مدونة متألقة ☆~بين الواقع والخيال هناك أنا ~☆ (3 زائر)

[Dr.Saki~☆]

مساء الخير
مو أي يوم كان قاسي و مؤلم نعتبره بشع و نكرهه يمكن هاليوم يغيرلنا لشي أحسن او نكتشف فيه حقيقة العالم و نميز الصديق الحقيقي عن غيره ونقوى ونتعلم

بيوم 6 فبراير او شباط كان يوم قاسي و حزين ومخيف لحظات صعبة وأخبار عن ناس مفقودين وتحت الأنقاض أبدا ما كان يوم سهل بس رغم هيك انا ما بكره هاليوم لأن تغيرت أنا مو نفسي قبل هالتاريخ من ناحية التزامي بالدين انا قبل كانت كل عبادتي باليوم هي عبارة عن الفروض الخمسة وبس وبأخرها كمان بعد الزلزال و وقت حسيت ان كان ممكن نموت فكرت شو عندي اعمال تنجيني يوم الحساب ولاشي ومن وقتها صرت أول ما اسمع الاذان قوم صلي وصلي السنن وصار عندي ورد كل يوم

وما لازم نقعد نندب و نخاف ونبكي المفروض نقوم ونواجه خوفنا ونشوف كيف ممكن نتجاوز ازمة مرت علينا انا لهلق بتذكر بالوقت يلي كنت فيه خايفة و ضليت يوم كامل قاعدة عم راقب الثرية اذا عم تتحرك وراقب الصفحات يلي عم تحكي عالزلزال كان في بنت عم تساعد الجمعيات وهنن عم يجمعوا التبرعات للمتضررين واخوها كان من الناس المفقودة بتركيا وما قدرانين يتواصلوا معه وكانت قوية وقامت تساعد لنتجاوز يلي صار لما خبرتني رفيقتي عنها استصغرت حالي وقلت بنفسي اذا هالبنت يلي تعتبر من يلي اضرروا بعزيز وراحت وصارت تساعد انا الحمدالله ما خسرت شي و ما اتضررنا ليش قاعدة شو عم استنى وفعلا من اليوم يلي لبعده من الصبح طلعت انا واختي و رفقاتي ساعدنا بفرز التياب والأدوية وبتوزيعها وحطينا ارقامنا بالجمعيات اذا احتاجونا شعورنا بآخر اليوم بأن عملنا شي كويس نسانا كل خوفنا

اي و اخو البنت الحمدالله قدروا يتواصلوا معه هو بخير و مافيه شي و هلق عم يشتغل و يكمل حياته طبيعي

حسينا بشعور حلو وفخر ان قدرنا نساعد ونفيد غيرنا بدل ما نحنا قاعدين قلت متل ما نحنا تشجعنا من قصة بنت حبيت اكتبلكم يلي صار يمكن حدا يتشجع ويقوم يحاول يغير ظروف ازمة مر فيها مو يقعد ويندب

ما بعرف شو خطر ببالي اكتب هالتدوينة يمكن هزة الصبح يلي صارت بتركيا خلتني اتذكر يلي صار واكتبه

 

[Dr.Saki~☆]

صباح الخير

الحمدالله الذي تتم بنعمته الصالحات
أول شي لازم نحكيه ان خلصت امتحاناتي صرلي 3 شهور عم امتحن بين مقابلات و نظري و عملي لقد هرمت حتى وصلت لهذه اللحظة

هالترم شفت علامات أول مرة بشوفها أول مرة بحياتي ببكي بسبب علامات حسبي الله ونعم الوكيل بالدكاترة "يلي بدرسوا و بيشرحوا بالجامعة منقلهم دكاترة "

بابا عم يسأل عن العلامات اتفقنا هالترم ما نتناقش فيهم لأنها مو علاماتي و ما بتمثلني كنت بدي اطلب جوال جديد هلق ما عاد فيني لأن فورا رح ينتقل النقاش من طلب جوال لعلاماتي

اذا في شي كويس صار ان ما تمددت الامتحانات اسبوع في طلاب تمددت ل 17 شهر لأن صدفت عندهم مادة مع عطلة راس السنة الهجرية انا توقعت تتأجل مادتي معهم الحمدالله ما تأجلت كنت انجلطت رح ضل امتحن اسبوع زيادة

المهم عطلت بالأخير ألف مبرووك ان وصلت لهون ما توقعت يجي اليوم يلي قول فيه عطلت
طول فترة الامتحان وانا عم اتخيل العطلة وقرر كيف بدي استغلها المهم حطيت قائمة و بعد ما خلصتها حسيت يا أما عطلتي 3 سنين او يومي 48 ساعة لأن غير هيك ما بلحق يلي ناوية اسويه

نهاية كل ترم بحس بتفاهتي انا ورفقاتي و نحنا عم نحكي أول صباح بدون امتحان أول فطور بدون امتحان اول سهر بدون امتحان وهكذا

حاولت شارككم جزء من تفاهتنا بس ما عرفت ارفع الفيديو

 

[Dr.Saki~☆]

صباح الخير

النت مقطوع قلت بكتب تدوينة فعالية الاسبوع وصار نقاش طويل عريض بالبيت ونسيت شو كانت الفعالية فقلت رح احكيلك سبب النقاش هاد يا سادة يا كرام انا حابة اتعلم شي جديد بالعطلة وما بدي شي تقليدي بدي شي حلو وممتع اقترحت شغلتين اما الرماية و التصويب او ركوب الخيل وماما ما عم ترضى و انا حاول اقنعها وهي ابدا اول شي قالت هدول مو للبنات بعدين قالت ما رح استفيد منهم وكان بيننا صد و رد اخر شي انتهى النقاش بموضوع الدراسة و العلامات ما بعرف كيف كل النقاشات مع بابا وماما بتنتهي بالعلامات بدها الرابط العجيب يلي كان يطلع بسبيستون يشرحلنا وبالاخير ما ارتفضوا الخيارين بس تأجلوا للعطلة الجاية انا بعرف انهم التغوا بس هيك بسكتوني مشان ما ضل عم نق وبأجلوا

صرلي اسبوع معطلة و على اساس روح على GYM كل يوم لهلق ما رحت و طول ما الجو شوب ماني طالعة من البيت

لهلق ما نمت ما عندي شي اسويه قعدت بقسم التطبيقات ارد عل المواضيع مشان زهورة تكرف الصبح و هي عم تختم و تأرشف و الليلة يلي قبلها كنت بقسم الكتب و الروايات العالمية كمان جبت شغل لسلوى واليوم محتارة لمين جيب شغل و تعب حاطة ببالي قسم القصص وقسم الترحيب

هلق اجا النت ورح نزل التدوينة انا كتبتها اول شي بالملاحظات بعدين نسختها عالتون و بس ما ضل شي قوله بشوفكم بتدوينة الجاية

​

 

[Dr.Saki~☆]

فعالية شهر أغسطس

ما هو أهم درس تعلمته في حياتك أو من خلال تجاربك الشخصية؟​

الدروس كتيرة بسم الله نبدأ
أهم شي اسرتي أولى أولوياتي حددت اسرة مو عائلة

وحقي ما بتنازل عنه وما اسمح لحدا يظلمني مين ما كان يكون جدي عمي خالي

دائما لما احكي مع حدا اكبر مني و خاصة اذا عن مشكلة بيناتنا احكي برواء و بدون انفعال وصوت عالي لأن حتى لو كان الحق معي رح ينقلب ضدتي

السر يلي بيطلع منك ما عاد سر و يلي بصير بالبيت ما بيطلع من البيت

لا صدق شخص عم يحكي على شخص تاني ولا وقف مع حدا ضد حدا

اعتمد على نفسي وما اتكل على احد

في كتير دروس بس هاد يلي خطرلي لأن نعست و لهلق ما نمت بس اصحى و خطر على بالي شي زيادة بنزله لحاله

​

 

[Dr.Saki~☆]

فعالية الإسبوع

شيء تكرهه ولا يمكنك إمساك نفسك عن انتقاده، ما هو بالنسبة لك؟

مسا الخير اليوم شفتوني كتير هون بس سلوى تنزل فعالية رح تلاقوني فورا موجودة ما بلاقي شي اكتبه بالمدونة بقعد استنى الفعاليات تغششني

المهم شي بكرهو وما بقدر ما انتقده يلي بيكذب كتير انا من الناس الرايقة يعني ما بسرعة ممكن قول للشخص حاج كذب يعني بمشي معو بكذبه للأخير لشوف وين بدو يوصل بعدين بس خلص ببلش فيه وطالعله كلشي كذبه كذبة كذبة بس بإسلوب لبق و برواق

اكيد مو أي كذب يعني كلنا منكذب ومحد فينا عمره ما كذب بس يلي بيستفزني هو يلي بيكذب ليخلي الناس تتقاتل مع بعضها او بكون غلطان و عم يكذب ليورط غيره يعني يلي بكذبه أذى لغيره او يلي بيكذب كتير اما غير هيك مالي دخل

اكيد في اشياء غير الكذب بس ما عم اتذكرهم بس من الجديد كونوا موسم زيارات و عطل أكتر شي انتقدناه هن الناس يلي بيجي معها ولاد صغار و ما بينتبهوا عليهم يعني منعرف وحدة عندها صبي صغير بس شقي تطنش ولادها و تهتم بالحكي و السير و شو قالت فلانة و شو عملت علانة و اختها كانت معها و كل شوي تقلها قومي شوفي ابنك امسكيه و هي مطنشة لحتى ابنها شرب العود يلي بالفواحة وفكره بيبسي لأن لونه أسود

يعني اهتمي بولادك مو معقول اهل البيت ينتبهوا عليهم بتذكر ما ضل حدا ما سمعها كلمة عن اهمالها بتستاهل مشان تتعلم لأن مو اول مرة


بكفي شغلتين بشوفكم بتدوينة جديدة عن قريب ❤

 

[Dr.Saki~☆]

#13​

فعالية الإسبوع


لنفترض انك صانع محتوى ع السوشيل ميديا كـ يوتيوب مثلاً، ما نوع محتواك سيكون؟
وماهي الفئة التي تستهدفها؟ حدثنا عن فكرتك او نظرتك بهذا المجال​

مساء الخير
شكرا على الفعاليات الحلوة سلوى لأن لولا الفعاليات مدونتي بتغبر
لو كنت صانع محتوى رح يكون محتواي متنوع بين معلومات عامة و نصائح وبعض الاخبار ممكن اشارك القليل من يومياتي الجامعية
كون المواضيع يلي عم شاركها ما فيها شي فجميع الفئات العمرية ممكن تتابعيني بس المستهدفة فئة الشباب
من فترة 5 سنين اتفقت مع رفقاتي نعمل حساب على الانستا و نشارك الاخبار والنصائح و مواضيع عامة و فعلا بلشنا و قسمنا المهام و تحمسنا بس ما استمرينا ولهلق الحساب موجود مافيه اكتر من الف متابع و نصهم عن طريق تطبيقات زيادة المتابعين
نظرتي لمجال صناع المحتوى و السوشال ميديا بحس ان مع الوقت رح يتم التعبير عن الاشخاص وانجازاتهم بعدد المتابعين بحساباتهم و مشاهداتهم للأسف مو لأعمالهم على ارض الواقع و فعاليتهم بالمجتمع

 

[Dr.Saki~☆]

​

#14

مساء الخير مرة تانية طبعا انا يا بقعد مرة وحدة بالمدونة يا بختفي

تقريبا من اسبوعين مطرت بعز الصيف و صورت السما كان منظرها كتير غريب انو شمس قوية مع مطر و غيوم

تجاهلو الاشياء الموجودة بالصورة وشوفوا جمال السما

​

 

[Dr.Saki~☆]

الحمد الله على سلامة الجميع من زلزال المغرب والله يحميكم و يحفظكم

بعد الزلزال الأساسي القوي رح يكون في هزات ارتدادية لترجع المنطقة لاستقراها السابق وان شاء الله تكون الهزات خفيفة

أهم شي لا تتابعو الدجالين و يلي بيتوقعوا الكوارث لأن بسببهم احتمال ما تناموا بشهر

و من شوي شفت بوست عن كيفية التصرف خلال الزلزال للاحتياط نسخته ورح شاركه معكم وان شاء الله ما منحتاجه

تبدأ جميع الزلازل بهزات خفيفة حتى لو كان الزلزال مدمرا ... و عليه يجب التصرف فور الإحساس بالاهتزاز مهما كان ضعيفا
عليك اتخاذ قرارك و التصرف وفقه خلال الثواني العشرين الأولى لبدء الاهتزاز
1 - في حال كنت متأكدا انك خلال هذه المدة تستطيع الخروج من المنزل الى شارع مفتوح بعيد عن المباني و أعمدة الكهرباء فعليك فعل ذلك دون تردد
2 - في حال انك غير متأكد من الخروج عليك الاحتماء داخل المنزل بعيدا عن النوافذ و الأبواب الخارجية و بعيدا عن الشرفات
في حال وجود اثاث قوي تمدد تحت طاولة متينة او سرير و ضع يديك فوق رأسك
في حال عدم توفر الاثاث القوي قف تحت نجفات الابواب الداخلية
حاول ان يكون الاحتماء في الغرف الداخلية البعيدة عن المحيط الخارجي للمنزل
من المهم ان تصطحب معك جهاز الموبايل
3 - في حال كنت في الطريق قف في المنتصف بعيدا عن الابنية و الأشجار و أعمدة الكهرباء
4 - في حال كنت في السيارة توقف بعيدا عن المنشآت و العناصر سابقة الذكر
5 - في حال كنت تحت الانقاض لا سمح الله لا تشعل نارا للاستضاءة و استخدم الموبايل او قم بالطرق المتواصل على ما يصدر صوتا يمكن أن ينبه الى مكان وجودك

ورح زيد عليهم ان نجمع اوراقنا الرسمية من جوازات و بطاقات و اموال و شاحن باوربنك بشنطة ناخدها معنا و احنا طالعين نخليها قريبة و بنفس الوقت ما تكون بمكان ممكن تنسرق فيه لأن في بعض ضعاف النفوس بتستغل هي الكوارث للسرقات و أكيد سمعنا عن هالنماذج خلال زلزال 6 فبراير .

والله يحمي الجميع 🩷

 

[Dr.Saki~☆]

بعد كارثة زلزال المغرب وبشكل مفاجئ حـرائق ضخمة ومدمــرة تجتاح غابات الساكت في ولاية بجاية بـالجزائر مساحة النيران تتسع بسرعة نحو المناطق المأهولة بالسكان مع تحرك فرق الإطفاء لمنع وصول اللهب إلى المنازل، وفق ما نقلت وسائل إعلام جزائرية. اللَّهم برداً وسلاماً على إخوتنا في الجزائر أعانكم الله ورفع عنكم مصابكم .

بالاضافة لمصابنا في ليبيا حيث ان ربع سكـان مدينة درنة قد اختـفى و أصبحـت المدينة غير صالحة للسكـن و الجـثث منـتشرة في كل مكان بالمدينة بالإضافة لمقتل ما يزيد عن 5000 شخص بسبب اعصار دانيال في منطقة شرق ليبيا في عشرة سبتمبر ما تسبب في فيضانات التي دمرت سدين واددت لسيول تسببت في أضرار جسيمة وجرف سكان باتجاه البحر. فيما تشير التقديرات إلى فقدان أكثر من 10 آلاف شخص .

وذكر حساب مدينة درنة على تويتر تويتة بتحزن مفادها كانت هنا مدينة درنة ☹
الله يحمي الجميع وما يضر حدا والله يصبر اهالي المفقودين و يشفي الجرحى ​

 

[Dr.Saki~☆]

فعالية شهر سبتمبر


من ناحية تطوير المهارات، لا بد ان لديك خطة، صحيح؟ ما نوع هذا الهدف الذي تسعى لتحقيقه؟
مثال للأهداف تعلم لغة، او مصلحة ما كالوافير الخياط المبرمج، تعلم ع برنامج ووووو...
عدد لا نهائي من الاهداف تختلف من شخص لآخر! ألقي لنا الضوء على أهدافك

صباح الخير
عندي أهداف كتير و خطط أكتر لحققها بس الأهم ان استمر بالخطط لأن بلتزم اسبوع بالكتير عشر ايام بعدين بمل و بوقف

أحد الأهداف ان اتعلم اللغة الفرنسية
اول شي تعلمت تعلم الاساسيات الحروف والارقام و صرت اقرأ الكلمات بس بدون ما اعرف معناها بس في كلمات اتوقع معانيها لأن في كلمات بتشبه بعضها بالانكليزي و بعدين مليت و لقيت مشوارها طويل تعلم اللغة و وقفت وعن طريق الصدفة من المسلسلات التركية صرت افهم بعض الجمل والكلمات و اقرأهم بس ما جربت اتعلم الكتابة

اتعلم اعزف على آلة موسيقية الكيبورد او الاورغ

نفس شي بلشت و ما كملت بالبداية كنت اعرف اقرأ النوتة والسلم صح بطيئة و بضل سنة بس المهم بعرف ففورا بدأت شوف مقاطع على اليوتيوب و شرح و طبق فورا و جرب بس كان في خطأ صغير كنت اعمله وموجود ببعض الفيديوهات هو ان حط ارقام و اعزف وتطلع المعزوفة صح بس هاد التصرف قالتلي عنه احدى معلمات الموسيقى انه غلط لأن منصير منعزف على الارقام بدون ما نركز و بس مسحتي الارقام مارح تتزكري وين كانو . وعنجد لما امسح الارقام البداية بتطبع ظابطة و بعدين ما بتزكر وانا لما ما يظبط معي الشي بمل و بتركه

وهي بعض من المهارات يلي كنت حابة اتعلمها بس ما كملت