. I HIT HIM IN THE FACE WITH A WATERMELON (1 زائر)

[T W I N K L E]

*
،

الناس مب طبيعية ، آنه قايلة من زمااانننن .. الناس ؟؟؟ مب طبيعية !!
والله مينن ، مادري شفي مخوخهم هالجمن يوم ؟ توه طالعة وحدة سخيفة من تحت الأرض
منزلة اغنية عن الحجاب وكاتبة وتس يور كومنت .. وماخلّت علامة استفهام ما رزتها !! نعممم ؟؟؟؟

دقيقة .. انتوا جوفوا بنفسكم الفيد !

https://twitter.com/i/web/status/1229791044306423810

معصبين ليش ان ملبسين اليهال حجاب ؟ ترا اغنية عن الحجاب ما تبونهم يلبسون ؟؟
بلآس كل واحد ومذهبه ياخي .. في مذاهب عندهم ان تبلغ البنت من عمر 9 سنوات ف.. اي واجب عليها
تتحجب من 9 سنوات ! شنو المشكلة ؟؟؟ لا يكون فيها تقييد حريّة ؟ لا يكون ما تقدر تلعب واهيا متحجبة ؟
فوقق ذييي كله ، هاي شرع رب العالمين مب من راسكم توافقون ولا ما توافقون !

اما تبون البنية سفور وبايعة الحيا أو تصير بنظركم مضطهدة ومسلوبة للحرية ؟ سوري آدري ان فيه
ناس ما يفكرون نفسي ، بس مب على كيفكم تفكرون نفسي او لا !! الموضوع مو قناعات كلشششش..
لما يكون أمر من رب العالمين ما نسأل ليش وما نفكر نعارضه أو نقول حريّة ، الحجاب وااااجبببب شرعًا
ومو من حق أي احد يقول عنه حريّة !

اذا انتي مابتلبسين الحجاب .. اتس اب تو يو ، ما لي دخل فيج .. خنقول مشكلتج الخاصة ولكن !
انج تطعنين في فكرة الحجاب ، وتحاربينه وتحرضين الناس على عدم لبسه لانج بس ما تلبسينه ؟؟ والمصيبة
انج تدرين انه واجب على كل مسلمة ، وتدرين ان كلام الله مافيه ون تو ! وتدرين انج غلط ومع ذلك
بكل وقاحة تتكلمين !!!

وولا اللي تقولج ، حجابج دليل الاستقامة ؟؟ اي دليل الاستقامة ! وين الوحدة تستقيم
اذا امر ربها عاصيته ؟؟ اذا فرض حاله من حال الصلاة والزكاة تاركته ! اي ما اقول لكم ان كل المحجبات
شريفات ، لا والله في منهم العن من اللي ما يلبسون حجاب ، ولكن .. انتي أديتي امر واجب ، انتي أديتي
فريضة الله عليج ، انتي استقمتي ! لما تعصين اوامر رب العالمين وين الاستقامة ؟ سوري بس فكرة اللي دين
بالاخلاق وبسسسس، هذي الوحدة تقص على روحها عشان ترضي ضميرها بس ! الدين مب بس اخلاق، شلون
تقولين اسلمت للذي فطر السماوات والأرض وانتي تعصينه بفرض من فروضه !!! فرض ما فيه روح وتعال
موجود بالقرآن وبكل المذاهب !

مب عيب ولا حرام لما تتحجب البنية بعمر صغير ، والاختلاف بين المذاهب اهوا اللي أوجب فارق العمر
في وقت وجوب الحجاب وهذي مب مشكلتي ، مشكلتي في ان الناس يجوفون البنية اللي بعمر 9 سنوات
تتحجب، صارت مسلوبة الحريّة ؟؟؟!! العيب يا جماعة لما تعرفون ان هاي الشي واجب وفرض وهم تتركونه
وتبتدون تطعنون بالمحجبات !!

ومحد ضحكني الا اللي تقول الحجاب يصير بالقناعة لما تكبر .. اهيا تختار ، لكن انتو تقمعون الطفلة
لما تلبسونها بهذا العمر !!! بعيدًا عن الدين ، تضحكني هالعقلية ! انت اي فكرة او مبدأ او خُلق معين تبي
تغرسه بعيالك تعلمهم عليه من الصغر ، لما يكبرون ويصير مخهم براسهم اهني على حسب كلامك يقررون !
لكن طفل بهالعمر ماعنده استيعاب للامور وادراكه ما يكون على المدى البعيد ، بتخليه على راحته ! انت
تبي تغرس فيه الشي الصح والزين ! ما ينغرس على كبر كلشش .. لما تبي الفكرة تترسخ براس الطفل
لازم يكون من صغره متعود عليه ورابي عليها ، لان من شبَّ على شيء شاب عليه !

بعد هالكلام كله ، آنه مب قاعدة اقول ان الغير محجة مب زينة .. ولا قاعدة اهاجم الغير محجبات !
آنه قاعدة اوضح بعض النقاط لبعض الناس اللي ماتفكر زين ، اللي فعلًا شنو في مخوخهم ماتدري ؟!
معليه احترم اللي يكون قرارها عدم لبس الحجاب ، ولكن ! لا تهاجم المحجبات وتبتدي تطعن
في الحجاب واهيا اللي راكبها الغلط من فوقها لي تحتها والمصيبة انها تدري @.@" !!!

وبس ترا مب معصبة ، بس تحمست وآنه اسولف
وهاي رايي الشخصي يعني، مب مجبرين ان توافقونه .

​

محتوى مخفي: :

المهم ي جماعههه علقت بمخي الاغنية طلعوها من راسي

​

​

 

[T W I N K L E]

*
،

هلوو ايفري ون .. شلونكم ؟ شخباركم ؟
شخبار البرد وياكم ؟ الكورونا ؟ يقولون الكورونا سوت ابديت وصلكم ولا لا ؟
بععدد شخباركم ؟ بامووت واضح اني معلقة على شخباركم !
ويي احسسس من زماانن عن المنتدى والمدونة ، احس مدونتي غبرررت خلاصص،
ييت شوي انفض الغبار عن مملكتي الجميلة لا يغركم احين انظفها باجر ترد تغبر


عمومًا ، ماعندي سالفة مهمة الفاضي الي ماعنده شغلة يقرأ تدويناتي
لانها باختصار سخيفة المهم ي قماععة ، جفت فيديو ضحكني وايدد
دقيقة جوفوه عقب باعلق


مشاهدة المرفق 5789


باموووتتتتتتت من الضحککک مادري شلونن هالفيديو خلاني فخورههه
بنفسييي كوني بحرينية فعلًا فعلًا البحرينيين عندهم عزة نفس مب طبيعيييةة
وكبرياء ، شنو يعني مشهور ؟؟ حتى اذكر في بحرين اف ام قالوا ان راغب علامة - مشهور-
يه البحرين وما عطوه ويه ولا احد عبّره ولا جنه موجود وزعل علينا وشال بخاطره حتى نهى
نبيل يوم يات البحرين محد عطاها ويه حتى المحلات محد عطاها هدايا مثل برا البحرين

عمومًا خلصت من فقرة مدح النفس ننتقل للقرقر اللي مامنه فايدة
2020 على ابواب انها تسكر وتيينا 2021 ، يمكن آنه قلت في تدوينة قبل ان هالسنة كانت حافلة
جدًا بس مب بالطريقة اللي كنت اتمناها! لكن ما يمنع اني اقول انها حرفيًا اثبتت نفسها وفرضت نفسها..
تكفوون قاعدة احس ان ما يصييير تعدي بدون لا اكتب عنها شي في الـ Dairy مالی اللی سویته
السنة اللي طافت كمشروع لمادة الانقليزي ايام المدرسة ! انه مب متخيلة حجم التغييرات
اللي طرأت على حياتي في هذي الفترة ، ومب قادرة اقولكم شلون أثرت علي مب بس حاليًا حتى
على المدى البعيد .. أتمنى السنة اليديدة تكون الطف علينا قولوا آمين

المهم خل افوشر عليكم شوي برسمتي الجميلةة ، طبعًا هذي آخر رسمة ممكن تجوفونها
لان انه مع الرسم صايرين اعداء هالفترة ، من زمااننن ما رسمت شي ، وهاي الشي مخليني اتنرفزز
وايددد .. بس الله كريم

المهم ، جفتوها ؟ اوكي .. اكتشفت ان ماعندي سالفة باي

​

 

[T W I N K L E]

*
،

تصدقون عاد ساعات عندي حجي بقلبي ودي اتحلطم واكتب ووو .. بس ماعرف شلوون !
ماعرف شلون ابتدي واسولف ومن وين اطلع مقدمة واتم ساعة اكتب بالمدونة وعقب احسني
غبية واطلع احسني نسيت شلون الاوادم يسولفون !

المهم.. آنه مادري متى الناس بتبتدي توتعي - تصحى - لنفسها وتراقب كلامها
وتجوف شنو اللي يصلح اقوله واللي ما يصلح اقوله ، هل من حقي اني اوجه هالكلام لهالشخص
ولا لا ! يعني جوفوا .. آنه من الناس اللي حصلت اتهامات مادري اصنفها على انها صحيحة او لا
اني ملسونة ولساني يبي له قص ، اقطط قنابل بالحجي شیطانة، بس آنه آجوفها وسيلة
دفاعية مب هجومية !

يعني لما شخص يكون معاي محترم.. ابدًا ومستحيل احرجه او افشله، اقول له كلام يجرحه
او يسم بدنه، استحالة اقط عليه كلام مو حلو او اني اقلل من شأنه لو واحد بالمئة ، تدرون انه
فيني طبع اكون حبوبة مليون بالمئة مع الشخص، واكره ان اخليه يتضايق وبالعكس احاول اخليه
مرتاح من قعدته معاي كثر ما اقدر ! بس من يبتدي يغلط علي اهني يطلع لساني ، وفي الغالب
يكون صج لساانن وما اسكت عن حقي ولكن بأدب !

مو معقولة تبون تغلطون على الناس او تضايقونهم او تقللون من شأنهم وتبونهم يسكتون لكم،
جوفوا انه وايد اطوّف واسكت واعدي للناس بس احيانًا توصل حدها او يكون الشخص وقح فعلًا
تحس نفسك تتهضم وتنظلم وتصير غصة في قلبك اذا ما رديت عليه ! يعني خل اعطيكم موقف ..

آنه قبل فترة ، خنقول في سنة المنعطفات 2020 انخطبت .. في ملجتي - ملكتي - آنه اخترت
كل شي لنفسي.. المسرح، الفستان، الميكب، تسريحة الشعر .. حرفيًا كل شي كان على ذوقي
ومثل ما احب لان بالنهاية هذي حفلتي وهذي ليلتي ! الكل حرفيًا اثنى على ذوقي بكل شي والكل
قال لي انج طالعة قمر واني اينن ومن هالكلام الا وحدة .. مادري اهوا حقد ولا اختلاف اذواق..
ما يهمني ، وما كان هدفي ان احد يمدحني او يقول لي كنتي جميلة وتطيحين الطير من السما !
وادري ان الناس اذواق ولكن .. تيين بحفلة عروس ثانية وتقولين لي كانت تسريحتج مب حلوة
وميكبج ما كانه ميكب عروس ! وانج في عرسي بتيين معاي وتختارين لي لان ذوقي مب حلو ..
من انتي عشان تقولين هالحجي لي وجدام الكل ؟؟؟

تعرفون آنه هذي الانسانة بالذات ماحب ذوقها ، قديم ومال اول وتبي ويهج يكون طحين
عشان يقولون عنج الناس انج بياض الثلج وتبي الميكب يكون اوفر وتبي التسريحة نفس
اللي بمخها ، ي عمي انتي اقترحتي علي صالونات وما اخذت باقتراحج لان شغلهم مب ذوقي
ولا بمستوى ميكب العادي بعد ، مو اروح لها كعروس ! آنه لزوارة الجمعة مستحيل اروح اتمكيج
في صالونهم مب بعد في عرسي ! بغض النظر عن هذا كله وعن اختلاف الاذواق وووو ..
بأي حق توجهين لي هالكلام بوقاحة ، شنو تسريحتي مب حلوة ؟

تدرون شنو قلت لها ؟ والله عاد ذوقج مايهمني ، اهم شي ذوقي وانه عاجبني ..
طبعًا اهيا تفشلت ! وبنفس الوقت .. قالت لي انزين في عرسج بايي معاج الصالون ، قلت لها
تم ! ولكن بشرط ، بسوي كل شي على ذوقي ، الا تسوي لي يعني آنه ذوقي مب حلو ؟ قلت لها
كل واحد وذوقه بس آنه ابي اكون في ليلة العمر مثل ما انه احب مب مثل ما انتي تحبين !! الا زعلت
وراحت اشتكت علي عند امي ان انه اقطط عليها صواريخ وما اجامل وملسونة ووو .. طبعًا مثل ما قالت
لي هالكلام جدام الكل انه رديت عليها جدام الكل ووالله ما تدوس لي على طرف ولا تكسرني جدام
الناس !

مادري متى الناس بتلتفت لنفسها ، وتعرف قدر نفسها ! يقولون لكم رحم الله امرئ عرف
قدر نفسه ، انت حدد مقامك ومكانتك قبل لا تيي تتدخل وتسولف باشياء ما تخصك ! او تفكر
تتطاول على غيرك .. اما الا هذي حلوة ، تبون تقططون حجي ع الناس واهما يدارونكم ! وبس
والله هذي بقبوقة بقلبي من زمان ودي اطلعها ومحرحشة في جبدي وكتبتها ، وشكرًا لقراءتكم .

​

 

[T W I N K L E]

​

*
،

الیوم آنه حدددييي مستانسسهه .. لان من بداية حياتي الجامعية توني لاول مرة احس
اني افهم وخطيرة ما شاء الله علي يعني من اول ما ابتدينا واحسني بقرة ضايعة
في بحر العلم حرفيييًااا .. يعني كنت صج صج وين ما اطقها عوية - عوجاء -

يعني تخيلوا وصلت لمرحلة من اليأس ماعتقد في احد منكم يوصل لها .. قمت ما يقارب الشهر
اسحب على الكلاسات وما احضر ، متخيليييننن ؟؟؟ وولا احل الاسايمنتس ولا ادش على قروبات الجامعة
لان خلاص كنت احسني بقرة فليش اتعب عمري واقعد من الصبححح ؟؟ خصوصا ان كلاساتنا وقتها
واييددد من وقت يعني الساعة 7 ونص انه رازة ويهي مجابلة اللاب !!

بعدين حسيتني ! تقوى حبيبتييي .. اصحي على عمرج ! باجر لين يبتي الدرجة الخايسة بالامتحانات
شبتسوييينن ؟؟ انتي اليوم قاعدة بالبحرين ، باجر لي سافرتي شلون بتسولفين مع الناسسس ؟؟
* للي ما يعرف حاليًا ادرس لغة * وطبعًا الشهادة دبلوم ومهمة جدًا للقبول الجامعي عقب ، فتخيلوا
ماعندي هالشهادة او درجتي فيها خايسة محد بيقبلني عقب ومب مستعدة اضيع من عمري زود ! يعني
آنه سنة راحت علي في دراسة اللغة مب بعد بروح علي سنين زيادة !!

ف اهني صار زمن الصحوة بامووتتت يضحك فيا محفوظين السلامة اختكم بالله
اقعدت مع نفسها ، ويابت الدرزن كتب اللي عندها وبدت تدرس ذاتي كل اللي فاتها واللي
ما فاتها ، والكشخة اللي فيني اني خلصت كل اللي خذوه في يومين ولحقت ع المقرر مع
الجماعة ! لا واللي متعجبة منه ما شاء الله علي لا اله الا الله ، اللهم لا حسدددد .. الله
يثببتننييي اني ما شاء الله حفظت الكلمات اللي خذوها كامل والافعال والقواعد والاعداد
من 1 لي 100 خلال يومين مع ان لو تجوفون الدرس الواحد جم كلمة فيه تحطون يدكم ع راسكم !!!

واللي فخورهه فيه اكثر اني اليوم كتبت مقال كامل عن نفسي ، يعني لو تقارنون الموضوع
بالانقلش بتكتشفون ان هذا المستوى من المقالات في المدرسة نكتبها بالصف الرابع او الخامس
الابتدائي وقد يكون حتى بمستوى سادس ابتدائي ، فآنه يعني وايددد فخورهه واكثر لحظةة
حماس كانت لما قريت مقالي بالبث والدكتورة انعجبت بالاكسنت تسوي لو تيين عندنا ما يفرقون
بينج وبين السكان الاصليين غير ان المقال كان كلههه صحح !

آنه احب اتعلم لغات وايد ، بس يمكن اللي كرهني في الدراسة الدكتور - يدرسونا دكتور ودكتوره -
طبعًا الدكتورة تيننن وماعليها غبار بس الدكتور يا كرهههيييي ثقيل طينة ، ما يدور يقوم احد الا انه
انزين درس يديد ما مدانا نحفظ الكلمات والقواعد وهلون ويبيني اتكلم بالصوت بعد مب اكتب له
بالجات ، غير جذي يتطرق لامور ما درسناها ويوهقني وايد لان ماعرف ! واللي يقهر اكثر مادري ليش
حاط علي حطة عادي عنده يقوم كل اللي معانا بالكلاس مرة وحدة الا انه عشرين الف مليون مرة ..
شتبيييييي ؟؟؟؟؟!!!!!!!! عمومًا نرجع لنقطة آنه فخورههه بنفسيي عن غثا الدكتور احبني والله
​

 

[T W I N K L E]

*
،

من هذا الغريب ؟ من هم أهله ؟ أين ذهبوا عنه ..؟!
لقد مات بالسجنِ مظلومًا ، وبأي ذنبٍ مات مسمومًا !
أين هم أهله ليطالبوا بدمه ؟!

عادةً عند موت المرء، وعندما يسكنُ أنينه، تحضرُ عائلته ..
أولاده وإخوته ، هذا يُوَسِّدُه وهذا يُقبِّله وذاك يُغمض عينيه !
لم أرَ ميتًا بالحديد مُقيّدًا قط ! من شدة تقييده كان ينزِفُ دمًا من ذلك القيد!

تميّز ذلك الغريب بكظمه لغيظه ، ولم تستطع سجون الطاغي أن تغيّرَ من سيرته !
بـِ دموعه ، صلاته بقلبٍ خاشع ، لسانه الذي يلهج بالدعاء ؟ كان يحسب ليالي فرجه ..
ذلك الفرج الذي يدري أن به يكُون مماته !!

مكث بطوامير الأشرار التي دامت ظلمتها ليل نهار ..
كان من الشمس محرومًا طيلة أعوام سجنه ، تلك الأعوام التي كان
ينتظره فيها محبينه ، كان محبيه ينتظرون من يخبرهم عنه ..
وساعة أن سمعوا من رسولٍ ما ببشارةٍ عنه حتى هبّوا مسرعين للقائه ..

كان يقول ذلك الرسول بأن موعدهم الجمعة، وفي تلك الجُمعة يَتهنّوْنَ بلقيا
محبوبهم ، فسألوا عن الميعاد .. أين ذلك اللقيا الذي يتلهفون إليه ؟ قال لهم جِسرُ المدينة !
هنالك نستقبل المظلوم ..

هبّ المحبون لرؤية المحبوب الذي لطالما كان منتهى آمالهم ..
بعد غيبةٍ طويلة ، وأخيرًا يعود لهم سالمًا غانمًا !

لكنهم عاينوا رؤية جنازةٍ تلوح من بعيد تولى حملها أربعةُ أشخاص ..
فسمعوا صوت الناعي ينعى بينما دموعه تهل بغزارة ! فقالوا للناعي
مالذي حدث ؟! ماهي أخبارك ؟ تنعى بحزن !! مالذي حصل ؟

فإذا بالمنادي يصيح على جسر المدينة .. هذا إمامكم !!
" الطيّبُ إبن الطيب أصله ،، من صلب حامي الحمية
من رحم بضعة محمد ،، فاطمة الزهراء الزكية
كانت أطباعه السماحة ،، والحلم عنده سجية "


- مُصاغٌ من قصيدة -



​