فخر المدونين Make Some NOISE (5 زائر)

[خَوْد]

مرحبا يا حلوين حبيت اكتب تدوينة سريعة قبل ما روح نام طبعا اليوم كان حافل بكتير اشياء
مانو روتيني استمتعت فيه بصراحة و بنفس الوقت من زمان ما سهرت لهل الوقت و على اد ما بحاول
اسهر ما بقدر حدي 1 و بطفي .

المهم صحيت الصبح طبعا انا خمة نوم بصحة 12 فطرت و هيك و رحت جهز لدرس الدورة لانو كان تسليمو
اليوم و ما كان جاهز كان فقرة منو جاهزة و التطبيقي ماكنت مبلشة فيه على ع كل حال ما اخدت مني وقت
لاني الدرس كان خفيف ما اني مابعرف اشرح شي فاهمتو بشكل عام بس عم حاول .

بعد ما نزلت الموضوع كان في ساعة لوقت مباراة الشطرنج مع قو طبعا هي فازت و بوقت قصير اصلا عادي
بعد ما خلصت رحت ع الجم < طبعا قو لو شافت هالكلام رح تعصب مني لاني حكيتلها اجلي اللعبة لل 6 مشان
بكون بالجم بس ما كنت مفكرة حتى اني روح بليل لاني صحيت متأخر و هيك وكان لازم نزل الدرس

بعد ما خلصت من اللعبة رتبت غراضي و طلعت ع الجم و طبعا اول مرة بطلع بهل الوقت لاني بصراحة مو كتير
بحب اطلع بليل خاصتا بألمانيا و بلد جديدة علي الله و اعلم شو ممكن يطلعلي بالطريق بس كانت تجربة حلوة
و برا الروتين اليومي حتى جو الجم كان غير .

بعد ما خلصت من الجم رحت بالقطار السريع و هالقطار ما بوقف بمنطقتي بوقت بمنطقة الرئيسية الي منطقتي
تابعة الها و بعيدة عنها 5 دقايق بالباص و طبعا مافي باصات اليوم لأنو عطلة ف ع اساس روح بالقطار البطيء
و انا رايحة شوف الشاشة الي فيها مواعيد الرحلات سبحان الله شفت رفقاتي و حكولي تعي منروح نتمشى لبين
ما يجي موعد قطارك لانو القطار الجاي بعد ساعة .

طبعا كنت فرحانة لاني جد من كتر ماني مشغولة او بكون نايمة او عندي شي سويه ما بفضى اني شوفهم و
ضلينا نحكي و نضحك و عنجد انبسطت لاني من زمان ما طلعت مع بني ادم و احكي مع حدا ع ساس يجي
موعد القطار و رفقاتي راحوا و انا عم استنى القطار و القطار ما اجا ! بعدين اكتشفت انو القطار الجاي 11 الا ربع
رحت اتصلت ب ماما و حكتلي رجعي بتكسي طبعا هون عنا التكسي كتير غالي ما منطلع فيه الا للطوارىء و
على حظي كان التكسي مارسيدس و كان فاتح الشبابيك و الجو رهههههيب و بارد و كان عم يمشي شوي شوي
و انا كنت شوي و رح اسكر من كتر ما كان الجو حلو عنجد انبسطت و حسيت اني ارتحت نفسيا شوي مع
اني ماسويت شي .

بعد ما وصلت ع البيت الله وكيلكم فتحت اللاب شفت سكاي مسوي قسم جديد للتطبيقات و 4 طلاب منزلين
تطبيقاتهم و انا من ساعة 11 لهلأ على نفس القعدة ما توقعت يكون هيك ضغط لا و هاد بس 4
كيف لو 30 عضو نزلوا مواضيعهم و على فكرة كتيير حبيت النتيجة النهائية و الدرس و التطبيقات كتير
حلوين يعني ماشفت دورة من قبل منزلة هيك درس و هاد الي شجعني بالبداية اني افتح هالدورة .

عنجد اليوم كان حلو من جميع النواحي ان كانت بالمنتدى او برا بالحياة الواقعية .
انا بحبكن كوومة كووومة . تصبحوا ع خير ياحلوين


​

 

[خَوْد]

28.7

نفس هاليوم قبل سنة كنت خايفة خوف مايعلم فيه الا ربنا و وكنت وحيدة و حزينة لاني طلعت من البلد الي
ترعرعت فيه و عشت فيه كل عمري و لاني حسيت اني تجردت من روحي من لما طلعت منها . .

متل هاليوم قبل سنة كنت خايفة اني ما اوصل لألمانيا وشوف امي و احضنا لانو هي كانت امنيتي
بكل سنة بعيد ميلادي لما يجي و احكي ياريت لو شوف امي ياريت لو احضنا ياريت لو كانت جمبي !

مرت سنة و تغيرت فيني كتير اشياء بشكر الله على كل شي على كل مصيبة مريت فيها كانت هي السبب
بأني هلأ قوية ! بشكر الله انو خلاني شوف امي و شم ريحتا و اجتمع مع عيلتي . .

شو بدي اكتر بهل عيد ميلاد ؟ هدية ؟ لا ما انا عندي اكبر هدية الله عطاني ياها و هي امي و عيلتي كلها

الله يحفظ اهلها و امهاتنا جميعاُ



​

 

[خَوْد]

Oberlinksweiler | Germany

. . .

ثواني . ساعات . ايامِ كثيرة
انتَ تعرف ماذا تريد ولكنكم تستطيع ان تنتظر ؟
كل لحظة تدوم للأبد . . اذا شعرت انكَ أضعت الطريق
ماذا لو ضاعت فرصك بالفعل ؟!
تبدأ بالإيمان بأنني ممكن ان اكون مخطئة !
ولكنك أعطيتني سبب واحد جيد . . !
للقتال و ان لا امشي بعيدا . . !

لأنني ما زلت هنا . . !
في كل خطوة تصعد جبلًا آخر . .
وكل نفس يصعب تصديقه . .

سوف تجعله من خلال الألم . .
الطقس . . و الاعاصير . .
للوصول إلى هذا الشيء الوحيد . .

عندما تعتقد أن الطريق لا يذهب[إلى أي مكان . .
فقط عندما تخليت عن أحلامك . .
ثم أخذها بيدي وأريك ما تستطيع . . !

لا يوجد حدود
لا يوجد حدود

أنا أخطئ هبوطي لأقف على الحافة . . !
ماذا لو كان اليوم جيدًا مرة أخرى ؟
لا أعرف ما الذي يتجه إليه المستقبل
لا شيء سيحبطني . .
لقد قفزت كل جسر و سمعت كل كذبة
لقد خاطرت بالامان لكنني كنت أعرف دائمًا السبب
كنت أعرف دائما السبب . .

حتى هنا ما زلتُ مُتَمَسِكَتاً !

يمكنك الذهاب أعلى
يمكنك الذهاب أعمق

لا يوجد حدود
فوقك و تحتك

كسر كل قاعدة لأنه لا يوجد شيء بينك وبين أحلامك

سوف تجعله من خلال الألم . .
الطقس . . و الاعاصير . .
للوصول إلى هذا الشيء الوحيد . .

لا يوجد حدود
لا يوجد حدود

"? _



​

 

[خَوْد]

مرحباَ يا حلوين عدنا مرة أٌخرى . بتعرفوا برجع لما يكون في شي مضايقني او مفرحني كتير احكي عنو
و اليوم حابة احكي عن فئة معينة و هالفئة اديش بتمنى انها تنقرض و تفك العالم من سمها و غبائها بالتفكير !

فئة من الشباب وممكن تكون من البنات الي لما يكون عندهم رفيق او متعرفين ع حدا جديد و يتخانقوا معو ويجيبوا
سيرة شكل هالشخص ك نوع من المسخرة ! يالله اديش بكره هالفئة ! بغض النظر عن شكل هالشخص ان كان جميل
او مو جميل ! يعني هالشي مو بإيدو هو يكون حلو او لا ! ترا الله خلقو هيك ! يعني هالشي مانو مكتسب متل العلم
و الثقافة ! ف اديش هالشي بيجرح هالشخص لما تتمسخر ع شكلو ! و اديشك انت تافه لحتى يجي هالموضوع من
الاساس على بالك ! انك تتمسخر ع شكل شخص بس مشان تبين انك الاقوى ! هاد بسميه تمرد مو قوة !

و هالفئة من الناس كيف بتقدر تنام و هي جرحت مشاعر حدا بهل الكلام ! يعني بيتفاخروا ياااي انا حكيت كلام قوي
لهل الانسان و اتمسخرت عليه لانو بيستاهل و هالانسان الي تمسخرت عليه نام زعلان ! بتعرف شو يعني نام زعلان ؟
يالله اديشها كبيرة عن الله ! انا اصلا ما بعرف كيف بيقدروا يناموا !

يعني انا قبل كنت من هالضحايا ! كنت اتأثر كتير لما حدا يعلق ع شكلي او جسمي ! طبعا هالشي من زمان تقريبا
7 او 8 سنوات ! لحتى صرت اشتغل ع حالي و روح ع الجم الخ بعدين اكتشفت انو ما كان لازم سوي كل هاد و كون
مقتنعة بحالي و واجه هالاشخاص بوجههم ! و كنت مو واثقة بحالي ابدا و لحد هلأ بتذكر كل كلمة مو منيحة
سمعتها هالشي مستحيل يتنسى ! و فوق هاد صارت عندي مناعة ضد هالكلام ! و انو هلأ شو ماحدا حكا على
شكلي او جسمي انا مقتنعة تماماَ انو الله خلقني بهل الصورة و انا ما بزعل ع خلقة الله لاني متأكدة الله عطاني
شي تاني بدل الجمال . . هالقناعة كنز و قوتني كتير و حمتني من كتير كلام وخاصتاَ من هالفئة !

كبرت و عرفت انو كل شخص بهل الدنيا بنت او ولد كلهم فيهم جمال ولكن جمال نسبي لانو الله عطا جمال لناس
و ناس تانيين عوضهم بشي الي فيهم جمال ماعندهم ياه متل طيبة القلب و الشخصية الحلوة و الكاريزما الخ
اكتشفت انو كتير ناس عندهم جمال ماعندهم هالصفات .

وات ايفر . . الي حبيت احكيه انو ياريت الناس تتثقف اكتر و تحس بالعالم و يكون عنا حنية تجاه بعضا حتى لو
مامنعرف بعض ! و دائما حط حالك مكان الشخص الي رح تحكيلو هالكلام ! بشو رح تحس وقتها ؟ جرح المشاعر
امر ابدا لا تستهين فيه لانها كبيرة عن الله . .


​

 

[خَوْد]

اول ايامي بالتصميم كانت مثيرة للشفقة بصراحة . . تعذبت كتير لحتى وصلت لهل المستوى و رح احكيلكم اي مستوى
اول ما بديت التصميم كنت بمنتدى جوري قطر ايام 2010 و كنت شوف مصممين مبدعين و خارقين يعني شي مو
طبيعي ف هالشي الي خلاني امشي بطريق التصميم . حاولت ادخل عالم الدروس و طبق الدروس بس وقتها ماكانت
تفيدني يعني كأني عم انسخ و الصق بس الشي الوحيد الي فادني من تطبيقهم هو معرفة ادوات البرنامج و كيف فينا
نتلاعب فيها و كل اداة شو وظيفتها .

ما اكتفيت هون لانو كان عندي فجوة كبيرة بالتصميم و اخطاء لا تعد ولا تحصى ! دخلت عالم اليوتيوب و بديت افتح
فديوات عن التصميم ما في شي الا و فتحته باليوتيوب من طريقة الكتابة الصحيحة للدمج للأكشن و للبسد التلوين
الي هم التأثيرات . بدت مسيرتي الفوتوشوبية بالضبط ب سنة 2011 بعد سنة من الممارسة و التدريب . كانت اكتر
معاناتي هية كتابة الحقوق كانت سيئة جداَ لحتى اتقنتها بالفعل و بمنتدى بنات كول هنيك كانت اول مرة أٌرقى
لعضوية المصممة و كنت فرحانة كتير وقتها لأني كنت احلم دائما انو الناس تعتبرني مصممة و كون قد هالاسم

طبعا بسنة 2011 ل سنة 2013 ضليت ببنات كول لحتى ما تسكر بعدها دخلت مجتمع شغب هالمجتمع كان خاص
فقط بالتصميم و المصممين متل منتدى صغير خاص فينا تعلمت بهل المنتدى كثير من الاشياء طريقة عمل الهيدرات
بطرق مختلفة و الاهم كانوا اكتر شي مركزين عليه هو الدمج . طبعا وقتها كان فن الدمج من افضل الفنون عندي
واكترها كانت قريبة من شخصيتي لما فيها من غموض و صعوبة بالتصميم ! بعد ما تعلمت اساسيات الدمج من
هالمجتمع سويت اول تصميم دمج كان الي استخدمت فيه 22 ستوك تخيلوا ! من اول تجربة الي كانت رهيبةة و
وقتها ماتخيلت انو تطلع معي هالنتيجة ! و السبب اني كنت دائما درب عيوني انها تشوف هالنوعية من التصاميم



^ هاد اول تصميم الي كان باستخدام فن الدمج

بعدها تسكر هالمجتمع مع اني زعلت كتير لما تسكر لاني ما كنت متواصلة ولا مع اي عضو هنيك ! بعدها لقيت
مجتمع اخر اسمو مجتمع فيكشن ! كانت نفس فكرة المجتمع الي قبله و بهل المنتدى اخدت ايقونة مصمم بليند
محترف و كانت اول مرة بحياتي اصنف هالتصنيف طبعا كتير فرحت و انصدمت لما ترقيت لهل المرتبة !
كانت اغلب تصاميمي بالدمج . عكس هون و السبب انو تصاميم الدمج بتاخد وقت اطول معي مشان طلع فكرتها
و ترتيب الستوكات كمان . تاني سبب اني صرت حب فنون مختلفةة و ماكون محصورة بفن معين متل فن
الكولاج و السكرابز بحب هالفنين كتير .

و لحد هلأ انا لا اعتبر محترفة تصميم على اد ما التصميم كل سنة بيتطور و بتطلع افكار جديدة و لحد هلأ عم طور
من مهاراتي بشتى الانواع بس حالياَ جد جد رح اثثبت على فن الدمج لان حرام الي تعلمته انساه او يروح و خاصتاَ
انو فن صعب .

وصلت لمرحلة من التصميم اني لما كنت بالجامعة كنت بكلاس الفوتوشوب كانت عندي خلفية وسيييعة عن
التصميم ! و الدكتور ما كان بيعرف و بالمقابل كان في طلاب بالصف ما استخدموا الفوتوشوب ابدا ! ف لما
كان الاستاذ يعطينا جركةة معينة بخطوات معينةة انا سوي نفس الحركة بس بخطوات مختلفةة و لما كان يشوف
النتيجة و الخطوات ينصدم و مرة كانت رفيقتي مو فاهمة شغلة بالدرس قمت رحت و شرحلتها بالتفصيل
و الاستاذ وراي عم يضحك عاد هداك اليوم كان احلى يوم بعمري ! حسيت بمعنى لما الشخص يتعب على
نفسه و يحصد ثمار تعبه !

و على سيرة الفوتوشوب مرة نزلت رسمة بإستخدام اداة البن تول و الاغلب الي علقوا استغربوا كيف اداة البن تول
بقدر ارسم فيها ! عاد هي قصتها قصةة ! كنت جد قبل ما استخدمها ابداَ كانت تعتبر اداة صفر ع الشمال بالنسبة
الي لحتى دخلت كلاس بالجامعة اسمة جرافيك ديزاين و الاستاذة عطتنا نفس لعبة باستخدام اداة البن تول
و فيها مراحل تقريبا 10 مراحل و باللعبة بيعطول عدد خطوات معينةة كلما زادت المرحلة كلما صارت اصعب وقل
عدد الجركات متل اول مرحلة مسموح 20 حركة و لازم نستخدم اداة البن تول مشان نكمل الشكل ! و المس حكت
الي بخلص اول بروح دايركت ع البيت ! عاد انا اول شي حسيت بصعوبة فيها بس انا من النوع الي بيتعلم بسرعة
و ايدي بتاخد ع الشغلة اول ما افهم الاساسيات ! لانو اداة البن تول الها حركات مثلا كيف نعمل منحنى و كيف نخلي
الخط مستقيم مو مايل . ف انا خلصت اول وحدة و انصدمت لما عرفت انو محد مخلص حسيت سويت انجاز خاصتا
انها كانت اول مرة بتسخدم هالاداة فيها ! و متل ماحكيتلكم الي بخلص اول بروح ع البيت ووقتها رحت
و الباقين ضلوا بالصف يكملوا اللعبة .

و من بعد هاليوم حبيت هالاداة كتيييير و صرت دور باليوتيوب عن طرق استخدامها و بشو منستخدمها قمت شفت
رسامين بيرسموا فيها ! قمت اخدت اول شي صورة سهلة كانت اسد و ما كان فيها تفاصيل كتدريب الي قمت
رسمتا نفس الرسمة الاصلية تماما مافي اي اختلاف و لونتها وكان هي اول مرة بلون بالفوتوشوب و كانت النتيجة
دمار !! بعدها بيوم بالضبط بديت بصورة السيارة الي عرضتها عليكم ! مع اني قسما بالله ما توقعت كل النتيجة
تطلع بالنهايةة ! عرفت معنى جملة ادفع حالك برا دائرة الراحة رح تشوف اشياء ماكنت مفكر انك بتقدر تسويها
فعلا عرفت اني عندي قدرات و موهبة بهل المجال من لما تعلمت الفوتوشوب لحالي .



^ الصورة الاصلية الي اخد الفكرة منها



^ و هون الرسمة مع التلوين

الي حاب يشوف رسمة السيارة نزلتها بموضوعي هون

و بعد ما دخلت الجامعةة ما كنت متوقعة انو كلاس التصميم لحالو ممكن الاستاذ يحكي فيه اشياء علمية
بتخص الرياضيات بالفوتوشوب ! يعني انصدمت من كمية المعلومات الهائلة الي الدكتور كان يعطينا ياها
بالحصة الوحدة ! عرفت وقتها انو التصميم بحررر مو مجرد هواية

ف الزبدة من كل هالكلام . . اني وصلت لمرحلة من التصميم مو بس اني استخدم ستوكات او سكرابز معينة
او متناسقين مع بعض نفس قبل و انهي التصميم ! هلأ زاد عنصر مهم و هو الاحساس ! الاحساس الي
مستحيل اتعلمه الا من نفسي ! لازم حس بشي معين و من هالاحساس صمم ! لو انتبهتوا اغلب مواضيعي
تحمل هالطابع و مابحب ابدا انهي موضوع او خلي موضوع يكون بسيط ! مثلا بموضوعي عن العصائر
لو ماكنت حابة كتير و حاسة بجو الاستوائي ما كانت طلعت معي هالنتيجة !! انا بحس بكل تفصيلة صغيرة
او كبيرة بالتصميم و بالموضوع مشان يطلع بأحلى نتيجة !

ف الي حابة احكيه انو احساس المصمم شيء جدا مهم بالتصميم ! في تصاميم بتحسوا فيها روح و في تصاميم
بتحسوها جامدة مع انو فيها اتقان بطريقة التصميم ! و السبب يرجع للمصمم نفسه ! و هالشي ما انتبهت له
الا من كم سنةة !

و عارفة انو محدا بحب فلسفة الفن . . بس ترا الفن بالاول و بالاخر يعتبر فلسفة و فلسفة ما بتنتهي !


​

 

[خَوْد]

ملاحظة: هالتدوينة ممكن تكون سبب بفرح او تفائل احدكم




اليوم مرتاحة كتير و فرحانة . . و الاهم ركزوا على الراحة !! مو مسدئة حاسة اني بحلم ههههههههههه
تخيلوا مرت سنة و انا بألمانيا و بعد 4 شهور بالضبط رح قدم اول امتحان الماني الي و ان شاء الله
انجح فيه ! ف مو هون الموضوع . .

مابعرف كيف اكتب الموضوع مع ترتيب الافكار لاني بتعرفوا الكارما ؟ الي لما الدنيا بتلف و تدور يالله
شو بآمن بهل المثل . . المهم اني لما كنت بالامارات اخر فترة تخيلوا كل رفقاتي كانوا يتطلعوا علي
بنظرات شفقة لاني ما سويت انجاز بحياتي او لأنهم متخرجين مع بعض و هن خلصوا جامعة الا انا
ترا الحياة ما بتمشي هيك ! الحياة مو سباق اذا طلع الاول يعني انت الاذكى او الاحسن ! وكان عندي
ظروف اخر فترة يعني كلمة جحيم قليلة كوصف للي كنت مر فيه !

واول ما اخدت قرار اني اجي ع المانيا و قسما بالله كانت ليلة مافيها ضو قمر . . الوحيد الي كان حاسس
بالقرار الي اخدتو هداك اليوم كان الله . . بهداك اليوم كنت متحلفة لأبي انتحر اذا ما طلعني لأني جد
الحياة صارت مو مستاهلة الواحد يعيشها . . بس تسدئوا لهلأ اهلي مو مسدئين اني كنت رح
سويها ؟ بس من كتر الضغوطات الي مريت فيها هنيك جد الموت ارحم بمليون مرة . .

ماعلينا نرجع لموضوعنا . . بهداك اليوم كنت عم ابكي و ابكي و ابكي بسبب مشكلة صارت و عرفت انو
خلااااااص . . هون نقطة و ما عاد بدي كمل قتال و جهاد لحتى كون مبسوطة . . بهداك اليوم كنت تعبانة
نفسياَ و جسدياَ و كنت وحيدة و حزينة و كئيبة و مكسورة ضليت ابكي و ما بعرف ع شو كنت ابكي !!
ابكي ع انو ما عندي رفقات ولا لاني وحيدة ولا لاني حسيت حالي بهداك الوقت ابشع مخلوق على وجه
الكرة الارضية و اني انا نفسي مو طايقة حالي لحتى حدا يطيقني و اني محدا بيستحمل يضل معي واني
مليانة عيوب و ماكنت لاقي اي شي ايجابي فيني ولا اني حبيت من كل قلبي و عطيت كل شي و اخر شي
انكسر ياريت لو انجرحت لا انكسرت ! ولا لاني جاهدت بالتخصص الي بحبو بس كل شي كان ضدي !
كل شي حبيتو راح من ايدي ! طار و اتلاشى وما عاد الو اي اثر . . بدت بجسمي الي تعبت عليه كتير
و انتهت ب ذاتي . . و توقعت اول خسارة كانت رح تكون الاخيرة بس للأسف خسرت كتير . .

بعد ما حكيتلكم عن معاناتي و صدقوني الي كتبته اختصار لاني مو حابة وجع قلبكم علي ولا محتاجة حدا
يشفق علي و رح تعرفوا ليه لحتى تكملوا القصة معي و اقرأوها للنهاية مشان تفهموا ليه . .

بعد ما قررت اني اطلع لألمانيا و بابا ما كان عندو خيار و سوا الي بدي ياه و بعدها اجيت احضنو و ابكي بحرقة
وربي ماكنت حب بابا يشوف دمعتي لاني بعرف كان يحبني اكتر وحدة من اخواتي من و انا صغيرة كانت
معاملتو الي غير عن اخواتي طبعا ما بينحاز ع حدا بس كان يعاملني غير و من كلمة يصدق كلامي عكس
اخواتي . . و لهل السبب كنت ابكي بحرقة لأنو بسبب التصرف هاد حسيت اني جرحت بابا و يمكن حس اني
مابدي عيش معو ! اخخخخ يا ئلبي مابعرف شو احكيلكم ! . . حضنتو و انا عم ابكي و احكيلو انا صح اتخذت
هالقرار اني اطلع حكيتلو انا بحبك و انت بتعرف اني رح اشتقلك و انك رح تضل غالي علي بس حكيتلو هيك
احسن الي و الك ترا مو قادرة كمل كتابة حاسة المشاعر تحركت لاني تذكرت . .

بعدها اجا الرد اني سافر من الشخص الي رح يطلعني و صارت الطلعة بيوم و ليلة ما لحقت ودع رفقاتي ولا
الاماكان الي بحبها ولا شي . . حسيت وقتها كأني تجردت من ككككككككل ششششي !! يالله مابعرف شو احكيلكم
الله ما يعيشكم هالشعور ابدا اديش هو فظيع . .

بتعرفوا اول ما طلعت الطيارة نزلت دمعة مني لا ارادي حسيت روحي ضلت هنيك . . حسيت وقتها اني تغرببت
مرة تانية . . و حسيت انو رحلتي بالعمر بلشت من هداك اليوم و اني انولدت من جديد كانت احاسيس و مشاعر
متلخبطة و مع هيك كانت اول خطوة الي للنضوج كان هالقرار الي اتخذتو و ماتراجعت عنو و لا ندمت اني اخدتو
كنت دائما احكي لحالي . . هيك احسن . . هيك احسن . .

ف طريق جيتي ع المانيا ما كان سهل و كلو كان مخاطر و كنت لحالي . . كنا نمشي بنص المطر و يضربب برق
و عادي جدا كنا ننشوي اذا الببرق اجا ع الارض . . و هاد غير كنا نمشي جمب مناطق عسكرية و عادي جدا اذا
طلقوا نار لانها منظقة جيش وما كنت اعررف . . ما كان في حدا يهون علي مصيبتي غير ربي و كان كافي
كنت ابكي و ادعي دعاء يوسف . . و كانت تمطر . . و ارتجف من الخوف . . بهداك الوقت قسما بالله حسيت
كأنو بيني و بين الله كان بينا شعرة بس على اد ما حسيت انو قريب مني . . فعلا المصايب بتقربك من ربك !

بعدها وصلت ع اليونان بعد طلوع الروح . . و جربت اطلع من المطار 4 مرات ما كانت تزبط لحتى اجاني رهاب
من المطار و صرت كلما روح لهنيك ارتجف و ما اقدر اطلع . . حسيت كأني عصفور و انحبس بقفص !
لحتى الشخص الي بدو يطلعني سوالي اوراق كلنا مزبوطة جواز و هوية و شهادة سواقة على نفس الاسم
و رحت ع الجزيرة و كانت كيف احكيلكم اخر محاولة الي و ضليت ادعي و ابكي ادعي و ابكي كل شي الي
كان ببالي اني الله يجمعني ب امي . . و ادعي اني تعبت و ماعاد اقدر استحمل و كلو وحيدة . . و مع هيك
الله كان جمبي . . حقق حلمي و وصلت لهون و كان بتاريخ 3. 9 .2018 لما وصلت هامبورج و بتاريخ 5.9.2018
شفت امي بتتخيلوا بعمري ما بحفظ تواريخ ! حتى من لما كنت باليونان و احكي لامي والله لما شوفك
رح اسجد سجود شكر لالله و حتى لو رح انفضح بالمطار ههههههههه بس هداك اليوم كان حلم حلم و تحقق

المهم بعد شهر بالضبط رح كمل سنة ب المانيا . . ف هون الموضوع . . اني رح سوي رد اعتبار لذاتي و لكل شخص
احبطني و لكل شخص اذاني و اهاني و نظر علي نظرة شفقة . . بشهر 12 بإذن الله رح انتقل على ميونخ الي كل
شخص بيحلم يسكن فيها انا مو مسدئة حاسة اني بحلم ! يالله حاسة اني رح ابكي من الفرحة ! مو مسدئة باقي
4 شهور اخد امتحان الالماني و متأكدة رح انجح فيه و رح انقل ع جامعة ب ميونخ و سكني رح ينتقل لهنيك
رد اعتبار قوي لكل الي قلل من شأني . . رح ورجي للكل كيف معاناتي تحولت لشي ايجابي و ناجح . .

اخر شي حابة احكيلكم ياه . . انو بعلم النفس الشخص بيتغير كل 7 سنوات ! انا سنة وحدة كانت كافية انها تغيرني
و اني انظر للحياة بنظرة مختلفة تماماَ عن قبل سنة ! بهل الرحلة كبرت مخي 10 سنين . . كل شي كان سلبي
بحياتي حولتو لإيجابي حتى عصبيتي خفت بشكل فظيييع و التوتر و كل شي . . عرفت انو المجتمع الي كنت فيه
هو الي كان يخليني هيك . . صرت حب حالي ااكتر لانو اي حدا هون بحكيلو الحكي الي كتبتو هلأ بيحكيلي انا
معجب فيكي لأنك خاطرتي بكل شي عندك مشان تكوني احسن و مشان مستقبل . . كانوا يحكولي في شباب
ما قدروا يسووا الي سويتيه مو بنات لا شباب ! ف هالشي كتييييير مفتخرة فيه ! مفتخرة بنفسي ! انا فرحانة من
حالي ! انا مبسوطة ومن كتر ماني مبسوطة حاسة رح ابكي . . حاسة قلبي كان فيه وجع كتير و انتقام لكتير
وحاسة هلأ انا راضية . . بس مو كتير لحتى اوصل للي بدي و بإذن الواحد الاحد رح اوصل طالما الله مخلي
دقات بهل القلب !!

ماحبيت وجع قلبكم بهل التدوينة . . بس اولها وجع قلب نهايتها فرح . . من يوم الاثنين رح بلش بأوراق الجامعة
مشان قدم و احجز مقعد . . خلص المعاناة و الاضطهاد كلو انتهى و رح بلش بأول خطوة لمستقبلي مع انو
اول خطوة كانت من لما طلعت من الامارات . .

و بتعرفوا لما الله يجبر خاطركم ؟ انا تحقق معي هالشي حسيت فيه . حسيت كل الحزن الي بقلبي
انجبر و حسيت انو لو شو ما صار هلأ او احباط مارح اتأثر لاني كل الي شايفتو هو مستقبلي رضيوا
الناس او ما رضيوا انا كل الي شايفتو مستقبلي ف ضلوا احبطوني و ازعجوني و اجرحوني لاني انا بعرف
كيف حول كل هالاشياء السلبية لجسر امشي عليه لاوصل لحلمي ! و محدا رح يقدر علي وقتها !

كل الي بدي ياه هو دعوة صادقة منكم لاني جد محتاجة هالشي هالفترة . . هالفترة هية الفترة المصيرية !



​

 

[خَوْد]

-







مرحبا لأحلى اعضاء . . رجعت من بعد غيبة مدري كم يوم كانت
اكتشفت شغلة فيني اني لما غيب بدون عذر لسبب ما ف بعرف اني كتير
مبسوطة لاني حتى ما فكرت اني اكتب عذر الا بعد الغياب . .

تذكرتوا لما قلتلكم بتدوينة من تدويناتي اني مرات بكون سعيدة على حساب
مستقبلي او الاشياء الي كنت اهتملها ههههههههه . .

المهم حابة احكيلكم عن مغامراتي بهل الفترة الي غبت فيها . .

يا جماعة والله العظيم ما فكرت المانيا لهل الدرجة حلوة ! فكرتها مملة او
مو حلوة و انا يعني بمقاطعة اسمها زارلاند و هي المقاطعة تعتبر اصغر
و افقر مقاطغة و اخي حكالي اني لسا ما شفت شي و انا ما سدئو احكيلو لا
المانيا مملة بدي ارجع ع الامارات هههههههههه بس بتعرفوا لما طلعت الاسبوع
الماضي عطلة اخدت اجازة يوم الخميس و الجمعة و سبت و احد كنت بميونخ
و المصيبة مو انو ميونخ حلوة المصيبة انو الطريق الها يعني هو الي حبيتو اكتر
ههههههههه ياخي انا عشقي القطارات انو و الله العظيم كتير ناس حكولي ليش
ما بتطلعي شهادة سواقة بما انك كنتي بتسوقي احكيلن مجنونة طلع و عندي
قطارات هههههههههههه بعشق بعشق القطارات . .

المهم اكتشفت انو المانيا بتجنن و اني لسا ما شفت شي بحياتي فعلا حكمت
عليها حكم مسبق قبل ما شوفا . . عرفت انو المانيا عندا شبكة سكك ضخمممةة
تخيلوا من مقاطعتي لمقاطعة ميونخ اخد مني 7 ساعات سفر وكلو بالقطار انو
اديش عندهم شبكة سكك مشالله . .

و الاحلى اني جربت كل انواع القطارات مثلا في قطار اسمو هون IC هاد القطار
محدا بيركبو اذا ما بطاقتو ما مكتوب فيها انو لازم يكرب هالقطار يعني مثلا في
بطاقات فيك تركب قطارات معينة بدون ما يكتبوا بالبطاقة انك بتقدر تركبها ماعدا
هاد القطار مدري سمعت انو قطار قديم كتير و بخص تاريخ المانيا و هو عنجد قديم
اصلا اول شي فكرتو قطار للجيش بعدين واحد قلي هاد الي لازم تركبيه و انا انصدمت
ههههههههههههه لدرجة انو الشبابيك بينفتحوا بالعرض نفس قطارات سوريا و الاحلى
انو لما مشى القطار ما سكروا الشباك و الهويات يدخلوا بالله كان احلى يوم بحياتي ههههههه
ذكرني بسوريا وربي و يدخل بين الغابات و الانفاق عنجد كان شي خيالي !!

و القطار التاني اسمو ICE هاد القطار يعتبر اسرع قطار ب المانيا حتى لدرجة ماهن مفتخرين
فيه حاطين صورتو على تطبيق المواصلات ب المانيا هههههههه و هو عنجد من حقهم يفتخروا
فيه انو وربي بعمري ما شفت هيك شي بكل حياتي . . قطار على شكل طيارة من جوا و فخخخم
بتعرفوا اني حجزت درجة تانية و ربي لما دخلت الدرجة التانية فكرت اني داخلة الدرجة الاولى
بالخطأ و خفت اني كون فيها لاني بتخالف ف اكتشفت انو هي الدرجة التانية بعد ما سألت يعني
اذا هي الدرجة التانية كيف لو الاولى ؟ ههههههههههههههه نفس نظام الطيارة بالضبط حتى
المفتشين لابسين نفس لبس مضيفات الطيرات و شكلن كيوووووت . .

المهم انو هالقطار بيمشي بسرعة 200+ ف لما يكون بالتذكرة في تبديلة بهل القطار التذكرة
بتغلى لانو بيختصر كتير وقت . . و من جوا كتير نضيف و كلااسي بشكل و من برا شكلو نفس
الطلقة .. و اكتر شي صدمني انو كانوا يحكوا بالمايك انجليزي هو بالعادة كلو الماني مافي لغة
تانية بس لانيه قطار دولي مشان هيك . .




^ شايفين ما احلاه



^ و هاد IC انتبهوا على المقطورة الحمرة هي الي عم تحرك كل هلقطار و القطار
طويل و ضخم نفسي اتخيل كيف هي بتجر كل هالقطار ! يعني تخيلوا اديشو قديم !
باقي القطارات بتكون فيها بكل مقطورة محرك و بشغلوهم كلهم مشان يخفف
الضغط على المقطورة الاولى ف لما شفت هالمقطورة قدامي و سمعت صوتها
عااااالي و صاخب عرفت انو قديم ..

و بس مع انو قديم كان سريييع اسرع من ال RE العادي !! لدرجة فكرتوا عم يتزحلط
ع السكة ههههههههههه هي تكنلوجيا الالمانيا شو بدكن بالحكي قديم بس صاروخ

بعد ما خلصنا من هالقطارين رح احكيلكم عن القطار الي بطابقين هاد الي
اخد كل مخي يعني رهييييييب ههههههههههههههه و الي ضحكني اكتر و حسيت انو
عمري 5 سنوات لما طلعت قعدت فوق و الله كان احلى يوم بحياتي . .
و مافيه صوت ابدا بعض القطارات الصوت بيوصل لجوا حتى لو كانت الشبابيك
مسكرة عدا هاد باين انو كتير حديث



^ شوفوا ما احلاه عنجد الركبة فيه غير وربي و الاحلى انو كان يلففني بالغابات
و بتشوفوا الدنيا كلها من فوق ما احلاه عنجد كانت تجربة ممتعة كتير . .

بهل الرحلة ركبت كل انواع القطارات ب المانيا هن RB و هو بكون قطار بطيء بيمشي
بين القرى و بوقف بالقرى الصغيرة و RE قطار متوسط السرعة بوقف بالمدن الرئيسية
الي بنفس المقاطعة و ICE هاد قطار دولي فيه نوعين نوع بكون بين اتحاد الاوروبي و نوع
بكون دوا المانيا و بوقف بس بعواصم المقاطعات الرئيسية يعني ما بوقف بالمدن الرئيسية
الصغيرة و في IC هو نفس RE بس متل ما حكيت فوق لازم تكون بطاقتك مصرحة لهل القطار
و القطار الطابقين يعتبر RE

بعد ما حكيتلكن عن تجربتي بالقطارات الي عنجد انبسطت فيها اكتر من الرحلة يمكن
وصلت لمقاطعة اسمها بايروت قام اخي حكالي شوفي انتي ببيروت حكيتلو كيف
حكالي اقرأي اللافتة قمت قرأت بيروت هههههههههههههههههه الي هية نفسها بايروت
و المقاطعة كتير حلوة ريفية بشكل و اول مرة بشوف قطار سريع بيتقاطع مع الشارع
شفت بدبي ترام بقاطع شارع بس هاد بطيء اما قطار سريع هي كانت اول مرة

رح كمل بعدين عن هالمغامرة لانو عنجد فيها حكي طويل . .


​

 

[خَوْد]

-


#تدوينة فعالية المجتمع الشهرية

أتمتلك هدفًا تظن أن تحقيقه سيؤثر في هذا العالم،
أيًا يكن سيئًا أم جيدًا، حدثنا عنه ؟

اي شخص يمتلك هدف معين و يسعى لتحقيقه رح يكون الو تأثير الو و للي حواليه وممكن على العالم !
عن نفسي انا شي اكيد اني حابة اني حقق هدفي بالشي الي بحبو و اثر ع العالم و اترك بصمة حلوة فيه
مو اني عيش و موت و محدا متذكر اسمي او شو سويت !! هيك يكون انجاز شخصي !!

بما اني من محبين السيارات و التزويد متل ما قرأتوا بتدوينة من تدويناتي انو حلمي او طموحي اني
افتح كراج لتعديل السيارات . . حابة اني غير فكرة تزويد السيارات ببال اغلب الناس انها هواية بشعة و
متهورة و هيك ! هواية تعديل السيارات تعتبر ثقافة مو مجرد هاوي فيها . . ف كتير حابة اني انشر هالشي
بشكل ايجابي اهم شي ما تكون بشكل سلبي و بصورة حلوة بما أني بحبها كتير ف هالشي الي حابة اني
غير فكرة العالم فيها . . فينكن تحكوا خلي العالم تتثقف شوي ب عالم غريب و مو منتشر بالشكل الصحيح !




​

 

[خَوْد]

​

​

​

​

انا اكتشفت انو الناس الطيبة هية الي بتتعذب من جواتها و جواتن في مليون صراع بين الخير و الشر عكس الشخص الي من جوا مو منيح مرتاح بحياتو اذا سوا شي مو منيح لحدا مارح يأنبو ضميرو بس اذا شخص منيح ؟ بفكر مليون مرة انا سويت شي خطأ لحدا بدون ما اعرف ؟ هال هالكلمة الي حكيتا اذت هالفلان ؟ بأنبو ضميرو مليون مرة و بموت الف موتة من جواتو لانو في صراع بين هالشخصيتين ! الشخصية الشريرة و الشخصية الطيبة الي كل وحدة بدا تتغلب ع التانية و تموت الصفة التانية ! ​

​

بس بتعرفو شغلة كمان ؟ انو هالعالم ما بيترك حدا بحالو ! بمعنى تاني انو كل يوم و كل دقيقة ممكن نمر بمواقف ​

بحياتنا بتخلينا انو نتغير للاسوأ لانو هالعالم محتاج الاسوأ لحتى يعيش ! محتاج الاقبح ! مشان يقدر يعيش ! لانو الطيبة و الصفات المنيحة حسيتا صارت منقرضة بهل الزمن صرت لما شوف حدا منيح احكي ببالي هاد اكيد عم يضحك علي لانو صار شي منقرض يا جماعة ! مابعرف يمكن انا صايرة كتير سلبية بس والله العظيم انا هو هالشخص الي حكيت عنو ك مثال و اكيد في غيري كتير هيك ! كل يوم بعيش مليون صراع بين هالشخصيتين الي جواتي الشخصية المنيحة و الشخصية الي مو منيحة بحس مرات ياااااارييت ياريت لو شخصيتي الشريرة تطغي اكتر يمكن كون مرتاحة اكتر من اني كون انا الطيبة او بالاحرى انا ( الضحية ) ! اي اي اكيد ما حدا بحب يمثل دور الضحية بس تخيلوا انو صرنا نعيش الدور كل يوم بدون ما نحس ع حالنا ! ههههههههههههه و مابعرف اضحك ع حالي و لا ابكي ع حالي لاني تعبت ! تعبت من هالصراع المقرف صراع كرييه لانو انا لاني هيك ولا هيك !!!! و كرهت انو الناس يسوا فيني اشياء مو منيحة تحت مصطلح اني طيبة !!​

​

نفسي ولو مرة مثل دور الظالم مو المظلوم لاني تعبت تعبت كون كبش الفداء تعبت اني اسمع كلام مقرف و بجرح​

بحكي ببالي عادي انا متعودة ع هالكلام بس خايفة لو حكيت الاشياء الفظيعة الي جواتي الي قدامي ينجرح ! لسا فيني امل اني انشر الشي الايجابي و يكون فيني كل شي سلبي بس ماضر الشخص الي قدامي مع انو هو ضرني ! بس لايمت يا ترى ؟ هاد سؤالي الوحيد الي ماقدرت جاوب عليه لحد هلأ لايمت ياترى ؟​

​

اوعكن تكونوا من هالشخصية و حاولوا قد ماتقدروا انكن تاخدوا جانب يا يمين يا يسار يا ابيض يا اسود لانو النص دائما بوجع ! دائما ! ​

​

23.11.2019​

​

​

​

 

[خَوْد]

12.2.19


انا اليوم مارة بيوم بيجي مرة بالسنة هاد اذا اجا بصراحة انا كتير كتير كوووومة فرحانة جد و الله حاسة من كتر ماني فرحانة رح ابكي ههههههههههههههههههه شو هالاعاقة بالمشاعر هي هههههههه . . المهم شوفوا امتحاني تقييم اللغة تبعي ماضللو شي بس 5 ايام رح يكون ب 7.12 يعني هاد السبت و هلأ عم بدربونا ع الامتحان ف في فقرة بالامتحان التحدث انو يجيبولنا صورة و نحن نوصفها بالكلمات و انو نقارن بين بلدنا و المانيا بالموضوع الي عم نحكي عنو مثلا لو عم نحكي عن الموبايلات لازم نقارن بلدنا بألمانيا من ناحية الموبايلات و كيف منستعملها و ايمت الخ و انو نحكي تجربتنا بهل الموضوع و اذا ماعنا تجربة منحكي بالمستقبل انو بدي سوي هيك مابدي سوي هيك الخ ف بالنسبة الي هالفقرة كانت اصعب فقرة الي بكل الامتحان و المصيبة انو لو نجحت بكل الامتحان و رسبت بالتحدث رسبت بكل الامتحان التحدث عندهم كتير مهم يعني عادي لو رسبت بفقرة وحدة من فقرات الامتحان المهم ما تكون فقرة التحدث و هاد الي كنت خايفة منو ف ضليت اتدرب ع هالفقرة الي عنجد بخاف منها كتير لانو مرات بتجيني صور مابعرف كيف اوصفها بتكون صعبة و مرات مابكون عندي كلمات كافية تحت هالثيم ف انا و حظي ف اليوم اجتني صورة عن الكمبيوترات و كانت هي لعبتي يعني انا اغلب شغلي ع الكمبيوتر و الاحلى من هيك انو اغلب المصطلحات الالمانية بالكمبيوتر انجليزية ف مابتعب حالي و بستخدم كلمات المانية مع اني بعرف بس هالثيم عنجد كان سهل و ضليت احكي بدون ما وقف مع اني حسيت اني جبت العيد بصراحة هههههههههههه ف لما شفت الاستاذ كان يعلق ع رفقاتي كتير و ماعلق علي متلن ف حكيت ببالي معقول ما بحبني قمت رحت لعندو لما خلص الكلاس و حكيتلو كيف كان وصفي للصورة ؟ قام حكالي قوووود . . عاد انا هون طرت من الفرحة لانو عرفت انو لو ما كان قووود ما كان تركني بحالي و ضل يعلق علي متل رفقاتي عاد عنجد فرحانة فرحانة لاني عرفت Trick هالفقرة و ما عدت خايفة من الامتحان بالعكس صرت متحمسة اكتر اني سويه لا و زيدكم من الشعر بيت انو بكرا عندي عطلة كمان يعني بقدر اسهر اليوم و اتفضى للتصميم من زمااان جاي عبالي صمم و كان جايني كريييتيف بلوووك ابن حرام ما كان يرووح !! و هلأ راح و ببالي كتير افكار سويهم و فوق هاد بكرا بقدر روح ع الجم بدون ما اصحى من صباحية الله اديشها الحياة حلوة


و هيك بكون خلصت من يومي مع انو هاد مختصر يعني ماحكيتلكم شو صار معي الصبح قبل الكورس احمدوا ربكم ولا كنت كتبت كمان عشرين سطر هههههههههه


​