حز بقلبي وحدة معي بالكورس اللغة كلما تسألها الانسة لوين حابة تسافري لو اتيحت لك الفرصة للسفر
دائما كانت بتحكي على ايطاليا , و انا اول مرة حكتها كنت مخططة و حاجزة و مخلصة اني روح ع البندقية
حسيت اني رح حس باحساس مو حلو لو حكيتلها انا رايحة ع ايطاليا و مبارح رجعت سألتها نفس السؤال
و رجعت حكت ع ايطاليا و سبحان الله كيف بس كمان حجزنا و خلصنا على ايطاليا بعطلة عيد البيض
انو شو هالصدفة ياربي .
و الي بيقهر من هالقصة انو الشي الي بدنا ياه كتير منعاني لنوصلو او ناخدو متل هي بتحب كتير تروح
على ايطاليا بس ما قدرت تروح و انا رح روح مرتين و صدقاَ مو محبةَ فيها بس لأنها كان الوجهة الانسب
من ناحية الجو و المادية
يعني اديه نفسي روح ع اليابان او البرازيل بس بالضبط رح يصير فيني متلها و بالمقابل رح شوف حدا
عم بروح عليهم كتير و هو بالاساس مانو فان كبير لهل البلدين
احلا شي تعلمتو باللغة هن ادوات الاقتران Konjunktionen
و بالاخص indem و كيف رح دخلها ع الجملة بتخلي مستوى اللغة يطلع من b1 لل c1 بكلمة
و هو استخداما بالاساس صعب يعني اول ما اخدتا و لما صارت الانسة تشرح عنها عنجد حسيت
بصعوبة باستخدامها ( مو قواعدياَ ) ولكن منطقياَ و كيف بتجي بمعناها الصح بالجملة هون كانت
الصعوبة
indem معناها بواسطة او من خلال
مثلاَ بدنا نقول :
يمكننا حماية البيئة من خلال تقليل القيادة
Man kann die Umwelt schützen , indem man weniger Auto fährt
طبعاَ لأنها اداة صلة رح تكون nebensatz و نيبين زاتس يعني ( المقطع التاني من الجملة بعد الفاصلة )
و هي قواعدياَ الفعل رح يروح لآخر الجملة
قواعدياَ هي سهلة , بس كيف اغمل جملة منطقية بإستخدامها هون الصعوبة لأني في كتير امثلة انطرحت
بالكوس باستخدامها و كانت خطأ بالرغم من انها قواعدياَ كانت صحيحة
ف صرت كتير استخدمها اثناء التقديمات الي بعملها مشان مخي ياخد عليها
-
تاني اداة اقتران حبيتها هي ال wegen طبعاً يمكن يستغربوا الي متعلمين اللغة الالمانية
انو ليه اخترت هيك اداة بس حبيتها لأنها باستخدم قواعد ( المضاف اليه Genativ )
بعدها مباشرةَ , و معروف بالالماني محدا بيستخدم المضاف اليه الا الفلهوي باللغة
حتى باللغة العامية قليل ليكون في مضاف اليه و هون منستخدموا بالدراسة الاكاديمية
اكتر شي
wegen معناها ( بسبب )
مثال :
لن أذهب اليوم الى النادي , بسبب سوء الطقس
Heute gehe ich nicht ins Fitnesssutio, wegen des schlechten Wetters
و احلا شي بالمضاف اليه كيف بتنضاف ال s للكلمة الي بعدها بحسها نغمة موسيقية
des هو ال التعريف الخاص بالمضاف اليه و بتنضاف اذا كانت ال التعريف مذكر او جماد
en هي نهاية الصفة الخاصة ب ال التعريف
s هي خاصة للمضاف اليه و بتنضاف اذا كانت ال التعريف مذكر او جماد
يعني كتير مرات مثلاَ بكون عندي اسم ( مؤنث ) و نفس الاسم الو مرادف بكون ( مذكر )
فبتقصد اني اتسخدم المذكر بالمضاف اليه مشان بحس هيك في نغمة موسيقية للحكي
ف صرت كتير حبها وهي بالاساس مستواها عالي باللغة و عطوني ياها كتير بكير لما كنت b1 بس
للأسف ماكنت اعرف استخدمها لأني ما كنت متقنة لقواعد المضاف اليه لسا
و كمان نفس الكلمة الها مرادف و كمان هي اداة مضاف اليه اسمها Aufgrund نفسها بالضبط
يعني بتشيلوا كلمة wegen و بتحطوها و نفس القواعد و انوجدت لحتى يكون في تنوع باللغة
و ما يصير في تكرار بالكلمات وقت الكتابة او الحكي
-
و اكتر قاعدة بحبا و بعرفا من زمان بس ما كنت بعرف طبقها صح
um ... zu
اما هي لا تعتبر اداة اقتران , هي عبارة عن وصف للجملة الرئيسية و بتجي بعد الفاصلة
و هي انا بشوف تطبيقها صعب لأن لازم يكون الفاعل موحد بالجملة الرئيسية و الثانوية لتتطبق مثلاَ :
أذهب إلى النادي كل يوم Ich gehe jeden Tag ins Fitnessstudio. انا احسن صحتي Ich verbessere meine Gesundheit
نفس الفاعل , الجملة بتصير :
اذهب الى النادي كل يوم لتحسين صحتي Ich gehe jeden Tag ins Fitnessstudio, um meine Gesundheit zu verbessern
مشان ما نعيد الفاعل مرتين ف منجمعهم مع بعض
إذا كان الفاعل في الجملة الرئيسية والفاعل في الجملة الثانوية متطابقين، يمكنك استخدام um .. zu
اذا ما كانوا متطابقين منقدر نستخدم اداة الاقتران damit بتجي بنفس المعنى
بس um .. zu بتكون انيقة اكتر
-
تاني قاعدة جديدة تعلمها و حبيتها لأنو نفسها بستخدما بالعربي وما كانت بعرف انو الها قاعدة خاصة بالالماني و هي
Brauchen ... zu
نحن بالعربي منحكي
انا ما بحتاج كل يوم اني اتسوق
بالالماني هيك بتصير
ich brauche jeden Tag nicht einzukaufen
ولأني فعل einkaufen فعل انفصالي kaufen + ein ف zu رح تكون بالنص
لما الفعل ما يكون انفصالي نفس فعل bekommen ف zu بتكون مفصولة عن الفعل zu bekoomen
و طبعاَ لازم لما نستخدم zu نرجع الفعل لمصدرو الاصلي بدون تصريف
و في شغلات كتيرة تعلمتن جديد ما تخليت انو اللغة الالمانية هيك حلوة
مبسوطة انو الشتي عنا خلص وانو درجات الحرارة بدت تعتدل
اكتر شي مبسوطة فيه انو ما عاد لازم البس جاكيت , ضاق خلقي فيه حرفيا !
اشتقت كون حرة طليقة بدون شي يربطني من برا
و كمان انو المانيا بتجننننننن لما يكون الجو معتدل بكون فيها
مليان انشطة الواحد يعملها غير لما بالشتي
و فوق هاد الي مبسوطة فيه , صرت لما اصحى ساعة 7 ماتكون الدنيا
ليل ! اذا ما بتعرفوا انو المانيا بالشتي الضو بيتأخر لطلع وكان
هالشي مسببلي اكتآب >< بس هلأ صارت تطلع الشمس مو بس الضو
مو مصدقة انو خلص الشتي مع انو بالعادة المانيا بتضل مشتية لشهر 4
و ماتلجت غير مرة , هي آثار الاحتباس الحراري الي انا متضايقة منو من
هالجهة ! لأن هاد معناه انو الارض مرضانة وهالشي مو منيح !
يالله اديه العمر مر بسرعة ! عنجد شي ما بيحمله عقل لا والله !
مرات بنسى عنجد انو كل سنة عم اكبر سنة و عم اتناسى اديه
صار عمري ! فلما كون ناسية و طاشة بهل الحياة و اذ بكون
فاتحة اليوتيوب و عم بسمع اغاني و فجأة من اغنية لأغنية
بيطلعولي اغاني من الجيل القديم , اغاني قدمها 10+ سنوات
اغاني بتذكرني لما كنت مراهقة , طاشة , ايام كنت مفكرة عندي
رفقات , حياة , ايام لما كان عم ينضحك علي و مفكرة اني عايشة
بالجنة , ييييي شو كانت تذكرني , ايام لما كنت مجنونة و ماهاممني
شي , عنجد كيف هيك اغنية بسيطة ترجعلي كل هالذكريات المدفونة !
شي منها حزين و شي سعيد ( بس سعيد طبعاَ وقتها لأن ماكنت شايفة
الصورة الكاملة )
كتير مرات والله بيجي ببالي امسح كل صور الذكريات الي مخبيتها بالفيس
بوك ! في صور من الامارات من 2008 مخبيتها بالفيس وحاطة خصوصية
ع الالبوم بس انا بشوفو و حاطتهم للذكرى , كون الانترنت اكتر مكان منيح
انو الواحد يحتفظ بشي لاطول فترة ممكنة !
كتير كان يجي ببالي اني امسحهم لأن الذكريات الي بتجي منهم بتعل القلب!
يعني صح ( كنت وقتها سعيدة ) بس كلما شوفهم بغم ع قلبي و بتذكر دائماَ
اديش كنت غبية و هبلة !
للامانة في منهم صور مجنونة و في منهم لما شوفهم بفرط ضحك , بس
شو ذنبي اذا انا بنت حلال , و العشرة مابتهون الا على ابن الحرام ؟
مو بإيدي هههههه حتى الذكريات ما بقدر خونها بس مع هيك الا ما يجي يوم
و امسح كل هالصور , لأن بالاساس انا قطعت علاقتي مع كل اصحاب الصور
ف ضلت الذكرى بس , رح امسحهم لما تجيني القوة لهل الشي !
بس حدا مصدق انو هالسنة رح يصير عمري 30 ! يااااه ليه هيك صار الرقم
كبير ! كنا 18 وما احلانا
طبعاَ انا ما عندي فوبيا العمر متل اغلب البنات , كتير حابة هالعمر كتير
مميز و احلا شي فيه انو انوثتي بتكمل فيه و فعلاَ حاسة فيها اكتر
من لما كنت بأوائل العشرينات !
هلأ منغمض عين منفتح عين و مابشوف حالي الا صرت بال 40
ما بعرف ليه ماعدت حب التصميم نفس قبل
هل بسبب فقدان المنتديات العربية ؟
ام عدم لمس شغف ( حقيقي ) عند المصممين
للإستلهام منهم ؟
انا متأكدة لو بديت تصميم قبل 2011 كنت رح اوصل لمراحل
فيه ! لأن كانت ذروتها بالمنتديات ! وكانوا في كتير مصممين
مبدعين وكانوا حرفياَ يلهموني اني دائماَ طور من اسلوب تصميمي
وهاد غير اني انا بعشق اني انفرد و اتميز بأي منتدى بشارك فيه
ففي منتدى شاركت فيه كان اسمو ( جوري قطر ) طبعاَ تسكر
و لحد هلأ متذكرة اسمو على قد ما كان فيه مصممين حرفياَ مبدعين !
و كنت حابة اتميز بهل المنتدى و كان كتييير بوقتها صعب علي اني
اتميز , لأن كان معتمد ع التصميم و انا كانت قدراتي التصميمية على قدها
يعني فينكم تحكوا كانت بأول بداياتي سنة 2011/2012
ولحد هلأ بتذكرلما تعلمت أول مرة كيف اعمل خلفية بباترن جانبي للموضوع
يعني يكون من المنتصف لون سادة و من على الجوانب باترن بكون ممسوح
بشكل كتير ناعم ببين كأنو سجادة اي اي هيك كان منتشر ستايل الخلفيات قبل
و من هالمنتدى تعلمت هالحركة لأنها كانت كتير منتشرة وقتها و طبعاَ المصمم الي
بطبقها وقتها كنت شوفو فنان و محترف
بعد ما تسكر جوري قطر سجلت بمنتدى بنات كولحتى بتذكر الدومين كان
cooolgirls.com طبعاَ هاد كمان تسكر
كان هالمنتدى حرفياَ من اكتر المنتديات الي اندمجت فيها و تفاعلت فيها لوقت طويل
من كتر المنتديات زمان كنت ما اثبت على منتدى و كنت ملولة بشكل و كنت حرفيا
متل ما بيحكوا بالانجليزي Picky
بس هاد المنتدى كانوا الاعضاء فيه كتيير لطفاء و طيوبين و من هالمنتدى فعلاَ تطورت
مهاراتي التصميمية بشكل فظيع بالرغم من انو كان منتدى ضخم حرفياَ و كان ملياااااان
اعضاء فيه و المصممين مستوياتهم مختلفة ف هالشي الي شجعني اني اتفاعل فيه
اني لاقي مصممين بنفس مستواي و ماحس اني خارج القطيع
اخد عضوية التصميم فيه و صرت لبي طلبات التصميم و كنت طايرة من الفرحة
طبعاَ صرت مشرفة ولأن الاشراف فيه كان صعب , كيف يعني صعب ؟ يعني مو بس
بثبت و بختم ردود لا كمان في متل تقرير اسبوعي لازم اكتبو بقسم المشرفين و طبعاَ
كل مشرف لازم يعمل هيك , و شفت هالشي ( بهداك الوقت ) انو صعب لأني باقي المنتديات
ما كانت بتطلب هالشي ف انسحبت
و لما تسكر كتير زعلت بصراحة لأنو فيه كتير ذكريات !
منتدى مجتمع شغب كان هالمنتدى مختص بالتصميم كان فيه اقسام منوعة بس كان
اختصاصو بالتصميم و كان بركز ع هالشي , طبعاَ المصممين الي فيه تعدوا مرحلة الابداع
بمراااااااااحل و الاحلى من هيك انو كل مصمم كان عندو لمسة خاصة فيه !
كان في مصمم لهلأ بتذكر الاسم المستعار الخاص فيه كان COLOR
و حرف الار كان بالمقلوب , كان هالمصمم حرفياَ الوحيد الي ابهرني من بين كل المصممين
مع انهم كلهم للأمانة مبدعين و محترفين التصميم بس هاد كان متقن فن بيشبه كتير فن
ال c4d
و فن الفرش مع بعض
بس انو كانوا بمستوى مختلف تماماَ , شي بعمري ما شفت متلو !
كان مثلا الختم المميز هنيك لازم 3 تصاميم مميزة و احترافية هو كان ينزل تصميم واحد
بس ينختم مميز من كتر ما تصميمو متعوب عليه و احترافي بشكل فظيع
كانت تصاميمو بحسها عشوائية من ناحية انتشار عناصر التصميم و الالوان بس لما
ضل اتطلع ع التصميم حس انو حلو بشكل غريب و صعب انو الواحد يركز بشو كان بحس
لما كان عم يصممو بتحسوا في تداخل بالمشاعر !
و لما كنت فكر انو اوصل لنفس المستوى الي هو فيه كان يجيني عجز بالتفكير حرفياَ
لأني بدي سنوات ضوئية لاول لربع مستواه
ومصمم تاني لهلأ بتذكر اسمو كان اسمو Funnylord
كان مشهور بتصاميم البليند ! حرفياَ كان ملكها !
هو الي عرفني لعالم البليند وكنت فكر انو البليند بس بكون دارك
لأن اغلب المصممين الي كانوا يستخدموا هالاسلوب كانوا يصمموا تصميم دارك
ف اول مرة شفت تصميم بليند لايت و كان لون الأبيض و الاوف وايت غالب
انبهرت حرفيا ! كان تصميم شبيه بالملاك ! كان كل شي فيه بيرفيكت !
الدمج ؟ اساساَ مستحيل تفرقوه عن الصورة الاصلية من كتر ما كان سموث
و احترافي ! و ناعم
كان عندو تصاميم كتيييييييرة بليند منها صغير و كبير و تواقيع و اكتر شي كنت انسحر
فيه هو التصاميم الكبيرة لأني دائماَ كنت شوفها صعب تنفيذ اي فكرة تصميم بحجم كبير
بس هو حتى ابدع من هالناحية !
و مرة نشر كمان المستلزمات الي بيستخدمها وقت البليند و حملت الملف واحتفظت فيه
بلابي القديم بس للأسف اللاب ودع بالي فيه !
و الي عجبني اكتر و اكتر فيه انو هو الي بيعمل تأثيرواتو بنفسو لأن البليند بيعتمد كتير ع التأثيرات
النهائية و بحس يعني ما بيكمل بدونهم ! و مرة نشرهم و صرت اتسخدمهم بتصاميمي كانت تأثيرات
جداَ حلوة !
ف يعني لو ترجع المنتديات الذهبية اكيد رح لاقي مليون سبب اني اتحمس و اندفع لاني اتعلم شغلات
جديدة و خاصةَ انو هلأ دراستي ما عاد الها علاقة بالتصميم ف اعتقد انو هالشي رح يخف بس اكيد ما رح افقدها
لأني بحاجة لهواية ابداعية و هواية حركية على الأقل وحدة و بما اني تركت الرسم للأبد مع اني كنت حبو بس
مسلتزماتو بتكسر الضهر خاصةَ هون بالمانيا و لو كنت محترفة بالرسم كنت مستعدة ادفع بقرة حجي حق هالمستلزمات
ف اي رح خلي التصميم جانبي بس اكيد مارح يكون نفس قبل لأني الالهامات الي كنت اخدها راحت للأسف
كانت @Yarrow
ملهمتي هون وكانت حرفياَ تدفعني اني اتعلم شغلات جديدة و مازالت طبعا
هالأغنية كانت ولا زالت من الاغاني المحببة لقلبي , قصتها غبية و غريبة و بتضحك ( بالنسبة لعمري هلأ و نضوجي )
قصتها اني لما كنت بالصف الثامن بالضبط بسنة 2008 كان في شخص دايما يلعبها و كنت معجبة فيه و هو ما بيعرف
ف حبيت هالأغنية كتير لأنو هو كان بحبها حتى كانت أول اغنية حاولت اني العب فيها كَ Freestyle يعني بإستخدام مساحة
اللعبة الكاملة ( الجهتين ) و كنت دائماَ لما شوف اشخاص يلعبوا بهل الستايل انصدم كيف بيقدروا يقروا الحركات ع الجتهين
و يتحركوا ( محتاجة تحرك كامل مو بس ثبات بنفس الجهة ) بس لأني جد كنت معجبة بهداك الشخص حاولت اطلع برا منطقة
الراحة تبعيتي و جرب العبها فري ستايل بالرغم من انو كان في اغاني غيرها الفريستايل تبعها اسهل و ابطىء بس اصريت
على هالأغنية
هاد هو الفريستايل
كان بالنسبة الي يعتبر صعب لأن كانت مليانة حركات انعكاسية ( متل دعسة فوق و دعسة تحت عكس بعض ) و هالشي
كان يخليني خربط كتير لحتى وصلت لمرحلة الاتقان
حتى كان مود ال Crazy تبعها صعب ( الموجود بالفديو الأول ) بس كلو اتقنتو بالتدريب و التكرار
حتى في مرة واحد رفيقي حكالي ليه بتضلي بتلعبي هالاغنية ؟ حكيتلو لأني بحبها
طبعاَ نهاية الشي كانت صادمة لأنو طلع هالشخص بحب اختي هالشي برغم من انو كان قديييم
بس لأنو كان اول اعجاب الي فما نسيتو
ملاحظة : معلومة ممكن تكون غير مهمة للبعض , بس الي غنت هالأغنية غنتها Som2 و هي بنت هولندية بعمر ال 14 سنة فقط !
متخيلين جمال صوتها و ادائها بالأغنية ؟
هي الأغنية كاملة
-
تاني اكتر أغنية كان محببة لقلبي بعد هالأفنية , هي معزوفة Passacaglia و كانت موجودة بالاصدار الجديد بس
ما كانت موجودة بالقديم يعني كانت نازلة جديد ولما سمعتها قلت هي هية
كنت العب هالمستوى S10
بعدين صرت العب S16 الي ع اليسار
و كنت دائماَ اعلق بآخر الأغنية لأن صارت متل المجنونة
- كانت دامئاَ عندي مشكلة بحركات الزوايا يعني بكونوا مثلاَ يمين فوق بعدين يمين تحت بشكل سريع
بتجي بعدها العكس فوق يسار بعدين تحت يسار بشكل سريع و هون لازم جسمي بتعدل بشكل جانبي للعبة
و هالشي ما كنت كتير سلسة فيه
في اغاني كانت اصعب من هي كملتهم لأنهم حركات أمامية مو جانبية بس اي أغنية فيها حركات جانبية
سريعة انا هون بكون مستواي ضعيف
-
تالت اكتر اغنية كنت حب العبها هي
( الي ع اليسار S15 هي الي كنت العبها اما الي ع اليمين S19 )
بالرغم من انو بالأخير فيها حركات جانبية بس ما بعرف لو لاحظتوا انها حركات نوعاَ ما متباعدة بالوقت
مو نفس الأغنية الي قبلها
هي الاغنية طبعاَ ما اتقنتها من اول مرة بس بالأخير ختمتها للأخير
حبيت كتير ال Best تبعها خاصة لو ادارة المول كانت رافعة صوت اللعبة عنجد بتجذب كتير مشاهدين
من البيت بس !
كمان هي من الأغاني الجداد الي نزلوا !
اكتر شي حبيتو بمؤسسين هاللعبة انهم بكل اصدار بنزلوه بعدلوا ع الاغاني و بضيفوا ريميسكات و اغاني جداد !
-
هالأغنية من الاغاني القديمة باللعبة بالاصدار القديم و كنت كتييييير حبها لأني شفت الفديو الأصلي تبع الاغنية الكامل
و حبيت كتير قصة الأغنية !!
و من كتر ما حبيتها جبت بمستوى S11 الي يعتبر Crazy علامة S و الي بتعني ولا خطأ !
( الي ع اليمين بالفديو )
هي هية الاغنية الاصلية و كتيييير حبيت قصتها ! بالرغم من اني مو فاهمة شو عم ينحكى بس الشعور وصل !
و كانت الغنية الكورية الوحيدة الي حبيتها من كل اغاني الكورية باللعبة !
-
و هي من اكتر الريميكسات الي كنت حب العبها ! تداخل الاغاني رهيب
ملاحظة : قسم الريميكس باللعبة هي عبارة عن اغاني منفصلة باللعبة يعني موجودين باللعبة عملوا منها قسم ريميكس
حركة حلوة من مؤسسين اللعبة ! و لأن قسم الريميكس بشكل عام اغانيه اطول من الاغنية العادية ف اعتبروها أغنيتين
من مجموع الاغاني ال 3 يعني اذا لعبت اغنية ريميكس بضل معي اغنية زيادة العبها اذا ما خسرت فيها
( الي ع اليمين )
و هي كانت من الأغاني الي كنت كتيييييير حب العبها كتير حبيتها البيت تبعها !
هي مود ال Crazy بالرغم من انو فيها كتير حركات جانبية بس مابعرف كيف بس كنت اتقنها
و بالأخير رح ورجيكم فديو كيف كنا ندخل شيفرة لحتى ينفتح عنا نظام اللعبة الكامل لأن لو ما فتحتوها
رح تضل مقفولة و تطلع بس الليفلات السهلة و مو كل الاغاني موجودة
كنت ابرع كتير بفتح الشيفرة هو عم يعملها بطيء للتعليم بس كنت اعملها بسرعة بطريقة كنت دور فيها
طبعاَ في شيفرات كتيرة باللعبة بتاخدوهم من موقع الرسمي للعبة متل شيفرة السرعة و مود اللعب مثلاَ اذا
بدكن من فوق الشريط تبع الحركات يختفي او تغيير اتجاه الخطوات ( هن الخطوات نفسها بس بيتغير اتجاهها
مثلاَ مود X بتصير الخطوات تطلع من الزاية بدل من النص و طبعاَ هاد اصعب مود هاد يعني لازم نكون حافظين
الحركات مزبوط او مود ال مخفي Vanish و هاد بخلي الحركات كلها تختفي ولازم نتذكر تسلسل الحركات و هاد
لسا اصعب من ال X لأن بالاساس مافي حركات لتنشاف و صدقوا او لا كانوا في شباب يلعبوا بهل المود
ببعض الاغاني و ماشاء الله كانوا حافظين الحركات صم !
مود المرآة ( الي هو يختفي شريط الحركات من فوق ) و هاد يعتبر سهل بالنسبة للأشخاص الي بيعرفوا يزامنو ضغطة الحركة
بالوقت و كنت استخدمها كتير : Middle, Middle, DownLeft, Middle, UpRight, DownRight, Middle, UpLeft
اذا بدكم تكنسوا كل الشيفرات الي دخلتوها : يسار فوق يمين فوق 3 مرات
اما مود الاكس كان من اصعب الشيفرات و بلخبط بس لما نفهم التسلسل رح نعرف ان الشيفرة اخدت على شكل اكس :
يسار تحت يمين فوق مرتين بعدين يمين تحت يسار فوق مرتين و اخير شي منضفط بالنص ( اخدة شكل اكس )
كنت سويها بهل الاغنية
طبعاَ بحكيلكم كنت شبه حافظة حركات الاغنية ( مشان هيك ما حطيتها مود المخفي تماماَ )
-
هاللعبة من أجمل الألعاب عندي , في الها كذا فائدة صحية اهمها تنشيط الذاكرة و تدريب العين انها تلقط الحركات بشكل أسرع
و للجسم كمان
و في مود جديد نزل عليها حسيتو غبي و غريب بنفس الوقت قال حاطين معادلات رياضية و الاجوبة عبارة عن حركات
ف لو الجواب صح اعتبرت الحركة صحيحة و في وقت طبعاَ لازن نحلها بسرعة
في مودات كتيرة فيها مثلاَ بيقدروا كحد اقصى 4 اشخاص يلعبوا بنفس الأغنية ( هن بيختاروا عدد الأشخاص ) ولما تبدأ اللعبة
بتطلع الحركات ع شكل الوان ( حسب العدد الي اخترناه لو اخترنا مثلاً 4 اشخاص رح يطلعوا 4 الوان ) و لازم كل شخص يمسك
لون واحد و يركز فيه و يلعبو بس هو و عاد هون الضحك مرة لعبتها مع رفقاتي 4 اشخاص بدبي مول و الله فرطت ضحك
ما كل واحد مركز بلون ف مننسى انو جمبنا حدا ف لا ارادي صرنا نضرب ببعض بالخطأ عنجد صعبة بس الضحك فيها مو طبيعي
بتتذكروا هاللعبة الي حكيت عنها و حكيت انها مو موجودة بالمانيا ؟
عاد الخبر الحلو اني عرفت بالصدفة انها موجودة ببرلين !
مو مصدقة بربي !
بس المشكلة انو برلين بعيدة عني معقول اضرب خط لهنيك بس مشان العب عليها !
بس ارتحت لما عرفت انها موجودة بالمانيا لا و الاصدار جديد مو قديم هالشي فرحني اكتر !
و الاحلى من هيك انو في مجموعة صغيرة من لاعبين هاللعبة بالمانيا عاملين قروب
عنجد ذكروني بأيام زمان
بروفيسور يشرح لطلّابه عن التسويق عبر إعطائهم أمثلة طريفة من الواقع :
1- رأيتَ فتاةً جميلة في حفلة فذهبت إليها وقلت: "أنا ثري، تزوّجيني" هذا هو التّسويق المباشر (direct marketing).
2- رأيتَ فتاةً جميلةً في حفلة فذهب إليها أحد أصدقائك فأشار إليك وقال لها: "إنّه ثري، تزوجيه" هذا هو الإعلان (advertising).
3- جائت إليك فتاة جميلة وقالت: "أنت ثريٌّ، تزوّجني!" هذه هي معرفة العلامة التجارية(brand recognition).
4- قلتَ لها "أنا ثري، تزوجيني" فصفعتك على وجهك، هذا هو رأي الزّبون (costumer feedback)
5- ذهبتَ إليها وقبل أن تقول شيئاً جاء شخص آخر وقال "انا ثري تزوجيني" هذه هي المنافسة (competition)
6- عرضتَ عليها الزواج فعرّفتكَ على زوجها، هذه هي الفجوة بين العرض والطّلب (suply and demand gap).
7- ذهبتَ إليها وقبل أن تقول شيئاً جاءت زوجتُك ... هذه هي القيود التي تمنعك من دخول أسواقٍ جديدة
يخربيت شركة ابل اديشها تسويقياَ ذكية !
بدي اشتري ساعة ابل 7 كان حقها 425 و ساعة ابل اصدار 9 حقها 475 !
يعني حرفياَ الفرق 50 يورو بس !
بس لما ندخل بموضوع التقسيط و الحبشتكلات التانية وقف سعر اصدار 9 فوق ال 500 يورو !
بينما اصدار 7 ضلت تحت ال 500 !
طبعاَ المضحك بالموضوع انو الواحد ما بفكر بهل الشي ابداَ لأن اول ما يوصل للدفع و يشوف
فارق السعر كبر بقول عادي ما انا شتريت اصدار 9 !
حرفياً تسويقهم غريب! و فعال بشكل غريب كمان ! بس حالياَ شتريت اصدار 7 ب 425
و الغريب اكتر , مع انو نزل اصدارين بعد 7 و مع هيك بعدها غالية ! طبعاَ انا عندي الريدي
اصدار 7 وصدقاَ ما توقعت انو سعرها يثبت هيك ! لهلأ بلاقي ساعات اصدار 7 حقها 700 و طالع
بستغرب انو اذا 7 هيك كيف 8 ولا 9
بس اخر شي بدي احكيه , اني لما شتريت اصدار السابع ما توقعت ابداَ يكون فيها مميزات كتيرة
لدرجة انو شركة ابل نزلت من هالمميزات مشان ترخص من الساعة و عم احكي هون عن اصدار
SE ! يعني ما تخيلت انو بساعتي فيها كل هالمميزات ! و انا شتريتها ع العمياني انو ساعة فخمة
و كبيرة و اهم شي بتقيس السعرات الحرارية ! و كان فيني بالمقابل رخص على الاقل 150 يورو
من حقها بإني شيل منها مميزات انا مو بحاجتها نفس قياس ضغط الدم و نسبة الاوكسجين
انا لهلأ بقول لشو بتستخدم هي ؟
بس صدقاَ اتركوا كل شي ع جنب , ميزة وحدة انفقدت باصدار ال SE و الي هو انو الساعة بتطفي
تماماَ لما نشيل عيوننا عليها عكس اصدار ال SERIES مابتطفي تماماَ بس انو الطاقة بتنخفض لدرجة
ببين الثيم بس بتختفي الارقام مثلاَ , هالشي كتير كتير كتير حبيتو بساعتي و معطيها عنجد لمسة حلوة
مشان هالميزة بس مستعدة ادفع 150 لا 200 يورو زيادة عليها بصراحة, لأن تخيلوا انو لكل ثيم شكلين
شكل لما نطلع ع الساعة و شكل مخفض الطاقة لما ننزل الساعة من وشنا و هالشي كتير حبيتو
و سمعت بالفديوات الي ع اليوتيوب انو اصدار SE الحركة بين التطبيقات و اي شي بدنا نعملو فيها
ابطىء تقريبياَ من اصدارات SERIES عم احكي عن حركة ال smooth بين اعدادات الساعة والتطبيقات
متخيلين انو الساعة رح تكمل عندي سنتين و انا هلأ يالله لفضيت اقرا عن المواصفات
اليوم شفت اعلان انو رح يفتح مهرجان مشهور بمنطقتي اسمو Duld
هالمهرجان كتير حلو و بيفتح مرتين بالسنة بكون في العاب و شغلات
نشربها و ناكلها وهيك , و حسيت انو هاد وقتو لأنو الجو عنا تحسن كتير
لا قصدي مو بس تحسن لا صار صيف بالرغم من انو نحن مو بالصيف لسا !
وكمان بكرا رح بلش اول يوم دوام بعد اجازة اسبوع , و بالضبط من بكرا
رح يكون في 4 اسابيع للكورس و بعدها اسبوع اجازة و بعدها الامتحان
بصراحة اول مرة بخاف للامتحان , بالعادة كنت لما قدم الامتحان كنت احكي
ظز و ماكنت اخدو على محمل الجد او ادرس قبل بيوم او يومين بس هالمرة
مابعرف ليه بس حاسة انو اخدتو كتير جدي و عم ادرس و مستغربة من حالي !
و حاسة خلفيات الكورسات السابقة كتير ساعدتني بهل المرحلة ! انو هالامتحان
من اصعب الامتحانات و حكوا انو بس 30% من الناس الي بقدموه بينجحوا فيه
بس الحمد الله ملمة بكل جوانب الامتحان , الي علي هو بس ممارستهم يومياَ
لحتى ما تقل جودتهم عندي , لازم اسمع راديو كل يوم ( هالشي الوحيد الكريه
بالنسبة الي لأن حرفياَ مابحب اسمع الماني بشكل عام ) بس لازم و اني اقرا
مقالات المانية ( هالشي بحبو و بفهمو حتى عم فكر اختار قصة المانية و اقراها )
يعني هيك , و كان اكبر خوف الي هو الحكي لأني و الشي الي الاغلب رح يشوفو
غريب فيني اني قليلة الحكي بالحياة الواقعية ! حتى باللغة العربية
فما بالكم بلغة عم اتعلمها جديد ! ف قبل كان بمخي قواعد المانية مابتاكلا
النيران , كلها فاهمتها و اذا حدا سألني ليه هي هيك بجاوبو صح قواعدياَ بس
للأسف الحكي كان عندي مصيبة كنت قبل فكر لحتى احكي لازم فكر بالجملة
مليون مرة لحتى تطلع صح بس اكتشفت هلأ مو مهم احكيا صح المهم احكي الماني
بطريقة يفهما الي قدامي بسرعة حتى لو ما كانت 100% مع التكرار بتجنب هالخطأ
و هلأ حرفياَ وصلت لمرحلة احكي الماني و ما اسكت خاصةَ مع خطيبة اخي كونها
المانية ! و كانت تصححلي كمان و هالشي الي بحبو فيها .
ف ما عاد عندي هاد الرهاب من الحكي بالالماني , لا و فهمي للي قدامي صار اقوا
من قبل , قبل كان لما حدا يحكي معي الماني , لازم خليه يعيد الجملة كذا مرة لأستوعبا
هلأ من اول مرة القطا فريرة ! و الله بغض النظر عن الكورس و الامتحان
انا كتير مبسوطة اني بلشت احكي نفس الخلق و احتك بالعالم , و خطيبة اخي الي
كنت فكرا مملة , اتضح انها مو مملة بس ما كان في لغة تواصل بيننا , و هي كتير
حبابة و حرفياَ انا و هي ما كنا نسكت و هي مبسوطة مني انو المانيتي كتير تحسنت
حكتلي قبل ما كنتي تقدري تكملي حديث كامل معي ( كنت استعصي بشغلات )
هلأ حكتلي بتقدر تناقشي و تاخدي و تعطي و انا طرررررررررت فرحة لما حكتلي هيك
انو هالحكي من حدا الماني !!!!!!!!!!!
ف فوبيا اكتر شي كنت خاف منو راح الباقي كلو مقدور عليه , لأطلع مستوى عن
المستوى الي انا فيه و الايام جاية
-
المهم انو الدنيا صيف عنا , متخيلين انو بشهر 4 و درجة الحرارة 25 ؟
هالشي مو منيح و رح ضل عيد و افتق مو منيييييييح
انا زعلانة ع الكرة الارضية الي عم يصير فيها !
شهر 4 المفروض يكون برد الحرارة ما تتعدا 10 مو تكون صيف !
رسمياَ الحشيش صار قانوني بالمانيا
متخيلين شو يعني ؟ دولة معباية قوانين بكل درخوشة حاطين قانون
لدرجة ماعندهم شي اسمو مشاعر ما مشاعر القانون قانون
انت كسرتو ؟ تعا لنسلخك سلخ
كانوا كتير مشددين على الحشيش متخيلين انها تفتح هالفتحة ؟
لدرجة كان اي شخص بدو يحشش كان يروح هولندا لانو مسموح هنيك
و ببيعوا بكل مكان و حتى عندهم مزارع و كبيييرة و بتاجروا فيها كأنها
بقدونس ههههههههههههههههههههههههههههههههههههههههههه
لا و كمان سمحوا بالحمل الشخصي و بالبيت لحد ال 3 نبتات
و رح يصير في محلات تعمل كيك فيه حشيش و حلويات
يعني كنا ندقق بالشوكولا ما نكون جبناها فيها كحول بالخطأ
هلأ صار بدنا ندقق اذا فيها حشيش
لا تفكروا مبسوطة ع هالقانون انا ما بطيقو و مابطيق ريحتو
لما شم ريحتو بالشارع بفطس من ريحة القرف و مو مصدقة انو رح
يصير قانوني و صير شم ريحتو بكل مكان
و كلو كوم و انهم كيف رح يعملوا كنترول على الي بحششوا و بسوقوا كوم تاني
كانوا للي بيشربوا مسموح 1 بيرة بس الحشيش كيف رح يضبطوه بالدم ؟
الدنيا صارت سخيفة مو طبيعي ياربي
ما بعرف المانيا لوين رايحة
اليوم تناقشنا فيها بالكورس و الانسة مو عاجبها الموضوع و قالت انو مسخرة
لأنو قالت على اساس في قوانين بتحد و بتضبط بس قالت كلها مسخرة و صارت
تضحك , انو كيف رح يضبطوا اكتر من 3 نبتات بالبيت ؟ الشرطة رح تدخل
البيت كيف رح تعرف انها 3 مو 4 ممكن 1 و فاصلها و قال انو في قانون
انو ممنوع اي حدا يحشش جمب المدارس و الحدائق مسابقة 100 متر انو
قالت كيف رح ينضبطوا هدول الي بحششوا بأقل من هالمسافة ؟ كلها عنجد
حكي فاضي و مسخرة المس ما حكت هيك عن غباء عنجد لما الواحد يفكر
فيها بشوف انها قوانين منظر مشان الشعب الفهمان يسكت !
.gif "At (136) ه2")
.gif "At (138) ه1")
.gif "At (209) ش2")
.gif "at1 ق1")
.gif "At (110) :(")
!
.png "At (39) ش1")
.gif "At (208) ض0")
)
.png "ne (1) هه4")
.gif "At (104) م1")
!
