. I HIT HIM IN THE FACE WITH A WATERMELON (4 زائر)

[T W I N K L E]

*
،

امم لاحظت ان اغلب الريآكشنات أو التفاعلات اللي تييني على المدونة - قهرتني -
حياتي مب حزينة بتاتًا ، وماحب أكسر خاطر أحد.. وآنه بالصج أساسًا حيويةة أكثر من الكآبات اللي غالبًا
ما أكتبها وجم مرة أحط تدوينة وأمسحها لان احس.. هاي مب الشي اللي آنه أعيشه ، مابي افهمكم
اني ع طول حياتي زعل في زعل واني بموت وان الدنيا قاسية وحياة الفهد تتسدح جدامكم

حياتي في الصج سو برآيت ، وسبب اني اكتب بعض التدوينات الكئيبة هو مزاجي المتقلّب..
لان آنه وحدةة مزاجييههههه بالمقام الاول، عادي اضحك وياكم احين.. وعقب خمس دقايق اصيح بلا سبب ..
أبسط الاشياء تنرفزني، والفراغ هم ينرفزني ويتعبني وايد..

عشان جي احاول اشغل يومي بالرسم أو شي حلو وهادف وأحاول أحط لنفسي طموحات
وأحلام تشحني طاقةة ايجايبةة .. إلا ان التدوينات الكئيبة اللي احطها كلها عبارة عن ذكريات من الماضي
أكتبها بسبب مرور ذكراها ، او اني احيانًا احس العالم ظالم بزيادة، ومثل ماقلت الفراغ يخليني أتذكر هاي الامور
لان ماعندي شغلة ولا مشغلة وغالبًا مايعفس مزاجي

سو خنسولف عن شيء يضحك بما اني من زمان ماسولفت باشياء كيوت..
سلمكم الله آنه يوم كنت صغييرهه وايدد كنت من اليهال اللي يسولفون عنهم الاطباء النفسيين
ويقولون انهم اذكياء، يس ايها السادة آنه كنت من اليهال اللي 24 ساعة اسولف معآ نفسي

كان عندي موقع اسرتاتيجي اسولف فيه ويا روحي عند الجفافة
جفافتنا سابقًا فيها مثل الزجاج في الباب مالها، كنت أقدر أجوف انعكاسي فيه وكانت هاي
الجفافة في الزاوية محطوطة فتخيلوا شكلي ؟ اقعد في الزاوية واجابل الجفافة
واطالع روحي في الزجاج مال الجفافة واسولف ويه روحي أتذكر كنت أالف قصصصصص
وسوالف وايدددد .. وفي الدقيقة الوحدة ألعب الف دوررر

المشكلة ان بيتنا كان عامر باليهال لكن كنت انسانة غريبة جدًا
لان على الرغم من ان فيه يهال وايد في البيت، ماحب العب وياهم افضل اني
العب ويه روحي عند أقرب منظرة أو عند موقعي المفضل الجفافة
امبيهه باصيححح يضحككك واييي اذا ماحصلت شي اجوف روحي فيه ، مافيه شي يوقفني
اسولف ويا روحي عادي وادور ع كبر البيت وآنه اسولف ويا روحي حتى بيتنا كلللهمم
كانوا يتطنزون عليّ وولا ايوووز ايي وباقولكم كنت معجبة بروحي وايد

كنت لين العب مع احد من اليهال كله آنه دور الجميلة الحلوة الانيقة واتخصر عند
المنظرة واسوي روحي عارضة ازياء باصيحححح امبييههه وكنت دايمًا
اللي اتحكم باليهال واعلمهم شنو يسوون وشنو ادوارهم باللعبة اسويهم خداماتي

-
تدرون الحلو شنو ؟ وآنه اكتب الضحكة مب مفارجة ويهي وآنه اتذكر شكلي
بذاك الوقت حلو ان الواحد بين الفترة والثانيةة يتذكر نفسه
& آنه متأكدة اني مب الوحيدة اللي اسولف ويا روحي يوم كنت صغيرة بس فيه احد
وصل لمرحلتي هذي ؟


- على فكرة للحين تدق علي حالات اصير فيها مينونة واسولف ويه روحي -​

 

[T W I N K L E]

*
،

امبييهههه ماقدرر ع كميةة الاستهبال اللي في وزارتنا !!!
تخيلوا يبون يدرسونا إلكترونيا في فترة الاجازة اللي ماعطينا اياها !! المشكلة موقعهم
فاششللللل ، السستم ماله مايتحمل البحرين كلها تدش تدرس من الموقع، يعني متخيلين
ان احنا نبطل البوابة مالتهم حق الدرجات ، نجوف درجاتنا مب ندرس ها ! الموقع مايبطل
طوللل اليوم ولي يوم ثاني بعد ، وحتى الايام اللي البوابة مايكون عليها لود بعد بطيييئئئةة وبالموت تبطل!

مب طبيعيين وزارتنا ، استخفوا وقعدوا لنا !! يموووتتوووننن ولا يقللون المنهج!
انزين ترا احنا ماخذنا الاجازة من جيسنا، الشي عشان صحتنا مب بيدنا الشغلةة ، خصوصًا ان اكثر
دولة في الوطن العربي سجلت حالات كورونا اهيا البحرين " 33 حالة " مؤكدة واللي بالحجر الصحي في الستين
حالة اعتقد، غير اللي عالقين في مشهد ويبون يردون البحرين، فمن حقنا ناخذ اجازة ، يستهبلووننن صجج..
يعني مابينقص منهم شي لو قللوا المنهج، ويعآه صججج .. مادري من وين يفكرونن ..

ماعلينا من الغباء المتفشي في وزارتنا المحترمة
اقولكم امس دق براسي اروح اسوي لي كنافه ترا كنافتي محترمة صدقونيي
طعمها لذيذ

المهمم عاد كنت ناوية اعلم ربعي شلون نسوي كنافة وصورت بعض الخطوات لهم
باصيحححح ، خل اعلمكم انتو بعد شلون تسوون اقوى كنافة
اول شي تاخذون الكنافةة وتكسرونها حلو ؟ خلوها ناعمة احس تصير اضبط ..
بعديننن ، اخذوا صبع زبدة أو نص ع حسب الكميةة ، وذوبوها كما بالصورة

عقب اخذوا الكنافة اللي كسرتوها ، ورشوا عليها الزبدة الذائبة وخلطوا الزبدة فيها خلطط
عساسس يعني تتشبع بالزبدة عرفتوا ، فعقب تنرص وبعد تستوي بس لا تتترسسسوونننهاا
لدرجة يطلع طعم الزبدة لما تاكلونها ..

عقب سووا لكم الخلطة اللي داخل الكنافة ، عن نفسي احبها بالقشطة ، ماحب جبن وهالخرابيط
فتقدرون تحطون القشطة بدون اي اضافة مثل ما انه اسويها عادةً أو فيه طريقة ساعات اذا بتفننن
في الخلطة، اسوي محلبية نشا واخلط معاها القشطة يصيرررر الطعممممم لذييييذذذذذذذذذ !!! وايد الذ من
القشطة بروحها ..

طبعًا آنه متعلمة اسوي الكنافة في المقلى مب في الفرن تستوي اسرعع ..
ولاني باسوي كميةةة ، اخذت اكبر مقلى عندنا المهم ، فانتوا اخذوا مقلى واقسموا
الكنافة نصييين، نص للطبقة السفلية، ونص للطبقة العلوية ..

^ هاي بعد ماقسمتها نصينن وحطيت اوردي نص بالمقلى
لازم تكون متشربة الزبدة مثل جي بس مب اوفففرررر

فحطوا أول شي الطبقة السفلية في المقلى واحرصوا على انكم ترصون الكنافة عشان تستوي
متماسكة ومايخترب شكلها عقب عقب ضيفوا عليها الخلطة مالتكم ، انه حطيت بس قشطة
اسرع سريييعع .. مثل ما بالصورة ..

^ جنها بيضة والله

عقب حطوا الطبقة الثانية من الكنافة ، وهم رصُّوها زيييننن ان ما زييننن..
وطبعًا هذييي اهمم خطووةةة حطوا صحنننن فوق الكنافةة، ويكون الصحن على كبر
المقلى بحيث يرصها وسهل تقلبونها عقببب لان اختكم بالله سوت مصيبة امس
وهاي اهو سبب التدوينة ذي

طبعًا يقول المثل من طمع طبع كنت ناوية اسوي لي كنافة وايد
فاخذت اكبر مقلى وماكان عندنا صحن كبر المقلى كان عندنا اصغر منه بوايد ، واكبر منه
ومايصير احط اصغر من المقلى فاخذت اكبر من المقلى فيوم استوت الطبقة التحتية
ماعرفت اقلب المقلى عشان تستوي الطبقة الفوقية ف اللي صار ان الطبقة
التحتية احترقت ولما قدرت اقلبها اختربت الكنافة وطاح جزء منها في المطبخ

^ باصيحح لما قلبتها طبعا انعفسسستتتتت .. وفي القلبة الثانية
صارت اعفس واعفس واحترقت اكثر واكثر عشان جي اقولكم حطوا
صحن يكون فِت ع المقلى

فبس والله اضطريت اكلها مختربة ومحروقة وما كان لي عين اسوي اللي يرشونه عليها
لان امي اذا قعدت يوم ثاني وجافت المواعين والمقلى محروق فيه والمطبخ معفوس بتستصرع علي
واكلتها لين ما حاسيت ان بييني تسمم من الكنافة المحروقة وقطيتها

^ باصيحححح جوفوا شكلهههاااا ولا عيششش محترقق
المكشلة صورتها لاختي تسوي لي اهم شي الطعم آنه خليت فيها طعمم ؟؟
فحمتها وشكلها اختررببب لان ماعرفت اقلبها وطاح منها وانعفست
صج صج لو مكملتها جان ياني تسممم

خسرت قوطي قشطة وكنافة وصبع زبدة وحرققت
في المقلى وعفست المطبخ والله حرام

-

على فكرة هاي مب اول مرة اسويها، كل مرة اسوي كنافة ويطلع طعمهااا لذيييذ
بس هالمرة ربعي حاطين عينهم على كنافتي آنه متاكدة المهمم خل اخلص لكم
شلون تسوونها

مثل ماقلت عقب ماتحطون الصحن ع الكنافة ، شغلوا النار.. كلها دقااااايق حتى خمس
دقايق ماتيي ، الا والطبقة التحتية تستوي .. من جي اقولكم المقلى وايد اسرع وهم بسرعة
تحترق فلازم تلاحقوون ع الكنافة ، وعقب فايدة الصحن انكم بتقلبون الكنافة في الصحن
وبتردونها مرة ثانية في المقلى عشان تسوون الطبقة اللي ماتعرضت للنار ، وبجي.. تستوي الكنافة
في وقت قصير جدًا ..

يبقى لكم ، " القطر " اهوا الشي اللي بترشونه على الكنافة !
شلون تسوونه ؟ ماي ، سكر ، عصروا شووووييي ليمون ، وزعفران .. طبعًا كل ذي ع النار
ويطلع لكمم احلىىى قطرر ينرش ع الكنافهههه

تقدرون تزينون الكنافة بالمكسرات وبالعافيههه ي البيي ق8ق8​

 

[T W I N K L E]

*
،

امم ماتوقعت تنختم مدونتي بمميزة احس جي صدممة !!
يلا ماعليهه.. منها للاعلى عقبال اييب اخر ختم اللي طبعًا بتكون معجزة لان إذا يبت
الختم الثاني احتمال تييني سكتة قلبية - اعرفني سحيبة -

عاد كنت من زمانن انطرر فعاليات المجتمع، لان تقريبًا مخي فاضي مافيه افكار
للتدوينات & حياتي صايرة روتينية بزيادة، مافيها سوالف واكشنات تنتكتب
سو .. هذي بتكون #تدوينة_ الاسبوع

-

تحدث مع الأعضاء تحت مقولة " عشرة أشياء ربما لا تعلمها عن نفسي " تجرأ و حدثنا عن بعض خفايا نفسك ؟

طبعًا حاولت أخلي التدوينة جديدةً نوعًا ما ، لاني امشي واسولف
عن نفسي وماعتقد فيه خفايا اللي صج ينقال عنها خفايا نفسي واييي لاحظت
ان الكل قاعد يكتب كل حقيقة بسطر واحد ، لا آنه بلوع جبدكم من احين ، وايد احب الهذرة

-1-

بما ان الكل بدأ الحقيقةة الاولى بترتيبه في العائلة وتعريفه عن نفسه، فآنه مب مقصرة بالتعريف
عن نفسي ولكن نمشي مع الموجة ، ف.. آنه البنت الكبرى في البيت بعد اختي
اللي تزوجت وسافرت للخارج وستمكث في الخارج طويلًا فلربما تمكث هناك للعشر سنين القادمة
فتركتني وحيدة فريدة في هذا المنزل المليء بالاطفال الذين يطلعون الشيب من الرأس
بامووت احنا 6 بنات واخوي السابع وترتيبي الثالثة بينهم ، اختي المتزوجة اكبر وحدة وعقب
اخوي وعقب آنه ، وبعدين تبدأ سلسلة اليهال من جميع الاعمار ..

اعترف ان فرق العمر بيني وبين وحدة من خواتي شوي - سنتين بس - ولكن بصراحة ماحسني
بهذا القرب منها، احس مستوى تفكيري مختلف نوعًا .. أو جيلهم بشكل عام مايدش مخي احسهم
يهال ، فعقب مامشت اختي المتزوجة من البيت - اهيا اكبر مني بثلاث سنوات - حسيت بفراغ كبير
وان مافيه احد اشاركه في الاهتمامات ، لانها الوحيدة اللي قريبة لي وتشاركني نفس التفكير والاهتمامات..

-2-

آنه الستايلست مالت البيت يعني مثلا بالاعياد أو المناسبات ..
اضبط لوك كل واحد في البيت من A to Z ، من ناحية الثياب آنه اللي اختارها لهم بما ان
خواتي كلهم يهال وانسق لهم بدلات العيد مثلًا وخصوصًا اخوي مايستغني عني في هالشغلة
اختي اللي اصغر مني بسنتين - احاول اخليها توثق بنفسها من هالناحية في الفترة الاخيرة، واخليها
تختار لعمرها واضبط وياها جمن شغلة بس - أما امي تاخذ رايي في القطع اللي تاخذها ، الوحيد اللي
مالي دخل فيه اهوا ابوي مريّح راسه ع الاخر .. ثوب وفمان الله - في امان الله بالبحريني -

واخلص من الثياب ننتقل لمرحلة الشعر، آنه بصراحة ما اسوي شعورهم مب فاضية لهم..
بس اعطي توصياتي بهالخصوص، سوي ستريت ، سوي ويفي ، قصي شعرج ، صبغي شعرج
مع ان احنا مانصبغ شعورنا بس امي اما اخوي فياخذ النصيب الاكبر من هالموضوع.. لازم لازم عقب
مايرجع من الحلاق يسألني ، حلو شعري ؟ تحسين اخفف اهني ؟ اطول اهني ؟ اقصر اهني ؟
لا وطالع لي بموضة يديدة، جوفي اللحية اوكي .. الشنب ؟ باقي شوي ويحف ويهه لنا

- على طاري الشعر ، ياجماعة اللي يسولف براسي ذبحنييي
يقولي قصي شعرجج وايد قصيرر داش بمخي ال bob شاسوي -

وطبعًا آنه الميكب آرتست للبيت ، في المناسبات مستغنين عن الصالونات بهالخصوص
احط حق كل خواتي حتى امي ، طبعًا سابقًا كانت الميكب ارتست اهيا اختي العودة ، ما شاء الله ذويقة
بالثياب والميكب ، او اللوك بشكل عام .. واحسني طالعة عليها بهالشغلة يعني اذواقنا ماتختلف
وايد فصرت خليفتها في هالموضوع

-3-

آنه حساسة ، ووايد حساسة بعددد اذا شخص غلط علي ولو ان بعفوية..
أو مثلاً متهاوشة ويه احد في البيت ، اووفف سيدة الدمعة تطيح ، المشكلة الدمعة تكسر هيبة
الصراخ يعني قاعدة اتهاوش ي دمعتي ليش تطيحين تخربين عليّ
واذا حبستها تخيلو شيصير ؟ خشمي يصير احمر مثل المهرج بالضبط ويهي بسرعة
يفضحني ، لا واخواني الحمير تعرفون شيسوون من يجوفون خشمي احمر ، اكا
بتصيح بتصيح الصيوحة وجان صج اصيح بامووت اكثر شي اتمنى يتغير فيني
بس مايتغير

اييي ومن ضمن الاحساس المرهف اللي عندي اصيح ع المسلسلات والافلام ..
ابطل لي عزيّة ، ماتم ، مناحححةةة كلها ع الشخصية اللي ماتت ، وبمسلسل يوسف
الصديق من يلتقي النبي يعقوب بالنبي يوسف عليهم السلام ، اقعد اصيح وياهممم
- عاد وا فضيحتي فضيحتاه اذا قاعدة اطالع مع احد " يا دمعة دونت تطيحي " -

-4-

آنه من النوع اللي يميل للتأجيل ، كل شي في حياتي أاجله ليما انضغط
واصيحح دمم عقبب، وخصوصًا في امور الدراسةة ، اوفف ولا عاددد الاختبارات اخلي
المعلمات يأجلونها بسبب اهمالي حتى للامتحانات النهائي والمنتصف مادرس من قبل..
اكون توني ابطل الكتاب لاول مرة ليلة الامتحان وعقب اقول ليش نزل مستواي

-5-

وايددد اتردد في اني اقول الاشياء اللي بمخي للاخرين ..
يعني عادي رفيجتي اللي وايد كلوز وعلى طول مع بعض ، ادش اكتب لها فقرررههه
شطووولللل واشكي لها الحال وعقب امسحها .. لا وآنه مثل الحمارة ادش ارد اكتب
لها وعقب امسح ، او مثلًا لو احد باط جبدي في السوشال ميديا - شخص ماعرفه-
اروح ارد عليه حتى لو مالي دخل، عقب خمس دقايق اذا ما طاح الفاس في الراس ومارد عليّ
اروح امسحها


لكن ارجع واقول انه ام لسانين ، لما احد يغلط علي بشكل مباشر
والله ارد ، واكسر راسه ، وادوس في بطنهه بععددد .. اتردد بس في الاشياء اللي ممكن
فعليًا تسبب لي مشكلة - مثلا اكتب احين وباجر القى نفسي بالسجن - أو باني اقول
شي يخصني للاخرين .. وطبعًا اغلب الاحيان اتخذ قرار اللي مب قايلة لاحد واسكت ..


-6-

اعشق شي اسمه ابوي، وايد براود اوف هم ..
استاننسسس لما يقولون لي تشبهين ابوج ، او يقولون لي مثلًا طالعة على ابوج
وما شاء الله عيلتنا جيناتهم قوية وايد يبين ان انه من العايلة الفلانية واني اشبه ابوي
غير جي ، ابوي صج صج غييير .. تفكيره وايد عقلاني ومتزن ، مواكب للتطور، يحب العلم .. يمكن
اكثر واحد عنده كتب في البحرين اهوا ابوي مب طبيعييين كتبه ، لو ابيعهم اطلع ثررروههه
من وراه عنده خمس مكتبات كبار كلهم كتب ، وعنده كتب مالهم مكان في المكتبات اساسًا حاطهم
فوق طاولات ومسوينن جبللل ، كل ما ادش عليه اجوفه يقرا

وعنده حس فني عالي ، يمكن هاي اكثر شي يقربني من ابوي ..
واحسني ورثت منه هالشي آنه واختي العودة ، ف يس اللي احاول اقوله ان ابوي وايد
شخص عظيم وعاد الله يحفظ لي ابوي ويحفظ لكم ابهاتكم

-7-

اتضايق بسرعة من الفراغ ، ومن احساسي اني اعيش عشان اكل وانام ..
الحياة الروتينية تذبحني ولو اني ماحب الطلعة - بيتوتية - شلون لا تسألون بس
احب ان يكون لي فايدة من الحياة وانجازات واحلام وطموحات اعيش في الدنيا عشان احققها،
آنه انسانة احب انشر الايجابية في كل مكان واتمنى اني اصير ايجابية قدر المستطاع، بس هالشي
مايمنعني اني اصير كئيبة وسلبية لان وايد تصيدني هالحالات واحاول ابتعد فيها عشان ما انشر
الطاقة ذي للاوادم ..

اتضايق بسبب وبدون سبب، وهالشي يخليني انعزل لفترة .. حتى ربعي الكلوز
واللي ماقدر استغني عنهم ، اسوي لهم ميوت .. اطلع من كل القروبات ، احذف كل الناس ، اسوي
تلفوني ايربلين مود ، وصججج اصير نفسية، لكن احاول ما استمر في هالحالة..
& احس التكنولوجيا ساعات اهيا السبب، وان اربعة وعشرين ساعة
ع التلفون تعطيني طاقة سلبية ويستعدل مزاجي لما اترك هالاشياء لفترة من الزمن ..

-8-

اميل لكره الاشخاص لما اجوفهم وايد اتملل منهم ياخي
خصوصًا لما هالشخص يسوي تصرف نرفزني ، تخترب خرايط مخي وتقوم تتصيد
الاغلاط اللي يسويها هالشخص وتنرفزني ليما اكرهه صج يعني مرة سافرت
مع خالتي ، وصارت مجابلتني اربعة وعشرين ساعة..

كانت ماتخليني انام ، صج تهلكني عدللل وقمت اتنرفز منها لانها تمصخها
- تخيلوا تطلعني من الساعة 2 الفير - فجرًا - ومانرد الفندق الا سبع ولا سبع وشي،
وعقب نرد نطلع قبل اذان الظهر ومانرد الا عقب مايخلص الغدا وعقب نرد نطلع قبل
اذان المغرب ومانرد الا وقت العشى ، يعني فعليًا كنت اموووتتتتت .. وبعدين كل شي فيها قام ينرفزني
ليما كرهتها صججججج لدرجة اول مرة كنت ابي ارد البحرييينننن ، خلاص طفح الكيل منها ..

طبعًا من زمان هالسفرة ، احين يوم ماقمت اجوفها وايد راح الكره

-9-

اعترف ان التدوينات اللي مافيها سوالف اسحب عليها اقوى سحبة
اتملل اقرا خواطر ، ولا شعر، ولا اي شي ثاني مثل المراجعات خصوصًا اذا كان طويل،
بس مايمنع اقراهم على فترات متباعدة او حتى اكتب مثلهم، عاد الا الشعر والخواطر ماقدر ماقدر
يمللوني وعاد النوع اللي صج صج احب اقراه ، اهوا السوالف بجميع انواعها، والمدونات
اللي تدش قلبي اهيا اللي كلها سوالف سواءً بيض ولا يضحكون ولا حلوين

-10-

آنه من الناس اللي تسلم عليكم وتقولكم تبي هدية عيد ميلادها ووتر ملون
مع حبي ، ادري هالفاكت كلكم تعرفونه بس لازم نؤكد عليه مع حبي
^ واضح ان ابي اصرفكم تعبت وانه اكتب ​

 

[T W I N K L E]

*
،

ذي الروايةة توني مبديهه فيها .. بس اتيننننن وايد حابتها ق8ق8ق8
اخذتها من معرض الكتاب من زمااان وتونيي افكرر اقراها ، بس صج صج حلوهه
تركز الرواية على مجتمع الطبقات ، وانهم مصنفين على ارقام ..
فمثلًا يعني اللي ارقامهم في البداية يكونون وايد اغنياء واللي ارقامهم
تكون اعلى يعني يكونون اقرب للفقر وان يكونون معدمين وجي ، عاد القصة تتكلم عن بنية
اسمها اميركا من طبقة الفنانين اللي يكونون " خمسات " وتحب آسبن واهوا واحد من طبقة الستات ،
واللي اثنينهم عايشين حياتهم ع الهارد ووركينق بس عشان اييبون لقمة العيش، لكن مع ذلك تظل حياتها
افضل من آسبن بما انهم خمسة .. وعاد تبتدي السالفة من لما قام الامير مالهم اتبع ابوه في سالفة السلكشن
وان بيختار الكوين المستقبلية وجي ، فعاد ام اميركا قاع تجبرها ان تسجل في هاي المسابقة اللي تفوز فيها وحدة
من بين 35 بنت سعيدة حظ ، فهاي الشي يعتبر بالنسبة لهم فرصة هروب من الحياة اللي انكتبت عليهم من الولادة
+ اميركا مب عاجبها الوضع لانها تحب اسبن ..

حدييي حابههه الكتاب، اهوا 5 اجزاء، وآنه توني في بداياته
والكلام اللي كتبته اهوا اللي توني متعرفة عليه من خلال قراءتي لل 3 جابترز الاولى
من الجزء الاول ، واقدر اقولل ان اذا تدورون على كتاب تقرونه، اخذوه وانتوا مغمضيننن ق8ق8

^ هاي يعتبر مراجعة ولا؟ تخيلوا ان في التدوينة اللي قبل قلت
اني ماحب اقرا تدوينات المراجعات بس هم قلت مب بعيد اكتب فيهم
لا بس كنت اقولكم اني احب القرقر والسوالف

-

تجوفون البوك مارك في الرواية ؟ هاي انه مسويته الكورس اللي طاف
حق فعالية البريست كانسر ، ووزعناه ع البنات وجي ، عاد الحلو ان جفت ناس للحين
تستخدم البوك مارك اللي سويته ، وحددي مستانسهه ع هالسالفة، غير جي فيه وحدة
كلمت رفيجتي في سناب " كانت مصورة شغلنا " إلا تسوي من وين طالبينهم
عبالها شغل محلات ​

 

[T W I N K L E]

*
،

من زمان ماطالعت مسلسل يطلع قلوب كباارر من عيني
صج صج صج اينننننن ق8ق8ق8 ، عاد الابطاللل كيييكككك فتخيلوا كميةة الذوباننن ؟
آوووف عجززتُ عن الكلام ، وعاد ويآ الاوستات شوي شوي ع قلبييي، احس بيوقفف - دموعععع -
مادري شباسوي عقب الدراما .. سمعوا بس سمعوا ، الاوستاتت مححتللةةة قلبييي .. لا وحاطين فيها
مقاطع حلوة من المسلسل ، حديييي باموووتتتتتتتتتتت - سحت سحت سحتتت -

محتوى مخفي: الاوستات

^ الفيديوات مافيها لقطات غلط ، ولكن تحسبًا للناس اللي وايد سنتستف
حطيتهم في محتوى مخفييي ..

^ إلا خاطري اسوي عنه تقرير بس مالي خلق اصمم
اذا راح الكسل بإذن الله باسوي


​

 

[T W I N K L E]

*
،

كح كح ما شاء الله .. مدونتي راحت الصفحة الاخيرة !!
طبعًا بسبب ان قعدة البيت ماتييب السوالف والاكشن ، المهم عاد ..
سكاي حط تبع الفعاليات ، فعالية اسبوع يديدة .. وقبل لا يحطها آنه جفته حاط السؤال
بمدونته وعطيته أقوى طاافف ، ليش ؟ لان ببساطة شديدة هالسؤال خايس وردي اخيس
يمكن مب بالنسبة للكل ، ولكن بالنسبةة لي .. عمومًا هذي التدوينة تابعة لـ#فعالية_الاسبوع.

آز آي سيد ، هالسؤال بالنسبة لي ع الاقل .. ( خايس ) !
لاني ماحس عندي اجابة تستحق تنكتب في تدوينة ، كل اللي بسويه اني بلاحق على عمري
بالعبادات طوول الوقت ، ماحس اني بفكر في انجاز اللي ما انجزته ، بالنسبة لي بكون شي تافه !
شخص على اعقاب الموت ، شخص بيجابل ربه .. ومايدري اهوا عقب أيام أو حتى سويعات بينتقل
لعالم ثاني تمامًا ..!! مايعرف اذا مصيره عذاب القبر ، ولا أُنس .. مصيره جنة ولا نار !!

ماحس اني بفكر بشي دنيوي بحت ، يمكن اشبع من امي وابوي وعيلتي .. اتحلل منهم
أكتب وصيتي ، والباقي آرقد في سجادة الصلاة يضحكك بس
اذا طوّل الوضع ، شهور وجي .. احس بزيد وقتي للعبادات ولكن ممكن امارس هواياتي ، اسافر
واغير جوّ .. كله ممكن ، لكن ستل احسني بجوف هاي الامور تافهة .. ماعرف ليش !

-
طبعًا مثل ماقلت جوابي نفس ويهي فخنسولف عن شي ثاني احسن
اقولكم ي جماعةة يايني تأنيب ضمير مب طبيعي ، بنات دفعتي قاعدين يدرسون عن بعد
ومستعدين للمنتصف وآنه من بدت الاجازة مادرست ولا ربع درس
ووايد متأملة ان يكنسلون الكورس واتخرج خلااصص ياخيي تعبتتت
ماتخيلني ادرس بعد خل يكنسلون الكورس مب لازم ارفع معدلي

الحمدلله قاعدين يدرسون تمديد تعليق الدراسة ، وعقبال ما يكنسلون الكورس ق8ق8
خصوصًا ان الاوادم اللي عالقين بايران للحين ماردوا البحرين ! فلو يردون بصير الوضع أخس من احين
غير جي ، ان تسجلت أول حالة وفاة في البحرين من الكورونا الله يرحمها ي رب ويخلي هالمرض
كفّارة لسيئاتها ..

ونرجع لموضوعنا ، مب ناويين يكنسلون الكورس يعنيي ؟؟!!! بكسر ع راسهم الوزارة
المشكلة تخيلوا ، عندنا وحدة حمارة ام كشة هذي الادمية كل الشعب متفقين
انها خايسة مادري شلون فازت بالانتخابات ، تخيلوا شنو تقول .. تبي تعتبر هالاجازة سنوية ونداوم
في الحر شهر 8 كورس يديد !!! متخيلييننن ... اوفرر ، ودي اسحبها من كشتها وادوس في بطنها واقعد
على جبدها ، واحولها لطعام للكلاب والله باططةةة جبديييي ..

نطلع من موضوعنا < اكثر تدوينة كوكتيل بتجوفونها في حياتكم

^ سويت ذي مع الهبة ي جماعةة طلع لي بحرينية
خواتي ماطلعت لهم البحرين حتىى ، بس وحدة فيهم طلع لها 15 % بحرينية
طبعًا ع حسب الصورة ، هاي الصورة حطيتها كذا مرة فنفس النتيجة ، جربت صور ثانية
هم يطلع لي بحرينية بس بعد يطلع لي اماراتية ووايد طلع لي في صور ثانية مصر
وهم طلعت لي كندا وارمينيا وايد - محدثتكم جربت مليون صورة -

فذلين البلدان تكرروا في اكثر من صورة ، تهقون جي أصلي ؟

عدنا لموضوع الاجازة < برا
تخيلوا معلمتنا مطرشة ان اهيا بتحط لنا درجات الدفتر كاملة ، اذا كتبنا لها
ان كاملين والصف كله مب مكمل الدفتر وحطت لنا فل مارك كلنا
يضحككك ، وتخيلوا بعد كملت لنا الاعمال ، بس باقي الاختبارات .. وآنه محدثتكم الجميلةة
عليّ 3 اختبارات ماختبرتها مع البنات ، اهما سووها وآنه ماسويتها فوضعييي كلشش
ونرجع نقول ان شاء الله يكنسلون الكورس ​

 

[T W I N K L E]

*
،

انتشار الكورونا في البحرينن مخيفف جدًا ، الوضع صار مايطمن بتاتًا ..
تخيلوا وزارتنا كانت بناءً على مبدأ الشفافية - مقسمة الحالات - يعني تسجل الحالات اللي
من الخارج بروحها ، الحالات اللي بسبب مخالطة القادمين من الخارج بروحها ، والحالات المحلية بروحها ..
وهم تحط الحالات المستقرة بروحها واللي بالعناية بروحها ، والوفيات بروحها !

كان طول الفترة اللي طافت ، الحالات كلها من الخارج والمحلية صفر والحالات اللي بالعناية
شوي ثنتين جي ، والباقي مستقرة .. احين فجأة امس التقسيم اختفى وقاموا يعلنون عن حالات جديدة!!!
وهالحالات مب مقسمة وبشكل عام بس يقولون ووايد !!! نسأل ، محد يوضح لنا شنو هالحالات ووين مصدرها ..
وطلع قرار تمديد العطلة حتى اشعار آخر ! ي جماعةة اليوم ايينا خبر ان في قرية من قرى البحرين الكورونا
منتشر بشكل كبير !!!! ويقولون ان فقدوا السيطرة على انتشاره وماعرف القيل والقال ، شنو الصح من الغلط
شنو الاشاعة وشنو اللي صج ، بس اللي اعرفه ان فعلًا فيه حالات محلية وقاعدة تخالط الناس ومانعرف عنها
واللي متاكدة منه ان البحريينن نتفففةةة !!!!

لا والرعب الاكبر خالتي مكلمتني في الخاص تبيني اصمم لها صورة ..
فيها دعاء بسبب الكورونا عشان تحطه في حالة الواتساب - جفتوا شلون
الناس بزلزلة والعروس تبي ريّل - طبعًا آنه سويت عمري مينونة وكتبت لها نعم
ع اساس مب فاهمة شتبي

والله صجج ، مب فاضية لهم .. ماحب الاستغلال بتاتًا ! يمكن يجوفون هالشي عادي وبسيط
بس آنه بالنسبة لي استغلال ، لان مب اول مرة تعالي صممي لي وسوي لي ، ويزعلون اذا ماسويتوا
لهم ، يعني حق بتولد تعالي صممي لي ثيم كامل حق المفرش مال الياهل والتبشيرة وحق التوزيعات ..الخ
وهذي الاشياء من برا وايد غالية وتكلّف لو تطلبونها والتصميم ياخذ وقت، يعني آنه لو ابطل لي بزنز اربحح ..
مب بس من خالتي ، من كل اللي حولي بشكل ينرفزز ، حتى ربعي ! وصراحةة انه من النوع اللي يستحي
يرد للناس طلب وهالشي ، ماحب اردهم وجي واقعد اتعذر لا ومايفهموون اعذاري ..

يعني ربعي ، كل مابتولد وحدة تصير لهم اييون يقولون لي صممي لنا ثيم - علشان اهما مايدفعون
شي من جيبهم ويحصلون تصاميم كـ بكج كامل وحلو وارتب حتى من اللي يطلبونهم غاليين "مجانًا "- وآنه
اسكت ومن طيب نفسي اسوي مرة ، المرات اللي عقب تصير تتوووو مااججج !! آنه ممكن اسوي ومابي
أي مبلغ من عندهم .. وبالعكس أكسب فيهم اجر ان أديت لهم خدمة وفرت عليهم شكثر وبشكل مرتب وحلو
ولكن !! انهم يستغلون هالشي فيك بحكم ان قراب منك ، الشي ينرفززز ويبط الجبد ، يعني بنت خالتي مرة
تبيني ارسم لها ولدها ، قلت لها بفلوس .. بما اني اساسًا ارسم بفلوس ، جان تقولي ماتستحين على ويهج
بنت خالتج !!! الشي يتعب ترا .. ومب انتي الوحيدة اللي تبين ارسم عيالج ، وايد عيب !

- عاد تخيلوا وآنه اكتب لكم هالتدوينة تتصل فيني خالتي
وآنه : اوكي :") ، يلا معليه .. نكسب في الدعاء وكل من يقراه اجر -

البوينت اللي ابي اوصله ، آنه بشكل عام عادي ..
اصمم من طيب نفسي والله ومب مُكرهة عالشي ، واصمم لهم بنفس مفتوحة
ع التصميم عشان اطلع لهم باجمل النتايج بس آنه اتضايق من بوينت الاستغلال فقط .

^ باصيحح جفتوا شلون انتقلت لموضوع ثاني تمامًا
-
ماعلينا ، آنه اساسًا افكر من زمان افتح بزنز تصميم ..
وكان فيه محاولة ، مب محاولة إلا بس فكرة بيني وبين اختي العودة بما ان تصميمها كشخههه ق8ق8
وفتحنا اكاونت مرة لكن ماسوينا فيه اي شي وسحبنا هالمرة صممت لي لوقو
وعلى فكرة أول مرة في حياتي اصمم لوقو ، وحدييي حابههه الرزلت ق8ق8ق8

^ طبعًا مغيرة سايز الصورة من اهني - من الموضوع - فاحس الجودة شوي انعفست
لان حجم اللوقو وايد عود عمومًا ، شرايكم ؟؟ اللوقو يجمع بين ثلاثة حروف T و F و D
والمقصد منه Taqwa Faraj Designs ، وملاحظين حرف الاس ولا لا ؟ تمثل الاس اللي بنهاية ديزاين
- واسم البزنز اللي مقررة ابطله TFDesigns - شرآيكم عاد ؟ ودي اخذ بآراءكم ..

شغلة ثانية ، انه لين بطلت مشروعي .. ابي يكون الدفع الكتروني
فحابة أعتمد طريقتين ، البنفت باي و الباي بال .. المشكلة اني ماعرف للباي بال
واخاف منه لان البطاقة اللي بسجل فيها مب مالتي بما اني تحت السن القانوني =،= ، كلها
اشهر وندش السن القانوني شدعوة خل يسوون لنا سو اخاف اسوي حركة غلط بالبطاقة
ولا ينباق شي ف .. اذا احد يعرف للباي بال بلييزز يعلمني عليه ..

​

 

[T W I N K L E]

*
،

كان يا مكان في زمنٍ كثُر فيه الجوّر ، كان هنالك رجلٌ في الخمسين من عمره، عُرف بين
أهل مدينته بالعلم الذي ورثه عن والده، فكان عالمًا فقيهًا عارفًا زاهدًا ساجدًا عابدًا لله وحده
لا شريك له ، يُعلّم الناس في الدين ويفقههم في ما جهلوا أو نسوا ، ولم يقتصر علمه على الدين
فقد شمل العلم الدنيوي أيضًا فكان يدرّس في شتى المجالات ويتِّمُ ما بدأه والده ..

كان ذلك الرجُل مضرب المثل في الحِلم والرحمة وكظم الغيظ ، فإذا ما بلغه
عن رجلٍ يؤذيه قيل أنه يبعث إليه بمال ، وقد كان حكيم زمانه وأفصحهم وأعلاهم وأفضلهم ، فقد تبعه
الكثير والتصق به البعض لينهل من علمه ويشعر بجوده وكرمه ويأنس بحسن مجالسته !

وكما قد كان له محبّين ، كان هنالك حفنةٌ من الجُهّال المضيقين عليه والكارهين له
فهو حال أهل الحق لا يجدون ناصرًا في دنيا كانت ملاذًا للباطل ، فقد كان هنالك الكثير من الوشاة
التي دخلت بين ذلك الرجل وحاكم الدولة الجائر ، إذ قال أحد الوشاة للحاكم الجائر " ما ظننت أن في الارض
خليفتين حتى رأيتُ ذلك الرجل يُسلم له بالخلافة والحُكم " ، حينها قد تأجج في نفس الحاكم بُغضًا مضافًا
للبغض، و زاد الواشي على ذلك بابلاغ الحاكم بأن الأموال تُحمل إليه من المشرق والمغرب وبأن له بيوتًا
من المال .

ولم يكن للحاكم أن يترك ما يهدد كرسيّه فأمر باعتقال الرجُل ، ولكن لم تنتهي دروس الرجل بسجنه بل كانت
أخلاقه التي يتحلى بها سببًا لتأثيره على السجّان وقد كان ذلك هو السر في دخول العلماء عليه وأخذ
المواعظ منه ..

بلغ الأمر السلطات وبدأت بنقله من سجنٍ لآخر بغيّة ردعه عن نشر العلم وتثبيط عزيمته
وإنهاء وجوده في ذهون الناس ، لكن السجون لم تغيّر ساعةً من صفات ذلك الرجل ولم تثني محبيه
لحظةً عن ذكره ومحاولة الوصول إليه بينما يقوم الحاكم بإخراجه من سجن طاغوتٍ لآخر حتى وصل به
الحال لأحد أكثر السجون قساوة ! فقد سُجن في طامورةٍ لا يرى فيها الليل من النهار ، ومن شدة ظلمتها
لا يرى الشخص من يكمن أمامه ، وضيقها لا يتسع لشخصٍ واحدٍ حتى ، كان مكبلًا بأصفادٍ من حديد
ضيقةٌ تُورَِم معصميه وتُسيِل الدماء من يديه وقدميه ! كان السجّان يعمل جاهدًا للتضييق على الرجل
والتنكيل به بكل الوسائل مرضاةً للحاكم بينما كان الرجل في كل مرّة يتعرض لأذية .. لا ينثني عن صلاته
وعبادته وحمده لله ، وقد حاول البعض دفع الرجل إلى إلتماس العفو من الحاكم ولكنه أبى أن يضع يده
بيد الظالم ، مما جعل الحاكم يأمر السجّان بدسِّ السُّم في الرطب واجبار الرجل على أكله !

وقد سبق ذلك الأمر دخول أحد المحبين على الرجل بفضل خادم السجّان الذي تأثّر بصفات
الرجل الرفيعة ، حينها أخبر الرجل ذلك المُحِب ببشارة خروجه قريبًا من السجن ، إذ كان يوافق يوم
الجُمعة وإن لقاءهم يكون على جسر المدينة، وأبلغه بإخبار باقي المحبين ببشارةٍ عظيمةٍ كهذه ..

-
صبيحةُ الجمعة ، عند جسر المدينة ..

كان المحبين والعلماء قد حضروا مرتدين أبهى الملابس ومتعطرين بأطيب الريح ،
كلٌ منهم يبارك للآخر خروج الرجل ، كان عيدًا لهُم ! وبينما هم كذلك لاحت جنازة يحملها أربعةُ اشخاص
بدون معزّين وبدون أقاربٍ أو أهل . وُضعت الجثة على الجسر بينما ينادي المنادي بهوية صاحب الجنازة
ويقول بأنه قد مات ميتةً طبيعية ، ومن يريد معاينته فليتقدم وينظر !

فكان من بين الجمع على الجسر ، عددٌ من وجهاء المدينة وفقهائها الذين أجمعوا على موته
بشكلٍ طبيعي من دون تقصيرٍ من السلطات الحاكمة !! وقد أشهدهم السجّان على أنه مات حتف
أنفه فشهدوا على ذلك !

بينما كان محبّين الرجل في حدادٍ وقد نشروا السواد ، واكتسوا لباس الحزن على رجلٍ عظيم
مات ظلمًا ، قد كان تظليل السلطات الحاكمة فاشلًا إذ قدم طبيبٌ مسيحي إلى جنازة الرجل ونظر
إلى راحته، فقال للناس : إن هذا الرجُل قُتِل بالسُّم ، فقولوا لعشيرته أن يطالبوا بدمه ! وهُنا انفجرت
قُنبلةٌ مدوّية أجبرت السلطات على أن تلقي باللوم كله على السجّان ، فاستدعى الحاكم أحد تابعيه وأمره بتكريم
جنازة الرجُل وأعلن حزنه ، وأمر المنادي بأن يقول " من أراد أن ينظر الطيب إبن الطيب ، والطاهر إبن الطاهر
فليحضر جنازة موسى بن جعفر " !!

​

 

[T W I N K L E]

*
،

قاعدة امووتتت من الوناسههه .. تخيلوا قعدت على أي خبرر ؟؟
" لا امتحانات واستبدالها بتقييم ملف الطالب " ق8ق8ق8ق8
اخخخخ هالأخبار السنعههه ، صج ان ما كنسلوا الكورس ، ولكن خلاص مابنداوم
ولا بنعيد الكورس ولا بتنحسب درجة الفصل اللي طاف بندرس اونلاين " صفوف
افتراضية " ومجرد نحل انشطة وعقب درجاتنا النهائية بتنحسب من تفاعلنا ويا المعلمات !!

يعني اقدر ان شاء الله ارفع معدلييي ق8 وبنفس الوقت مافيههه تعبب ..

تعرفون اكثر شي احاتيه شنو ؟ شهر الله ، كنت خايفة ان الامتحانات بنقدمها في شهر رمضان
وبتضيع ليلة القدر وآنه ادرس فالحمدلله لأول مرة احسني بعيش شهر رمضان صح ، وباسوي
كل اللي اقدر عليه في هالشهر الفضيل ، وايد أشياء كنت ابي اكون فاضية فيها مثل " يوم الضربة "
هذي بعد كنت باصيح لان بادرس للامتحانات فيها بدل لا أحيي هالايام العظيمة ق8ق8 ..

آنه من هالمنبر .. قاع يزيد ايماني ان كل شي صلاح !
حتى هالكورونا اللي مخرعنا صلاح ، مانعرف شنو الله كاتب لنا وشنو مدبّر لنا ..
فالحمدلله عدد خلقه ورضا نفسه وزنة عرشه ومداد كلماته ​

 

[T W I N K L E]

*
،

صج ان مدونتي صارت برعاية الكورونا واحس طلع من خشمي وخشمكم كثر ماسولفت عنه
بس آنه صايرة وايدد وسواسيةة بزيادهه .. يعني قاع اشك ان فيني كورونا والله .. صارلي يوم
رابع الصخونة تروح وترد لي ، صج ان ماكح و حرارتي مب مرتفعة وايد يعني مب الحرارة
القاتلة بس تعرفون ذي اللي تكسر العافيهه والوضع في الديرة ما يطمن كلش ! - ولو اني ماطلع -

المهم عاد آنه متابعة اخبار ايطاليا اول بأول ، وأول ماجفتهم اعلنوا طب الحرب .. وآنه اقول
يارب الطف في عبادك ، وآحين توني اجوف فيديو لهم ان اهما استسلموا للوباء وطلعوا للشارع
وقاموا يودعون العالم ، تعرفوونن شنو حسيتتت وآنه اجوف الفيد ؟؟ حسيت ان الوباء بينتصر علينا
كلنا وبنموت وماعرف افكار كئيبة، وآنه ادري تمام الدراية ان الخبر مفبرك والفيد قديم وماله علاقة
بالكورونا واتوقع مال مظاهراتهم ..

الفيديو عطاني هالشعور بخيبة الامل باعتبار الدول اللي الكورونا قاعد يقتل فيهم الالاف
في وقت قصير اهما دول متطورة وغنية وعندها وعندها .. فإذا آنه اللي ادري ان الفيد ماله علاقة
بالكورونا أزمني ، مابالكم بذلين الناس اللي مايعرفون ان الخبر مفبرك ؟ تخيلوا شنو بيصديهم ؟؟
ماعرف هالناس من وين يفكرون ، بس صج أتمنى يستوعبون شقاع يسوون !!! اتمنى يستوعبون
ان ترويع الناس حرام، أتمنى ينقرضووونننن .. شفيهم ذلين ؟؟؟ صج مب حزتهم ..

المهم ، بالحديث عن الكورونا خل اجاوب على سؤال @7sN ..

وانتوا؟ شلون قاعدين تستغلون وقتكم؟ مهتم أعرف بصراحة

القعدة في البيت عطتني متسع من الوقت اني اسوي الاشياء اللي كنت أتعذر بالوقت وماسويها..
ولكن للاسف اقدر اقول اني اخطط واخطط وماسوي ماختلف الوضع وايد عن قبل ، لازلت
اضيع يومي على ولا شي لكن ستل فيه اختلاف وقاعدة اشتغل على اني أملي يومي

أول شي قمت أسويه اني زدت من وقت قراءتي للقرآن ، قبل كنت اقرا ولكن مب يوميًا ولا على اوقات محددة..
احين قمت احاول استغل وقتي في هالشي واخلي قراءة القرآن " عادة " عندي وناوية اواصل
لي شهر رمضان وعقبه .. اؤمن اني لو استمريت بهالشي لاكثر من شهر بيصير روتين عندي فان شاء
الله احقق هالشي والله يثبتني ..

بعد أمس بديت ألعب رياضة - يعني احين بسوي لي روتين حياة صحي -
صج قام احس عضلاتي انشدت بس ظهري ي جماعة يعورني اتخيل اني سويت
التمارين غلط

وبديت أشتغل على بزنزي الخاص ومادري متى سيرى النور =) ، ولكن ان شاء الله قريب
غير جي .. يومي فاضي افسفس حب ، اطالع دراما وانام واقعد :/ ، يضحك اني اعطي
الناس نصايح وآنه طول اليوم عطالية بطالية ..

يعني آنه امس انصح @Bubblegum ترسم وآنه ساحبة ع الرسم من سنة يدي ،
صج صج من زمان مارسمت ، اخر رسمة لي كانت لمجلة انمي تون .. للي ماجافها - هُنا -

والله وايد صايرة كسلانة آنه ، ماسوي شي يمكن بس امس
سويت العشا للبيت ورق عنب وذليتهم عليه ذل بس احس هالشغلة البسيطة
أضافت ليومي الممل شي اقدر اقول اني سويت شي بحياتي لان الطبخ عندي شي
عظيم







​