فخر المدونين Make Some NOISE (3 زائر)

[Selene]

مرحبا يا حلوين . . رجعتلكم من جديد
مع اني لهلأ مو مسدئة اني غبت شي شهرين و انا مفكرة اني غايبة
كتير لما تطلعت على سجل الغياب انصدمت . .

ع فكرة ترا انا عندي شهر 7 و 8 من اتعس الشهور عندي حتى
بالسنة الماضية غبت بهل الوقت مابعرف ليه هيك بيجيني سبات شتوي
بهل الشهرين . .

يلا اعتبروها سنوية . .

ع فكرة انا شتقتلكم كتييير بس جد انضغطت بشكل فظيع و لهلأ ع فكرة
بس خلص كنت بدي اخد قرار يا انسحب او كمل اما ضل هيك بالنص لا

اما شو بلشت كورس الالماني و هاللفل صعب صعب ليقول الرحمن بس ص0
لا جد مو مزح ص0 ع قولة جودة ( كرههههههههههههههههههههههههان حااااالي )

لدرجة اني شاكة اني انجح بالامتحان ههههههههههههههههههههه
هو بصراحة انا ماعندي شي مستحيل و ماعندي الرسوب ببالي بس ياخي حاسة
اني طلعت من مود الالماني و اللغة خاصتا اني هلأ قدمت ع الجامعة و احتمال اني بلش
بشهر 11 بالانجليزي ف جد بدي حاول اني بلش هالسنة مشان اعمل انسحاب تكتيكي من هالكورس
مابدي قدم الامتحان و ارسب فيه و تنحسب علي وحدة اني رسبت

بس الحلو بهل اللفل مبني على النقاش و الحكي بالالماني بيعطونا مواضيع و بدنا نحكي
و نتناقش فيها . . هو حلو كتير حتى لو ما كنت بعرف كلمات المانية كتير هو بس انو الواحد
يحاول حتى لو لخبط شوي و الاستاذ بساعد شوي . . خاصتا لما تجينا مواضيع مثيرة للاهتمام
بتخلي الواحد يرد و يحكي حتى لو ما بيعرف الماني يعني هو حلو و مو حلو
خاصتا اني انا عندي رهاب التكلم بالالماني يااااااااااااااااااااي ص0

المهم كتبت هالتدوينة مشان تحسوا فيني اني ما غبت مشان العب برا هههههههههههههههههه
< شسالفة . . ترا و الله الكورس هالكني و بعد الكورس بروح ع الجم
بوصل ع البيت فرطانة تعب و نعس و فوقها بدي حل واجب الالماني لدرجة وصلت
مرحلة اني كون بالتخت ساعة 8

بس هلأ رح حاول لاقي وقت يمين يسار للمنتدى بس من هلأ بحكيلكن اغلب تواجدي
رح يكون من الجمعة بليل للأحد و بأيام الاسبوع رح يكون خفيف


و فرحت كتير بهل التغييرات الي صارت للمنتدى بغيابي < هو بس بغيابي الاشياء
الحلوة بتصير مو

حبيت الالوان الجديدة كتييير حتى تمنيت لو ما عندي العضوية المدفوعة
مشان اكشخ باللون الاخضر الانيق . . و الالوان الباقية تحفة خاصتا البنفسجي

و فرحت كتير لما شفت مشرفين جدد و مشرفين ترقوا عنجد مبسوطة كتير
ان شاء الله يضل موقع التون بإزدهار و تطور . .


​

 

[Selene]

مرحبا يا حلوين رجعنالكم مرة تانية . .
اليوم كان كتير حلو مابعرف ليه كل مرة بكون عندي تمرين رجلين بحسو عيد
مع انو غيري بييككككره هاليوم لانو بس يخلص تمرين بحس انو بطل يعرف يمشي

ما بعرف ليه انا ما بوصل لمرحلة ببطل اعرف امشي ؟ مع اني بلعب بهل اليوم لعب
عن الف رجال . . تخيلوا بس بس لرجلي حاطة بهل اليوم 12 تمرين

متخيلين العدد ؟ و كل تمرين اقوى من التاني ( بدون مزح ) مقسمتهم لـ :
- 3 تمارين للعضلة الجانبية
- 3 تمارين للعضلة الخلفية
- 2 للعضلة الامامية و الخلفية
- 4 تمارين للعضلة الامامية

بالعادة بعملوا يوم الرجلين يومين يوم للامامي لحال و يوم لباقي التمارين
لانهم كتار و صعبين و على فكرة في تمارين اكتر من هدول بس والله جدولي فل
و نفسي غير التمارين بس قالتلي اختي خليكي شهر على هالجدول بعد هالشهر غيري التمارين
مشان الجسم ما يتعود على هالنوعية . . بس في تمارين اساسية هي مستحيل غيرها بتمارين تانيية

نفس :

1. السكواتس : هاد اهم اهم اهم اهم تمرين بالرجلين يعني لو حدا بدلو بتمرين تاني
ما بعرف شو احكيلك ( شو استفدت انت هيك )

2. الديد لفت : هالتمرين للعضلة الخلفية و في منها نوعين في نوع اسمو الديد لفت الروماني
( مابعرف ليه هيك اسمو بس احفظوها ) هاد اقوى تمرين للعضلة الخلفية الفرق بينو وبين
التمرين الديد لفت العادي انو الروماني بتوصلوا البار لعند الركبة مو للارض و ترجعوا تطلعوا لفوق

3. اللانجز : هالتمرين قوي قوي ان كان بوزن اضافي او بوزن الجسم بس , هالتمرين بحرك العضلة
الامامية و الخلفية بنفس الوقت و كلما كانت فتحة رجلكم اوسع كلما كان تأثير التمرين اكبر
طبعا كلما وسعت فتحة الرجل كلما كان التمرين اصعب و رح تحسوا بالشد من اول دورة

4. اكستنشن الامامي : هاد الي بفوتو ما استفاد من يوم الرجلين لان بدون ما احكي انا
بمجرد انك انت تجرب اول مرة و تحط ايدك على رجلك رح تحس بعضلة رجلك انها برزت
هالتمرين رهيب و بخلي عضلة الرجل الامامية تبرز بشكل كتير حلو . .

5. و في تمرين بسكر مكانو السكواتس بس مفعولو حلو المكبس : هالتمرين خارق
مع اني بحس انو بيشبه ولو شوي السكواتس بس حلاوتو انو بالسكواتس الواحد ما
بيقدر يحمل وزن عالي اما بهل التمرين حلاوتو انو بكون الواحد قاعد يعني بيقدر يحمل وزن
اعلى . .

هدول التمارين الرئيسية للرجلين يعني بحس انو يوم الرجلين ما بيكمل بدونهم ابدا
و في تمارين تانية نفس :

تمارين الجانبية :

1. الحبلة الي بتكون مربوطة بالحديدة و فينا نبدل الادوات فيها منجيب اداة الي بتكون
نفس ربطة على الرجل و منربطها بالحبلة و منحرك الرجل على الجنب
هالتمرين خارق للعضلة الجانبية ( للي عندهم خفسة هالتمرين بروحها و بيعمل خصر
ما بعرف كيف بس انا بلش يطلعلي من هالتمرين )

2. عندكم التين هن عكس بعض وحدة فتح ووحدة ضم التنتين مهمين
الفتح بتقوي العضلات الجانبية و الضم بتقوي العضلات الداخلية و الاهم
الي بدهم ال GAPE الي بتكون بين الرجلين لازم يلعبوا تمارين الضم
لانها بتحرق الدهون المنطقة الداخلية

عندكن تمارين العضلة الخلفية كتير كتير ممتعة و حلوة و بتحسوا بشدة العضلة من اول يوم:

طبعا من هلأ بحكيلكن الي بدو يجربها لا يلومني على الوجع الي رح يجيه من اول يوم
بس بعدين رح يصير مممممتتتتع بشكل و الاهم انو بروح الترهل و بخلي الرجل شكلها كتيير حلو


1. الديد لفت : الريدي شرحتو فوق مو لازم ارجع اشرحو بس في عندكن الديد لفت العادي
الي بتنزلوا البار فيه للارض و بترجعوا تطلعوا و الاهم الاهم الاهم ضهركن يكون مستقيم
مو منحني و رجلكم مستقيمة لان لو انحنت رح تشتغل العضلة الامامية مو الخلفية ف
انتبهوا انكن ما تحنوا الفخد و ماتشدوه كتير يكون وسط .

2. في عندكن الالات بتكون نفس سرير و في مخدة ورا بتنامي عليه ( طبعا مو على ضهرك )
و بتحطي رجلك تحت المخدة و بترفعي المخدة لتوصل للفخد . . هاد التمرين بشل العضلة
الخلفية شل لانو كتيييير بشدها يعني بنفس التمرين لما خلص بحس ما بقدر امشي
على قد ما رجلي متخدرة هاد التمرين رهيييب

3. عندكن اللانجز كمان هاد تمرين بيجمع بين العضلة الخلفية و الامامية اذا كبرنا فتحة الرجل
اذا كانت الفتحة صغيرة رح تحرك اكتر شي العضلة الامامية ف انا مشان شغل العضلة الخلفية
و الامامية بالتمرين بنفس الوقت بوسع فتحة الرجل ( مع انو اصعب و هون يكمن التحدي )

و كمان بدي احكيلكن شغلة . . انو في الات بتركز على عضلة عضلة مو العضلتين مع بعض
يعني مثلا تمرين هاد التخت و ترفعي المخدة برجليكي هاد تمرين بركز على الرجلتين مع بعض
في بعض الالات فردية اي بتشغل عضلة عضلة على حدى و هالنوع من التمارين يعتبر من اقوى
التمارين لان انت بتحط كل تركيز التمرين برجل وحدة بدل رجلتين و عنجد فكرت نفس الشي لحتى
ما جربت التنين و شفت انو عنجد لما يكون تمرين لرجل وحدة بدل رجلتين بتعب اكتر ففي الة
للعضلة الخلفية كيف شكلها ؟ بتحطي ركبتك على مخدة و الرجل التانية بتحطيها تحت المخدة
بتحركي الرجل الي حاتطيها تحت المخدة هاد التمرين كتييير قوي و صعب بنفس الوقت و بتحدى
اي حدا يكمل 10 عدات بدون ما ترتجف رجلو ههههههههههههههههه

و في نفسو للعضلة الامامية الة بتشتغل فردي . .

و في تمرين جديد عن جديد صرت سويه لان جد جد جد شفتو ع اليوتيوب و شفت اديش
مدحوا فيه و لما جربتو ع الحقيقة ما صدقت

التمرين عبارة انكم تجيبوا كرسي او معقد الجم اذا انتوا بالجم و تخلوا الكرسي وراكم
و ترفعوا رجل على الكرسي بعدين بتجيبوا وزن او بدون ( اساسا بدون وزن صعبة )
بعدين بتنزلوا على رجل وحدة و بتطلعوا طبعا لا تخلوا الركبة تعمل بلوك خلوا فيه انحناء بسيط
هالتمرين دماااااااااار و ربي هاد اكتر تمرين بهلكني مابعرف ليه صعب صعب ياخي
الي بشوفو بدون ما يجربو بفكرو سخيف بس جد هالتمرين نفس تمرين البلانك محدا بحس فيه
الا الي مجربو و كلما كبرتفتحة الرجل كمان كلما صعب التمرين و صارت
في ضغط اكبر

المهم حسيت اني حكيت كتير بالنسبة لتدوينة يومية مع انو صدقا كان بدي اكتب شي تاني
و تحمست و دخلت بموضوع الجم

لسا ما شفتوا يوم الضهر . . من احلى الايام عندي و بحس من بعد تمرين الضهر
انو هيك ضهري مشدود و راجع لورا بكل ثقة والله احساس رهيب خاصتا انو بيجي
معو تمرين التراي بعششششق هاليوم جد

رح اكتبلكم بتدوينة تانية عن يوم الضهر . . والله شكلي رح اكتب بتدوينات
منفصلة عن روتيني لكل يوم

صح ما كتبت بتدوينة سابقة اني بلشت دايت ومابعرف شو بتعرفوا كم نقصت ؟
7 كيلو . . بس انا ما بتطلع ع الارقام بتعرفوا ليه ؟ نفس ما حكيتلكم بتدوينة سابقة كمان
عن الفرق بين وزن الدهون و العضل و جبتلكم صورة لنفس الوزن بين الدهون و العضل
و كان فرق الحجم كبير مع انهم نفس الوزن و لهل السبب اني انا ماعم بهتم للرقام لان جد
صح نزلت 7 كيلو و هالرقم مو قليل بس بنفس الوقت لا تنسوا اني عم العب حديد يعني
بكل تأكيد عم زيد عضل كمان و العضل الو وزن . . قياسي بالتياب اختلف كتير بحس اختلف
اكتر من 7 كيلو بس مو لأني العضل حجمو اقل و بنفس وزن الدهون ؟ مشان هيك ماعدت اهتم
للميزان . . و الاهم انو بحكيلكم بصراحة كان عندي بنطلون و بحكيها بدون خجل قبل
الكورونا كان يجي علي تمام اما بعد الكورونا ما كان يدخل بفخدي والله
هلأ صرت البسو احسن من لما كنت البسو قبل الكورونا هالشي كتير مفرحني يعني انا شو همني
الميزان اذا التياب ما فاتوا فيني ؟ هي التياب هي الميزان تبعي و المراية اهم شي انو كل شي فيني
عم يتغير لك حتى ضهري الي ما فكرت طلع فيه عضل بلش يبين فيه

بصراحة مبسوطة و الله حياة الرياضة كتييير حلوة . . و فوق هاد لليوم موقفة
شيشة من هديك التدوينة و مبسوووطة كتير . .

المهم انا لعيت كتير و بشك حدا قرا لنص التدوينة
اساسا الي قرأتها كلها رح اعطيه 5 تونات


تشوووووز

​

 

[Selene]

الي كان بدي احكيه بالتدوينة السابقة و سحبت عليه و حكيت عن الجم رح اكتبها هون
بصراحة يا جماعة موضوع جدي ومافيه مزح . .

ياجماعة انا بطلت اعرف احكي عربي نفس العالم حاسة حالي نفس البنقالي الي متعلم
عربي جديد ههههههههههههههه مابعرف هاد شو سببو ؟ معقول سببوا تفاوت بين اللغات ؟

هو اخي مرة حكالي رح توصل لمرحلة مارح يكون عندك لا لماني ولا انجليزي و لا عربي بس بعد هالمرحلة
في لغة رح تصير احسن وحدة معقول هاللغة تكون الانجليزي ؟

والله العظيم خايفة من كلامو لاني كلامو قاعد يصير جد جد صايرة انتبه ع حالي لما احكي مع
اهلي حتى هن كذا مرة كانوا يضحكوا علي لاني العربي تبعي صاير ضعيف

و انا ماخدتها ضحك معهم و انا من النوع الي بعشق عربيتي يعني اللغة بحبها كتير
بس والله العظيم مابعرف كيف احكيلكن يمكن هاد سببوا من تفاوت اللغات ع مخي
و صار هيك . . لا و زيد الطين بلة لسا بالجامعة مارح يكون في عربي بنوووب كلو انجليزي
و رفقات اجانب يعني يادوب لاقي وقت ولو 5 دقايق احكي فيها عربي مع اي حدا مافي

عاد هون الخوف الحقيقي . . حتى صرلي فترة اسمع اغاني عربية مشان ها شوي مخي يضل
متابع بس بلشت مل منهم . .

حدى عندو طريقة مشان اللغة العربية تضل تعرف رفرش بالمخ ما عدا القراءة بليز
الواحد جد يادوب عندو وقت ليدرس الماني بروح يريح عيونو من الكتب يفتح كتاب تاني

انا خايفة تنضرب لغتي جد

​

 

[Selene]

-



^ اساسا هالتدوينة مليانة اخطاء املائية و اخطاء بصياغة الجملة ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه بموووووووووووووووت

 

[Selene]

فعالية الأسبوعية

كُلنا لدينا أهداف في حياتنا نسعى لتحقيقها بأي شكل كان؛
شاركنا أهدافك الكبيرة التي تَسعى لتحقيقها


يجب ان لا نشارك احلامنا و طموحاتنا على العلن , لأنه في العالم ، ماعدا والدك وأمك ، لا أحد هو صديقك
الحميم . إذا ألحقت عليهم أي أذى ، او اذا القيت باللوم عليهم ، او اذا أسأت إليهم ، فلن يتغيروا أبدًا ولن
ينتقموا منك ، لأن الوالدين هم مقدموا الرعاية والقائمون على الرعاية ، فهم كذلك من سيضحي من أجلك
كلما وقعت في ورطة ..

ولكن .. الأصدقاء ، لن أعارض على الصداقات ، فبدونها تكون الحياة مستحيلة ، ولكن مع ذلك ..
في بعض الأحيان يمكن أن يصبح أفضل صديق لك أسوأ عدو لك ، وقد ينحرفون عن جانبهم في
أي يوم ، لكن والديك سيواصلان التضحية من أجلك حتى يوم تقاعدهم ..

لا ينبغي مشاركة الأحلام مع أي شخص ، الآن في هذا الزمن لا أحد يعرف أي شيء سوى
المنافسة ! أقول إن أفضل الأصدقاء يمكن أن يصبح منافسًا صحيًا لك ، أنت لا تعرف أبدًا ..

حتى تستعد ، من الأفضل عدم مشاركة رغباتك الملتهبة ، فعندما تقول أحلامك لأصدقائك
فإنهم قد يتفاعلون بقول تعليقات سلبية مثل " هذا ليس لك " ، " لا يمكنك فعل ذلك أبدًا "
إلخ .. سوف يستمرون في تثبيط عزيمتك ، وسوف تبدأ ببطء في تحطيم أحلامك ..

يتفاعل الآباء أيضًا ولكنهم يريدونك حقًا تحقيق ذلك على أي حال ..

أنا لا أقول أن لا تشارك الأشياء الشخصية مع الأصدقاء ، نعم يمكنك مشاركة أي شيء ولكن
الأحلام هي رغبات مشتعلة ، هذه أكثر من مجرد أشياء شخصية ويجب على الجميع الحفاظ
على خصوصيتها ..


ملاحظة: الطموح بالاساس كان حلم و تحقق بالعمل و الجهد

​

 

[Selene]

مساء الورد للجميع

مابعرف ليه كل يوم جمعة بكون ملل و المصيبة انو كل يوم لما يكون عندي دوام
عقلي بيحلالو السهر لا و فجأة بتطلع الاشياء الي بتسلي و الانميات الحلوة
اما لو كان ويكند و بكرا عطلة بنام من ساعة 8 المغرب و كل شي بكون ممل
سبحان الله كيف الانسان . .

اليوم كان حلو طبعا من ناحية الجو . . كان معتدل هوا بارد نسبيا و في هوا
لطيييف . . ولبست اليوم تياب صيفية كنت خايفة من اسبوع البس تياب صيفية
لان دوامي الصبح و بكون بررد و الضهر بكون حرررر ف احترت شو سوي ؟
ف اليوم قررت البس تياب صيفية و امري ل الله لأكتشف انو اليوم الجو بجنن . .

المهم الكلاس اليوم كان مممممللل هو دائما كل جمعة بكون ممل لان خلص
بكون اخر الاسبوع و الواحد بكون طااق قلبو . .

رحت ع الجم بعد الكورس دايركت و كان عندي اليوم ضهر و تراي . . بصراحة
هاليوم عندي ياه ادماااااان لاني بحس جسمي كلو بيستقيم و بشد . . عنجد
انو يوم الضهر و الرجلين من اهم الايام لانهم بيشغلوا العضلات الاساسية

تمرنت تمرين خواصر 100 مرة يمين و 100 يسار و بعدين لعبت كارديو الدرج
نص ساعة و كان الحمد الله تمرين اليوم حلو . . هو انا بالعادة انا الي
بفجر التمرين مو هو بفجرني . .

على كلن مابدي احكي كتير بالجم و بعدين تصير نفس التدوينة تبعيت يوم الرجلين . .
انا عندي فكرة جديدة لموضوع و ان شاء الله حصل عليها موافقة من الادارة عشان
اطرحها متحمستلها كتير . .

و بس والله هاد كل شي لليوم طبعا اعذروني على هالروتين الممل

و قبل ما انهي التدوينة بهديلكم هالاغنية

​

 

[Selene]

مساء الورد للجميع

رح احكيلكم من الاخر وبدون لف ودوران . . انا جد جد جد مالي ابدا ابدا ابدا خلق
ادرس الماني ياخي مدري كيف بدي انسحب بشكل لان مخي مققققفففففللل و اجا
الكورس بوقت غلط x_x والله العظيم و هي حلفت انو داومت سنة كاملة بكورس
B1 و كنت روح كل يوم ولا يوم من ايام دوامي بهل الكورس كنت حس اني بدي
نام و حس انو راسي ثقيل شو ما كان , كان بكون فيه شوي اكشن و يكون شوي
ممتع اما هالكورس ههههههههههههههههه لانيه مو شبابي و كلن كبار
ف مممممممممممممللللل هداك الكورس كنا نلعب باللغة الالمانية مو بس كنا ندرس
كنا نسوي مجموعات و نتحدى بعض باللغة الالمانية الي بيغلط مثلا بكلمة المانية
فريق الخصم بياخد نقطة و من هالالعاب طبعا هي حلاوتها انها بالالماني و انو مع
رفقاتنا وكلن من نفس العمر . . اما شو الجوب زعتر حطوني بكورس كلن ختايرة لدرجة
انا انصدمت لما الاستاذ صار يناديني ( فغاااو المااااسري ) ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
انا قلت بقلبي خيييييييييييييييبببةة شو صاير
لك حتى صوتها ع الاذن كتير بايخة
هي كلمة احترام زايد نفس ما نحكي بالعربي السيد بوخشم مابيحكوا اول الاسم
بيحكوا تاني اسم كنوع من الاحترام < اعذرني سكاي حطيتك مثال
ف يعني هداك الكورس كنا نحن و الاساتذة اصدقاء و كنا نحكيهم بصيغة
الرفقات مو الاحترام لهل الدرجة كانوا قريبين منا و ما كنت حس بهل الحساسية
انو فغاو هير مدري شو ( سيد و سيدة ) يعني الوضع اوفر
ف اليوم من كتر الملل . . يعني فوق ما ال B2 ممل من الله و كمان الكورس
كلو كبار و الاستاذ ممل بشكل بس شاطر يلعي و يلعي و يلعي و ياريت لو
منفهم شي هههههههههههههههههه بيحكي بسرعة ايمينيم و بلغة
B2 و متوقع منا انو نفهم < خير ههههههههههههههههههههههه ص0 ؟
لك كنت رح نااااااااام حسيت اني دااايخة و بس بدي حط راسي ع الطاولة
ع اد ماحسيت راسي تقيل ههههههههههههههه لا و احلى شي
بالضبط بنفس الوقت الي اجاني الخمول و النعس وصلنا لسؤال انو نسوي
جمل على كلمات تحت ثيم ( البيئة و المناخ ) و انا قلت والله العظيم مارح حل
و هي حلفت و انا عم حاول اني مخمخ بشي جملة و الله كان
مخي فااااااضي مع اني فيني ترجم الكلام للالماني اذا ما عرفت كلمة بس
اني لاقي جملة بالعربي عن هالثيم و لا كنت لاقي ههههههههههههههههههه
حسيت اني هبلةة و محششة بنص الكلاس الحمد الله
الاستاذ ما ركز علي اساسا انا مابدي العب دور الشاطر لاني بصراحة
مو حاطة ببالي حط جهد فعلي بالكورس لاني مبين من اولو ص0

بالاخر ما منحكي غير هاكونا ماتاتا ص0

​

 

[Selene]

لا يعود الإنسان بعدما أحب من قلبه , لايعود كاملاَ كما كان لا يعود قلبه
على ما يرام , ولا حتى ايامه القادمة ولا أوقاته التي يعيشها بخلوة مع
نفسه, سيتذكر كل شيء حتى وإن أظهر النسيان سيبكي كثيراَ, سيٌصبح
ضحية أمام الذكريات كٌل شيء لن يعود كما كان بعد ان تحب , لأن الذي
بيسار صدرك لم يعد لك . . "


2020 . 09 . 25


​

 

[Selene]

فعالية الأسبوع

-العالم كُلّه يسمعك؛ ماذا تُريد أن تقول ؟
مع وَضع هاشتاق #فعالية_الأسبوع

احم احم تست تست ون تو ثري . . شغال ؟ اي اي شغال

بسم الله الرحمن الرحيم . . حابة احكي و لو اني عارفة كلامي مارح يوصل
لكل العالم ف رح احكي الي بقلبي لانو جد ضل بقلبي فترة و منيح اجت
فعالية نفس هي مشان احكي

ياريت لو الناس تبطل تتنمر ع الناس لان هالموضوع مانو بسيط ابدا ابدا
و ربي انو الموضوع ممكن يتفاقم ليصير مرض نفسي شنيع و كتير بوجع

لما الواحد يكون من وهو صغير تم التنمر عليه رح يضل كككككل عمرو
عندو عقدة و قلة ثقة بنفسو بسبب هالشخص الي تنمر عليه و هو صغير

حتى و هو كبير على اساس احسن ؟

ف لما شوف بنت اغلب الوقت تحكي ( و مالو جسمي انا عاجبني
او انو تذكر جسمها زيادة عن اللزوم او اول شي يخطر ببالها ب أي مثال
جسمها ف هي بتكون متعقدة منو بسبب بعض الناس الي تنمروا عليها
او بالاحرى على جسمها . . )

او لو بنت مو واثقة بنفسها و جمالها لان مرة من مرات او اكتر من مرة
حدا قالها انتي بشعة او مصدقة حالك انك حلوة و من هالتعليقات
وممكن وقتها يكون ردها قوي و مو هاممها بس بينها و بين نفسها
اي اهتزت . . و اي بنت بتهتز و لا تحكولي محدا بهموا رأي الناس
اي بترد ع الشخص بقوة و بتمسح الارض فيه بس بدكن الصراحة ؟
اي بتفكر بينها و بين نفسها بكلامو بس بتعرفوا

ع كترة المرات الي بينحكى فيها خلص ياخي البنت بتوصل لمرحلة
انو ثقتها بتهتز ع قد ما كانت حلوة . . بتصير بتتذكر كلام بعض الناس

المهم مو حابة اني كتر كلام . . في كتير امثلة وربي معنااااااااااة
للي بعيشها بسبب التنمر . .

ان كان على الشكل ولا على الجسم ولا على شخصية او اي شي

ياعمي في كتي رمرات انا مابحب بعض الناس او ما بنعجب فيهم
بس ما بروح بتنمر ع كل حدا كان عكسي او كان ما بيشبهني
او ما عجبني ؟ شو هالعقلية الغبية ؟

و اخدينها اونة شخصية قوية ؟ انتوا قولوا والله
عنجد قوة شخصية ؟ اساسا من هون بتبدا ضعف الشخصية

و بتذكر مرة رورو نزلت موضوع عن التنمر و كتبت رد طويل عريض
و انو تم التنمر علي . . مشان هيك انا ما بتنمر ع حدا بغض النظر
انو بنظر المتنمر انو هالشي بشوفو واو او قوة شخصية انا ما بتنمر
ع حدا لاني ذقت طعم التنمر و تعذبت منو مع اني انا بنت مسالمة
بس شايفين ؟ عمري ما بذوق حدا شي انا ذقتو

المهم مو حابة طول الموضوع . . بس موضوع التنمر موضوع خطير جدا
ولازم محدا يستهين فيه ابدا لان . .

الكلمة بتنقال و بتنتهي و بتمر الايام بس
معناها بضل كككككككككل العمرررررررررررر


فتأكدوا مليون مرة و راجعوا نفسكم مرة و مرتين و تلاتة
قبل ما تحكوا كلمة بتجرح لحدا و اسألو نفسكم :

هل هالشي بيستاهل انو يعيش كل عمرو بعذاب نفسي ؟
و تذكروا انو في الله و شايف كل شي و في حساب بالدنيا
و بالاخرة


​

 

[Selene]

# لا تجلس لوحدك طول اليوم !
العزلة حلوه ونحتاجها لنعيد تنظيم افكارنا واهدافنا لكن مو بالشكل الي يخليك تغلق الابواب
الي حولك لان مو كل الابواب الي تغلقه سهل فتحها وكل ما زادت عدد الابواب المغلقه كل ما
صارت العزله الي ترتاح فيها سجن لا مخرج منه سوا الدخول في متاهات من الافكار الغير مفهومه
وتنتهي بكئابه شديده تجلعلك لا تفهم نفسك ولا تحبها ولا تعرف ماذا تريد ..

والله شكلو القطار فاتني و مارح اقدر اني ارجع صحح بعض العادات الخاطئة
الي عودت نفسي عليها و الانعزال وحدة منهم حتى وربي انو اخر سطر الي كتبته
هاد الي قاعد يصير معي بالضبط . . انا ماعم بفهم حالي و مابحب حالي و عم حاول دور ع نفسي
شكلي ضيعتها من زمان . .

# تكلم وفضفض لا تكتم !
الفضفضه مع الغير مهمه جدا ً وضرورية لتحس بالراحة عندما تتكلم عن مشاغلك همومك
قهرك حزنك اعجابك صدماتك الخ تساعد بالتخفيف حتى وان كان الشخص الي مختارة للفضفضه
غبي او ما يعرف كيف يحاورك , اهم شي اختيارك للشخص ما يكون بايخ يرمي نكته بنص كلامك
او يتمسخر من شي انت مقهور عليه , او ينقل الكلام اهم شي تختار شخص امين !
كتم الامور هذه كلها تتعب نفسيتك وراحتك وتجعل الافكار متكومه في عقلك الامر الذي يجعلك
تحس بالضياع او بالاحرى الغرق داخل حفرا سوداء ولا مخرج منها !

طيب و الي عندو ازمة ثقة من الكل حتى لما شوف شخص منيح ياخي ورب الكعبة انو
الغدرة بتجيك من اقرب شخص قبل ما تجيب من ابعد شخص !! و انت عارف هالشي صح ؟

انا عندي تجارب كتير كتير كتير سيئة بهل الخصوص لدرجة عودت حالي اني ما احكي
او رح نجي للنقطة الاولى الي خلتني اعزل نفسي عن الكل الي بالتالي رح نوصل لهل النقطة
اني عود حالي اني ما احكي لحدا ! و هي الناس السيئين بهل الحياة و يمكن ما بتعرف يجيني
شخص منيح و سكر الباب بوشو بسبب تجاربي الفاشلة بس شو بدي سوي ؟ ياعمي الواحد تعب
من كتر التجارب الفاشلة و الله ما عاد الي طاقة اني افتح قلبي و احكي . . صار الواحد بعد كل فضفضة
يحكي ياااريت لو ما فضفضت . . و هالجملة لما تنقال اسوأ بكتير من عدم الفضفضة !
و ياما قلتها و ندمت اني حكيت الي بقلبي . .

# حب نفسك ودللها وامنح الاخرين فرصة لحبها !
لا تعامل نفسك على انك شخص مضروب او منتهي او بلا فائده او شخص ليس لديه ما يخسره
امنح نفسك ما تستحق والجميع يستحق ان يرتاح وان يضحك ويبتسم وان يشعر بالدلال !
لا تحرم نفسك فقط لنظريه ان الحياة لن تستمر او الحياة زائلة وكل الي حولنا هو وقتي ..

الحياة ليست زائلة بل انت زائل عنها فحاول ان تترك بصمتك فيها قبل ان تزول منها !
لا ترضى بالقليل ولا تقبل ان تكون لاشيء ! حاول ان تحفر تاريخ وذكريات لن ينساها احد
اهدف لبناء نفسك بالشكل الذي يجعل الاخرين كل ما ذكروك بكوا على ما فقدو وما خسروا
لا ترضى بان تزول وانت غير معروف من هذه الحياة بنظر احد ..

انا هيك . . لا حدا يغرو الاسد الي برا ( كنت دائما شبه نفسي بالاسد لاني
انا من برج الاسد و كنت افتخر بصفات برج الاسد للي ما قراها يقرأها ليفهم قصدي )
بس من جواتي كان العكس تماما كنت دايما منهزمة مهما بذلت من مجهود
و كنت دايما حس نفسي ناقصة لو شو ما حطيت و عمل و سويت مدري يمكن
كنت اتطلع ع غيري مو على شو عندو ؟ لا انو مثلا لما حط كيلو مكياج ما بطلع
حلوة نفس ما بنت تانية تحط كيلو مكياج و هالشي كان مرات يسببلي كآبة
انو حتى مع مكياج مو حلوة . . لو شو ما البس ما بطلع حلوة نفس ما بنت تانية
تلبس و تطلع حلوة . . و هالشي سببلي كآبة و بطلت حب نفسي يوم عن يوم

يمكن الجمال هو مو كل شي و مرات كانت تمر ايام حس حالي فيها كتير حلوة
بدون شي . . بس بتعرف هالايام بتنعد عالأصابع كنت اكره حالي اكتر من ما حبها

حتى من ناحية الدراسة نفس الشي . . بدرس بدرس بدرس و انا ذكية و الله ذكية
بسبب عدم الثقة هالشي بخليني اني انسى و هاد بأثر بالمخ ترا . . صرت ادرس
مليون ساعة مشان يغطي هالشي و غيري بتدرس ربع ساعة بتكون اذكى بالحصة ليه طيب ؟
هالشي مو سبب اني اكره حالي و ما حبها ؟

لو شو ما سويت . . لدرجة حبيت الرياضة و خليت الجم هوايتي قبل ما يكون
روتين حياة . . بسبب اني لاقي نفسي الي ضيعتها . . رح تحكي شو دخل الجم
ب اني لاقي نفسي . . لما الوحدة ما تكون واثقة من نفسها بأي شي بتعملو
مع انو الي بتعملو بجنن و احسن من كتير ناس ف فكرت الرياضة هي الي
رح تخليني زيد ثقتي بنفسي و حبها اكتر . . و فعلا وصلت لربع هالمرحلة و لما
قربت وصل للهدف صارت و تركت الجم و زدت عشر تالات كيلو و رجعت الحالة

و هلأ عم حاول قد ما اقدر ارجع ع الاقل لربع هديك المرحلة الي وصلتلها
لاني حسيت انو الرياضة هي الحل اني حب نفسي و قدرها . . لأنها بتزيد الثقة
و حسيت هاد الي ناقصني الثقة . .


بصراحة تدوينتك حزنتني لانها حقيقة و صحيحة و الي احزني اني
مابقدر اني غير من نفسي من بعد هالعمر . . لأن افضل عمر للتغيير
لما نكون صغار و مراهقين . . هلأ صار كتير صعب اني غير عادة بسيطة
فما بالك لما كون معتزلة عن العالم . .

و ذكرت بتدوينة من تدويناتي اني بلشت انسى اللغة العربية
بسبب عدم ممارستي الها و هالشي بسبب انعزالي عن العالم
انو عنجد هالشي و كتير محزن و مثير للشفقة . .

لما اتذكر كيف كنت اجتماعية و هلأ منعزلة . . شي مثير
للإشمئزاز فعلا . .

ترى صح كتبت اني ماعندي طاقة للتغيير و هالشي صحيح
بس بتعرف ومع هيك اخر نتوفة طاقة باقية حاتطها للتغيير ؟
اي حابة كون احسن بس والله مو قادرة . . مثلا بالكورس فيه
بنات والله مخي لحالو قاعد يعمل سيناريو و صورة بشعة انو تخليني
ابتعد و ماروح اتعرف او احكي مع اي بنت او حتى اني كون صداقات
هالحاجز ماااااااااعم ينكسر ! ماعم بقدر حكي حدا او كون صداقات
و الشي مو مني . . هههههه انا بدي بالعكس مافي احلى من الصداقات
بس . . ههههههههههه شو بدو الواحد يحكي

اكتر شي بيوجع الشخص . . لما يزعل ع حالو . .
و انا زعلانة ع حالي لاني وصلت لمرحلة ما عندي
طاقة لأي تغيير و مافي حدا بمحيطي ساعدني او شجعني
للتغيير و هاد مثير للشفقة اكتر انو الشخص يكون بحاجة لشخص
تاني مشان يعينو . . و هالشي انا ضدو


انا ما بحب افتح تمي بالفضفضة لان بقطر نكد و سلبية
بس تدوينتك شجعتني اني علق و فضفض مع اني بكره الفضفضة

​