مدونة راقية في مٌحادثة عميقة مع " الفوضى _ (2 زائر)

[Selene]

فعالية شهر اغسطس

"لكلٍّ منّا أشياء صغيرة نُخبئها لأننا نحبها، لا لقيمتها، بل لما تمثّله.
اكتب عن غرض تحتفظ به: هدية، ورقة، قِطعة قديمة… وشارك القصة وراءه، وما الذي يجعله عزيزًا عليك."
​

كون اني بحب احتفظ بأشياء لمعنويتها مو لقيمتها حسيت هالفعالية انكتبت الي
من و انا و صغيرة بحب احتفظ بأشياء اخواتي بشوفوها ( خردة )

بس كل قطعة حرفياَ بتحمل كومة ذكريات, ضحكات و حتى دموع

كان عندي صندوق لما كنت بالامارات و للأسف ما قدرت طلعو معي ع المانيا كلما كنت متضايقة كنت افتحو و كل مرة كان يغيرلي نفسيتي
ع قد ما كان يحمل ذكريات حلوة

من الأغراض الي كانت فيه , ملف لما كنت بالصف السادس , لما كنت بالمدرسة , ( مدرسة الشغلة ) كان عنا تقليد كل سنة الانسات يوزعوا
علينا اخر كل سنة ملف فيه كل امتحاناتنا الي امتحناها خلال السنة مشان ندرس الاسئءلة و نتعلم من اخطائنا قبل الامتحانات النهائية

ف كنا نشيل اوراق الامتحانات و نخليهم بالبيت و نجي بالملف هاد, كان ورقي يعني بينكتب عليه , فكان لازم كل وحدة مننا كل زملائها بالصف
و ملعلماتها يكتبوا ع الملف كذكرى

وصلت معي اني احتفظ بالملف 12 سنة و الملف اهترى و بعض الكتابات مٌحت بمرور الوقت , بس كان في بعض منها باق
و كلما اقرى اتذكر شي كيف الايام مرت بسرعة , شي اديه كنت مبسوطة و شي كيف الكلام كان ع قد تفكيرنا يعني متل كانوا يكتبوا

اكتب لكي بالمقلوب ليدوم حبنا في القلوب هههههههههههههههههههههههه

تخيلوا تقرا هالشي بعد 12 سنة و فرق التفكير كيف

-

الصور المدرسية الجماعية عندي ياهم تقريباَ 7 سنين دراسية اي 7 صور جماعية اخر 7 سنين بالمدرسة صرت اهتم بالذكرى

و حتى كان عندي دفتر ذكريات اذا بتتذكروا ايام دفاتر الذكريات , حط فيه ستكرات و رتبو و ما خليت حدا الا و يكتب فيه

يالله , اخر مرة شفتو قبل لا اجي المانيا كان حرفياَ مهتري و الورق من كتر ما هو عتيق صاير تقيييل و على اي حركة بتنشق

-

كان عندي ما يقارب 17 تذكرة سنما لحضوري افلام هاري بوتر , الجزء الخامس لحالو عندي 7 تذاكر الو
ايامها كنت مدمنة افلام هاري بوتر لدرجة مو بس حذرتو بالسنما مليون مرة لا و اشتريت سلسلة الافلام كاملة DVD
و مع اني ما بحب القراءة كنت عم فكر جيب سلسلة الكتب كاملة كديكور بغرفتي هههههههههههه

هلأ ما بطيقو , اعتقد على كتر ما حبيتو هلأ ما صار اقل من عادي , اختلاف اهتمامات ؟

-

بطاقات الالعاب كنت محتفظة فيهم , لما ندخل مول و بدنا نلعب لازم نشتري كرت العاب ففي بعض الكروت انتهت مدتها
كون بنزلوا كروت جديدة و لازم نجدد ف كنت احتفظ بالقديمة , وبكون عليها خطوط و خدوش و كروت من مختلف المولات
منهم صحارى , دبي و ميغا مول هههههههههههههههههه

هالذكريات و الله لا تقدر بثمن

و للاسف كلها راحت بس ضلت بقلبي

هلأ عملت صندوق جديد لذكريات جديدة لحياة جديدة من اول ما اجيت المانيا , و اكترها من الشخص الي بحبو
احتفظت بورقنا لما لعبنا حرف اسم جماد بلاد و بتذكر الضحك و الهبل الي صار

ذكرياتنا لما كنا نسافر , تذاكر السفر , تذاكر القطارات بالبلد الي رحنا عليها, حتى لما كان يجبلي سوارة ما كنت البسا كنت خبيها بالصندوق

كرت عرس اخي و الضيافة الي وزعوها بالعرس محتفظة فيها كذكرى

بيوم خطبتي , عملت تسريحة شعر و حطيت ورد ع شعري , ورد طبيعي , حتى هي نشفتهم و اختفظت فيهم

حتى باقة الورد لما اجا خطيبي مع امو بيوم الطليبة اخدت كم وردة من الباقة و نشفتهم و احتفظت فيهم

مع انو كل هاد ولاشي , المادة ولا شي قدام الي بالقلب . الي بالقلب اكتر بكتيييير

ممكن كل هالاشياء تروح , تضيع , تنحرق حتى تنكب , بس مكانها بالقلب

تعلمت من اول صندوق كان عندي لما راح , والله بكيييت بكيييت من قلبي , ما بكيت على الي فيه قد ما بكيت على معنوية الاشياء الي كانت فيه

و جمعتهم على سنواااات فوق ال 18 سنة والله . كان عندي دبدوب فيه عطاني ياه اول حب بحياتي ( ع اساس ) لما كان عمري 14 متخيلين 14 و انا عمري هلأ 30

كان في سوارة هداني ياها واحد صديق , و للأسف بعد معرفتي الو بشهر توفى بحادث , و احتفظت بهل السوارة و كلما افتح الصندوق شوفا اتذكرو و اترحم عليه هالقصة من 2016

بعد وقت طويل فهمت , ان الاشياء المادية ما مهمة قد ما مهم الي بالقلب , لان لما يكون الشي غالي و عزيز مارح يتنسى و الدليل و انا عم احكيلكم عنها
كأنها قدامي هلأ

شغلات هبلة كانت , و اساساَ بعض منها كوني مخطوبة هلأ المفروض كانت تنكب بس حسيت صار مربوطة مو بالحب الاول بل بالوقت الزمني حينها
لما كنت غبية و هبلة و كيف كانت اكبر همومي اشتري من محل clairs كوني كنت شوفو غالي ههههههههه

 

[Selene]

-





الفنان الوحيد الي بكيت على موتو الوحيييد هو زياد الرحباني
الي بضحك اني ما كنت بعرفو قبل لا يموت

تعرفت عليه بعد ما مات بسبب كمية البوستات الي كانت عليه

والله بكيت حرقة من قلبي لان لمس شي فيني

كان " انسان "

حسيتو كتير قريب مني , واعتقد مو بس مني , من كتير ناس لأن اكيد لمس شي فيهم

توقعتو مجرد ملحن سخيف , متعجرف متلو متل غيرو , طلع لا

فيلسوووف و كان صريح كتير

كان عندو كتير مقابلات ما شفت متلا

ما عم ضخم موضوعو , بس كان يحكي الواقع

واقع كتير ناس , كان يحكي عن معاناة كتير ناس

كتير من تسجيلات صوتو كانت تلمس شي فيني

و ابكي اكتر , و اعتقد مو عليه شخصياَ , كيف ابكي ع حدا ما بعرفو ؟
كنت ابكي لان ذكرني بشي .

لما عرفت قصص بعض الاغاني الي لحنها بكيت اكتر

وما بعرف ليه تخيلت امي ؟

دائماَ لما اسمع صوت فيروز اساساَ بتجي امي ببالي على قد ما بتحبا

و كنت اكره فيروز , او بالاحرى ما كنت اكرها بس كنت اتجنب سماع غانيها

لان مرة من المرات كنت مشغلة اغنية ( يا جبل البعيد ) وماما كانت جمبي

سمعتا وما شفتا غير بكت , بكت بكيي , استغربت ليه ؟ سألتا . . شو فيكي ؟

سويت شي خطأ ؟ وما كانت تحكي وما كانت تحكي

والله والله لليوم عندي تساؤل , ليه بكت عليها ؟

من وقتها بكره فيروز , لانها بكت امي , و بعرف هي مو السبب , بس مابعرف صارت مربوطة هالذكرى بفيروز .
بس انا ما كنت بكرها بالمعنى الحرفي, ففنها جميل بس كنت اتجنب سماعها
لأن صوتها كان مربوط بهل الذكرى

بس بعد ما مات زياد الرحباني , انا حبيت فيروز اكتر لعدة اسباب , لحنيتها على ابنها , لما عرفت قصة اغنية كيفك انت ؟

تغير نظرتي لفيروز , بس بعدني ما رح اسمعلها , لأن ما زال صوتها مربوط بهل الذكرى بس قدرتها اكتر

-

وكان عندي تساؤل

ليه مات فقير ؟ بالرغم من انو لقبوه بالظاهرة على الفن الراقي الي قدمو
توقعت انو غني كونو انولد بعيلة فنية عريقة !

المحزن ان كل فنان بصير اكتر قيمة بعد موتو
قبل ما يموت لا حدا نشر عن فنو ولا عن اعمالو

حتى عانى من الفقر

من اشهر اقوالو والي ما قدرت انساها :

انا مو كافر
بس الجوع كافر
الفقر كافر
المرض كافر
شو بدي اعمل اذا كل صفات الكافر فيي !

يالله هالحكي شو عميق ! و ما بستبعد انو كتب هالحكي لما كان مريض و فقير !

و متلو كتييير من الفنانين الي الناس عرفت قيمتن بعد ما ماتوا
هلأ اعمال زياد الرحباني رح تصير كقيمة سوقية اغلى من لما كان عايش

ما بستبعد

اكتر مثال متل دوستويفسكي
متل فان جوخ
واقع محزن فعلاَ
نشوف هيك مواهب تدفن و هن عايشين ولا بيستفيدو من فنهم ولما يموتوا بصير حقهم غاالي

واقع محزن ..

 

[Selene]

-





ماعرفت وين فضفض حزني


اليوم بالصدفة عرفت انو في زميلة معنا بالشغل توفت بحادث سيارة

زعلت كتير بالرغم ان هالزميلة ما عرفتها من زمان و حكيت
معها مرة بس حكي طويل و تبادلنا اهتماماتنا

كانت بتحب القراءة كتير و شجعتني كتير اني اقرأ

اسلوبها كان كلو حياة بخليني غصب عني حبها

نصحتني برواية والله العظيم ان ذاكرتي يادوب مساعدتني مانسيت اسمها و رح جيب النسخة الاصلية احتفظ فيها كذكرى منها ، بالرغم والله العظيم ما عرفتها كم يوم بس

هالكتاب هي حكتلي انو بتعشقو وضلت تحكي عنو كأنها ربحت شي جائزة كبيرة وكيف كانوا عيونها يوسعوا من الحماس وهي عم تشرحلي. انو عطيتها مساحة تشرحلي ليه هي بتحبو

البنت عمرا ٢٣ سنة والله ما عاشت حياتا

احساس غريب اجاني اول مرة بحس فيه

حزن على استغراب اديه الحياة قصيرة بشكل سخيييف

والله حزنت عليها من قلبي من جوا

الله يعين اهلها والله خسارة بنوتة بهل العمر مو سهلة

ياريت لو كانت مسلمة لحتى اقدر احكيلها الله يرحمك

رسالة :

شوفوا
حسوا
و تعلموا

انا اخدت من شوي صفعة ع وجهي
لحتى الدنيا تعلمني و بدي كمان تتعلموا كمان

كيف الدنيا بلحظة بتنتهي

صرت فكر كتير بيني وبين حالي
ما بستغرب دوري يكون الجاي والله واعلم كيف رح تكون موتتي

مو نفسية او دراما، بس كتير صار يجيني هيك تفكير
بعد هالقصة

الموت مابيعرف عمر

البنت مبارح كانت محكيتني اليوم هي تحت التراب

ليه لحتى خاف اخطو اي خطوة ؟
او احكي اي كلمة ؟
او ادرس اي تخصص ؟
او اختار اي شي بحبو ؟

يمكن بكرا موت وما عشت حياتي متل ما بدي

مشان هيك رح عيش حياتي كأن اليوم اخر يوم الي

لروحك السلام ميكايلا

ادعولها

 

[Selene]

-




انا هي اول مرة بعمري بشتري لبس جم جديد كامل و كلو سويت بانتس !! انو غيرت كل ستايلي بالجم للأولد سكول

حتى عم فكر بيع كل لبسي القديم لأن صرلي شهور ما لبستو حتى قبل ما اشتري لبس الجديد

-

طبعاَ الكل بيعرف اديه بعشق ماركة جم شارك , كتبت تدوينة كاملة عليها بأول مدونتي

ف طبعاَ جبت كل لبستي منها مع انو حقها كلية ونص بس يلا للعمر و كمان انا صرت اشتغل فصار عندي شوي سيولة اكتر عن قبل

قلت دلل حالي

بس جد يا بنات , اول شرية من بعد اول شغل عنجد بتحكوا ببالكن يا محلا الشغل صح في كرف و ضغط مرات
بس لما يجي ال pay day بتنسوا كل هالتعب

رح ورجيكن شو شتريت و رأيي بدون مجاملة و لنك كل قطعة لو وحدة حبت تجيب

-




هي البجامة اقل ما احكي عنها انها خييييييييييييييياااااااااااااااااااااااااااالللللللللللللللللللللللللللل
والله بعمري انا لبست كتييير بجامات بس متل هي ما شفت ! ناااعمة بشكل فظيييع حتى من برا
من برا هي قطن بس قطن ناعم مو الخشن و من جوا فرو نااااعم جبت الجاكيت و البنطلون من نفس هاللون كطقم

الحلو فيها انو حاطين لوقو الماركة ع معصم الايد هي اول مرة بشوف هيك حركة و البنطلون حاطين لوقو الماركة
ع رجل اليسار من ورا اخر البنطلون

اللون كتير ناعم , لبقت عليها بلوزة لما تنزلوا تحت رح تشوفوها

سعرها ما يقارب ال 80 يورو بس والله بتستاهل كل فلس هاد غير انها مصممة للتمرين
اول شي والله ترددت جيبا 80 حق بجامة غااالية كتير بس شفتو شو بيعمل اول راتب

تقييمي مليون من عشرة

لنك الجاكيت : Gymshark GSLC Graphic Zip Up Hoodie - Soft White
لنك البنطلون : Gymshark GSLC Lifting Club Cuffed Joggers - Soft White




هي البجامة ظلمتا للامانة اول ما جبتا , اول شي هي كانت بالتنزيلات ف جبتا بسعر كتير رخيص مشان هيك اخترت الرمادي
انا ما بحب هاللون عليي ما بعرف بحسو بكبرني كتير و بيبهت لون بشرتي بس بصراحة لما لبستو مع شوز ابيض و تيشيرت ابيض نفض اللون

اول ما لبست البنطلون حسيتو مبهبط هيك وسيع كتير من النص , هن كاتبين ستايلو اوفر سايز بس ما توقعت يطلع
علي متل كيس البطاطا

كنت رح رجع هالبجامة لحتى ما عطيت فرصة للبنطلون, طلع بدو وقت لحتى يرتاح القماش ليلبس الجسم
لان كان مجعلك من التوصيل , و طلع عنجد حلو مو ضيق ع الجسم هيك نص نص وسيع و الحلو فيه قصتو من ورا
هاد الخط المايل من فوق اذا انتبهتوا عليه كتير حبيتو و الجاكيت مكان كتابة اسم الماركة كتير حلو

القماشة مو نفس الاولى اخف بس كمان قطن و دافية و من جوا مو فرو

تقييمي 8 من 10 للون بس

لنك الجاكيت : Gymshark Power Hoodie - Silver Grey
لنك البنطلون : Gymshark Gymshark Power Joggers - Silver Grey




عاد هاد البنطلون صدمني للأمانة , كنت جايبتو لانو ع التخفيضات لان جبت الريدي بجامة رمادية الي فوق
بس الي صدمني قماشتو ! تقيلة و ناااعمة

كنت رح رجعو بس مشان الجودة الممتازة خليتو

هاد نفس البجامة الاولى من جوا في فرو و من برا ناعمة بس الفرق انو هاد ستايلو شادد شوي مو اوفر سايز
مع انو كاتبين اوفر سايز ستايلو بس يمكن لان القماشة تقيلة مبين اشدد

تقييمي مليون من 10

اللنك : Gymshark Lifting Essentials Graphic Brushed Oversized Joggers - Light Grey Core Marl

و لو ما جبت البجامة الكريمية كنت جبت لون الكريمي منو بس شسفالة اشتري من كل لون بنطلونين
بكفي الرمادي





الششي الوحيد الي ما حبيتو انو اسم الماركة كاتبينو بالاسود
ياخي بحب اسم الماركة يبين مو مشان الماركة نفسا بس لانو اسما حلو

القماشة كتير كتير تقيلة هاد يمكن يضل عندي 10 سنين لقدام من متانة قماشتو ههههههههههه
صح الحلو فيه هاد و الرمادي الي مكتوب بالاحمر و اول بجامة انن ماعندن متل هاد الخيط الي بضيق البنطلون
هاد حلو للبلوز لان الخيط ببين تحت البلوزة انو في شي منفوخ

تقييمي 8 من عشرة بس مشان اللوقو بلون الاسود

اللنك : Gymshark Campus Classics Graphic Joggers - Black




هي البلوزة لبقتا ع اول بجامة و للأمانة عنجد حظي حلو لان هي طلع عليها تخفيض و الوحيدة من بين الوانها هي بس
جبتها و قياس ميديم لان اللارج كان رايح قلت لو ما اجت برجعا بس سبحاااان الله الرزقة لما تجيك بتكون بس الك

انو البلوزة لبستي لبس بالضبط يعني مو ضيقة , فلفي ( يعني مهفهفة نفس المودل ) و كتييييييييييير طلعت حلوة ع اول بجامة
لان مكتوبة بنفس لون هالبلوزة

و مرييييحة بشكل لا يصدق

تقييمي مليون من عشرة

اللنك : https://de.gymshark.com/products/gymshark-everyday-seamless-t-shirt-burgundy-brown-ss24





^ هدول نفس الستايل بس غير لون , قصتن اني جبت الخضرة قبل بطلبية لان عليها تخفيض
ما جبت غير الوان منها لان الوحدة ب 25 يورو قلت مستحيل جيب بلوزة رياضة بهيك سعر
هي كان سعرا 12 و نص , لما جبتا وياريت لو ما جبتها

انشليييت من قماشتها الرهيبة و المريحة , كتير تقيلة بالنسبة لبلوزة جم و بتبرز تفصايل الجسم بشكل حلو خاصةَ العضل
يعني لو جسمك ماحلو غصباَ عنو رح يطلع حلو بهل البلوزة

قمت شو ؟ جبت الابيض و الاسود ( ما حطيتو بالصور ) و كل وحدة 25
مشان هيك ياريت لو ما جبتا

قلت يلا بتضاين و بدي بلوزة بيضة و سودا على الاقل للجم

و للامانة عنجد هالبلوزة خطيييييرة سعرا فيا مصدومة من جودتها !!!

هي ملييوووون من 10

اللنك لكل الالوان : Gymshark Training Baby Tee - Celeste Blue




هي البلوزة ستايلا كتيييير خفيف و مهفهف , كنت رح رجعا لان بحب ستايل البلوز نفس الي قبلا
بس كالعادة القرار السريع مو منيح , عطيتا فرصة مع البجامة الرمادية الاولى و عنجد طلعت حلوة و شكلا مريح للنظر

البلوزة شبه شفافة , يعني بدا تكون شفافة بس خجلانة , حلوة للتعرق الكتير لان واضح انها ضد التعرق و بتخلي الجسم يتنفس

تقييمي 8 من عشرة بس مشان انها خفيفة شوي

اللنك : https://de.gymshark.com/products/gymshark-training-t-shirt-white-ss22

-

الجرابات : Gymshark Crew Socks 7pk - White

لا تضحكوا , بس انا كوني بتمرن كارديو و حديد و حتى بالشغل كتير بمشي
دورت ع كتييييير جرابات تكون مريحة , بحيث انها تمسك الشوز من النص ما تتزحلط الرجل
او تحسوا انو الرجل عم تتحرك جوا الشوز ,تكون مدعمة من كعب الرجل بقماشة زيادة مشان
تصير المشية اسلس , و فيها نظام تهوية مشان ما تطلع بكتيريا بالرجل

هدول والله هدووول , شتريت كتير قبل و من كذا ماركة ع الفاضي ! ووالله ما ارخص من هدول

عانيييت , شي كتير خفاف للعادة ينشقوا من قدام او رجلي كانت تتحرك جوا الشوز ( الشوز ع رجلي بالضبط )
بس كيف احكيلكن لما الجراب يكون ناعم ف بخلي الرجل تتحرك لقدام جوا الشوز ممكن تعمل فضى من ورا من كتر
ما بتحركن لقدام يعني الجراب ما بثبت الرجل بالضبط جوا الشوز !

اخر شي استسلمت للواقع و شتريت ال 7 ازواج منن لان عنجد المنقذين
مريحين بشكل خيالي , قطن , فيهم نظام تهوية , سماك من ورا الرجل و من قدام , خفاف من النص
بثبتوا الرجل من النص و كتير مناح لرفع الاوزان و الاحلى فيهم قياسات مو موحدة

بضاينوا معكن عمر هدول




عاد هي من ماركة هولستر , انا بععععششششققققق هالماركة من لما كنت بالامارات و اي كككل اسعارن كليتيتن و نص
اذا ما اشتريت من التخفيضات

يعني هي مع التخفيضات ب 20 قبل التخفيضات تخيلوا ب 50 !
اسعارن كتييير غالية اغلى من جم شارك بمراحل

ف شفت عرض ع هالجاكيت ( انا شايفتو بلوزة لان مارح افتح الجاكيت )

بس شو احكيلكن ع القماشة يا سلاااام , باردة , ناعمة و تقيلة

طبعاَ على اد ما مدحت منطقياَ 50 لهيك جاكيت كتير غالي بس هولستر هي غالية

بس مبسوطة اني شتريتها ع اللبس طلع شللاااان

انا جبت اكبر بقياس لان ما بدي تكون نص بطن او بشكل عام قصيرة

تقييمي مليون من عشرة

اللنك : Women's Gilly Hicks Active Recharge Zip-Up Hoodie | Women's Clearance | HollisterCo.com





هي البلوزة جبتا كمان للتمرين انصدمت من جودتها
يا جماعة اي شي بتشتروه من هولستر و انتوا مغمضين اشتروه
الجووودة دايماَ تووووب التووووب

هي قطن 100% نااااااااااااااااااعمة و ع الجسم كتييير حلوة

تقييمي مليون من عشرة

ملاحظة : هي جبتا ب 12 و هي حقا ب 25
عنجد بدكن تكونوا صيادين بالماركات الي بتحبوها
عنجد وقت التنزيلات الاسعار بتنزل بالارض !

اللنك : Women's Ribbed Icon Henley | Women's Clearance | HollisterCo.com




هي كانت بالصورة ع اساس نص بطن او ربع البطن مبين مو نص بطن صريح
ترددت جيبا ما بحب هيك بس قلت جربا , بالحقيقة طلعت ( fit عادي ) مو نص ولا ربع بطن
بلوزة عادية بكتف مفتوح بس بالصور مخلين البلوزة تبين هيك

قطن 100% ناعمة و كتير حلوة ع اللبس

لما اجت و قستا شفت انو بتصير حتى ع الطلعات

تقييمي مليون من عشرة

اللنك : Women's Lace Trim Off-the-Shoulder Number Graphic Tee | Women's Clearance | HollisterCo.com


​

 

[Selene]

-


​

فعالية الاسبوع ²

"قد تكون نزهة قصيرة أو مشوار عابر
، صف رحلة صغيرة منحتك سعادة غير متوقعة "
​

مشاركة متأخرة , عادي لو ما انحسبت بس حابة شارك بهل الفعالية

-


هي عبار عن رحلة قصيرة صح كانت ببلد تاني بس كانت عبارة عن 3 ايام لما قررنا نروح على مدينة بإيطاليا بشهر التالت , و هي مدينة
على حدود المانيا ف كانت وجهة شتوية مو صيفية, كانت رحلة غريبة و سرييعة و كلها شغلات جديدة بالنسبة الي , طلعت انا و عيلتي , اخي ستأجر
فان كامل مشان يساعنا كلنا . كنا كلنا 8 اشخاص ف كان بدنا سيارة تجمعنا كلنا ما كان بدنا سيارتين , ف والله اخي ابو الافكار , راح ستأجر فان فخم حرفياَ فخم اول مرة
بشوف هيك فان من مارسيدس تقولوا سيارة ارباب كبير هيك مقاعد جلد و ميوزك سستم بكل الفان و نضيييفة و مظللة مزبوط و مريحة بشكل مثلاَ هي
تجربة اول مرة بمر فيها اني شوف فان بهل الفخامة

لما تجي كلمة فان ببالي بتخيل سرافيس سوريا

احلى شي بهل الرحلة كانت جمعتنا , و كل حدا عندو ذوق مختلف بالاغاني , على ضحك و مسخرة و لما نوقف بالاستراحة لازم اللمسة السورية تكون موجودة , ابريق الشاي مع
سندويشات الزعتر و الجبنة .

صح و ماما عملت وقتها خبز بزعتر عبارة عن كوكيز بس بزعتر و سوت خبز بفليفلة ضليت اكل منن طول الطريق

المدينة الي رايحين عليها اسمها ميرانو MERANO , المناظر الي عيوني شافتها بهل الرحلة يعني ولا بالخياااال . الطريق اخد شي 5 ساعات لوصلنا وجهتنا .

هالمدينة كانت على جبل , فلما طلعنا لفوق نشوف المناظر تحت , كلو خضاااار و اشجاار ما بتنعد من التفاح و هي كانت اول مرة بحياتي بشوف شكل شجر التفاح قدامي
و احلى شي انو كنا جايين بوقت كيف احكيلكن لا هو شتي ولا ربيع بين التنين , ف كان ينزل مطر وااضح انو مطر ري سبحان الله كيف هيك , مطر مانو غزير ولا خفيف هيك
كتييير لطيف على شجر التفاح و شكلو كتييير خيال كيف نازل من اعلى الجبل مع الضباب

طبيعة المدينة مو طبيعية شو حلوة ! مع انها مانها مدينة ايطالية 100% بس لانها ع حدود المانيا ما حسيت بجو الطليان بصراحة يعني هنيك بيحكوا ايطالي و الماني
لانها ع الحدود بس و مع هيك لما رحنا ناكل بيتزا الايطالية حواسي الذوقية لهلأ ما كانت تنسى طعمة البيتزا الايطالية الاصلية شي ولا بالخيال , العجينة بتدوب بالتم , طريية
و طيييبة و ما بنسى زيت الزيتون الايطالي

رحنا تاني يوم على مدينة كلللللهههههاااا زرع/ورد كللللهههها و انتوا عارفين شو يعني مدينة ورد بمكان المطر فيه لطييف ؟ يعني عبارة عن جنةةة !! اول مرة بعمري بشوف
ورد التوليب الالاف منو مزروع قدامي و طاالع , الورد حرفياَ كان بكل مكان و في اماكن كانوا منسقين الوان الورود ليطلعوا بشكل معين من بعيد . وكان مليان اشجار وكل شجرة
حاطين جمبها اسمها و نوعها , و كل زرعة ورد حاطين اسمها و نوعها . هي كانت اول تجربة الي مع حديقة ورد و زرع بهل الشكل . عندي صور عن المكان , بس كيف احكيلكن ,
على اد ما شفتوا الصور حلوين انو هااااد ولا شي مقارنة بالي شافتو عيني .

الحلو اكتر انو هالمدينة نوع الورد الي فيه بغيروه على حسب الموسم مثلاَ بالوقت الي اجينا فيه كان موسم التوليب ف بينحصر و بالصيف بحطوا نوع صيفي و هيك
يعني لاااا يُمَل ابداَ

مكان اقامتنا كان حرفياَ فوق الغيوم لان كان ع الجبل

شكل شجر التفاح عنجد غريب , اول مرة شفتو فكرتو عنب

المدينة محاطة بجبال شاهقة منظر رهييب

اطلالة البيت مو طبيعية

هي بحيرة مشهورة هنيك , اخي ما توقع تكون متجمدة , منظر تقول خلفية ويندوز اكس بي
+ هي اول مرة بحياتي بشوف بحيرة متجمدة قدامي , تخيلت يكون معين ايس سكيت و اتزلج عليها

هي حديقة بس صبار تخيلوا كانت موجودة ضمن حديقة الزرع , الحديقة ضخمة و فيها اغلب الانواع بس تخيلوا معي شغلتين , الاولى اديه في شمس هنيك
لحتى عايش الصبار و كبران هيك ؟ بالرغم من انو هالمدينة بينزل فيا تلج ؟ تاني شغلة , اديه اخد معن وقت لحتى كبرت الصبارة لهيك حجم!! الي بعرفو
الصبار ليوصل لهيك حجم بدو كتييير وقت سنوات . عنجد شي عجيب

هاد واحد من الطرق الي مرينا فيهن , و ع اليمين كان في بيوت خشبية و نهر جاري و الله تعقيييم بصري












صور بدون اي تعديل

فهالرحلة عطتني سعادة لا توصف وورجتني جمال اول مرة بشوفو جمال جديد شفت شغلات اول مرة عيوني بتشوفها , و ذقت شغلات اول مرة بذوقها
كنت مع ناس بجننوا , رحلة قصيرة غيرت نظرتي للجمال و انو اديه في جمال بهل العالم مخبى محتاج انو يكتشف






​

 

[Selene]

-





الي صار يوم السبت الماضي , زحط ضهري بالجم, زحط بمعنى اجاني انزلاق للمرة الرابعة
تعاملت مع الوضع عااادي هههه كون صار عندي خبرة

اخر انزلاق اجاني كان بالضبط من سنة و 5 اشهر بس من غبائي خليتو يرجع

الي صار اني كنت مركزة ع ضهري بالجم من تمارين و اوزان خفيفة كنت عاملة 70% كارديو و 30% بس حديد و كتير ع الخفيف مرتين بالاسبوع بس

كان الهدف بس تحريك جسمي و ما اخسر العضل الي كسبتو بالكارديو

قمت بديت بشغل كنت عارفة نهايتو شو

من اول شهر و انا عم قول لأهلي هالشغل مو منيح لضهري , فيه توطاية كتير و شغل ع الارض, وقوف ل 6 ساعات و ممنوع نقعد, و حمل شغلات تقيلة
لدرجة كنت اخد راحة من الجم بأيام لازم روح عليها بكون حاسةضهري عم يوجع او تعبانة مشان ما زيدها علي

قام ضهري زحط بالضبط بعد شهرين من الشغل

و الحمد الله انا هلأ كتير منيحة , صرلي من السبت الماضي عند ماما لان ما كنت قادرة اتحرك ابداَ , وطي , انحني حتى امشي , كان ضهري عامل نفس برج بيزا المائل ههههههه و رجع ضهري تمام و عم اتحرك طبيعي الحمد الله

بصراحة ما توقعت بأسبوع ضهري يرجع كنت خايفة يطول

هلأ اخد اجازة مرضية من الشغل اسبوعين بس ارجع رح احكيلن بكل صراحة , يا يخلوني عند صندوق الدفع بس و اقدر اقعد , يقلصوا ساعات شغلي ما يخلولي ياها للقصوى , و يعطوني يوم دوام يوم راحة او يومين دوام يوم راحة او رح احكيلن يلغوني من الشغل ,

هون القانون لازم صاحب الشغل هو الي يلغيني مو انا الغي حالي بحالي مشان ما يصرلي مشاكل عند دائرة العمل

بس بتمنى انهم ما يطلعوني لاني جد حابة الشغل و حابة زملاء الشغل كتير حبابين و الشغل نفسو مسلي

هي اخر اخباري و ان شاء الله انتبه عحالي اكتر من ناحية الضهر