مدونة متألقة ☆~بين الواقع والخيال هناك أنا ~☆ (1 زائر)

[Dr.Saki~☆]

#0​

مساء الخير
هي رح تكون أول مدوناتي
@O Z E N
يسلمو ايديك عالهيدر ❤
أتمنى تستفيدوا و تستمتعوا بالقراءة

 

[Dr.Saki~☆]

​

#1​

مساء الخير
كيفكم أيها التونيين
اليوم رح عرفكم عن نفسي وأبدأ أول تدوينات ❤

انا ساكي عمري 21 لسا عم ادرس بالجامعة بضل بتأفف من الجامعة والدراسة مع إني بحب تخصصي ولدت بالسعودية وعشت فيها لحتى خلصت الثانوي رجعت عسورية مشان سجل بالجامعة
اول ما حدا يتعرف علي بفكرني شايفة حالي و مغرورة و حكيّ قليل بس لما يتعرف علي أكتر بيكتشفوا اني غير هيك تماما بالعكس كتير حبابة و بساعد الكل و بحب الحكي لما كون مرتاحة بالحكي مع الطرف التاني ويكون الموضوع عاجبني (أتوقع واضح قديش بحب الحكي من ردودي الطويلة )
ما كتير بحب الأفلام والمسلسلات يعني كل فترة لأتحمس ع شي وتابعه وأكتر تصنيف بكرهو الرومنسي البحت لازم يكون معه شي تاني مغامرة أكشن أي شي المهم مو بس رومنسي يعني حلو يكون مغامرة وضمن المغامرة اتنين بحبو بعض بس مو التركيز على قصة حبهم و نلغي المغامرة بحب اتعلم شي جديد دائما وطوّر من حالي
برجي الأسد ما بأمن بالأبراج بس احيانا بحب احكي فيها تسلاية
ما كتير بعرف عبّر عن مشاعري وأكتر شي بكره إني إبكي قدام حدا بحب دائما بيّن قوية وبكره منظر الضعيفة
اهتماماتي بالحياة كتير ومافي شي محدد بس ما بعرف ارسم ولا اكتب شعر ✏
بحب تابع مواضيع بحس البنات قليل ليتابعوها وبستغرب إنهم ما بيعرفو يعني متل المشاكل بين روسيا و اوكرانيا بستغرب لما يمر هالموضوع بشي سيرة واشوفهم سطلو وما بيعرفو شي ماهو الدنيا مطبولة فيها كيف ما بتعرفو او مرة عم نحكي بموضوع فشبهتلهم الدكتور يلي بضل يحكيلنا انا عنجد قلقان من علاماتكم ب بان كي مون وطلعوا كلهم ما بيعرفوا بان كي مون بحب تابع المواضيع السياسي ويلي فيها إثارة جدل حتى لو معرفة سطحية وعامة مشان شو ما نحكى قدامي كون فاهمة شو عم يصير ما اقعد متل الأطرش بالزفة وبحب الامتال والاقتباسات كنت جمعهم بدفتر بس صرلي زمان ما عاد ضفت عليهم شي
وهاد مختصر عني حسيته مو ظابط كتير بس مو مشكلة مع الوقت بتتعرفوا علي أكتر ويمكن تكتشفوا فيني أشيا انا ما بعرفها عن حالي
وهون بكون خلصت أول تدوينة بتمنى تكون عجبتكم بعرف أكيد عجبتكم لأن انا كتبتها🩷

 

[Dr.Saki~☆]

​

#2​

بصير اعترف اني فتحت المدونة مشان شارك بالفعالية الإسبوعية

إن كنت من ضمن الذين يصيحون توتراً الآن شاركنا بـ تدوينة وفضفض لنا، دعنا نسمع عن مخططاتك للحرية والاحلام الوردية بعد انتهاءك من نكبتك

اول شي السلام عليكم
كيفكم
ثانيا فعالية هالاسبوع لعبتي
انا بوقت الامتحانات كل حكي عن الدراسة

..............
لحظة صمت بعد ما مدحت حالي وقلت ان هالفعالية لعبتي وما عرفانة كيف ابدأ

المهم انا فترة امتحاناتي بتطول كتيير يعني عندي شهر عملي و بعدها شهر نظري و في بينهم اسبوعين المفروض نجهز فيهم للنظري وندرس ما بعرف كيف رح ندرس فيهم والامتحان بعد العيد مباشرة تخيلو كل الجامعات اجلت اسبوع بعد العيد الا جامعتي بقيت مصممة على بعد العيد مباشرة ما بعرف شو لازم نقول بس حسبي الله ونعم الوكيل فيهم
بالنسبة للدراسة والله ما بعرف شو بدي قلك يعني انا بكون قدامي ترم كامل طويل عريض ما بدرس فيه و بيجي اسبوع المادة وبدرس فيه و بندم عالوقت يلي ضيعته وبقول أخر مرة ورح صير ادرس اول بأول بس لهلق ما نفذت يلي بقوله رح خلص السنة الرابعة وصير خامسة وانا لهلق بدرس باسبوع المادة للنظري و ليلة الامتحان للعملي بس الحمدالله دائما علاماتي حلوة ومعدلي ممتاز بس بتمنى يكون أعلى أنا بعرف بس لو ادرس أبكر بشوي و ركز يمكن كنت الأولى عالكلية
طبعا بفترة الامتحان بصير عندي شغف بكلشي الا الدراسة يعني بتذكر التون بالامتحانات بتذكر فلم ومسلسل بدي شوفه بالامتحان مع إني ما كتير بحب تابع بس بالامتحان فجأة بيتغير رأيي وبصير لازم تابع
بس خلص الامتحان ببطل في شي لازم تابعه وما بعود في امور حلوة ضيع فيها وقتي
وكلشي كنت مقررة اعمله بس خلص ما بعمله وهيك بكون ضيعت وقتي وانا عم خطط

هو بالأخير هي حالة طبيعية ان ننشغل بأمور مو مهمة بالامتحان لأن بكون مخنا تعب و بده يرتاح يعني لو درسنا صح انو ندرس شوي و ناخد بريك قصير و بعدها نرجع ندرس ما حنتشتت أثناء الدراسة بمواضيع مالها داعي

وبالأخير بتمنى التوفيق لكل يلي لسا عندهم امتحان أما المعطلين فلا توفيق لكم اكيد عم امزح أما المعطلين بالهنا بعطلتكم

 

[Dr.Saki~☆]

#3​

غداً يوم عرفة أفضل أيام السنة عن جابر رضي الله عنه، قال رسول الله صلى الله عليه وسلم (ما من يوم أفضل عند الله من يوم عرفة، ينـزل الله تعالى إلى سماء الدنيا، فيباهي بأهل الأرض أهل السماء، فيقول: انظروا إلى عبادي، جاؤوني شعثاً غبراً ضاجِّين، جاؤوا من كل فج عميق، يرجون رحمتي، ولم يروا عقابي، فلم يُرَ يوماً أكثر عتقاً من النار، من يوم عرفة).
يستحب به الصيام فبصايمه تكفير للسنة الماضية والتالية عن أبي قتادة رضي الله عنه، عن النبي صلى الله عليه وآله وسلم قال: «صِيَامُ يَوْمِ عَرَفَةَ أَحْتَسِبُ عَلَى اللهِ أَنْ يُكَفِّرَ السَّنَةَ الَّتِي قَبْلَهُ وَالسَّنَةَ الَّتِي بَعْدَهُ».
وقال النبي الكريم صلى الله عليه وسلم، عن فضل يوم عرفة، إن«خير الدعاء هو دعاء يوم عرفة»

 

[Dr.Saki~☆]

#4​

كيف تٌعالج مزاجك؟ ما هي الأمور التي تجعلك تشعر بالمتعة ؟
او بالعامية شي ترتاح وتروق فيه لما تكون مضايق وطفشان
دعونا نستمع لأذواقكم المختلفة

حسيتهم سؤالين واحد كيف بتغير مزاجك لما تدايق والتاني اشياء بتبسط بدون ما تكون مدايق

اول شي ما كتير بيتعكر مزاجي غالباً بتجاهل وببعد عن كلشي ما بيعجبني و باخد الامور بدون ما حملها زيادة بس أكيد بوصل لمرحلة بدايق فيها

كنت بعد عن الكل واتوحد و سكر الجوال وخلص ما عاد بدي احكي مع حدا "اعتزل ما يؤذيك " بس هاد الحكي قديم من زمان ما عملت هيك

اذا انزعجت بالنهار بفكر اني اطلع اتمشى بس بلغي الفكرة فوراً لأن بدها اذونات اهلي ما عندهم مانع اطلع مع اختي بس دوامها صعب بيختلف عني فغالبا لنا كون مقهورة ما بتكون موجود واذا بدي اطلع مع رفيفتي بدي استنى اهلها يوافقوا فبلغي الفكرة لحالي من البداية

اما اذا بالليل ممكن نطلع كلنا من البيت ندرج بالسيارة بحس هاد اكتر شي بغيري مزاجي طلعتنا العائلية حتى لو مشوار صغير مجرد السير و القصص يلي بتنحكى بتغيرلي مزاجي او قعدتنا بغرفة الضيوف<منغير جو عن غرفة القعدة > و نحكي وندردش سوا بحس ملكت الدنيا وما فيها وبيتغير مزاجي تماما

اما الاشياء يلي بستمتع فيها/

الجلي وخاصة اذا كان جلي عزيمة او ضيوف كتار بحب اسهر عليهم وانا عم اجلي ما بنزعج من الجلي

جمعتي مع اخواتي على شغلة معينة متل ترتيب خزانتنا او نعمل حلو سوا بحب هيك اجواء

احيانا مواقف بسيطة كتير بتفرحنا متل نكون بجمعة وفيه ولد صغير يترك كل الموجودين ويجي لعندك او قطة تقرب منك وتمشي معك ❤

وبس ماعاد خطر على بالي شي تاني مع اني كتير اشياء بتبسطي كلمة مديح بتخلي قلبي يفرح او حدا يتذكرني بشي بحبو او يسأل عني بعد مدة

وكل عام وانتو بخير بمناسبة عيد الأضحى أعاده الله علينا وعليكم باليمن والمسرات

 

[Dr.Saki~☆]

#5​

اووف مدونتي صارت بالصفحة التالتة من كتر الاهمال ننفض غبرتها بفعالية الاسبوع
​

- يوليو -
فعالية الاسبوع

أي شخصية خارقة كنت تتمنى أن تصبح مثلها عندما كنت صغيراً؟ وما سبب حبك لها او امنيتك هذه؟ حدثنا عنها
لأجعل السؤال بنطاق أوسع يمكنك اعتبار الشخصية من كرتون او انمي او فيلم او شخص واقعي تمنيت من صغرك ان تكون مثله
​

كنت بحب حياة شيهو بكونان وبتمنى كون محلها بحب المغامرة يلي عم تعيشها وكيف صنعت عقار و بعدين هربت جو الاكشن بس الرايق و فيها مواصفات منتمناها يعني عالمة و ذكية و غامضة بحب برودها و غموضها وبنفس الوقت قلبها طيب
و مين كمان كنت حب حياتها قلكم وما بتدبحوني لافينيا يلي مع سالي بحب ثقتها و جبروتها وما كانت تحطها واطية لسالي بأي شي او ان حدا يقدر بحطها بمقارنة معها بس ما كنت حب حركاتها مع سالي بعد ما فلست بس قبل ما تفلس كانت تعجبني
وكنت حب الجاسوسات سام يلي لابسة اخضر شخصية قيادية و حياتهم مغامرة
بحب اي شخصية انثوية عايشة مغامرة و تكون قوية ومعتمدة على نفسها مو مايعة و بتستنى يجي من يساعدها و يحميها ⚔

​

 

[Dr.Saki~☆]

#6​

​

فعالية شهر يوليو

جميعنا نملك خيال، مهما كان حدوده ضيق أم واسع
لكنه وبلا ادنى شك يعيننا على مرارة الواقع! ويضيف ألواناً على صفحتنا الرمادية
لو كان بيدك اختراع شخصية خيالية، لـ حكاية، او لتمثيلية درامية!
او حتى ان يكون صديق من خيالك تحدثه بدلاً من مخاطبة نفسك! حدد النوع..
وأخبرنا كيف ستكون هذه الشخصية؟ صفها لنا شكلاً وروحاً وطبعاً!
وما الشيء الذي جعلك تختار هكذا صفات ؟
​

للصراحة الشخصية الخيالية يلي بعقلي بالبداية كانت شخصية اخترعتها لتكمل انمي بما ان المؤلف مو ناوي يخلص الانمي بعدين كبرت و عقلت و ما عاد حبيت القصة يلي كملتها بالشخصية قمت رقيت الشخصية وسويتلها رواية جديدة بعقلي و ناوية اذا ضل عندي شغف لوقتها اكتبها واعملها مسلسل (هيك حابة بس ما أتوقع وصل لهالمرحلة ) أول شي نعرفكم باسم الشخصية ميرا
طبعا رح تقولوا واو الاسم كتير غريب وما بذكرنا باسمك ابدا ً مواصفاتها الشكلية بنت قصيرة شعرها أحمر بشرتها بيضاء بملامح بريئة وعيونها زرق تخيلتها بهي المواصفات لأن قليل نشوف هيك مواصفات بالواقع و انا حابة ميرا تكون شكلياً مميزة ذكية قوية متمردة وجريئة وحقها ما بتتركه يضيع
حطيتلها هالصفات لأن انا كنت حابة امتلكهم يعني بالأخير ميرا هي انا بالشخصية يلي بتمنى اوصللها وللصراحة مع الوقت صرت عم اشبهها و اتقمص شخصياتها لحد ما صارت الصفات يلي بتمناها عندي
هو كلشي منتخيله بعبّر عن يلي جواتنا ويلي ناقصنا و منتماه و عن حياتنا و تفاصيلها وكلشي بحدود يعني حلو يكون عنا متنفس بشخصية خيالية او حياة وهمية بتدور بعقلنا بس مو لدرجة نخلطها بالواقع او ننسى الواقع وننكره و نتعلق بخيالنا لأن وقتها بكون يلي عم بصير مرض
وبالأخير ميرا بتسلم عليكم وعلى شخصياتكم الخيالية

​

 

[Dr.Saki~☆]

#7​

مبارح طلعت علامات البكالوريا وألف مبروك للناجحين و حظ اوفر للراسبين
بس صار في سؤال تكرر كتير ورح يضل يتكرر لوقت تطلع المفاضلة (التنسيق يعني) بعض الطلاب تنزل علاماتها و تسأل ان هي علاماتي بيطلعلي طب او شو الهندسات يلي بتطلعلي؟ وما شفت لهلق حدا سأل عن فرع تاني
ما بعرف ليش المجتمع حاطت الطب والهندسة ضمن الكليات المرغوبة او بسموها قمة
تعو نتخيل ان كل العالم صاروا مهندسين و دكاترة وبعدين اولادهم مين رح يدرسهم طيب لما يعطل غرض مين رح يصلحه و شعرهم مين رح يقصه وأمثلة كتيير
المجتمع بده كل المهن و ودراسات وكل واحد اله دور الحلاق اله دور و المدرسين الهم دور و العمال و الكهربائي و السمكري و البيطري و المبرمج و التاجر والكل كل واحد منهم المجتمع ما بيمشي بدونه
يعني لكل الناجحين ادرسوا يلي بتحبوه و بيعجبكم لا تختارو حسب المجتمع شو بحب انتو شو بتحبو
اختي نجحت مبارح بعلامات عادية مو عالية الكل يقلنا قال يعني عم يواسينا ان يلا عالتكميلي (امتحان بتعيد فيه أقصى حد 3 مواد من البكالوريا لتحسن علاماتها) بتتحسن علاماتها و بتقدر تسجل طب وقتها مع ان هي ولا مرة قالت انه ضمن رغباتها ودائما بتقول انها بدها معهد تعويضات مشان تتخرج بسرعة المهم كل واحد يمشي ورا رغبته لأن اذا الشي ما بتحبوه مارح تبدعوا فيه وبس وشكرا حبيت قلكم رأيي المختصر و هي النصيحة صغننة ❤

 

[Dr.Saki~☆]

#8​

صباح الخير
بهالأجواء الحارة و الشوب فتحت الصور و صرت رفه عن نفسي بصور السما المغيمة يعني فيها غيوم أيام ما كان الجو حلو والهواء منعش 🌬
رح حطلكم صورتين صورتهم بشهر مارس ورح كمّل بحث على شي فيديو مطر

​

 

[Dr.Saki~☆]

#9​

- يوليو -
فعالية الاسبوع
ممكن تشوفه سؤال عفوي لكن رح يوضح طريقة تفكيرك وطموحاتك
اذا ربحت جائزة اليانصيب، ماذا ستفعل بالأموال؟​

مساء الخير
ما عمري فكرت اسحب ورقة يانصيب بس لو فرضا اني اشتريت و ربحت نص المبلغ رح اعمل فيه مشروع وجزء صغير رح استثمره بالأسهم (أرباح بدون تعب ) والباقي بخبيهم احتياط وخلص بنساهم للزمن نصهم رح جيب فيهم دهب والنص التاني اصرفهم دولار مشان اذا انهارت امريكا يضللي الذهب واذا رخص الذهب لأي سبب يضللي الدولار واكيد رح حدد مبلغ شهري لكم عيلة محتاجة كنت حابة كمل واحكي اكتر بس خلصو المصاري ما ضل شي احكيه

​