مدونة متألقة A Ca$e for a Gentle Thief and a Treasured Heart - 7sN (2 زائر)

[7sN]

اليوم أهلي احتجزوني عندهم عشان اشوف اعلان فيلم Joker لأني ما شفته لما نزل اول مرة
فـ استغلوا وضع اني قاعد معاهم وشغلولي الاعلان عشان يشوفون ردة فعلي وكلامي وحركات

قبل ما اتكلم .. هذا الاعلان :

طبعا عجبني .. عجبني بقوه

اعلان كافي لتوضيح الفيلم وأجواءه وعمقه , ما اعرف من وين ابدأ بالضبط لكني راح اعطيكم بعض
المعلومات اللي اعرفها وتحليلي الشخصي

الفيلم بشكل واضح اشوف انه مركّز على الجانب النفسي من الجوكر , وهذا اكثر شي طبيعي وهو
الاختيار الصح لفيلم يتكلم عن قصة سابقة لشخصية + هذي افضل طريقة لتوضيح كيفية تغيير
انسان من شخص عادي إلى مختل عقلياً

من اسلوبه واسلوب كلامه ذكّرني بشخص فيه توحّد مر علي باليوتيوب قبل فترة , هالشخص كان
يروح أماكن مزدحمة ويحاول يضحّك الناس ويسعدهم , كان هدفه انه يخلّي العالم مكان افضل و
مكان مريح للجميع .. بالاعلان نشوف ان هالشي بالضبط ينطبق على شخصية جوكر من ناحية كلامه
عن امه انها تقول له "لديك هدف لجعل العالم مكان يملأه الضحك والسعادة" , وما احس ان شخص
بكامل قواه العقلية راح يتكلم عن امه بهالطريقة اللي كأنها طفولية

وخلال خروجه للعالم وتعايشه مع المجتمع ما شاف إلا أسوأ المعاملة من ناحية الضرب والتنمّر
والتهزيء , وهالشي ممكن يأثّر عليه من جانب نظرته للحياة على انها نكته .. مثل ما قال "كنت اعتقد
بأن حياتي تراجيدية , لكن اتضح لي مؤخراً أنها كوميدية"

وفعلاً لما نسمع القصة باختصار راح نشوف الجانب المُضحك منها اللي هو يندرج من ضمن
الكوميديا السوداء او الكوميديا المظلمة , ما هي القصة؟

"شخص حاول يخلّي العالم مكان سعيد .. اكتئب"

 

[7sN]

السلام عليكم

غبت فترة طويلة عذراً ، مبارك عليكم الشهر جميعاً وأتمنى ان رمضان خفيف عليكم
مثل ما هو خفيف ولطيف علي .. ممكن صار خفيف ولطيف بعد الاختبارات؟

طبعاً غيابي كان بسبب انشغالي بالحياة ، المتابعين يعرفون اني قاعد اشتغل على لعبة
للآن ما خلصنا من القصة ، هي مو قصة طويلة أبداً بالعكس قصيرة لكن الشغل بنفسه
فيه نوع من الصعوبة .. هذي أول لعبة راح يسوونها المجموعة وهذا حسابهم بالانستقرام :

verhalenstudios

غير الشغل على اللعبة كان عندي اختبارات وكنت خايف منهم ، كنت بس ابي اخلص من المادتين
اللي عندي واعدّيهم لأن مو أول مرة آخذهم ، احس بهالكورس صارت عندي عقلية انتهاز الفرصة
بدون تأجيل على عكس الكورسات السابقة

وغير الاختبارات حالياً قاعد أتدرب على كتابة القصص ، لو في احد ما يدري ترا في قصة قصيرة كتبتها
وحطيتها بقسم القصص ، هذي هي :

موضوع مميز - The Chosen One | A Short Story

الردود اسعدتني كثير ، مو لأن القصة عجبتهم طبعاً لأن في ناس يشوفونها ناقصة وفي ناس ما عجبتهم
وفي غيرهم قالولي ان المنظور اللي اتخذته ما ناسب القصة ، هذا الشي عجبني ، في أفكار بالقصة لقيت
منها آراء كثيرة عن اللي قصدته وقت كتابتهم ، حبيت ردة الفعل وكانت تجربة جميلة تعلمت منها كثير ..
على سبيل المثال لو احد متابع المدونة من البداية بيعرف اني كنت مستصعب حالة كتابة الحوارات وإني
كنت شايل همهم ، بس الحين كتابة الحوارات صارت نقطة قوتي لدرجة اني صرت مؤلف الحوارات باللعبة
اللي اشتغل عليها

وبالنهاية قاعد اتابع انميات قديمة ، خلصت فيلمين انمي "صراع الجبابرة" اللي احتمال اكتب مراجعة
عنه بموضوع ، بس مادري لو في احد راح يقدر يسوي تصميم لأن هالأنمي تقريباً ماله أي صوره بالنت

والحين قاعد اتابع الأنمي الجميل جداً Mobile Suit Zeta Gundam
وقاعد اقرأ المانجا الرائعة للمحقق كونان

مادري لو الحين "رجعت" ، الشغل للآن ما خلص هذا وغير تعب جدّي المستمر للآن رغم ان الوضع
مستقر لله الحمد ، بس راح احاول اكون متواجد بقدر المستطاع

​

 

[7sN]

السلام عليكم ورحمة الله وبركاته

طبعاً المفروض احط مدوّنتي بـ "مجتمع المدوّنين" بس ما حطيتها لأن مدوّنتي فيها 12 صفحة
ولازم احذف الأكواد اللي طلعوا بسبب التطوّر ، حاولت احذف بس تكاسلت لما شفت اني لازم
اعيد نفس الحركة لـ 12 صفحة فـ قررت اني أتم هنا ما اروح مكان .. فكرت اني ابدأ مدوّنة
جديدة بس رفضت الفكرة لأني أساساً بدأت بكتابة هذي المدوّنة للاحتفاظ بذكرياتي فيها ، و
لهالسبب ما راح افتح وحده جديده .. ممكن هالشي يعني ان المتابعين راح يصيرون اقل ، ولكن
هذه هي الحياة

عالعموم انا رجعت بهالتدوينة لأني بتكلم عن شي لاحظته بالأنميات ، شي يسوونه اغلب
الأنميات ونتايج هالشي دايماً مختلفة .. وهو الفيلر

كلنا نعرف حلقات الفيلر بالأنميات على انها الحلقات اللي ما تأثر على الحدث الرئيسي بالقصة
ولا تطوّر شخصيات القصة ولا تقدّم بأحداث القصة .. هي فقط حلقات موجودة لعدم قرب
الأنمي من المانجا .. لأن لو احداث الانمي اقتربت مع احداث المانجا راح يضطر الأستوديو انه
يوقّف الأنمي إلى ان تتقدّم المانجا اكثر وبعدين يرجع ينعرض الأنمي

في السنوات الأخيرة الأستوديوهات عرفوا الحل المناسب لمشكلة حلقات الفيلر وهو حل "المواسم" !

صار الأنمي يمشي على شكل مواسم متتالية بحيث ان كل موسم يحتوي آرك معيّن وعند
الانتهاء من الآرك ينتهي الموسم الأول ويبدأ الثاني بعده بسنة ( او 4 سنوات بحالة اتاك
اون تايتن الموسم الثاني ) .. بس بالسابق هالفكرة ما كانت موجوده نفس وجودها بالشكل
الحالي ، كان ينعرض الأنمي المشهور بكل حلقاته بدون توقّف ولو قرّبت الأحداث من المانجا
على طول بنشوف الأستوديو يملأ الأنمي حلقات فيلر .. على سبيل المثال ( ناروتو - ون بيس
- دراغون بول - بليتش وغيرهم.. )

الكل يتّفق على عدم حب حلقات الفيلر ، لدرجة ان الناس لما يتابعون الأنميات المذكورة
يشوفون لستة الحلقات الفيلر لتجاهلها .. وطبعا ما اقدر ألومهم على هذه الفكرة .. ولكن
عندي رأي شوووي مختلف بخصوص الفيلر

الفيلر ممكن انه يكون أسوأ شي بالدنيا وبنفس الوقت أحلى شي بالدنيا

وعشان اوضّح هالشي لازم اذكر مثال .. وطبعا مثل ما الكل متوقع ، مثالي
يتضمن أنمي دراغون بول .. لكن حتى لو كنت غير متابع لدراغون بول
أتوقع انك راح تفهم المقصد

راح اتكلم تحديداً عن Dragon Ball Z لأنه هو الأنمي اللي يعطي شعور أهمية
الفيلر بشكل كبير وبنفس الوقت يقلل من أهميته بشكل كبير

كيف يتم استخدام الفيلر في Dragon Ball Z ؟

بالمانجا نشوف شخصية "بيكولو" يأمر "غوهان" بأنه راح يكون وحيد بالصحراء
لمدة 6 شهور ، خلال الـ 6 أشهر لازم غوهان يصمد أمام المصاعب اللي راح
يواجهها ويستخدمهم كـ دافع للتطوّر بقوته وطاقته ، بعد ما خلص كلامه بيكولو
طار وترك غوهان وحيد بالصحراء خايف .. من بعد هالحدث المانجا تقفز 6 شهور
فجأه ونشوف غوهان قوي و واثق من نفسه مما يعني أنه صمد وتطوّر بالشكل
المطلوب منه وصار جاهز لقتال السايانز

طبعاً انا ضد هالتطبيق للفكرة ، كان الأفضل اننا نعيش مع غوهان هذي الأشهر
عشان نحس فيه ونشوف سقوطه وصعوده خلال العوائق اللي يمر فيها ولكن
للأسف المانجا ما انتهزت هذي الفرصة .. بس منو انتهزها؟ الأنمي

الأنمي استغل الـ 6 شهور هذه وما قفز لآخرها ، شفنا مغامرة غوهان بأفضل
شكل ممكن ! شفناه يفكّر بالرجوع للبيت وشفناه يختلط مع الأطفال الفقراء
وشفناه يخاف من الديناصورات والحيوانات الوحشية بالصحراء .. وكل هذا
ساهم بحبنا له وتعلقنا فيه خصوصاً لما نشوفه بالنهاية متمكن من الصمود
أمام هذي المخلوقات .. وهذا اكبر مثال على الاستخدام الصحيح للفيلر !
لأن الأنمي هنا عرف ان المانجا ما راح تعرض المغامرة ، وعرف ان بنهاية
المغامرة غوهان راح يتطوّر .. فـ بس كان على الأستوديو انهم يملؤون
الفراغات اللي نحتاجها كمشاهدين

بالجانب الثاني ، انمي Dragon Ball Z هو من أسوأ الأمثلة على حلقات الفيلر
لسبب واحد .. القتااااال

لو احد يبي يشوف قتال انمي ، ما انصحه يشوف من انمي Dragon Ball Z ، القتالات
جداً طويلة والأستوديو يستغلّونهم بشكل ممل .. على سبيل المثال : غوكو ضد فريزا

هالقتال هذا مشهور جدا بعالم الأنميات بسبب القتال ، مو لأنه جيد ، بل لأنه غير منطقي
بقوانين الأنمي نفسه .. خلال القتال فريزا يقول لـ غوكو ان الكوكب راح ينفجر بعد 5 دقائق
.. فـ تمام 5 دقائق؟ اتفقنا .. القتال استمر 20 حلقة احس ما يحتاج اشرح ليش هالشي
سيئ

وهالشي ما ينتهي عند غوكو ضد فريزا ، يبدأ قبله ويستمر لآخر حلقة .. لهالسبب دايماً
انصح الناس بمشاهدة Dragon Ball Kai بدل من Dragon Ball Z .. لأن دراغون بول
كاي يقطع الفيلر والقتالات تنتهي بسرعة على عكس Z

وهنا نوصل للخلاصة .. الفيلر مو سيئ كـ فكرة ، لكنه يحتاج تطبيق مميّز ، لأنه خلال
هالتطبيق راح نشوف نتيجة ما كنا نعرف اننا نحتاجها من قبل

كتبت هالتدوينة لأني ابي انصحكم بمشاهدة Dragon Ball الجزء الأول
كل حلقاته حلوة وتقريباً مافي فيلر سيئ

​

 

[7sN]

السلام عليكم ورحمة الله وبركاته

خلال غيابي استغلّيت وقت فراغي بتكْملة الأفلام والأشياء اللي كنت أتابعها او مهتم فيها ،
والحمدلله ما قصّرت بنفسي .. قرأت مانجا Fist of the North Star كلها أخيراً - شفت انمي
Mobile Suit Gundam: The Origins (2015) .. شفت مسرحيتين للفنان اللبناني جورج خباز
(مطلوب + مع الوقت يمكن) .. قرأت كتاب The Hidden Tools of Comedy + The Anatomy
of Story .. لكن أهم شي سويته (وموضوعي بالتدوينة) هو إني شفت 3 أفلام كنت متحمس
لهم من زمان وهم:

1- Once Upon a Time... in Hollywood
2- Joker
3- The Irishman

وحسيت اني ودي أتكلم عنهم فحبيت أبدأ بفيلم Once Upon a Time... in Hollywood
بما إني شفته أول واحد (وأعتقد إنه نزل قبل الأثنين؟)

فيلم Once Upon a Time... in Hollywood هو من اخراج المبدع Quentin Tarantino
صاحب الأفلام الناجحة : Django Unchained - The Hateful Eight - Pulp Fiction ومن
بطولة Leonardo DiCaprio - Brad Pitt - Margot Robbie

الفيلم يتكلم عن قصة حقيقية تتضمّن مقتل الممثلة شارون تايت في هوليوود في سنة
1969 ، ولكن سمح المخرج لنفسه بإنه يضيف شخصيتين خياليتين في الفيلم وهما "ريك دالتون"
و "كليف بوث" .. ريك دالتون هو ممثل ناجح و "دلوع" بينما كليف بوث هو الرجل البديل اللي
يتبادل أدوار ريك الخطرة ويقوم بها بأكمله وجه .. فهل إضافتهم في الفيلم سيغيّر مجرى التاريخ؟
وما هو قدر شارون تايت وربطها بـ ريك و كليف؟

الفيلم لما نزل كنت فقط أسمع آراء سلبية عنه ، وحتى اليوتيوبرز اللي ضايفهم كانوا يمدحون
الفيلم ولكن بلا استيعاب للي حصل وكأنهم مو مستوعبينه رغم اعجابهم فيه ، وطبعا هذا كان
خبر سيّئ لي كوْني أحب المخرج وكنت متحمس لهالفيلم بشكل لا تصوّر له ، خصوصاً وأن
الشخص اللي أثق بآراءه كان بكل مرة يشوف فيلم حلو يصنفه كفيلم أفضل من هذا ، وهالشي
خلّاني أشك أكثر بالجودة

نزل الفيلم .. ولما شفته بالبداية ما استوعبت أغلب الأمور رغم إعجابي فيه ، وعشان نكون واقعيين
شوي ، صعب ما أُعجب بإبداع كوينتن تارانتينو بالتصوير الجميل والحوار الممتع الطبيعي و الموسيقا
الكلاسيكية اللي تتواجد بكل أفلامه .. لكن ما كنت فاهم صراع الفيلم؟ وصراع الشخصيات؟ .. ما كنت فاهم
ليش شارون تايت طوال الفيلم تظهر وحواراتها قليلة ومالها تأثير (واضح) على الفيلم وأحداثه؟ ما معنى
ماضي شخصية كليف بوث وأحداث القارب مع زوجته؟ كانت هذي أسئلة ما تتركني بحالي وانا أفكر
بالمعاني .. وهنا حسيت بالمتعة الأكبر بخصوص فيلم Once Upon a Time... in Hollywood لأني
أحب الفيلم اللي يترك مجال للمُشاهد للتفكير بالمعاني وللتفاعل مع الفيلم للوصول إلى المطلوب ،
ففي اليوم الثاني قررت إني أعيد الفيلم وأركّز بأقل الأشياء من أجل وجود الإجابات اللي أبحث عنها

راح أحرق الأحداث والمعاني .. بس لو تبون تعرفون رأيي في الفيلم باختصار ولو كنت أنصح فيه
أو لا .. فأنا أنصح فيه .. وبشدّة .. الحين اللي ما يبيني أحرق عليه أتمنى يشوف الفيلم وبعدين يرجع

أحب أبدأ بتوضيح أن محاولة "تغيير التاريخ" ليست غريبة على تارانتينو ، فأشهر أفلامه معتمده
بشكل كامل على تغيير التاريخ .. وكمثال لنأخذ فيلم Inglorious Basterds اللي مبني على أساس
تجميع فريق لقتل هتلر .. وكمثال آخر ناخذ فيلم Django Unchained اللي يحكي قصة عبد و وقوفه
أمام المستعبدين في زمن عنصري .. لهذا السبب فيلم Once Upon a Time... in Hollywood لا
يختلف أبداً عمّا سبقه من حيث الأساس والمبدأ ، حيث أن الفيلم كان عن انقاذ شارون تايت من
قدرها الواقعي .. ولكن هنا تبدأ المشكلة عند الناس وهي : لماذا انقاذ شارون تايت يعتبر مهم؟

وطبعا هذا سؤال جميل ومهم جداً ، بالفيلمين اللي ذكرتهم واضح جداً أهمية قتل هتلر وأهمية
صعود المظلوم على العنصريين وهذي قصص إنسانية ومشبعة لما حصل في التاريخ نظراً
لتأثيرهم على طرق تفكيرنا وحياتنا الآن .. ولكن ما أهمية شارون تايت بالضبط؟ وهل الفيلم أساساً
كان فقط يبي ينقذ شارون تايت؟ ولا له هدف أكبر؟ تساءلت مع نفسي و وصلت للإجابة اللي وصّلتني
لمعنى الفيلم كله .. الفيلم ليس عن إنقاذ شارون تايت .. بل عن إنقاذ أمريكا الستّينات

أوكي .. ومعنى ذلك؟

أمريكا في الستّينات كان يسود فيها الأمان ، الحرية ، والسعادة ، في مقتل شارون تايت تم محيْ
المميزات هذي وأصبح الناس بحالة نفسية مرعبة ، زاد الخوف ومعه الكراهية والأبواب أصبحت
مغلقة بإحكام بعد ما كانت مفتوحة للجميع .. موْت شارون تايت كان موْت أمريكا السعيدة ، ولهذا
بالضبط ، الفيلم ركّز على إنقاذ شارون تايت .. فبإنقاذها يتم إنقاذ أمريكا من التغيير السلبي اللي
حصل في الواقع

لهالسبب نشوف شارون تايت في الفيلم دايماً سعيدة وتعبّر عن هالسعادة بالرقص وذهابها إلى
السينما لرؤية فيلمها وملاحظة ردود أفعال الناس عليها .. بالفيلم كانت شارون تايت تمثّل الجانب
الإيجابي من أمريكا ، بل تمثّل أمريكا ، وهذا كان المعنى من استخدام تارانتينو لها بهالطريقة طوال
الفيلم

بالنسبة لشخصيتيْ ريك دالتون و كليف بوث والهيبيّين فالحالة أعمق .. ريك دالتون هو انسان غير
جيّد بأي شي بالحياة غير التمثيل ، وحتى التمثيل صار يسبب له سقوط في اسمه وأداءه ، ضف إلى
ذلك بأنه لا يتحمل أي شخص أقل منه غير كليف - لأنه طبعا هو البديل ومن غيره ما راح يكون لـ ريك
أي فائدة - وهذا واضح لما يشوف الهيبيّين بالشارع ودايماً يسبهم ويعبر عن كرهه لهم .. بينما كليف
في الجانب الآخر دايماً يلاحظ الهيبيّين ويمد لهم يد العوْن بلا خوف بل وحتى راح عندهم المزرعة وكان
في مجال إنه ينضم لهم! فكّرت في الربط هذا بين ريك وكليف والهيبيّين لما شاهدت الفيلم مرة أخرى
وما معنى الربط ومعنى النتيجة اللي صارت بالنهاية (من أفضل النهايات بالتاريخ على فكرة) وتوصّلت
إلى الإجابة

علاقة ريك بكليف هي علاقة اتكالية ليست إلا ، ريك يعتمد عليه بالتمثيل كوْنه بديل ، ويعتمد عليه
بالحياة (حتى بقيادة السيارة) فصراع ريك في الفيلم هو أنه يكتمل كإنسان من جميع النواحي ، كان
عليه إنه يكون ممثل ناجح ورجل قوي ومثل ما ذكرت فوق ; هو ضعيف في الأثنين

علاقة كليف بالهيبيّين هي علاقة تشابه ، الشي اللي يجمعهم مع بعض هو ان كليف انسان معتمد
على نفسه وحر بقراراته ولا يخاف من أحد وعمل شي لا يغتفرله - قتل زوجته في القارب - وهذي
المواصفات تنطبق على الهيبيّين اللي عايشين مع بعض بالمزرعة ويعتمدون على أنفسهم و
أفعالهم اللي لا تُغتفر

في الفصل الثاني من الفيلم يبدأ توسّع الشخصيات .. ريك يروح لتصوير مسلسل بنفسه من غير
كليف ، كليف يروح لمزرعة الهيبيّين .. هالفصل هذا يبيّن مدى التزام الشخصيتين بمبادئهم لما يكونون
غايبين عن بعضهم .. الامتحان لريك كان إنه يصير "رجل" بمعنى الكلمة ويترك الدلع ويعتمد على نفسه
في التمثيل .. بينما كان الامتحان لكليف هو أنه لا يستسلم للتشابه الموجود بينه وبين الهيبيّين وينضم
لهم على حساب إنسانيته .. وطبعا أثنينهم نجحوا بالامتحان بعد قرب خسارتهم

ريك أعطى أداء عالي وصار مطلوب كممثل ، كليف ترك حياة الهيبيّين وركّز على نفسه وحياته مع ريك
كبديل .. ولكن هذا ما كان كافي ، ريك إلى الآن معتمد على كليف بالحياة .. وهنا نذهب إلى الفصل الثالث
حيث يتم "الالتقاء"

في هالفصل يتم هجوم الهيبيّين على شارون تايت ولكن بالخطأ دخلوا بيت ريك اللي بداخله كليف (المنتشي)
وريك اللي بحمام السباحة ويسمع أغاني وما يدري عنهم .. طبعا اللي شاف الفيلم يعرف كمية العنف
الموجوده بهاللقطة وكيف ان هالشي طبيعي جدا مع تارانتينو ، لما انطعن كليف ومات أثنين من الهيبيّين
صارت بس وحده باقيه تصرخ وراحت حمام السباحة وطاحت فيه بينما راح ريك من الخوف وجاب قاذفة
لهب وحرقها بينما هي في الماء .. طبعا اللقطة ممتعة ومضحكة لكن هل فيها معنى للشخصيتين؟
طبعا!

موْت الهيبيّين كان مُستحق لما سووه بحياتهم من أفعال لا تُغتفر ، بينما إصابة كليف كانت تعبير عن توْبته
من بعد قتل زوجته ، لو ما تاب كان صار قدره نفس قدر الهيبيّين .. بالجانب الآخر تم تصوير ريك على أنه
يهرب من البنت الصارخة وهذا كان تعبير عن أن شخصيته لم تتطوّر .. ولكن! يفاجئنا بأن شخصيته فعلاً
تطوّرت بخروجه مع قاذفة اللهب وحرقها .. في اللحظة هذي صعد ريك من كوْنه فقط ممثّل ناجح إلى
رجل يعتمد على نفسه في الأوقات الصعبة .. انتقل من بطل أفلام إلى بطل في حياته الشخصية ، وبسبب
هاللقطة فهو اكتمل كإنسان ولا يحتاج مساعدة كليف اللي راح يروح المستشفى بسبب إصابته < وطبعا
واضح إن بذهاب كليف إلى المستشفى وشلله الأبدي المؤلف يقول لنا بالشكل الصريح أن ريك اكتمل

وطبعاً تم قتل الهيبيّين وكل هذا ينتهي بالنهاية الجميلة لما شارون تايت تنادي ريك إلى منزلها
وهذا يبيّن لنا تحقيق هدف ريك بالتمثيل مع زوجها المخرج رومان بولانسكي وزيادة شهرته ونجاحاته
.. وهكذا ينتهي الفيلم بتطوّر شخصية ريك وبإنقاذ شارون تايت .. وبإنقاذ أمريكا

ما توقّعت أكتب لهالدرجة لكن أتمنى ان اللي شاف الفيلم استمتع بكلامي او اللي ما فهم
الفيلم استوعب اللي قصدته .. بس أحب أوضّح من بعد كلامي أن صحيح أقول "هذي المعاني" و
"المؤلف قصد" ولكن لا يوجد شي يأكّد أن اللي كتبته يعكس قصد تارانتينو بالضبط .. هذي بكل
بساطة محاولة مني لفهم واستيعاب الأحداث للوصول إلى معنى يمسك الفيلم ويجعله وحدة
متكاملة .. وأحس بأن هذا التحليل كان جيّد لرؤية الفيلم من خلاله ، لو أي أحد عنده تعليق أو إضافة
أو حتى اختلاف فأنا أرحّب بهالشي وأتمنى نتناقش فيه

وشكراً ​

 

[7sN]

السلام عليكم ورحمة الله وبركاته

رجعت مره ثانية عشان أتكلم عن الفيلم الثاني من بين الثلاثة اللي ذكرتهم بالتدوينة السابقة
وهو فيلم Joker من اخراج وتأليف تود فيليبس وبطولة واكين فينيكس اللي بسبب هذا الدور
أخذ جائزة الأوسكار

اللي تابع مدوّنتي من البداية يعرف إني أحب شخصية جوكر وإنه من أفضل الأشرار عندي وخصوصاً
بفيلم The Dark Knight ، وتحمست إني أشوف هالفيلم ، ولو ترجعون لأول تدوينة بهالصفحة بتشوفون
إني تكلمت عن الإعلان وعن حماسي ومن أي ناحية متحمس

أحب أوضّح بالبداية إن فيلم جوكر ليس مقتبس من الكوميكس ، ولا يتّبع أي عالم سينمائي ، هو مجرد فيلم
تم صنعه بشكل منفصل عن أي فيلم أبطال خارقين ثاني ، وهذا كان خبر جيد بالنسبة لي لأني أكره العوالم
السينمائية وأكره الحدود المتواجدة بجميع أفلامهم .. فهل هالفيلم قدر إنه يصنع لنفسه شخصية خاصة فيه
بعيدة عن أفلام الأبطال الخارقين؟ هل قدّم شي مختلف وفنّي ومحترم؟ هل أبدع المخرج تود فيليبس بإنه
يبني شخصية مختلفة بشكل ابتكاري؟ هذي الإجابات اللي راح أحاول أجاوبها وأحاول أوضّح وجهة نظري
بالموضوع

كالعادة راح أبدأ أحرق أحداث الفيلم وصراع شخصية جوكر فاللي يبي يشوف الفيلم أنصحه ما يكمل قراءة ،
ولو تبون تعرفون هل أنصح فيه أو لا فأنا لا أنصح بهالفيلم .. لو تبون أفلام شبيهة بنوع الفيلم تفضلوا :

1- King of Comedy
2- Taxi Driver
3- Nightcrawler

مثل ما يعرفون الأغلبية ، فيلم جوكر يعتبر من نوع دراسة الشخصية ، بحيث إن يقدّم شخصية رئيسية
عنده مشاكل نفسية وأخلاقية تتوضّح خلال الفيلم وتكبر وتأثر بالشخصية نفسها وفي المجتمع ، لهالسبب
كان بالنسبة لي الفيلم واضح هدفه وكنت مستعد أشد استعداد لهالنوع كوْني أحبه ولو إني ما تعمقت بأفلامه

لو أبي أبدأ بإيجابية فطبعا راح أذكر تمثيل واكين فينيكس ولكن أحس الكل تكلم عنه بالشكل المطلوب
وهو يستاهل هالتركيز من الجماهير لأنه كان يستحقه من زمان وما كان يحصله لأنه ما كان يسوي
أفلام تجارية .. جوكر فيلم تجاري طبعا كوْنه يعتمد على أشهر شخصية بعالم القصص المصورة
ولكن مشاهدة أداءه بالفيلم يوضّح سبب قبوله بالدور لأن الفيلم يتعمق بحالة دراسة شخصية آرثر

أحب الحين أبدأ بالكلام عن القصة ورأيي فيها وسبب رفضي للتوصية بالفيلم

فيلم جوكر يتكلم عن آرثر فليك ، مهرج حلمه يكون ستاند أب كوميديان ويطلع على برنامج موري (قدوته
الكوميدية) عشان يكون له قيمة بحياته ويكتسب حب أمه والامرأة اللي يحبها وفخرهم فيه للتخلص من
الحياة الكئيبة اللي يعيشها

قصة الفيلم طبعا جميلة ومافيها شي خطأ .. إلا شي واحد ، وهو أن الفيلم نسخة من فيلم آخر اسمه
The King of Comedy .. قصة جوكر نسخة من قصة هالفيلم ، رغبة آرثر تشبه رغبة بوبكن
بطل الفيلم ، والأحداث النفسية اللي يمر فيها آرثر مشابهة بشكل كبير لشخصية بوبكن من King
of Comedy

وهنا المشكلة الكبيرة بالنسبة لي ، انا ما أعرف كيف ممكن أمدح فيلم جوكر ، هل أمدحه على
دراسة وتوضيح شخصية آرثر؟ طيب شخصية بوبكن موجودة وأقدر أمدحه لكوْنه أول من فعلها
بين الفيلمين .. هل أمدح لما آرثر تخيّل نفسه في البرنامج ويتم تقديمه للناس؟ بوبكن صارله نفس
الشي بالضبط في فيلمه! أمدح إن جوكر يحب وحده ويطلع معاها في مواعيد غرامية وبعدين يتضح
إنه خيال؟ نفس الشي صار في King of Comedy .. مافي شي تم تقديمه فيلم جوكر ولم يتواجد
بفيلم King of Comedy

المخرج تود فيليبس صرّح بأن هذا شي مقصود لأنه يحب أفلام مارتن سكورسيزي (مخرج King
of Comedy) ولكن هل الإلهام والحب يكفون لإنك تنسخ فيلم كامل بقصته وبرغبة شخصيته
الرئيسية والأحداث اللي يمر فيها؟ لو كان هذا كافي إذن ليش تسمّي نفسك مخرج أو مؤلف؟ لو
كانت صناعة الأفلام تكون بالنسخ كان كل يوم صرنا نروح لفيلم علاء الدين المعاد للمرة المليون!
مشكلتي مع فيلم جوكر هو انعدام الابتكار بالجوانب المهمة لتمييز شخصية آرثر عن شخصيات
أفلام دراسة الشخصية ، وما وجدت تمييز او حتى محاولة للتمييز..

جوكر شخصية أساساً موجودة بعالم القصص المصورة وكان هدفه إنه يكون ستاند أب كوميديان
بقصة The Killing Joke ، لما سمعت ان تود فيليبس يبي يبتعد عن عالم القصص المصورة
فرحت بس اتضح إنه ابتعد عن عالم القصص المصورة والتصق بعالم أفلام مارتن سكورسيزي
مما يخلّيني أفكر ليش من الأساس ابتعدت لو انك بتقلد بالنهاية؟

يعني تخيلوا معاي

تخيلوا أنمي جديد اسمه المحقق كولين ، كولين ولد عبقري بالثانوية ويحب بنت اسمها جان توري ، يركض
وراء عصابة ويعطونه مخدّر ليتحول إلى ولد وبعدين يكتشف إن هذي العصابة إسمها العصابة البيضاء

هل راح تحبون المحقق كولين؟ هل راح تمدحونه؟ هل راح تعرفون تمدحونه أصلاً؟ هذا بالضبط
اللي أقصده مع فيلم جوكر

طبعا لو كان في أحد يختلف معاي فأنا أرحب بالنقاش وأبي أعرف سبب حب الناس للفيلم وهل هو
سبب خاص بالفيلم نفسه ولا بيطلع مشابه لأفلام مارتن سكورسيزي؟

وشكراً ​

 

[7sN]

السلام عليكم ورحمة الله وبركاته

وأخيراً وصلت للفيلم الثالث اللي شفته وأعدت مشاهدته أمس وهو فيلم The Irishman من اخراج
Martin Scorsese وبطولة Robert Di Niro - Al Pacino - Joe Pesci

الفيلم يتكلم عن القصة الحقيقية للقاتل المأجور فرانك شيران المقتبسة من كتابه (I Heard You
Paint Houses) ودخوله عالم المافيا وارتباطه مع شخصيتيْ راصل بوفالينو وجيمي هوفا

هذا كل اللي أبي أقوله بخصوص وصف القصة وأترك الأحداث للي عنده الرغبة بمشاهدة الفيلم

فيلم The Irishman كان من أكثر الأفلام اللي انتظرتها بحياتي ، كان في أخبار عن تجمع مارتن
سكورسيزي وآل باتشينو وروبرت دي نيرو في السنوات الماضية وكنت متابع بشكل قوي خصوصاً
في البداية ، لهالسبب آمالي كانت عالية خصوصاً وأن مارتن سكورسيزي هو أفضل مخرج عندي
وأفلامه تلهمني بالدرجة الأولى .. الأسئلة اللي بحاول أجاوبها هي هل الفيلم نجح واستغل وجود
عمالقة الفن وأساطيره بفيلم واحد؟ هل كان التجمع موفّق؟ ما هو تأثير الفيلم علي بالضبط؟

مثل الفيلمين اللي تكلمت عنهم فوق راح أبدأ أحرق الأحداث (والمعاني؟) ولو تبون تعرفون رأيي
وهل أنصح بالفيلم أو لا .. أنصح فيه وبشدة .. اللي يبي يشوف الفيلم أتمنى يشوفه وبعدين يرجع
يقرأ كلامي

بس لازم أنبّه الجميع أن الفيلم مدّته 3 ساعات ونصف .. الفيلم يبيكم تعيشون معاه

بعمل كبير وضخم نفس عمل The Irishman كان طبيعي من آمال الناس بإنها تكون عالية للمستوى اللي وصلت له
، وخلال مشاهدتي للفيلم مرتين حسيت ان مارتن سكورسيزي كان عارف ومستوعب هالشي ، كل لقطة تطلع بالفيلم
لازم يكون لها أهمية ويكون فيها قدر كبير جدا من العطاء والأداء التمثيلي والموسيقي المناسب لكل شخصية ولكل مكان
وزمان ، ذكرت العطاء المناسب للشخصية لأن فعلاً شخصية فرانك شيران كانت تحتاج شخص يقدر يمثّل بعيونه وملامحه
أكثر من كلامه وحركته ، واختيار روبرت دي نيرو للدور هو أنسب اختيار لأنه معلّم بالهدوء ومعبّر بالنظرات

لقطات كثيرة ما يقول فيها حرف ولكننا نفهم ، نفهم اللي يفكر فيه ونفهم عواطفه ولا كان يحتاج إنه يبكي أو يصرخ ،
لأن بمجرد بكاءه تنتهي شخصيته وتتحطم ، شخصية فرانك شيران بالفيلم قُدِّمت بأفضل شكل ممكن وهذي كانت نقطة
قوة الفيلم ، ليست فقط المحافظة على شخصية فرانك شيران بل أيضاً الشخصيات الأخرى الممتازة مثل راصل بوفالينو
اللي لو كان بالفيلم دقيقة زيادة كان بكيت بسببه ، وشخصية جيمي هوفا اللي أعطت لـ آل باتشينو الأداء المرغوب والمطلوب
منه بشده بكل مره يظهر بفيلم .. الآن أقدر أقول إني أخيراً شفت فيلم جديد لـ آل باتشينو وهو يصرخ ويضرب الطاولة

ما أحس إني أقدر أتكلم عن كل التفاصيل طبعاً لأن الفيلم أكبر من إني أحلله ، ولكن أحب أتكلم عن أكثر فكرة أثّرت
فيني بالفيلم وصرت أتابع الفيلم بنظرتها واستمتعت فيه أكثر .. الفكرة هي الحياة والموت

الفيلم يركّز بشكل كبير على فكرة الموت لدرجة إن بكل لقطة يطلع شخص جديد توقف الكاميرا عليه وتحط خبر
وفاته او مقتله .. أول مره شفت الفيلم ما فهمت ليش الفيلم يعرض هذي المعلومات بهذي الطريقة؟ هل هو أسلوب
كوميدي مارتن سكورسيزي استخدمه؟ أو أنه أسلوب يذكرنا بأن هذي الأحداث واقعية؟ بمشاهدتي للفيلم مرة أخرى
اكتشفت (أو فهمت) أن هذي الحركة ماشيه بشكل مناسب وصحيح مع فكرة الفيلم .. الفيلم يتكلم عن التقدم في العمر
وتغيير الحياة وظروفها بناءاً على التغيير الزمني ، بهذي اللقطات الفيلم يذكّرنا بأن مهما كان الشخص قوي بفترة
من حياته ، راح يتقدم الزمن ومصيرها الأمور تتغير وتنتهي

الفيلم كأنه يتكلم عن انتهاء عصر معيّن للمافيا ، ولكن هو أيضاً انتهاء عصر معين للمخرج مارتن سكورسيزي
والممثلين أمثال روبرت دي نيرو و آل باتشينو و جو بيشي ، صنّاع الفيلم كبروا مع شخصيات الفيلم ، أفلام
المافيا بالسابق كانت هي الأعلى والأنجح ولكن كل شي له نهاية .. بالفيلم فرانك شيران لا يمثّل نفسه فقط بل
يمثّل روبرت دي نيرو وآل باتشينو وجو بيشي ومارتن سكورسيزي وطبعا نوع أفلام المافيا

لهالسبب أشوف استخدام تقنية تصغير العمر أو De-aging كانت بشكل غريب مناسبة للفيلم وللحياة الواقعية ،
الفيلم يروي قصة حياة قاتل مأجور في المافيا ولكنه أيضاً يروي قصة حياة مخرج وممثلين عندهم عطاء وبصمة
بتاريخ السينما من خلال أفلام المافيا ، ومافي نهاية أفضل من أن مارتن سكورسيزي يرسل رسالة حب لهالعصر
السينمائي من خلال فيلم يجمع نجوم العصر هذا بقصة ثقيلة وطويلة وشخصيات عميقة ومعبّرة ، مدة الفيلم ساعدت
فكرة الفيلم بالحياة .. لهالسبب ما أشوف ان الفيلم فيه عيب بالمدة أبداً لأنه كان يبيك تعيش معاه ، وفعلا تحققت الرغبة

لما انتهيت من الفيلم مرتين قعدت أفكّر بالفن ومعنى الفن .. وهل الفن له معنى واحد معيّن؟ سؤال الفن كان دايماً
ببالي من بداية افتتاح المدوّنة وبكل مره أكتب عنه أكون مو متأكد لو كان هذا المفهوم الصحيح له ، لما شفت
فيلم The Irishman وشفت مقابلات مارتن سكورسيزي كانوا يسألونه ليش الفيلم مدته 3 ساعات ونصف؟
هذا كثير! قال ان الناس الآن تركيزهم صار أقل من السابق بسبب الأفلام القصيرة ونظام الحياة ، ورغم هذي
العوائق إلا أنه أخرج فيلم مدته تفوق تركيز الناس .. وكأنه يستخدم الفن ويستخدم مفهوم الفن عنده للوقوف أمام
التغييرات عشان يقول لنا "هذا هو الفن" .. وقفة مارتن سكورسيزي أمام عوائق ممكن تؤدي لفشل أكبر فيلم
سواه هي وقفة ملهمة بكل تأكيد ، وهذا عالأقل لازم يخليك تفكّر عزيزي القارئ ، هل الأفلام فقط للمتعة؟ أم
هي وسل للتعبير؟ أم هي رسالة؟

ماهو الشي اللي يجعل من مخرج أنه يجازف بفيلم؟
?What kind of man makes a phone call like that

​

 

[7sN]

السلام عليكم ورحمة الله وبركاته

بما اني تكلمت عن الأفلام الثلاثة وخلصت منهم حبيت أسولف بلا هدف وأشوف
وين ممكن أوصل بكلامي

خلال الفترة الماضية كانت عندنا ظروف وكان في مشاكل نفسية وشخصية ، وخلالهم ما كنت
متحمّل مواقع التواصل ولا كنت متحمّل الناس ولا كان لي نفس أتحملهم أو حتى أحاول أتحملهم ،
تويتر هو أكثر موقع تعّبني بالحياة على فكرة

ببدايتي فيه كنت أحبه وكنت ضايف أغلب اللي مشترك بقنواتهم باليوتيوب ، بس بعد مدة شفت
ان كل كلامهم كان سلبي ، إما انهم يتكلمون عن الاكتئاب والأفكار الانتحارية أو يدافعون عن
أفكار ما تمد للمنطق او البديهية بصلة .. الناس ما صاروا يفكرون بعقلهم وبس صار الدافع الوحيد
هو الحرية .. هل الحرية هدف لهالدرجة؟ لدرجة إننا نضحي بجوانب حياتنا المهمة نفس الأخلاق
والمسؤوليات والمحافظة على الأسرة؟

المهم لما شفت إني كنت بوسط الأمور اللي ذكرتها قررت أبتعد عن مواقع التواصل وعن كل مكان
فيه تواصل مع بشر بالنت ، ولما ابتعدت حسيت كأني تحررت من لعنة كان الموضوع منعش و
خلاني أستوعب عدد الأشياء اللي لازم أطوّرها بنفسي وهذا اللي ركزت عليه ، وشعور جميل انك
تعيش حياتك بحثاً عن الأمور اللي بتنفعك بالحياة وتخليك قادر على حمل المسؤوليات بدل ملاحقتك
للأشياء اللي تحررك منها وتخليك عايش بلا هدف ولا شخصية

مادري ليش الناس يحبون يفتخرون بأخطاءهم ، ومادري ليش الناس يمدحون غيرهم على أخطاءهم

وشي غريب لما تمر عليك لحظات تحس انك الوحيد اللي تفكر بهالطريقة ، يخليك تحس كأن الخطأ
فيك وانك مو شايف العالم بالنظرة المطلوبة ، بس هل النظرة المطلوبة تتطلب مني أترك نفس المبادئ
اللي تربيت عليها وتعلمتها؟ المبادئ اللي أمرني ربي بإني أتمسك فيها وأتخذ قدوة حسنة منها؟

هل لازم أمشي وفق المتاح لإعجاب غيري عشان أقدر آكل وأشرب؟
ولا أرضى بالأمر الواقع وأتحمل وأصبر على الحقد والاستغلال اللي أشوفه كل يوم؟

مادري والله .. بس المهم ، ربّوا ابناءكم وبناتكم ياجماعة​

 

[7sN]

قبل كم يوم قعدت اتصفح مواضيعي السابقة عشان استرجع الذكريات اتذكر اول مره
كتبت موضوع كان بسبب إني شفت هجوم العمالقة وكنت ابي اكتب عنه بمكان فشفت ان المنتدى
فيه اعضاء واستغليت الموقف وقتها كان عندي اهتمام بقسم الأنمي العام لأني أحب أتفلسف
فكل يومين أحط موضوع لين خلصوا أفكاري

بس اللي لاحظته وقتها ان المواضيع اللي مافيهم طقم محد يرد عليهم ، كان في ردود ولكن مو
بالشكل المطلوب لأن مواضيعي كلهم كلام من غير ألوان حلوة ولا صور حلوة ، لهالسبب لما
قررت أحط موضوع بقسم الفن والأنيميشن طلبت طقم من الغائبة @R A G A D وما قصّرت
وسويت موضوع "الإثارة والتشويق | To Create Suspense"

فطبعا استانست شفت الردود كثيرة قلت اسوي موضوع ثاني ( الطقم من @صوَفيَّـاإ ⊱ اللي ما قصرت بعد ) :

الأكشن في الأفلام | To Make an Action Scene

وقتها خلاص تحمست وصرت أطلب تصاميم لكل شي اسويه حتى المدونة ببدايتها ما كان
في تصاميم بس كلام يملئ الصفحات ( نفس الحين ) فتعرفت على الغائبة الثانية
@THE LAST وصدف ان تصاميمها هي بالضبط اللي احتاجها ، وطلبت منها تصاميم
لموضوع كبير وسويته :

إنطباعات أنيمية [1] #Anime Recommendation

اللي حصل على ختم إداري .. المشكلة لاست تعبت اكثر مني المسكينة انا بس تفلسفت
أما هي ما شاء الله عليها أخذت كل أنمي وسوّت أحسن ما عندها ، المشكلة لما شفت ان
في كذا أنمي ما انصح فيهم كان ببالي احذف كلمة Recommendation بس فات الأوان
وبصراحة استحيت أقول لها هالشي .. وحطيت رقم 1 بالعنوان لأن كان ببالي اني اسوي
سلسلة عن التوصيات في الأنميات والأفلام

وكنت راح أسوي جزء ثاني بقسم الفن والأنيميشن بتصميم أختي @K y o u κ α ✿ بس
وقتها طلعت اخبار المنتدى بالتطورات اللي راح تمنع الطقم ، وما كنا عارفين بالضبط شلون
راح يصير شكل المنتدى ونظامه ، ولما تم معرفة كل هذا صار عند كل واحد فينا ظروف منعته
بس أحب أشكرها لأنها سوّت تصميم كان روعه بمعنى الكلمة وبما انه تصميمها فلازم آخذ
موافقتها قبل ما أحطه هنا (محتفظ بالصورة)

وطبعا مثل ما الكل عارف ، تغير المنتدى والتصاميم صارت أكواد واختربت اشكال المواضيع
والكل ندم إلا أنا مواضيعي اللي سويتهم بالبداية يازينهم بس .. ولو دخلتوا الروابط فوق
بتشوفون اني رجعت التصاميم قبل يومين عشان احافظ على شكل المواضيع وعشان ما يضيع
تعب المصممين اللي ابدعوا

خلال رجوعي للذكريات اكتشفت شكثر احب سنة 2017 بالمنتدى من ناحية الناس الموجودين
والأجواء اللي تغيرت بسبب الأجيال الجديدة بعدها بدأت الظروف تتغير عندي وإلى الآن
أغيب وأرجع ×_×

محتوى مخفي: شسمه

ها في أحد يبي يسويلي تصميم؟

عيشوا :

​

 

[7sN]

بما ان الناس قاعدين يتذكرون اللحظات اللي أثّرت فيهم طفولياً قلت أبي أشارككم
الفرحة وأتكلم عن موقفي مع البقي ، وكما يعرف بالروايات الأخرى دباب أو
Buggy .. الشي اللي يشبه السيارة ولكن تركبه بالبر غالباً

كنا قبل دايماً دايماً نروح البر كالعادة ونستمتع وننام هناك يوم أو يومين سواء نروح مع
الأهل أو مع الأصحاب ، طبعا أفضّل الأصحاب بس الموقف اللي بتكلم عنه كان مع الأهل
بس مادري كان قبل كم سنة المهم ما كنت صغير بقوه يمكن كنت 15 او بالكثير 16
بس كنا رايحين كللل الأهل يعني انا واخواني وأمي وأبوي وخوالي وخالاتي وابناءهم و
بناتهم والجميع

كنا دايماً نأجر بقيّات (جمع بقي) لمدة ساعة او ساعتين اعتقد وبعدين نرجعهم ، وكان هذا
أفضل وقت عندي ، أركب وأقحّص (ما اعرف اترجمها) وأخوّف اللي يركب معاي على
أساس إني أعرف أسوق

مرة من المرات ما كان معاي أحد الحمدلله وسقت لمكان شبه بعيد عن أهلي ومحد يشوفني
(أيضاً الحمدلله) ولما سويت نفسي رجل وقحّصت انقلبت بالبقي وطحت برا وهو انقلب
وطاح علي مادري شلون .. بس المهم لما وقفت شفت نفسي بالتلفون وطلعلي جرح تحت
عيني اليسرى وللآن اللي يشوفني بيلاحظه بس غير هالجرح ما صار شي ثاني والحمدلله
البقي سليم رجعت لأهلي وابوي شافني قال شصار!! قلتله الموضوع وبعدين طلع بفكرة
و قال "لا تقول لهم انك انقلبت بالبقي" .. انا استغربت ، قلتله عيل شقول؟ قال "قولهم انك
كنت تسوق ولابس نظارة ، والنظارة اللي لابسها جرحتك"

.. ..

? + ? = ?

قلتله .. يصير؟ قال إي إي يصير ، قالها بنبرة كأنه يسلك لي وبعدين قلتله ليش ما أقولهم اني
انقلبت ترا عادي ، قال لأن بعدين خالك ما راح يسمح للباقيين إنهم يسوقون خوفاً من انهم ينقلبون
بعد ، فالمهم بعدين دخلت خيمة الأهل وانا كُلّي شجاعة وثقة بأنهم راح يصدقوني وأبوي دخل معاي

قالوا أووه حسن شفيك؟ شصار؟
قلتلهم لا بس كنت أسوق البقي .. والنظارة .. جرحتني
..
هدوووء
..
خالي :
أنا :

خالي ضحك وقال إي واضح النظارة جرحتك .. وبعدين أبوي ضحك معاه -_-
قاعد يبيّن انه حتى أهو مو مصدقني ق

فمن بعدها ما قمت أركب البقي بحجة اني كبرت خلاص والبقي للأطفال < خاله يركب​

 

[7sN]

#تدوينة الأسبوع

استمتعت وانا اقرأ الحقائق بالمدونات المشكلة كثير منهم يتشابهون معاي والمشكلة
الثانية ان أغلب اللي يتابعون المدونة يعرفوني عدل لأني ما أقصّر بأسراري ما شاء الله كله
فاضح نفسي .. بس بحاول أكتب شي جديد ?

1- من بين 4 أخوان أنا الثاني ، أصغر من أخوي الكبير بـ 10 شهور

2- تخصصي آداب انجليزي ، بس ما أداوم أبداً بس أروح وقت الامتحانات وما يحسبون الغياب

3- عندنا بلبل من سنة وللآن ما نعرف هو ذكر ولا انثى بس أعاملها معاملة الأنثى بلا سبب

4- بطّلت أنصح الناس لأني ما أعمل بنصايحي ، فإلى أن أعمل فيهم بعدين برجع أنصح

5- عندي حب عميق لزمن الساموراي بدأ من لعبت لعبة Samurai Warriors 2 ، بالصدفة أفضل
شخصية عندي باللعبة كانت Miyamoto Musashi والحين اقرأ كتابه < شخصية باللعبة مقتبسة من الواقع

6- أعشق المسرحيات ونصوصهم ، كتابة المسرحية تختلف اختلاف جذري عن الروايات ، ولما قرأت
بعض النصوص من المؤلف "تشيخوف" انصدمت من الطريقة وانعجبت فيها

7- مؤمن بأن الشيء مو لازم يكون كامل ليكون له "قيمة"

8- صاير أختار كلامي بعناية وبتركيز أكبر من السابق ، وما صرت أقول أشياء فقط
لمجرد إيماني فيها من غير ما أفهمها

9- أحب المنتديات بقوه ، أحس مهما كثرت المواقع ومواقع التواصل مافي واحد منهم
يقرّب من جمالية المنتديات

10- جانبي العاطفي أكبر بقوه من جانبي المنطقي ، بس أحاول أتحكم لأن بكل مره
أترك العاطفي براحته تكون النتيجة ندم وكارثة

وبس ، أتمنى عرفتوا عني أشياء ما كنتوا تعرفونها..؟ وأتمنى عجبكم شكل التدوينة وتصميمها
الجميييل جداً من الموهوبة @Black Swan ما قصّرت وكنت واثق انها بتسوي شي
مميز

​