فخر المدونين Make Some NOISE (7 زائر)

[Selene]

مرحبا يا حلوين

# تحدي شهر 7
و نبتدي باول تدوينة من صفحة 12 بجرعة تفاؤل و حماس و فرح

انا قررت اني غير جسمي و ادخل كورس تنحيف مدتو 4 شهور . . بس انا ناوية اني انحف بمدة

شهر و نص 15 كيلو . . الكورس مدتو طويلة و هو خاص للاشخاص الي اوزانهم عالية

بس الي من 100 و تحت بيقدر ينزل قبل ما تنتهي مدة الكورس . .

هالدايت رهيب و سمعت عن كتير اشخاص نحفوا منو 20 و 30 كيلو و اعمارهم كانت كبيرة

بهل الكورس بيقدر الواحد ينحف 2-3 كيلو بالاسبوع يعني بشهر بيقدر الواحد ينزل 12 كيلو

لو كان ماشي عليه مزبوط و الحلو فيه انو مابيحرموني من شي و بالاسابيع القادمة

رح تنفتحلي وجبات كانت ممنوعة بصراحة ناوية على 15 كيلو من اليوم لاني الريدي

بلشت لقبل عيد ميلادي تاريخ 28.7 و كمان اليوم سجلت بالجم مشان زيد النتائج . .

ع فكرة هالدايت بدون رياضة بتطلع نتائجه بس مع الرياضة النزول بكون اسرع و اسهل

+ قبل بيوم ما ابدأ الدايت بكون في يوم لتنضيف المعدة بهل اليوم تخيلوا يوم واحد بتنقصو

من 1 الى 3 كيلو . . عبارة عن شرب سوائل بكميات كبيرة و اكل زيادي قليل الدسم

و اكل فواكه و خضراوات بجميع انواعها و بكميات مفتوحة ماعدا العنب و المانجا و الموز

و كلما اكلنا اكتر وشربنا اكتر كلما استفدنا اكتر .. الفائدة من هاليوم انو لما نبدا دايت

بتكون المعدة نضيفة و الدايت بيضرب دايركت ع الدهون بدل ما يبدا بتنضيف المعدة

انا لسا ما سويت هاليوم لان الدايت بيبدأ يوم الخميس بس انا حاليا مانعة نفسي من اليوم

ليوم الخميس من الاكل الي فيه كاربز . . الصبح اكلت بيضة مسلوقة خيار و بندورة و زيتون

و الغدا سويت قطع جاج صغيرة مع بروكلي و ذرة و فطر و فليفلة و عصر كتير ليمون عليهم

و تبلتهم و خليتهم يستووا ع البخار و العشا اكلت رمانة و بس . . و هيك ليوم الاربعاء

رح سوي تنضيف معدة و بلش بالدايت الفعلي . .

بما اني مو من البنات الي بتخجل من وزنها ف رح صورلكم نتائج الدايت

و هاد كل شي لليوم


​

 

[Selene]

#تحدي_العادات_السيئة

هالتدوينة كمان تحدي بس هالمرة الكن . . بس قبل ما احكيلكم شو هالتحدي

رح احكيلكم قصته . .

رح يعتبر اعتراف بس انا حالياَ مابعرف اذا بصنف ضمن مدمنين التدخين او لا

انا بحب كتير الشيشة او الارجيلة بلهجتنا وبدخنها يوميا و مرات مرتين
و خاصتا هالفترة كتير زودتها بسبب الحجر الي صار قبل

طبعا مو حابة احكيلكم انو كتير ساءت حالتي بسببها و ماقدرت اني وقفها لاني
ماعندي شغلة سويها ف كنت اتسلى فيها . . و المصيبة انو عودت حالي

كلما اقعد ع المنتدى لازم تكون جمبي ومابقدر صمم شي او سوي موضوع بمزاج بدونها

و هالخطأ الي سويتو بس شسمه . . من اليوم قررت اخدت قرار اني وقفها و القرار اجا

مع قرار تغيير جسمي . . ناوية اني غير من نفسي للأحسن و اترك العادات المو منيحة
هلأ مو اني انا ترك الشيشة للأبد بس بصير اني دخنها كل سنة مرة . .
بس المهم اني اترك عادة جدا سيئة لما تصير بشكل يومي

ف التحدي هو عبارة انو نحاول نترك عادات سيئة لفترة مو ضروري للأبد

نمنع حالنا منها لفترة شهر مثلا . . مثلا نمنع نفسنا من شرب المشروبات الغازية

او نمنع نفسنا من السهر الخ ف اذكروا من شو بدكن تمنعوا نفسكم

و اذا شي خاص لان مرات بكون في عنا عادات سيئة و مو حابين نخبر حدا عنها

ف لا تكتبوها بس احكولي نتائج التحدي و اكيد بكون سعيدة حتى لو كان شي خاص

لأن انا عانيت من التدخين ف اكيد حدا غيري عم بعاني و بدو تشجيع انو يترك هالعادة
ف هالتحدي اجا و نحن لها WE CAN DO IT


حط الهاتشاق و احكي لنا قصتك

: اشكر المصممة المبدعة Z U R A لتصميمها هالطقم الرهيب

​

 

[Selene]

فعالية الأسبوع 2

شارِكنا عشر أشياءٍ مُختلفة عن شخصيّتك.

هلأ مابعرف لو رح اقدر اعطيكم 10 اشياء 10 اشياء بس رح حاول اني مخمخ بشخصيتي
و اكتب الي اعرفه لانو بتعرفو الي شايفتو مو نفس الي شايفينو الناس رح حط جمب كل صفة
حدتها فيني من 10 و الي فوق العشرة قولوا الله يستر

1. عنيدة 7/10 - و الشي الحلو الي دربت حالي فيه اني عاند على اهداف لحققها
2. عصبية 1000/10 - و هالشي مسببلي ازمة لدرجة فتحت قوقل و بحثت عن حلول لمشكلة العصبية
3. خيالية 10/10 - بحب كتير اتخيل اشياء يمكن مستحيل تصير بس هيك بحس بإستمتاع و خيالي خصب
4. حساسة 1000/10 - بحاول كتير اني ما خلي هالصفة تأثر بشكل سلبي علي لانو مو منيحة كتير ><"
5. انطوائية 4/10 - بحب الهدوء و عدم الاختلاط مع اي شخص مابعرفو و بتزعجني الاماكن الي فيها ضجيج
6. مزاجية 7/10 - مزاجي عادي ينقلب من فرحانة كتير لأني ابكي بثانية ممكن اي شي صغير يغير مزاجي
7. هادئة 5/10 - صرت ميل على الهدوء اكتر من الضجيج و عادي كمل ساعة و انا ساكتة و مستمتعة بهل الشي
8. حنونة 1000/10 - كتير ناس حكولي هالصفة فيني حنية لا توصف يمكن اخدتها من ماما
9. شغوفة 10/10 - شغوفة لكل الاشياء الي بحبها ومستحيل هالشغف يروح و شغوفة لاني اتعلم كل شي جديد
10. طموحة 10/10 - بحب كتير اني كون احسن بكرا و اني طور من نفسي حتى لو اليوم كنت 0 و بكر 1 ف هاد انجاز


​

 

[Selene]

مرات لما نكون بعلاقة سامة بتضرنا اكتر ما تفيدنا . . و هو مو مجرد لقب جمب اسمك
بالسوشل ميديا ( Taken مع القفل ) . . مرات كتير الواحد ما بيقدر يترك و يمشي !
بكون مربوط بهل العلاقة لانو التزم ! لانو صارت هالعلاقة مسؤولية عليه مابيقدر
يترك و يمشي !

و كمان انو مجبور يستحمل ! منو مشان يتعلم من تجاربو القديمة مو ع اول مطب ينسحب !
و منها لانو بحب هالشخص ! ف من هون سمومية العلاقة بتبلش ! لما هالاشياء تكتر !
لما الشخص يتنازل عن حقو بالعلاقة . . ! وقتا كل شي بينهدم . . ووقتا العد التنازلي للفراق . .

ف جد جد انو الواحد يترك افضل من انو يضل ! . . بس للأسف مرات الشخص ما بيفهم هالشي
الا متأخر ! لانو هالشي جدا صعب خاصتا لما يكون احد الاطراف متعلق اكتر من التاني . .
و بكون مربوط بالذكريات . . ! وهاد اسوأ شي !! بحس حالو انو مربوط روحيا مع هداك الشخص !
و اذا تركوا كأني روحو طلعت من جسمو بالضبط ! ببطل يتنفس . . ! بصير بخبط ! بصرخ ! بكسر !
ما عاد فيه روح . . اي . . الي عطاه هالروح راح من حياتو بكل بساطة . . ما عاد يسمع عنو شي . .
مبارح كانوا يسالوا ع بعض و يحكوا لبعض وانا كمان بحبك و اليوم مافي حدا . . ! شعور قاسي صح ؟

كل شي بذكرو بهل الشخص , الطريقة الي كان يدلعوا فيها و القابهم بين بعض و خلفية الموبايل
و اسمهم على الموبايل و محادثاتهم و الاغاني المشتركة بينهم . . الهدايا و الصور المشتركة
مع بعض و الاماكن . . و الكلام . . و العطور . . حتى السرير نفسو الي كان هالشخص
يكلمه قبل ما ينام ! يتذكر و يقول كنت اكلمه قبل لا انام ! و الاهم الوعود الي كانت بينهم !
بيت يجمعهم !! شايفة هالبيت ؟ بيتنا رح يكون احلى من هاد . . رح يكون فيه كراجين للسيارة
وحدة الي ووحدة الك . . و رح يكون فيه مسبح لانك بتحبي تسبحي و رح يكون بالغابة نفس هالبيت
لأنو كتير دافي و حنون . .

لما هالشخص يقله حفظت الدرس ؟ الي هو انك تسكر الشباك عشان ما تبرد و تغطى منيح
لأني انا بخاف عليك من البرد ؟ و يقول اي انا حفظت الدرس رح سويهم قبل ما نام . .

و كتير اشياء غيرها . . بس اول ما يبدا بالتخلي شوي شوي هون عاد تنتهي العلاقة او تقدروا
تحكوا العد التنازلي لإنتهائها و متأكدة انو هالشخص كان بيعرف انو هالعلاقة رح تنتهي
عاجل ام اجلاَ و ما كان جاهز لهل اليوم ابدا . . و كل يوم بقول ببالو متى رح يجي هاليوم ؟
انا خايف كتير . . صرت كتير متعلق فيه . . ! بس و اخييرا . . ! اجا هاليوم . . و روحي طلعت
و ارتحت . . شكرا انك ريحتني من اخر روح كانت فيني . . كنت متعذب فيها و انت ريحتني
لأن من بعدك مارح يكون في حدا ليوم مماتي . .

بس هالشخص بحب يحكيلك شغلة صغيرة الك قبل ما يسكر هالصفحة للأبد و ينساك
و كأنك شي ما صار . . !

بعض اللقى مؤلم و بعض الفراق احسن . . !

​

 

[Selene]

بمجرد ان تتعافى من علاقة ما . .
ستكتشف بأن الحياة ما زالت مستمرة, لكنك انت من توقف
عن المشي, و ستلاحظ ان أضواء الشوارع لم تنطفىء, انما
شيئٌ ما بداخلك لم يرى الضوء منذ زمن, و بأن لكل انسان ملامحه
الخاصة, كل مافي الامر أنك كنت ترى ملامحه في كل وجه
تصادفه , بمجرد ان تتعافى من علاقة ما, سترى الاشياء من
منظور اخر, و ستفخر بنفسك حينما كانت جميع تلك الاشياء
تدعوك للإستسلام و لكنك لم تفعل

​

 

[Selene]

و يظل السؤال: لماذا من بين الآلاف الوجوه التي تعبرنا
لا نسقط في حٌب إلا الوجه الذي لا نملك رؤيته إلا بشق
الأنفس ! لماذا من بين كل الأكتاف الملاصقة لنا . .
لا يسقط رأسنا إلا على الكتف الذي بيننا و بينه مسافة
الأرض و العادات والمجتمع . . !

لماذا دائما يأتي الحب . . مُتأخراّ . .
قويا . . و مستحيلا . . ؟!

​

 

[Selene]

هالسبوعين الي مروا مستغربة اني ما تضايقت ولا شي
و اكتر اسبوعين كان عندي فيهم سلام داخلي مو طبيعي . . !

هيك مو زعلانة من شي و مو فارق معي حدا و مطوفة للكل
و مطوفة لكل شي مكتأب و حزين و بعصبني . . !

هيك صار فيني برود مشاعر و احاسيس مو طبيعية !
و الاهم انو كتير مرتاحةة نفسيا ! صدقاّ كأن سم و راح
عن قلبي ! ما توقعت انو قرار بسيط بيعمل فيني كل هاد

و مبسوطة كتير و صدقوني هالفرحة مانها مصطنعة ابدا
حاسة ان هالاسبوعين كل الي هاممني هو نفسي وبس
و مهتمة بحالي كتير . . مبسوطة اني تركت الشيشة
هلأ انا مكملة اسبوعين بدونها و صدقا اني مرتاحةة
من ناحية التنفس و مرتاحة نفسيا اني بيني و بين حالي
ماني مدمنة لشي لأني بكره هالمصطلح . . !

و فوق هاد ادائي بالجم تحسن كتييير خلال اسبوعين !
نقصت 4 كيلو يعني بتقدروا تحكوا اسبوع و 4 ايام
و جسمي قاعد يتغير مع انو هو مجرد اسبوعين . .

المهم اني من يوم و رايح مارح فكر الا بنفسي و سعادة
نفسي و مصلحة نفسي . . صدقاَ انو ارضاء الاخرين
غاية لا تُدرك . . !

و مرة شفت مقولة انو اذا الانسان ما حب حالو صعب
يقدر يحب حدا ! لان الحب بيبدأ من حبك لذاتك و بعدها للآخرين

و بتمنى كمان انكم تكونوا مبسوطين و مرتاحين بحياتهم

حابة اسألكم هل انتوا كمان عندكم سلام داخلي ؟

 

[Selene]

شي جدا غريب . . كيف انسان كان كتييير قريب مني مبارح اليوم بكل بساطة
صرنا غربا ! . . كتييير غريب الموضوع و المصيبة هي مو اول مرة بتصير !
و كل ما تصير كأنها اول مرة بالنسبة الي ! هالموضوع بالنسبة الي مو عادي ابدا . . !

نفسي بشخص يقدر الذكريات و المعاشرة و الايام الحلوة مع بعض !
والله العظيم اني انا لما كت صغيرة كنت ابكي على الشخص نفسو
بس هلأ لا تغير كل تفكيري . . ! صرت ابكي ع الايام و الذكريات الحلوة
الي كانت مع بعض ! انو كيف بكل بساطة بكل بساطة بيندعس عليها
و بيمشي و لا كأني صار شي !

هالوضع طبيعي عند الناس يعني ؟ ياريت لو بالحب بس ! لا و بالصداقات
كمان ! و لا كأني صار شي . . هيك ندعس و نمشي ! انا اديش بحتقر هالنوعية
من الناس الي عندها الذكريات شي جدا سخيف و الايام الحلوة و العشرة !
و ما بتحسبلهم حساب ! اي انا من النوع بموت الف موتة بأي علاقة و بستحمل
بس مشان هالموضوع و اتركوا الباقي ! انا بقدس الذكريات و العشرة و الايام
الحلوة ! بس ليش مالقيت شخص نفسي يكون متمسك بهل الشي . . ؟ !

ما اعتقد اني جاية من المريخ و اني اخر قطعة ! بس للأسف دائما الاشخاص
بقابلوا الاشخاص الخطأ و لما يجي الصح . . ؟ ههههه بكون راح الي راح . . !

مشان هيك ما عدت ابدا مهتمة اني اعرف حدا . . من شو بتشكي الوحدة ؟
ع الاقل الوحدة بتحميني من اني اتعلق بحدا ان كان ذكريات او ايام حلوة
والله كتير ناس يحكولي اشياء سلبية بالوحدة و انا ولا همني دام انو راحتي
بالموضوع . . !

والله مريت بتجارب لحتى قرفت كل الشغلة صرت اعرف الشخص
من وجهو و من اول كلمة بيحكيها . . ما عاد اقدر اني جامل او استحمل
اعتقد انو زمن ( هو ) راح و اجا زمن ( انا ) لان جد لازم ينحط نقطة و نبدا
من اول ( الصفحة ) مو من اول ( السطر ) !

خلص تعبت جد ووصلت حدي . . اقصى حدي وصل . . استحملت
و انجرح قلبي . . و انكسرت . . و نحفت . . و قصيت شعري . .
و حلقت شعري . . و لونت شعري . . و سمنت . . و رجعت نحفت . .
بكيت . . و انتحرت . . و رجعت بكيت . . و رجعت انتحرت . .
تصنعت لحتى قلت حاج . . انضحك علي و انلعب علي

كل هاد ليه ؟ لأن قلبي طيب و مابحب اكسر بخاطر حدا ؟
كل هاد لاني بخاف ع مشاعر الي قدامي ؟ و مابتهمني
مشاعري ابدا ؟

لدرجة اني نسيت انا مين و شو هويتي و شو بحب !!
انا عنجد خايفة اخسر حالي للأبد . . !

هالسنة رح تكون سنة تغيير كلي الي . . رح اطلع من الحضيض
لاعلى قمة و مارح شوف حدا ولا حتى رح التفت . .

مو هاد انتقام كافي للكل ؟ النجاااااااااااااااااااااااح !

النجاح اقوى انتقام ! اني كون احسن من مبارح هاد اقوى انتقام !
اني كون سعيدة و سعادتي مو مربوطة بحدا هاد اقوى انتقام !
اني كمل حياتي الطبيعية و لا كأني صار شي مبارح هاد اقوى انتقام !
اني اشتغل ع حالي و اتعلم اشياء جديدة و ماخلي شي يوقفني هاد اقوى انتقام !

شيلو كل هاد . . لما يجي هالشخص و يجي يحكيلي يتتذكريني
واحكيلو لا والله مين انت ؟ هااااااد اقوووووى انتقااااااام . . !

و بالاخير لا حدا يعير اي اهتمام للي كتبتو مجرد فضفضة سخيفة مني

A hundred days have made me older
Since the last time that I saw your pretty face
A thousand lies have made me colder
And I don't think I can look at this the same
All the miles that separate
Disappear now when I'm dreamin' of your face


سؤالي لكم : هل انتوا من النوع الي بيتعلق بالذكريات و الاماكن ؟

 

[Selene]

مرحبا يا حلوين . . رجعتلكم مرة تانية . . وبعتذر ع هالغياب بس مدري ليه حسيت اني
مليت من روتين المنتدى و القعدة الطويلة ع اللاب . .

المهم هالكم اسبوع جربت شي جديد اول مرة بسويها جربت سوق
بسكليتة بس هالمرة مو للتسلاية هالمرة كوسيلة مواصلات و اني هيك انزل للشارع
وسوقا جمب السيارات و و ادخل الدوار و هيك و بصراحة كنت كتير متوترة اول يوم
ركبتا بالشارع لاني كنت متعودة اركبها بالحديقة او لما يكون مكان مخصص للبسكليتات

بس هالمرة لا صرت سوق جمب السيارات و ادخل الدوار و اعطي اشارة بإيدي ههههههههههههه
عجبتني الشغلة كتير و احلى شي لما يكون الهوا بارد و كون نازلة بنزلة و البسكليتة تنزل
لحالا و الهوا يضرب بوشي يالله و مو بس هيك بكون قدامي الجبل و لونو اخضر بحس اني
بعالم تاني . . و صرت روح ع الجم بالبسكليتة كل يوم و كمان صرت روح ع الكورس
فيها . . و بصراحة عنجد حسيت جسمي غييير وقت سوقها يعني اديش بستفيد بهل ربع ساعة
سواقة فيها عنجد فرق لما سوقها بالالة بالجم . . و حتى استغربت كتير لما كنت سوقها
و يكون في طلعة بسييييطة بالشارع بحس كأني طالعة جبل على اد مانها صعبة سواقتها !
للعادة بتطلع روحي و مرة سقتها لما كان نازل مطر

بالله ما بتتخيلوا اديشها حلوة سواقتها بالمطر و ريحة الشارع
و الهوا البارد . .

و كمان حابة احكيلكن اني بلشت المستوى الرابع من اللغة الالمانية يعني مابعرف
شو احكيلكن ابكي ولا اضحك طبعا ع حالي ؟
المستوى نوعا ما صعب حتى الكلمات كلها مختلفة عن المستوى الي كنت اخدو
الله يستر من هالمستوى الكل بيحكي عنو انو اصعب مستوى
ومو مسدئة انن حاطين بس 4 شهور مدة الكورس مع انو صعب و المستوى الي قبلو
6 شهور ؟ بس نحن لها صح ؟ مافي بيصعب علي بإذن الله مع الدراسة و المثابرة

​

 

[Selene]

الفعالية الشهرية

"لو كنتَ تمتلك مِصباح علاء الدين السحريّ؛ ماهي الثلاث أمنيات التي ستطلبها ؟"

1. حقق احلامي الي هن عبارة عن 3 احلام
2. حياة صحية مريحة
3. انو الله يطول بعمر امي و ابي و اخواتي و يضلوا حوليي

الفعالية الأسبوعية

بما أن السنة الدراسية الجديدة على الأبواب
برأيك كيف ستكون الأوضاع الدراسية في ظل ما يشهده العالم الآن خلال أزمة كورونا؟

والله عنا كتير متشددين بالكورس بهل الكورونا و خاصتا انو الكل بيعرف انو
رح تجي موجة تانية مثلا التباعد بالصف كل شخص بطالة لحالو و لازم نعقم الايدين
و الكمامات لما نتحرك و نمسح الطاولة بالمعقم و ما الى ذلك و بالشارع رجعوا
شددوا كمان مع انو هاد مو موضوعنا بس الله يستر :#

شكرا جميلتنا دارك على هالفعالية الجميلةة

​