. I HIT HIM IN THE FACE WITH A WATERMELON (4 زائر)

[T W I N K L E]

*
،

آنه مادري شفيني صج اليووممم !! احس ان فيني شي مب طبيعي ..
مادري في ينانوة مستقعدين لي ولا شلووننن !! كنت طالبة باستا أمس ويوم يابوها
أكلت شوي وعطيت خواتي قلت لهم اكلوا منها وخلولي ، المهم ييت اليوم وصخنتها ..

ييت شلتها ، جان تطيح من يدي بشكلل غريب ..!! يعني مادري شلون طاحت انه ماهديتها
وانقلبت يعني .. انكتت ف الأرض مع ان خاطريي فيها، خصوصًا إن خواتي ماخلوا لي وايد قليلين
الأدب وفوق جي تنكت !! عسى عن صلاح مشيناها ..

في نفس الساعة رحت سويت لي عصير ، آنه احط فيه عسكريم - متعودة ع تخبيصاتي -
شلت العسكريم باحطه ف العصير جان يطيح من يدي ع الأرض عبالكم خليته ؟ بعد
شلته من ع الارض وحطيته - لحد يقول وصخة - بيتنا نظيف .. اوقي، شوي
باخذ عود وباحطه ف العصير - يعني حركات - جان يطيح العود من يدي !!! - اهني بدت تمصخ السالفة -

اوقييي مشيناها ، جان امي تغصبني اغسل القلاص اللي شربت فيه ..
رحت باغسله ، جان يطيح من يدي وتنجرح !! اهننيي حسيت ان دعوة خايسة صادتني !!

انزيين الموضوع طلع عن حدهه ، يدي قامت ترجفف بشكل مب طبيعي !!
حتى ان امي تقولي انتي بالعمالة تسوينها ي زعم ترجف !! واحس ان يدي لي هاي اللحظة اللي قاعدة
اكتب فيها مب طبيعية، فيها شعور غريب مادري شلون ..

عآد آقولكم، ماعلينا من الينانوة اللي ساكنين ف يدي ، آنه صايدني شغف بالطب
والأشياء الطبية أكثر من قبل ، مادري لان خدمة المجتمع مأثرة عليّ؟ أو الدرامات الطبية اللي اجوفهم
أو حتى اقتراب المرحلة الجامعية - الدنيااا تركضضض ، احس امس كنت ف ابتدائي -

المهم ان هالشغف مخليني ابحث وايد عن أي شيء يصيدني وخصوصًا اني بين فترة ل فترة
تصيدني اشياء غريبة مثل رجفة اليد سابقًا ، وأحيانًا تتكرر وتطوّل .. وهاي الشي يخليني
ابحث عن الأعراض وأوسوس وايد ، كل شوي اقول شكله فيني هالمرض - ولا تسعين الف مرض-
بامووت يضحك الشي بس يخرع بنفس الوقت



​

 

[T W I N K L E]

*
،

آنه انسانة ماحب آنصدممم من احدد !! خلوني على عمآي بس لا تصدموني بشخص ..
يعني ي الله !! شلوونن جيي ماصدقق ان الشخص اللي خذت عنه فكرة حلوة وانه انسان محترم
طلع حتى تفلةة مايسوى ..!!!!!!!

اوقيي ي جماعةة آنه قاع اكتب اهني لسبب واحد .. وهو الموعظة ي جماعة الخير +
باقولج .. ايي انتي .. اللي تقرين .. الصبيان خلكم ع جنب ، جوفي ياقلبي الصبيان كلهم طخة وحدة
لا تقولين محترم م محترم ، والله انتي البريئة والمحترمة

خل اقولكم السالفة ، ويارب تطلع حلمة عادد !!

تعرفون خدمة المجتمع ، مب قايلة لكم ان فيه ممرض مادري شوضعه مسؤول عني ؟
المهم ان هالانسان كنت امدحه صح ؟ عبالي شخص عدلل !! آخر شي شنو ؟؟

-
رفيجتي خدمتها عقبي صارت ، وكان هم مسؤول عنها .. - اهيا تشيل حديد - يعني اللي يجوفها
يقول صبي يعني دفشة تقدرون تقولون ، ف اهوا مادري شنو صار بالضبط
بس المهم ان ضافها في الانستا .. ومرت الايام الى ان نصل لليوم ذي ..

جان اهيا كالعادة تصور ف النادي وهلّون ، جان صورت الصالة وحطت ذي الايموجي ?
ونزلت الصورة ستوري انستا ، جان يرد على الستوري مالها " ام الحديد " ..
مادري شصار بينهم كلام، بس عقب سألته تعرف وحدة اسمها زينب في الخدمة ؟
- زينب اهيا رفيجتنا " وحدة ثانية خدمتها هالاسبوع " - جان يقول
" ايي بس ماعرفهم ، سمرة ولا بيضة ؟ " عقب دايركت قال ، " ام براطم ولا ؟ "

طبعًا رفيجتي كانت تكبجر لنا ف القروب ، وايد عيببب الصراحةة شنو ام براطم !!
عقب شوي الا يسوي ضبطي لي وحدة ، يقول ان اللي معاه حاليًا مب حلوين وتعرفوونن
قعد يوصف جسمهم بالتفصيللل !!!!!!!!!! والله انصدمتت ان يقززززز - يطالع من فوق لي تحت-
.. تعرفون آنه قاع اقول احين على كثر ما الحمدلله ان خلصت خدمتي ، على كثر ماقول واعيباه ،
على كثر ماقول شلوننن كنت قاعدة صوبه ؟؟؟!!!!!! شلون قضيت فترة دوام كامل وانه قاعدة معاه !

ي ربي لو احد يقول لي عنه جي في فترة الخدمة ، جان والله دقيقة ماقعد معاه !!
المشكلة كان مسوي روحه آية الله واهوا يسولف ويانا ع الحلال والحرام والدجال ومادري شنو !
وعاد وانه اقرا المحادثة وآنصدم بنفس الوقت قاع اتذكر المواقف اللي حسيتها ذيج اللحظة عادية
بس احين يوم قمت اربطها ، طلعت نواياه خبيثة

باقولكم واحد من المواقف، فالتمريض عند الريسبشن .. يعني المكان اللي آنه قاعدة فيه
فيفا مافيها سيرفس - يعني النت مايشتغل - ، فاهوا كان طول الوقت يتطنز عليّ ويحرني
ان ويييوو الانستا عندي يشتغل وانتي لاا ..

طبعًا كانت ردة فعلي لكلامه ، شاسوي لك يعني ؟ عادي ..
جان يقولي تبين آشبك لج ؟ قلت له اي .. جان آبطل الواي فاي واهوا يبطل الهوت سبوت،
عطيته تلفوني يكتب الباسوورد .. جان يقولي انتي كتبي !

تم يقولي الباسوورد وآنه اكتبه، عاد مادري شفيه التلفون مايشبك ..
جان اقول له الباسوورد اللي كتبته ، الا يقولي صح .. انزين بعد ماشبك ، عقب آنه
صكيت الواي فاي ورجعت على نتي ..

المشكلة وين ؟ ان في اثناء م كنت آنطر التلفون يشبك ، الا يقولي آنه احط
الباسوورد رقمي والتلفون بعد باسوورده رقمي ، كل شي رقمي ، جان اقول له انزين
كلمن يحط رقمه باسوورد يعني مب اول واحد ! بس ابدًا ما يه على بالي انها محاولة تضبيط
وآنه ذاك اليوم طنشته اقوى تطنيش وعادي يعني ، مافتكرت في اللي قاله ما يه على
بالي كللشش !

-
ف يب مثل ماقلت لكم .. الصبيان حددههممم مامنهم امان
والله كنت اقول انه محترم ، بس طاحححح من عيني لدرجة مايقدر يركب مرة ثانية
وبعد ماكنت انصح ف التمريض .. قاع اقول حق رفيجتي روحي الرعاية، لا تقعدين معاه دقيقة زيادة
ورفيجتي اللي تشيل حديد يبي لها كف عشان تعلمه شلون يلزم حدوده .. لو آنه منها ويقولي هالكلام بكل
جرأة علمته شلون ياكل خراه .. هاي اللي ناقص !

طبعًا قلة الأدب هالأيام ببلاش وعبالهم واااو ، سواءً عند البنات ولا الصبيان
وعبالكم رفيجتي ماكلت زف مني؟ حتى آنه زفيتها لان شنو ؟؟ قلت لها ترا اهوا بعد معتبرج
قليلة ادب من جي تجرأ يقولج هالكلام ، لو وحدة ثانية ايخسي يقول هالكلام لان يعرف الرد اللي بييه
براويه نجوم الليل ف النهار ، اما انتي ترا معتبرج ماتستحين والخجل عندج ببيزة ..

وبس والله وايد اشتطيت ، بس حددي منصدمةة
ف يآه ، نلقاكم في تدوينة اخرى بعد أن تهدأ الصدمة ​

 

[T W I N K L E]

*
،

السلام عليكم ورحمةة الله وبركاتهه ..
عيدكم مباركك جميعًا، وأعاده الله علينا وعليكم باليمن والبركات ..
^ باي ذا واي، مب عيد عندي.. عيدنا باجر ، لكن أقدر أقول اني حصلت معايدات
وايد لدرجة اني قاع آحس انها بتكون أكثر من المعايدات في العيد نفسه

عآد العيد هالسنةة كللش ماجنه عيد !! حرفيًا محد مفتكر فيه ..
توني آكلم ميلي جان تقول ماعندي عيد - ملاحظين انها اللي معايدة عليّ وبعد مافيه عيد -
وربعي نفس الحالة ماشتروا حتى ثياب، واخوي اول سنة هلّون مايشتري له ولا مفتكر
ويقول ربعه نفس الشي، ومتخيلين اني توني توني رايحة اشتري ثياب العيد يعني باجر
العيد وتوني آخذ عاد اهوا بشكل عام من زين عيدي ؟؟

حتى يمعة الاهل للاسف مالها طعم ولا احصل عيادي ولا شي، على اساس كبرت
لكن اللي استغربت منه اهوا الناس اللي حتى ثياب ماتشتري، آنه صج عيدي بيض
بس ياخي حتى لو باقعد في البيت بعد آشتري ثياب، كشخوا حق روحكم شدعوة ؟ كسروا الروتين
ونسوا روحكم بروحكم، ماحس ان لازم تطلعون عشان تسوون لكم اجواء العيد .. حتى ويآ نفسكم
تقدرون تستانسون، طلبوا لكم من مطعم، تيمعوا معا ربعكم، سووا لكم برنامج .. حسّوا بالعيد حتى لو بيض
عآد ذي مب سالفتنا، مادري شلون المقدمة تحولت ل سوالف

المهممم، ف ذي التدوينة بآقولكم قصتي مع الشعر ..!!

يمكن آعتبره شي غريب شوي فيني، بس آنه ي جماعة عندي عقدة من الشعر
يعني صج صج شيء جدّي - جدي ولا عمي < آوت - ، ماقصد الشعر اللي براسي .. لآ
الشعر اللي طايح يكون، سواءً طويل ولا قصير .. يعني ماعندي اي مشكلة اني اتعامل مع الشعر
طالما انه بالراس بمجرد مايطيح اتقزز منه بشكل مب طبيعععي !! - حتى لو شعري -
لدرجة اني اخلي امي تشيل الشعر من مشطي عني - مادري شباسوي بدون امي -

بحثت عن هالموضوع، جان اجوف ف النت شي اسمه فوبيا الشعر
المشكلة إن صحّت معلوماتي الفوبيا يعني خوف صح ؟ آنه ماخاف من الشعر بس ماطيقه
او اتقزز منه، بس يعني م يخرعني !!
وطبعًا ذي السالفة فيني من يوم آنه صغيرة وآيد..وكبرت معاي، يعني قبل كنت اجوفه شي عادي..
بس آحين قام يحرجني وايد، يعني آتفشل من السالفة

خل آقولكم موقف من المواقف، مرّة فيه وحدة معانا بالمدرسة .. معرفتي فيها مب وايد
يعني معرفة سطحية، مدري اهيا تعتبرني صديقتها بس آنه اجوفها وحدة عادية مثل باقي البنات ..
عاد جافتني بكفتيريا المدرسة، جان تقولي تبين آشتري لج .. طبعًا احسن من اني ادش الزحمة ، فقلت لها
اوكي .. عطيتها تاخذ لي ماي، جان تخيلو واهيا يايبة الماي ف يدها شعر، تخيلو ان الشعر لزق بالماي بما انه
مثلج ومن برع صاير عليه ماي مدري قطرات الندى - شيسمونه ؟ - المهم عاد من اخذته من عندها
حاولت اشيل الشعر من على الغرشة .. لعبت نفسي، ماجفت روحي الا ادمع وابولع - يعني وحدة شوي وتزوع -

يس ايها السادة !! انه من اجوف الشعر عيني تدمع وازوع واحيانًا احسني ماقدر اتنفس عدل
بس مب خوف كلشش ، بس ان لايعة جبدي منه ، المهمم البنية مسكينننةة انحررججتتت وآنه انحرجت وياها !
بس والله الشي حددهه لا ارادي ..!

وطبعًا عقب مستحيل اشرب الماي، كرهته وسقيت الزرع فيه
واللي خلاني ابطل الموضوع اقين.. اني من شوي كنت اشيل شعري من ربطة الشعر
ومب راضي ينقص، تخيلو شكلي - كنت مغمضة عيني عشان لا اجوفه - واهوا مب راضي
يطلع من الربطة فكنت آحس فيه واكتشفت اني حتى لو مغمضة عيني تييني مثل الحالة وآبتدي
ازوع

-

آنه حدددهه ودي افهمني ليش تلوع جبدي منه؟ - والمصيبة ان شعري غير مستثنى من الموضوع -
حتى لو اجوف شعرة وحدة عالارض تقلب نفسي، والمشكلة الصجية ف ان لايعة جبدي من الشعر هو
كونه شعر مادري ليش !! يعني لو تييبون لي خيوط بنفس سمك الشعر ماتلوع جبدي منه بس الشعر
غيرر ! المهم تنصحوني آروح طبيب نفسي؟ شكلي مينن - مجنونة - لآه ؟ ​

 

[T W I N K L E]

*
،

#العراق_البحرين

اليوم كانت المباراة بين العراق والبحرين، طبعًا مايحتاج اقول لكم ان الكورة كللشش مب من صوبي ..
بس هالمرّة تحمستت صج، ليش؟ لان بين أقرب دولتين لقلبي حرفيًا " بلدي الحبيبة والعراق " ..

طبعًا أكثر دولة رحت لها اهيا العراق، حتى اكثر من السعودية .. واحببب كل
شي فيها، ريحتها، ناسها، لهجتها، ارضها، مقدساتها، كل شييي حرفيًا، ماوصف لكم ان كل اجازة
تمر عليّ يصير خاطري اروح العراق بدل تركيا اللي هابين فيها نص الشعب

ف آنه كان وضعي حزتها هلّون ..

-
آنه عاد ف المباريات اللي هلّون وايد استانس، لان شعبنا كله يصير يد وحدة ..
النزاعات السياسية والطائفية تكون على جنب، البحرين كلها روح وحدة ووناستها وحدة
وحماسها واحد، تحسّون ان صجج لما يفوز المنتخب جنه الكل محصل المليون
طبعًا وآنه اسولف احس قلوب تطلع من عيني، آحب اجوف وطني مستانس هلون ..

فيه تغريدة للحين عالقة ف بالي بهالخصوص، بحريني رفاعي يقول
" يبه الخيط الأخضر يلعب، اكيد ماتغلبونا " ! ، اهني قاع احسس ان صجج
هذي بحرينا، اللي من سنين ماجفناها هلّون ..

ف وآنه آتفرفر ف الهاشتاق واطالع كل واحد يقول ويتوقع شنو النتيجة، والحماس ذي
وايد خلاني شاقة الحلج وآنه كنت حرفيًا اشجع الاثنين ف مب مفتكرة بالنتيجة
على زود ما اني مستانسة وآنه اجوف شلون عيال ديرتي مستانسين هالكثر ..

خل اراويكم ما يعبر عن اللي اقوله ..

https://twitter.com/i/web/status/1161633072862904321

^ هذي على اخر خمس دقايق من المباراة .. اكيد كنت متابعة الهاشتاق قبل
بس مافكرت اكبجر الا عقب .. ف كنت باراويكم حماس العراقيين بداية المباراة الفف
بس للاسف راحوا تغريداتهم تحت كلللش

-

المهمم ابشرككمم فزززنااااا ? ? ? ? ? ? ? ?
واحينن اقدر اقووول " هذي البحريني ما تغلبونه " هاردلك العراق
قلت لكم كنت احيي اللي يغلب، عاد احين الكاس بحريني شلون ماتبوني استانس ..
وطبعًا جانب من فرحةة البحرينيين ..

https://twitter.com/i/web/status/1161732658872901634

https://twitter.com/i/web/status/1161735996167413761

https://twitter.com/i/web/status/1161723521074118657

http://instagr.am/p/B1KDS3hnarg/
-
آحب لما يكون فيه مناسبة ولو بسيطة تجمعنا .. كل كل البحريننن
من اصغر قرية ل اكبر مدينة فيها، ولو اني ماهتم في الرياضات واعتبرها شي كلش
مب من صوبي، إلا اني طالعتها بشغف وحماس كبيرين، لان حسيتها تجمعنا وهاي اهم شي
عشان جي اقدر اقول اححينن - اعلن حبّي للكورة -​

 

[T W I N K L E]

*
،

امي من شوي تقولي نزلي تحت - اوادم بيون البيت - .. طبعًا انه رديت عليها
ان م لي خلق ومادري شنو، فزفتني تسوي لي، نزلي عايدي عليهم وان عيب ماعايدتي
عليهم ف العيد وآحين بعد يوم يوا بيتنا !

آنه من الناس اللي ماتنافق احد، يعني انت ك آدمي مب عاجبني .. عندي مشكلة وياك
ماقدر اتعامل معاك ولا كأنه بينا شي، ماحب اعطيك الانطباع ان احنا ربع وآنه في الصج مب طايقة
اجوف ويهك ! آنه مب حقودة أبدًا، وممكن لو صادفت هالشخص اعامله باحترام بس أبدًا ماكون وياه
جنه آنه وياه ربع، يكون حاله من حال الأوادم الباجي ..

" بعيدًا عن الناس اللي صادهم فضول، يقولون لكم ومن الفضول ماقتل "
بامووتتتتت يضحكككك
-

أما بالنسبة للأوادم اللي مو واحد ولا اثنين اللي شرهانين عليّ - ماعرف شلون اشرح لكم الكلمة -
" هيلب، اي احد يفهمها يترجم " .. حبيت اقول لكم ان مافي قلبي عليكم شي " عبالهم اختفيت فجأة
لأسباب قلبية ضدهم " يعني شايلة بقلبي عليهم او شي، بس والله ماتوقعت احد يفكر هلّون عني
شدعوة عليكم، مب معقول شخص اسولف وياه 24 ساعة بيوم وليلة اقلب عليه واصير حاقدة واختفي
وحركات الدراما أما ليش مختفية لاني كنت فعليًا ودي اختفي من التون بس كلش مب شايلة بقلبي
ع أحد، أصلًا ما صار بينا شي عشان يكون هذا سبب اختفائي

وبس والله يعني لو كنت صج حاقدة ع أحد، مابروح اسولف وياه مثل قبل ولا كأن شي بينا !​

 

[T W I N K L E]

*
،

مَنْ كُنْتُ مَوْلاه فهذا عَلِيٌّ مَوْلاه ??.​

 

[T W I N K L E]

*
،

#قبس من الذاكرة

ميسيزو وألعاب الأونلاين اللي بالكمبيوتر عشقققق لا ينتهي ..
بداية العشق كانت عالم الأسرار، كانت أحلى لعبة واعتقد انها بتبقى احلى لعبةة
قط لعبتها من هالنوعيةة، انصدمت ان فيه ناس ماتعرفها !! أتذكر ع أيامها فيه تسويق مب طبيعي
ل اللعبة في سبيستون ..

خل آقولكم تاريخي ويا ذي اللعبة الاسطورية، بوقتها كانت عايلتنا صغيرة نسبيًا
يعني خواتي الصغار للحين ما يوا ع الحياة ! فكنا ثلاثة بس، اختي اكبر وحدة واخوي
اللي اصغر منها بسنة وآنه اللي اصغر منه بسنتين ..

ع ذيجج الأيام كانت حياتنا مختلفة عن الجيل الحالي - خفي علينا ي العودة -
المهمم كنّا ثلاثتنا نتسدح جدام التلفزيون ونطالع سبيس تون بشغففف كبيير !! وللحين
هالمشهد مايروح من ذاكرتي يا سدحة ع البطن، يا سدحة ع الظهر والريل متعلقة
ع المكتبة ، يس ايها السادة كانت ايام التلفزيون بو دبة وكان لازم ينحط ع مكتبة وهلون

المهمم محدثتكم، بينما قاعدة تطالع سبيستون معا اخوانها جافت هالاعلان ..

طبعًا جفته مرة، قلت اللاي شكلها حلوة اللعبة.. جفتها مرة ثانية صار خاطري فيها
مرة ثالثة سال اللعاب، المشكلة شنو؟ ان ماكنا نعرف من وين ننزلها وشلون ..

لكن لحسن الحظ كنّا من اليهال اللي كل اسبوع يشترون مجلة ماجد ومجلة سبيس تون
- مع انها كانت غالية بالنسبة لنا - بس كنا نيمع ونشتريها عشان الهدية اللي تيي معاها،
وفي عدد من الأعداد كانت الهدية سيدي فيه لعبة عالم الاسرار بس ستيل تحتاج تثبيت وتحميل الداتا
والابديت ومادري شنو..

المهم ثبتناها ع الكمبيوتر الوحيد في البيت، واللي كنا نتناوب عليه
للحين أتذكر انهم يقصون علي ويخلوني اخر وحدة العب ، المهم ان كل واحد ساعة
بالدور نلعب فيها، وكان عندنا حمآس كبيييررر في اللعب .. صج صج كانت من أجمل الالعاب
اللي كونت فيها صداقة واستمريت فيها لفترة ، كنت أرد من المدرسة وأركض بسرعة
اشغل الكمبيوتر عشان اكون اول وحدة العب في الكمبيوتر ومحد يقص علي ويخليني اخر وحدة تلعب

ماوصف لكممم شكثثررر كنت استمتع في اللعب، ولحد الآن اتذكر أول مرة حصلت فيها
تذكار باللعبة كان سعره غالي، وكنت أسعد وحدة ف الحياة لاني حصلته وبعته بسعر غالي وكنت
اغنى وحدة في اخواني، وللحين اتذكر غيرة اخوي من الفلوس اللي كانت عندي بالمقابل اخوي
كان اقوى واحد واكبر لفل فينا لان يقص علينا ويلعب اكثر منا

طبعًا وصلت ل لفل ماذكره بالضبط ولكن في الثلاثينات وعقب صكوا اللعبة
اتذكرر اني كنت خائبة الأمل ان صكوها وكنت ادور لعبة مشابهةة لها بكل فارغغغ الصبر !! بعدها
بفترة رجع اخوي من بيت عمي ومعاه فلاش ميموري ويقول عالم الاسرار رجعوهااا !!

اهنييي طرت من الفرحة، ودايركت حطينا الفلاش ع اساس نثبتها بالكمبيوتر، وكانت بنسختها
الثانية لكن الناشر مختلف وصار اسمها - ارض الاسرار - وطبعًا بعد ما اخوي ياب اللعبة، كان يتحكم
فيها بحكم ان ولد عمي اللي كان ولد عمه ورفيجه بنفس الوقت اهوا اللي ماعطيه اياها وان هذي
لعبته، فكان يلعب ساعات اكثر مني !!

المهمم ان وقتها ابوي اشترى أول لابتوب في تاريخ بيتنا ونزلنا اللعبة في اللاب توب بعد
وبدأت مسيرتنا من جديد من الصفر، وقمنا انه واخوي نتنافس ع اللعب، عاد اختي العودة سحبت ع هاللعبة
وماقامت تلعبها معانا، ف صار اللعب مرتكز بيني وبين اخوي لكن ستيل القعدة ع الكمبيوتر
كانت بالساعات لان اهتمامات اختي العودة كانت مختلفة وكانت تدش منتديات وحركات بركات

وأتذكر اني سويت لي شخصية وتميت العب وطورتها لدرجة اني وصلت لفل 45 ..
وكنت اعلى من اخوي ف اللفل وكان بالنسبة لي انجاز وهم كنّا اغنياء خل اقولكم شلون
آنه واخوي كنا اكبر نصابين في اللعبة - الله يسامحنا كنا يهال -

اللعبة فيها نقاط تشتريها بفلوس حقيقية وهالنقاط تقدر تشتري فيها اسلحة وثياب واشياء نادرة
فكنا انه واخوي كل واحد يدش اللعبة من جهاز وواحد منا يقول للاوادم للبيع نقاط..
والنقطة بمادري جم - بفلوس اللعبة - المهم والثاني يعزز للاول، يقول صح ياجماعة انا اشتريت من
عنده وفعلا حوّل لي نقاط والاوادم كانوا يصدقون بامووووووووووووووووتت صج
ماضي اسود ، المهم وعقب مايحولون لنا مليون ولا مليونين نطلع من اللعبة
وولا يجوفون رقعة ويهنا يضحكككككككككككككككك

وللحين اتذكر مرة خليت واحد يشتري لي سيف نادر بتسعة ملايين
ماتذكر شلون قصيت عليه، بس يحليله طيب اشترى لي اياه وسوا لي صداقة
بامووتتتت مادري شلون كنت ممشية حياتي اتذكر قال لي اذا تحتاجين شي ثاني
كلميني بامووتتتتتت عاددد صكوا اللعبة للافس

-
طبعًا للحين ادور العاب من نفس الطخّة حتى لو انقليزية، اهم شي ع اللاب
واشكالهم حلوة وفيها ناس وايد عشان يصير حماس والادارة مهتمة، لان حاليًا فيه نسخة
غير للعبة اللي قلت لكم عنها بناشر مختلف بعد :\ والادارة مب مهتمة في اللعبة والكل يقول
وع ولا تحملينها وكل همهم الفلوس وناس تشتري نقاط وماتنزل لهم في اللعبة، ف قلت مستحيل
احملها .. عاد حملت ارافيستا يخي اهيا حلوة بس اشكالها ماتشجع ونظامها ماحبيته وايد
اذا احد يعرف لعبة من نفس الطخة ذي حتى لو انقليزية يفيدنا ..​

 

[T W I N K L E]

السَّلَامُ عَلَى الشَّيْبِ الْخَضِيبِ، السَّلَامُ عَلَى الْخَدِّ التَّرِيبِ‏ ، السَّلَامُ عَلَى الْبَدَنِ السَّلِيبِ، السَّلَامُ عَلَى الثَّغْرِ الْمَقْرُوعِ بِالْقَضِيبِ، السَّلَامُ عَلَى الْوَدَجِ الْمَقْطُوعِ، السَّلَامُ عَلَى الرَّأْسِ الْمَرْفُوعِ، السَّلَامُ عَلَى الْأَجْسَامِ الْعَارِيَةِ فِي الْفَلَوَاتِ، تَنْهَشُهَا الذِّئَابُ الْعَادِيَاتُ، وَ تَخْتَلِفُ إِلَيْهَا السِّبَاعُ الضَّارِيَاتُ.

 

[T W I N K L E]

مرّت فترةة من آخر دخول لي ف المنتدى، تقريبًا الناس اللي كنت اعرفهم بالمنتدى تغيروا
يمكن آنه تغيرت ؟! بس وايد قاع احس ان هالناس مو نفسها اللي كنت اسولف وياها قبل سنة وسنتين
وبنفس الوقت قاع آحس ان آنه اللي تغيرت مب اهما - مب قصدي تغيرت عليهم - بس قصدي ان شخصيتي
تغيرت في هالسنتين اللي كنت فيها بعيدة جدًا عن الاعضاء .. حرفيًا الناس اللي كان يومي مايكمل
بدونهم صرت ماعرف حتى اقولهم " هاي " من كثر ما احسهم صاروا غريبين عليّ ! وبعضهم سوري
ع الكلمة اكتشفت انهم مب كفو الوقت اللي ضاع مني وياهم، لهالدرجة العلاقات لما تفتر ويصير
فيه *قاب* بينك وبين الشخص تتحول هلون ؟ وتصير تنظر للشخص بنظرة ثانية، وتحس ان حددههه
" ستوب تقوى، من هالناس اللي كنتي تسولفين وياهم، من صجج انتي ؟"

- على فكرة الفئة اللي سولفت عنها، اهيا مب كل ربعي اللي في المنتدى..
ولكن شكثر منهم للاسف نظرتي تغيرت لهم 180 درجة، وصج ماحب هالشعور !!! -

عمومًا.. دشينا سنة يديدة، مختلفة تمامًا.. وبدايتها أبدًا مب مبشرّة، مع ان المفروض
تكون من أجمل سنين حياتي، ويارب فعلًا تصير هلون، سنة 2020 تعتبر فارق كبير ومنعطف لي
هاي السنة اللي اقدر اقول فيها ان آنه كبرت صج والله ترا احين عمري 17 يضحكك
للي يتذكر انه متى سجلت فالمنتدى مابلومني على كلامي ذي آنه سجلت ف 2014 ي جماععةة
مستوعبينن ؟؟ قايز آحين احنا في 2020!! جفتو شكثر كنت ياهل ؟؟ امبيههههه أيااااممم..

عمري 17 وداشة 18 هالسنةة، عشان جي اقول هذي سنة مهمة لي ..
السنة اللي بتخرج فيها من المدعسةة وبافتك منها للابد وصج ماودي آرد اجوفها
لحد يقول بتوحشج مادري شنو، آحس خلااااصصصص تشبعتتتت مليوووننن منها !! وبنفس الوقت
اهيا السنة اللي بتحدد مصيري لي آخر حياتي، من شنو آنه باتخصص وشنو ممكن اشتغل في المستقبل
واكثررر شيي متحمسة له الليسن ي جماعة حددهههه يونس الشي، بمجرد مافكر بالليسن.

مع كل هالاشياء، عندي خطط شكثر لهالسنةة، وقاع اشتغل عليها، عندي
طموحات هالسنة ودي احققها، مب مثل السنوات اللي طافت.. طموحاتي كلها بالزبالة
بس عاد تخيلو تقوم الحرب العالمية الثالثة .. ي جماعععةة ودي اعيشش
بليزز عاددد ماصدق اني باتخرج، بعد تقوم الحرب !! صج ان مواليدنا نحس ، ماتم شي
خايس مايصير ع حظنا عاد..

وبس يعني، ولو انها متأخرة قليلًا ..
" كُل عام وانتو بخير يالربعع، صج ان آنه ييت متأخر ..
بس والله كنت مكروفففةةة بالامتحانات، ماتتخيلون حجم الكرف ..
متى آتخرججج بسسسس - ايي ترا باقي لي بس كورس واتخرج - لا بس اقول "​

 

[T W I N K L E]

*
،

صار لي فترة - جم يوم - اتابع اخبار استراليا والحرائق اللي فيها، يخيي تعورر القللبب..
الحيوانات والله اكثر شي معور قلبي، كلش مب مفتكرة بالتلوث حددههه بالطقاق،
بس الحيوانات حددهه حرامم اللي قاعد يصير لهم، فوق ال 500 مليون حيوان نافق..!!

ماقدر اوصف كمية الحزن اللي جفته بعيونهم، شلون يجوفون بيتهم وموطنهم وعايلتهم
تحترق جدامهم ومحد يقدر يسوي لهم شي، كمية الخوف اللي فيهم تقطع القلب، وانه اجوف
فيديوهات لهم شلون - الحيوانات اللي بطبيعتها تهرب من الانسان - متمسكة وبشدة بالناس !

حرفيًا الفيديوهات اللي صار لي جمن يوم جايفتهم مب راضية تفارق مخيلتي..
شلون الكنغر يحضن اللي أنقذته ومتعلق فيها !! غير الكوالا المتمسك باللي أنقذه، الدب
اللي يسحّب في ريل الادمي !! غير صور الحيوانات اللي حاضنة بعضها من الخوف، وكمية
اسى ويأس بعينهم، ياتني الصيحححة عليهم بصراحةة ..

الحيوانات عندها رحمة، عندها قلب، عندها احساس.. والاكثر من جي
ان لا حول لها ولا قوة، اذا انحرق موطنها وين تروح، شلون تنقذ نفسها، الانسان بيطلع
بيهاجر، بجوف له حل من تحت الارض، هالحيوانات المسكينة ظلت تعيش حالة خوف، هلع
حزن بشكل مب طبيعي، جفت صورة لكنغر ركض عن موضع الحريق مع امه، لما ابتعدوا
عنها طاحت امه، قام يتفقدها.. يقعدها.. يتأكد انها حية.. ويوم قامت، حضنها !!!! احساسي
تجاههم ماقدر اوصفه بتاتًا، كل ماجوف صورة لهم اقول سبحان اللي انزل فيهم مشاعر نفتقدها
في كثير من عينات البشر ..


يس نفتقدها وبشدة في ناس شكثر، ماقررت اييب طاري هالموضوع الا عقب
ماجفت انسان حقير، مايستحق اسم انسان يعذب قطو بالمكرويف، يخيي الفيد قطعع قلبي
بمعنى الكلمة حقير !! تخيلوا بس، دخل القطو ف المكرويف وشغله عليه، وقام القطو يطق
باب المكرويف يحاول يطلع !! عسى يده الكسر ان شاء الله، والله حراممم عليه، شفيهم الناس ؟؟
استخفوا وقعدوا لنا، والله مينن، كل يوم اجوف ناس اسوأ من اللي قبلها !!

صج صج شهالحقارة، شهالقلوب القاسية.. ؟ لهالدرجة الأرواح رخيصة بيدهم !!
الله لا يحجّر قلبي مثل ما قلوبهم حجر ولا يبليني بما بلاهم، حرق دمي وانه اجوف الفيد
حتى ماقدرت اكمله، عباله يضحك.. سخافةةة، حدي اتمنى يصيدونه ويسجننونه ويعذبونه
نفس ماعذب هالمخلوق الضعيف! ​