الختم الاداري بين آلاف الشخصيات | لماذا سكنت قلوبنا أنت ؟ (1 زائر)

[N A Y]

-
السلام عليكم ورحمة الله
كيف الحال تمسوحة اكيد صرت بخير لما شفت ردي
كان هذا اول موضوع لفتني بمواضيعك هالشهر
من عنوانه يلي جذبني لأشوف تحليلك للموضوع
ولأنك على عكس مهاراتك الاملائية إلا إنك متمرس بالتحليلات
بالمناسبة شكرًا لدعواتك اللطيفة يلي بافتتاحية الموضوع
اللهم آمين أجمعين
الفكرة يلي طلعت منها بهالموضوع رهيبة بجد وبالغالب
انها تجربة صارت مع الجميع انه تعلقوا بشخصية بعينها بدون
سبب محدد لكن كان فيها شي مختلف ومُلفت، وهالشي صار
معي كمان بشخصيات كثيرة مثل فيوليت، اوبيتو، ايرين، ايتاشي
نيشيميا، راينر وايروين، كانيكي وغيرهم بس مو حاضرتني اسماؤهم بهاللحظة

- لو قابلت نفسك داخل شخصية أنمي، هل ستتعرّف عليها أم ستمضي بدون الإنتباه لتلك التفاصيل الصغيرة ؟ .

سؤالك فتح لي الكثير من الأبواب والأفكار، هل كنت رح أتعرف عليها؟
بترجح الكفّة اكثر لانه لا، مو باللحظات الأولى على الأقل، بس عالأكيد
كانت رح تلفتني وتعلق ببالي لفترة طويلة بدون ما اكتشف السبب الحقيقي
لحد ما اعيش موقف او ذكرى او شعور ترجع لبالي فيها ف تجي لحظة الادراك
وافهم ليه هي مميزة بالنسبة لي، واني شفت جزء مني فيها بشكل ما بس
ما اعترفت بهالشي ولا واجهته واكثر الاوقات ما اواجهه ولا ابحث عن تفسيرات
من هذا النوع، افضّل بعض الامور تضل مجهولة بالنسبة لي
بس لازم احكيلك ان الفقرة يلي قبل ما تبدا كلامك عن ساسكي فيها
امور واقعيّة وصريحة بشكل مزعج وحقيقي وانا ما احب اتقابل مع النصوص
الصريحة بهالشكل xd
اختيارك لساسكي من بين جميع الشخصيات الممكن اسقاط فكرة الموضوع
عليها كانت مميزة وموفقة بنظري، عمومًا انمي ناروتو كله ارتباطي بشخصياته
هو عاطفي مو ارتباط واقعي او منطقي او نتاج مثالية العمل والقصّة لأن عيوبه
كثيرة اساسًا مع هيك اكثر انمي احتوى شخصيات تشدّ الواحد ليتعلق فيها
وتخلق جواه مشاعر كثيرة ومعقدة ومتناقضة احيانًا
وصفك لشخصيّة ساسكي كان اكثر وصف دقيق سمعته عنه
ومثل ما قلت بالضبط انه تمسك بهدف الانتقام واعتبره طريقه
الوحيد ليتحمل الحياة، احنا كمشاهدين وصلنا هالشعور أكثر شي
باللحظة يلي انتهى فيها قتال ايتاشي وساسكي ومات ايتاشي
ومن بعدها تزعزع داخله وخارجه وشعر انه حتى الحلم يلي عاش
مشانه سنين كان وهم وما وصل للخلاص ولا حس براحة مثلما توقع
انه يصير لما ينتقم. استوعب بهاللحظة انه كله كان سراب تضخم
بسبب ألمه ووحدته ورفضه للمساعدة من اي طرف
النقطة يلي ذكرتها بعيدًا عن شخصية ساسكي بل كمثال بالحياة
الواقعيّة ان الشخص يتمسك بالألم مو لانه مرتاح وهو متعايش مع هالشعور
ولا لأنه مازوخي يحب العذاب بل لأن عقله مو راسم احتمالات وطرق مختلفة
وما عنده تصديق حقيقي لأنه التخلي عنه ما رح يقتله وبالعكس
رح يفتح له ابواب جديدة، بنشوف هالشي بالعلاقات يلي بتكون واضحة
لكل الناس انها توكسيك ونستغرب ليه فلان لساته مع حدا توكسيك هيك
او ليه بستمر بالرجوع اله. هو ببساطة بشوف الالم القديم المعتاد اهون
على قلبه من المجهول. الموضوع يشبه شخص واقف بين بابين واحد فوق
في قبله درج طويل وباب تحت هو واقف عند الباب يلي تحت لسا
لكن يحاول يطلع الدرج ليوصل الباب اللي فوق، ومع كل نسمة ريح
تفتح الباب يلي تحت يرجع يلتفت له ويرجع يوقف عنده ف يحس
انه ما رح يقدر يوصل لفوق ابدًا بحياته، والحال انه بس محتاج يستمر
بمحاولة الصعود للدرج مهما نفسه كانت تشدّه لإنه يرجع ينزل ورح ينجح
بالنهاية بالوصول، خطوة ع خطوة تؤدي للهدف
جزء من طباع ساسكي الصغير ورغبته بشدّ الانتباه وتحصيل الاعتراف
من ابوه واخوه زي ما ذكرت هي نزعة انسانية موجودة في
اغلبنا خصوصًا بالعمر الصغير او المراهقة
في منهم تستمر معهم عطول ويكون هذا من اهدافهم بالحياة
وفي ناس يصيروا ناضجين ويتركوا الركض ورا هالفكرة

ثم فجأة أصبح الشخص الذي يربطه بكل شيء فقده، وهنا حدث شيء نفسي خطير، فالحب نفسه لم يختفِ بل اختلط بالكراهية

دائمًا ما بكون بين الحب الشديد والكره الشديد شعرة رفيعة
تجاوزها اسهل مما الواحد ممكن يتخيّل لانه كل ما كبرت قيمة
الشخص كبرت قيمة اخطاءه وهفواته الصغيرة حتى ف كيف
بحاجة كبيرة مثل قتل عائلته، وهذا الشي بالضبط يلي سعى
ايتاشى انه ساسكي يوصله وهو انه يتجاوز الشعرة هاي ويتحول لحقد دفين
ولعلّ اكثر شي خلق بساسكي معاناة كبيرة جدًا انه كان داخليًا ورغم كلشي صار
يحس بإنه حبه القديم لاخوه ما زال موجود ويلي رجع ظهر فورًا بعد موته وبشكل اقوى
من حبه له بالطفولة. تخيّل الامر فعلاً صعب عالواحد وانه يعيشه كمان اصعب ولا عجب
التحول والبرود يلي صاروا بشخصيته من هالشي

فماذا يحدث للإنسان حين يعيش طويلًا داخل جرحه ؟، هل يبقى الجرح مجرد ذكرى ؟ ..
أم يتحول ببطء إلى هوية ؟

بعد فترة معيّنة او مطولة من التعايش مع شعور معيّن ايًا كانت ماهيته
يتحول من جزء داخل كيان الانسان ويصير هو كيانه بحد ذاته -لكنها ما تعتبر نهاية الحكاية
فطريق العودة للنفس دائمًا موجود-لكن ممكن يعيش هالشعور لفترة من الزمن انه
ينسى كيف كان يشعر او يفكر او ينظر للحياة قبلها مثل نقطة حبر وسط كاسة مي شوي شوي
يتسرب اللون ليغطي الكاسة كاملة لهيك ما في شي اخطر من الكتمان والانعزال -الدائم- عن الحياة

لو وُضعنا مكان ساسكي وأُعطينا الجرح نفسه، هل كنا سنخرج منه كما نحب أن نعتقد ؟ أم أننا كنا سنحمل جرحه بالطريقة نفسها ونصبح نحن أيضًا الشخص الذي كنا نخاف أن نصبحه ؟

اي حدا ينطرح عليه سؤال : شو كنت رح تسوي لو كنت مكان فلان رح يجاوب بتأكيد انه
ما كان رح يعمل نفس غلطه ورح يتصرف بشكل اذكى واصح لكن الامور ما تنقاس بهالشكل
الانسان ما ينكشف معدنه الحقيقي بكلامه ونقده لتصرفات شخص ثاني وهو جالس مرتاح
ينكشف بس لما يتحول المثال لحقيقة وينحط بنفس الموقف وإلا الكلام والمواعظ والحكم
سهلة عالكل
لهيك فعليًا ما عندي فكرة شو كنت رح اسوي لكن ما كنت حسوي القرار الصح بالغالب
جزء مني عارف هالشي يعني
يعطيك العافية عالطرح الجميل للموضوع ومعلش لو شطحت شوي
استمر بنشر مواضيعك الجميلة هاي ف اسلوبك وافكارك يستحقوا المشاركة دائمًا
في امان الله