كان يومًا مهيبًا .. تقلّدتُ وسام الشرف للنزول من سيارتنا مُتوجهةً وسط ازدحامٍ
شديد لتلك البقعة الطاهرة، هل بإمكاني تسميتها بالبقعة X ؟ لا تؤاخذني عزيزي القارئ
فلا يمكنني ذكر تلك البقعة حتى.. لقد حتّم القدر عليّ أن أكتب حروفًا لا يسعكم فهمها ..
لنعُد لصلب الموضوع، كنتُ صغيرةً جدًا لأدرك ماهيّة اليوم الذي كنتُ اعيشه
وكبر حجم تلك البقعة لدى الجميع، كنتُ صغيرةً بما يكفي للشعور بالحماس ازاء الوصول
اليها بينما الكثير من المركبات تحوّط تلك البقعة ..
كان يومًا صاخبًا ، لكنه صخبٌ محمود .. كانت البسمة تعتصر وجوه الجميع !
قضينا يومًا ممتعًا بفضل تلك البقعة، فقد قدمت لنا الطعام، وسائل الراحة، المسابقات
والكثير من الوقت الجيد... أعلم ما يتبادر في ذهنك الآن، كيف يمكن لبقعةٍ ما أن تعمل عمل
المطعم والمنزل والمهرجانات والمسرح والملعب في آنٍ واحد ! أنا أيضًا لا أعلم، ولكنها فعلت كل ذلك ..
بعد قضاء وقتٍ بسيط، كان علينا العودة، وقد كانت تلك الزيارة الاولى والاخيرة بالنسبة الي ..
لا اعلم ان كان عليّ أن احمد الله واشكره لكونها الاخيرة أم كان علي الحُزن، فالبقعة x لم تعد
كما كانت.. اصبحت لا تقدم الكثير بل على العكس، فقد اخذت الكثير والكثير أيضًا !
ولكن الغريب هو حب الناس اليها، رغم انها قد خدعتهم وسرقت مالا يمكن تعويضه منهم..
لا يزالون يتوقون لمقابلة تلك البقعة.. رغم ما بثته من رعبٍ لديهم، لا يزالون يرابطون
للوصول اليها ، ببساطة كنتُ طفلةً لاستطيع فهم المجريات ..
ها أنا وقد كبُرت اخبرني احدهم بفخر بأن من يقرب اليه شارك في تحويل البقعة x
الى ماهي عليه الآن .. وقد صنع المئات من البقعة x وهو بطل !!!
حينها ادركت ان السمكة لا يمكنها الخروج من قاع البحر وإلا فقد غرقت ! ذلك
هو الغرق الحقيقي ، أنا فقط اردتُ اخبار البعض كم من الغباء يحملونه في رؤوسهم ... و... كانت تلك ثرثرة لا طائل منها، ولن اقوم باكمال القصة ... الى اللقاء
الكورس اللي طاف كان وايدد متعبب ..!! بشكل مب طبيعي، بحكم ان احنا توجيهي .. وبنتخرج من المدرسةة خلاص .. ولازم يضغطونا بالمشاريع والدراسة وكل شيي، اول مراحل الضغط كانت بالمشاريع اللي ماتخلص والامتحانات التجريبية - مادري من هالغبي اللي حط هالفكرة الخايسة - " امتحانات مالها داعي تضييع حصص وماعليها درجات واجبارية :/ " ، وعقب انضغطنا في الدراسة فمثلًا الكيم " كيمياء " درسنا نص الكتاب في يوم واحد متخيلييينننن ؟؟!!!!! من كثر ما الحصص ضاعوا في سخافة المشاريع والامتحانات .. واضطرينا نمشّي للمعلمة حتى لو مب فاهمين، اهم شي نخلص المنهج الطويييلللل !!
خل اسولف لكم عن المشاريع مالتنا .. كان عندنا مشروعينن كبااارر ويبي لهم شغلل وفلوووس، معرضينن متخيلين ؟؟ احنا نهتم بالمعرض من الالف للياء، وواحد من هالمعارض - معرض الكيم والحيا " احياء " - على مستوى مدارس البحرين وبحضور من الوزارة وبنات من مدارس ثانيههه !!! اقدر اقول انيي خلصصصتتت ؟؟ متتت ؟؟ انتهيتتت ؟؟ حتى ان المعارض مكلفههه جدًاا جدًاا، تخيلوا تكلفة المعرضين مع بعض 742.74 $ !! تخيلوا عاد .. صفنا بروحه دفع هالمبلغ !! لا بالاصح انه وربعي دفعنا 185.69 $ اضافة للمبلغ اللي فوق اللي دفعناه مع بنات الصف ! صج صج انهلكنا بالشغل، لا هو من ترتيب المعارض، لا هو من المحتوى اللي نقدمه، لا هو من التوزيعات، لا هو من الشرح والوقفة، لا هو من تجميع الفلوس، لان تمينا نبيع كل يوم في الفسحتين عشان نيمع الفلوس، تخيلوا انه حملت كيمرتي الفورية وقمت اصور الاوادم بفلوس وكانوا ايون لي وايدد .. بصراحة ربحتتت يبي لي ابيع عليهم المرة الياية واخذ الفلوس حقي
ايضًا من الاشياء اللي خلت الكورس اللي طاف جدًا مرهق، كوني لاول مرة ادرس لكل اختبار قبل كنت ما ادرس لكل الاختبارات واقدم البعض بدون دراسه في البيت احفظ سريع قبل الاختبار او اخذ الاسئلة من الصفوف الثانيه واحفظ اجوبتها اما هالكورس شديت حيلي وايد، ودرس للمنتصف والنهائي قبلل بمدددههه وهذي بعد اول مرة اسويها !
النتيجة النهائيةة؟ نزل معدلي التراكمي اربع بوينتات، وصرت 94.7، وهاي الشي سبب لي خيبة املل كبييرررةةة !! لان ع التعب والدراسة والشغل اللي اشتغلته هالكورس احس حرام انزلل !! تضايقتت وايد في البدايهه وصحتت بعدد اول ماعرفت النتيجة، خصوصًا ان امتحانين بس خربوا عليّ ونزلوني اما الباقي كل شي اوكي .. وهالامتحانين كانو صعبيييييننننن اوردي الكل مخبص فيهم، بس انه انقهرت لان ع دراستي طول الكورس ماستحق هالدرجات .. ،.
تميت طول الاجازة حاسة بنكد واحس مالها طعم، خصوصًا ان كان طموحي اتخرج ب 95 وانه نزلت عنها، ولكن تقوى ستوب .. هذي مب نهاية العالم !! ان شاء الله الكورس الياي ارجع 95 واستانس واطير من الفرحهه وايي اكتب لكم اهني ، لكن آنه اليووممم واييددددد وايد وايد مستانسههه ق8ق8ق8 .. يومي ابتدى بشكل ممل ورتيييببب جدًا، لكن كمّل بطريقة خلتنيي اطيييرر من السعادهه .. باقولكم سمعوا نصايح @SKY NET ما بتندموت والله صج الواحد لي متى ينطر هدايا من الناس؟؟ الواحد لازم يكافئ روحه بروحهه .. فكافأت روحي امس مكافأة صغيرة بس خلت امس يصير كيوت شوي، اما اليوم فكملت هديتي ق8ق8 ، يبت لي هدية عودة ومب صغيررهه بعدد واستاهل عقب التعب اللي تعبته في الكورس اللي طاف نص 1
طبعًا امس رحنا نتسوق وهلون، امي كانت تاخذ لخواتي اغراض المدرسهه .. آنه ماكان عندي حماس لها بحكم ان شي اسمه مدرسهه حطمنني وايدد .. لكن قلت ليش ما ابتدي الكورس الياي بشي يديد - وهذي آنه ماسويها كل سنة لان ماله داعي - بس هالسنة سويتها خصوصًا انها اخر سنة لي، قمت واشتريت لي شنطة يديدة، مطّارة ماي مثل اليهالو باموووتتت حق اشرب ماي لان وايد اتكيسل اروح اصب لي كل شوي بععد يبت لي سويرة على حجر كريم عشان اكشخ فيها للمدرسهه ق8ق8 ، وطبعًا اخذت على حجر السترين لان اهوا الحجر مال شهري " نوفمبر " ! ولي جولة اخرى ان شاء الله في شراء جوتي يديد ، وبافلس بيتنا
اما عاددد اليووممم تخيلوو شنو طلبت لي طلبت لي سمارت ووتش خصوصًا ان خاطرررييي فيها من زماننن .. طلبت لي ساعة Fitbit versa 2 ، واسبوع وتوصل ان شاء الله ق8ق8ق8 ، حددددييي متحمسههه لهاا .. بس توصل باصورها لكم ع الطبيعيةة
وتبعًااا آخر شيي .. تحولنا لووتر ميلوونن كاملليننن والكامل الله ??ر1?
* ،
وايدد انقهرر لما اعطي شخص اغراضي واامنه عليهم .. ويخربهمم ع الآخر !! عندي تابلت رسم ماستخدمه بس مخليته لي احتياط ، وبين فترة للثانية يصير خاطري ابطله.. عطيته آدمية بكوارتينه، يديييدد .. حتى المغلفات عليه ! عشان ترسم فيه وترده لي..
وترا آنه عندي طبع.. الاجهزة ماقط كوارتينهم، واحتفظ حتى بقراطيسهم.. واحب اجوفهم ع طول نظاف ويدد مثل ماشريتهم اول مرة، بلا مبالغة البنية ردت لي التابلت كل الكوارتين الصغار اللي داخل الكارتون الاصلي مخفسة ومقعود عليها، وتعرفون اللي ماتنصك لان مختربة ؟؟ والوايرات اللي معا التابلت حتى مب ملفوفة والتابلت فيه قلمين، ردته لي بقلم واحد !!!! والاغراض مب في اماكنها الصح !
السيدي مال الدرايفر حاطته داخل الكارتون جي مقطوط بدون الجيسه مالته ومب في مكانه .. ماعرف هالناس من وين لهم ضمير ؟؟؟ شي عندج امانة تعفسينه هلونن ؟؟ وايدددد بطت جبدي بصراحةة، اعتبرها قلة ادب وذوق بعد ..
عبالكم بلعتها حامضةة ؟؟ قلت لها شله الكارتون جي ؟؟ تسوي اختها قعدت ع الكارتون ! اغراض التابلت شله جي ؟؟ " ماعرف " وتضحك !!!! تعرفون اللي وعي شهالاوادم ؟؟ ياتني الصيحة ع اغراضي ، بس والله انه الحمارة اللي عطيتها ..
المشكلة انها حتى شكرا ماقالت .. وتسوي اذا احتجته المرة الياية باخذه .. اقول في نفسي طل بعينج تاخذينه .. وعي صج شهالاوادم اللي ماتستحي !!
افلام الرعب نقدر نقول .. مالها اي هدف بالحياة؟؟ ولا مرة جفت فلم رعب وحسيت ان فلللم .. قصصة .. شي يستاهل يتطالع، يس من شوي خلصت فلم عندي اياه من زماااننن وماجفته من قبل NOTHING LEFT TO FEAR ~
مثل ماقلت، لما خلصت الفلم اول سؤال يه في بالي .. آنه احين شنو استفدت ؟؟ بامووت يعني في اشياء نجوفها، نحس ان منها فايدة .. هذي بس خرعتني شوي وخلتني اتحمس اعرف شقاعد يصير، وكان صج حماس وعجبني الوضع .. بس بالنهاية .. شنو ؟؟؟؟ واتتت ؟؟ حددههه وآتتت !!! صج احس ضيعت وقتتيي ..
- فيه حرق للفلم -
اممم اقدر اقول ان الفلم حلوو وممتع، يصلح يتطالع نص الليل عشان ماترقدون بس يعني الفلم كله ع بعضه شي يقهر، اوكي كل مرة يدعون عائلة ويختارون شخص منها عشان يقتل عائلته وواحد منهم بس يتم، واللي يتم يبتدي نفس الجريمة بعايلة ثانية ، وهو كومبليتلي متحكمين فيه وهكذا .. انزين انه شنو استفدت !!
احس افلام الرعب ينقصها الهدف والعبرة منها .. احس مايمنع ان اخاف وبنفس الوقت استفيد من الشي اللي قاع اجوفه .. صح ؟ يس استفدت ان آنه خفت بس بعد اوكي مب لازم استفيد ليش السالفة كل شوي تنعاددد !!! ليش مايخلون الفلم عبارة عن SURVIVAL ستوري للعائلة من اللي قاعد يصيررر .. ان نكتشف صج شنو قاعد يصير، ولا مرة جفت فلم رعب له تفسير بليييز عاد ادري ان خيال ، بس ليش شي مبهم، خلص الفلم وفهمت شنو صار لهالعائلة المسكينة وعقب يات عائلة ثانية عشان تواجه نفس المصير وخلص الفلم .. انزينننن ! آنه ابي افهم شقاعد يصير اكثر .. مابي يخلص الفلم وآنه اقول قهههررر شلون صارت البنية هلون، ومافيه شي يوقفهم وووو...
خلوا نهاية سعيدة انزييينننن .. اوف واضح ان منبطة جبدي، وهاي مب اول مرة اجوف فلم رعب من هالنوع .. اوكي الكلام اللي قلته كله فاضي باي
لا امزح مب باي .. آنه قلت لكم براويكم ساعتي بس توصل، الزبده ان وصلت من زمان وماراويتكم < جفتوا شلون نطيت في سالفة ثانيهه
طبعًا اول شي، آنه طلبتها وشحنوها لي على POSTAPLUS ، طبعًا آنه كل الاوردرات اللي اسويهم الشحن يكون على ارامكس ف استغربت من اسم الشركة، بالنسبة لي شركة يديدة، فلازم اروح اسوي سيرج، لما بحثت عنها جفت انها شركة سيييييئئئئةةةة جدًا جدًا، - فاصل، اشكر من هذا المنبر @SKY NET ع الموقع الرهيب اللي يحفظ الردود من شوي قلبي طاح لان عقب كل هالكلام اللي كتبته الصفحة بالغلط انصكت وكنت بموت -
المهم نرجع لسالفتنا، حرفيًا ولا كومنت عنهم زين ويمدحون فيهم، رحت اكاونتاتهم في السوشال ميديا كلها سب وناس تتذمر وتقول آخر تعامل وهلون، فخفتتت حدييي ع ساعتي خصوصًا اني مستانسة عليها وكان خاطري فيها من زمااااننن .. الموهييم .. قمت اراقب شحنتي من التراكينق نمبر جفتهم مطوولييين والابديت ماينزل الا بعد سنننةة، يعني مقارنةً بارامكس يتاخروننن وايددد، عقب رحت اكاونتهم ع الانستا وزفيييتهمم زف ع التأخير، لان تخيلو تمت في التخليص الجمركي من الساعة عشر الصبح لي يوم ثاني ؟؟؟ اعنبوووو، ساعة ماتاخذ، والله كل شحناتي اللي على ارامكس التخليص ماياخذ ساعة ودايركت يطلع لي ان اوت فور ديلفري ويتصلون لي ان بيوصلون الشحنة ..
المهم عقب مازفيتهم قعدوا يقولون عزيزتي تقوى، ناسف ع التاخير ومادري شنو والمهم ان الزفة فادت ووصلوها يوم ثاني مباشرة وبس والله هذي سالفتي البيض
أحيانًا أحس بألم شديد في معدتي لدرجة ماقدر اتحرك واقوم.. واهملت هاي الشي لفترة! قعدت أقول من الاكل الحار، لاني ما شاء الله عليّ اقطع علوب الفلفل - ماعرف اشرح شنو يعني علب- ولكن قصدي فلفل اخضر اللي يكون طويل وحارررر، اقطعه واكله مع العيش.. وماقدر ما اكل الشي حار.. كل شي اترسه بدون مبالغة فلفل بالنسبة لي شي اساسي في لذة الاكل ..
لما حسيت ان الوضع طلع عن حده، لدرجة اني رحت المستشفى عدة مرات الطوارئ وحطوا عليّ سيلان وماكان قاعد يخف، ومايخف الا بالنوم.. واحس بحرارة شديدة واحيانًا الم في الصدر يمتد لي الظهر وضيق تنفس - لدرجة قمت اشك ان فيني مرض من امراض القلب - فقررت اروح كـ موعد مب في الطوارئ واجوف شنو فيني ..
طبعًا الدكتورة ماقالت لي اي شي مفيد .. غير ان ابتعدي عن الحار وجي، وسوت لي تحليل شامل للدم، طبعًا سمعت نصيحتها لفترة وابتعدت عن الحار وفعلًا وقّف، والم المعدة صار اييني بشكل اخف، وهاي الشي خلاني اهمل سالفة اني اروح للنتيجة وطنشت نتيجة التحليل اقوى تطنيش وعشت حياتي الطبيعية ومرر وقتتت طويل، مب هيّن !
بعدها بفترة امي خذت لي موعد وراحت جافت النتيجة بدوني في فترة آنه في المدرسة ولما آنه رجعت البيت، استقبلتني امي بخبر حدهه نايس ان فيني جرثومة المعدة :/ وان العلاج ممكن يطول ولازم ما اهمل هالمشكلة بتاتًا، لان ممكن تتفاقم وتسبب لا سمح الله امراض خطيرة.. فأخذت موعد ع أساس نحدد مع الدكتورة خطة العلاج وجي، وطبعًا الدكتورة جرحتني
حسيتها اهانة شقصدها يعنني تسوي لي انتي المفروض احولج ع قسم اليهال بس اذا حولتج بيردون يحولونج ع الكبار بسبب العمر باصيييححح، كله من طولي ووزني تخيلوا طولي 150 ووزني 42 يعني جني ياهللل بس احس جرحتني شوي يضحككككككك
المهمم.. الدكتورة كانت مترددة من العلاج، تقول يمكن اذا وصفت لي الدوا ما اتحمله عشان جي تبي تحولني لقسم اليهال وفعلًا الدوا وايدددد متعببب، حتى ابوي يقول لي وقفيه يمكن مايناسبج - ع كيفه ابوي مسوي دكتور - يعني تخيلوا احس وايددد ..
8 حبات باليوم !!! وطبعًا توني مبدية الحبوب من اليوم، يعني اربع الصبح واربع بالليل تخيلوا شربت الصبح ياتني الزوعة وكانت عندنا رحلة، يعني مودي صار خايسسس وبطنييي قامم يعورنييي عدل ، وعقب لاحظت ان دقات قلبي مب منتظمة، يعني تيخلوا بدون لا اسوي اي جهد وصلت 131 وآنه قاعدة مرتاحة، طبعًا الرينج الطبيعي من 60 لي 100 قريت فالنت، فهاي فوق الطبيعي ، وصج صج قمت احس ان قلبي يعورني احس يضحك وآنه اقول قلبي يعورني بس صج يعنيي .. مادري الدكتورة ماتفهم ولا الخلل فيني، ولا هاي طبيعي وآنه دراما كوين
المشكلة شنو آنه عندي الساعة تقيس النبض لاه؟ وطول الوقت اقعد اطالع، تسوي لي امي .. فصخيها هذي بتسبب لج عقدة نفسيه بس ترا دقيقة تطلع لكم بالض انصحكم فيها عشان تييكم عقده كل شوي تطالعون، والله قمت اطالع النبض بدل الوقت
هاي كان حزتها في الرحلةة ، بالنسبة لي كان وقتتت حدهه عصيب والله كفاية انها الرحلة الثانية من تاريخ دخولي للمدرسة واحين بتخرج، يعني الواحد يبي يستانس .. شدعوة يتنكد عليههه !!!
المهم .. تقوى حياتي شنو استفدنا من هالقصة ؟ ماعرف شنو سبب جرثومة المعدة الي فيني، لكن من الاسباب الرئيسية اكل المطاعم وهم تنتقل من الناس اللي حولكم لما يعاطسون بويهكم مثلا ، تاكلون بنفس القفشة او الصحن يعني انه من دريت ان فيني سويت لروحي عزل قمت اكل بصحن بروحي وهلون، عشان بس لا اعدي احد .. وبس يعني اهتموا بعمركم لا تتمرمطون مثلي .. ق8ق8ق8
بدأت الحكاية مذ كانت الحياة عبارةً عن أقوايلٍ للكبار، مذ كان تصورنا للعالم مبنيًا
على ما يتم بثّه في عقولنا، بالضبط .. في تلك النقطة ! كنتُ أعيش صراع البقاء بين
مجموعةٍ من الأفكار المتناقضة، كلٌ منها يحاول الانقضاض عليّ بينما أقفُ حائرةً بين
ما يجب أن أصدقه وما يجب أن أدحضه !
بالطبع، لم أستمر في تلك الدوّامةِ مطولًا، فليس على الطفل إلا تصديق
محيطه، هكذا تقتضي الفطرة.. الابن يتعلم من والده، وماوكلي يتعلم من الحيوانات،
كلٌّ والبيئة التي تحتضنه، لذا لا ألوم أؤلئك الذين علقوا في وحل الوهم ..
-
" فِلمٌ سينمائي "
طفولتي دُفِنت في شريط أحد الافلام قديمةِ الطراز، فلم أكن أعيش
كما هي الحياة في كُتبنا الوطنية، بالاحرى كانت الكتب هي من تصوّر الفلم السينمائي
أما واقعنا فهو لا يزال واقعًا .. فقط كان الوهم يسيطر على الجميع حتى ظننا العكس !
ذات مرةٍ ، ذهبتُ كما عادتي للمتجر القريب من منزلنا..
لكنّ سيارات الشرطة تحوّطه من كل جانب، لم أستطع الدخول، وعدتُ للمنزل...
وكيف انتقلتُ لهذه القصة ولم أذكُر جارنا الشرطيّ !! ما ان اراه يرتدي زي العمل حتى أهرع
للمنزل موصدةً الباب بقوة شديدة..
لا افهم خوفي غير المبرر، حتى أنني قد ذهبت لعدة رحلاتٍ للاطفاء والشرطة
وعدة محاضراتٍ عن مراكز الطوارئ، وحظيتُ بالتوعية الكافية بخصوص كونهم موجودين لحمايتنا
في المقام الاول، ولكن كنت لا أزالُ أشعر بالخوف بمجرد رؤيتهم !
مرّت السنين .. وذاك الخوفُ لا يزال يرافقني، ولكنه وصل لذروته في سنين نضجي
الأولى !! أدركتُ أن الرعب الذي كان ينتابني لم يكن عبثًا، وأنا فقط أحلم في شرطة الكتب والأفلام..
لا الموجودة في عالمنا القبيح هذا ! عمومًا القصة مبتورةٌ عند هذا الحد ولن أكملها، وداعًا !
اقولكم عاد هالايام .. الدنيا صايرة ملل وآنه احسني صايرة نفسيةة بزيااادههه وكلش مب عاجبني وضعي، يعني مادري شفيني صج كله منفسةة ومتضايقه ومالي خلق احد.. حتى ربعي اليوم يقولون لي خل نطلع نروح مكان وجي، قلت لهم ان لا ، وتموا يحاولون معاي فعصبت عليهم
يمكن حتى انتو لاحظتوا هالشي فيني المهمم .. اقولكم عاد .. وسط هالملل ، إليكم اهم الاحداث اللي صارتت لي بهالفترة عندي تحلطممم وايددد
- السالفة الاولى -
ياجماعة هذي السالفة قلتها لعشرين الف شخص .. وكل ماقولها انقههررر اقولكم عاد صارلنا سنيييننن نتعامل مع افشل شركة اتصالات عرفها التاريخ، وساكتين عنهم، وتعتبر اغلى وحدة بعد .. يعني فوق شينهم قوات عينهم، خل اقولكم شصار ..
انه مشتركة بباقة سعرها 6 دينار و 300 فلس حلو ؟؟ تعطيني 6 جيبي نت و 500 دقيقة محلية مجانية حق الاتصالات صراحة ماعرف شنو عن الاس ام اس .. بس مب مهم ، المهم اني شهريا ادفع واموري تمام .. إلى أن أتى اليوم المشؤوم شحنت تلفوني وشغلت الداتا ، واشتغل النت تمام لاقل من دقيقةة وعقب وقف، ما قام يشتغل !!! اكتشفت ان اهما شفطوا الفلوس وصكوها عليّ !!!!
طبعًا .. خل افهمكم النظام، الطبيعي الواحد لما يدفع فلوس اقل من سعر الباقةة ويشغل الداتا تنشفط الفلوس وما يردونها لكم الحراميةة !! لكن آنه مادفعت اقل من سعر الباقةة ، آنه دفعت أكثر من سعر باقتي بمئتين فلس .. يعني دافعة 6 دينار و 500 فلس، لكن الحمير طلعوا مبدلين باقتي من راسهم وخلوها 7 دينار بدون لا يستشيروني او يعطوني اي اشعار، والجلاب تخيلوا .. الفرق بين الستة دينار ونص والسبعة دينار بسسيييططط ، يعني لو يردون المبلغ لاكاونتي وازيد عليه النص دينار ويشغلون الخدمة بامشيها لهم، لكن شنسوي الحمار حمار ، مارضوا يردون لي فلوسي .. حتى تهاوشت وياهم وقلت لهم آنه عندي 5 ارقام ع شركتكم الخايسة، وادفع شهريًا لها مبلغ مب هيّن وباسحب كل ارقامي بحولها ع شركة ثانيةة وظلوا خسروا كستمرز لين ماتسكرون شركتكم
الحمير مب اول مرة يسوونها لعايلتنا، هاي المرة الرابعةة اللي يبوقون من عندنا .. يشفطون الفلوس كلها ويبندون عليك الخدمة، ولا يرضون يرجعون المبلغ اللي ع حسب كلامهم " السستم اوتوماتيك سحبها " ، حتى انقههرررتتت عليهممم حدييي لان مب اول مرة وكله نتغاضى عنهم، حتى قلت لهم انتو اكلوا في فلوس الحرام ليل نهار.. صج صج يبطون الجبد، المشكلة ان الغلط منهم، يعني يالحمير يوم بدلتوا باقتي ل 7 دينار ، ليش ماطرشتوا لي ان بدلتوا الباقةة ، صج صج بوايقةةة !!!!
حصلوا من عندي وايد حسنات ع كثر ماسبيت فيهم عند كل شخص قلت له السالفة المهم ماعلينا منهم.. ع طاري النت، بدلنا البرودباند مال البيت، وصار نتت البيتت عسل عسل عسللل !! سريعععع وانزل لي حلقات 24 ساعة .. والجيبي الحمدلله اييب العافيهه، وفوق كل ذيي في الويكند النت غير محدود عشان اطالع مسلسلاتي وسرعته ماتقل بعددد ..
- السالفة الثانيةة -
مب آنه قلت لكم ان المضادات كنت احسها قوية علي ؟؟ عاد صج صج هالاحساس طلع في محله، في ثاني يوم من استخدامي لهالمضادات تعبتتت وايددد .. احس تأثير المضادات صار مضاعفف عدل في جسمي ، لاني ملاحظة ان التأثير مالهم مايروح في ساعة ولا ساعتين، صجج صج يتم طول اليوم، فجني شاربةة وايدد حبوب..
المهم، اقولكم صادني رجفةة وماقدر اتنفس وراسي يدور ودقات قلبي صارت فوووققق يعني تخيلوا وصلت 177 ، وانتو مستوعبين ان الطبيعي في الثمانين وان مايزيد عن 100، فكانت دقات قلبي peak لمدة دقيقة و cardio دقيقتين ، و fat burn طول اليوم !! طبعًا كل ذي وآنه قاعدة ع الكرسي يعني مب مسويهه اي جهددد .. وهذي التقسيمات اللي قلتها لكم كلها تقسيمات فوق الطبيعي يعني تصير تحت الجهد.. عشان تفهمون اكثر القوا نظرة اهني- هُنا -
طبعًا حزتها رديت البيت، بس الشي اللي بط جبديي برود المشرفاتت !!! يعني انه قاعدة اقول هالسالفة بس عشان اتحلطم والله صجج ، شهالمشرفات الخرا، تخيلوا ابوي في الدوام ودوامه وايدد بعيد عن المدرسة ومايقدر يطلع بما انه يدرّس ، والوحيد اللي يقدر ياخذني اخوي، عمره 20 والعمر المسموح فيه 21 ! عشان سنةة وحدةة بسس مب راضيين ايي ياخذني، وانتو مستوعبين ان مدرستنا مافيها ممرضة وفوق ذي كله حالتي كانت تستدعي الاسعاف، لولا لطف الله في ذاك الوقت بسس !! يعني حتى يوم طلعت من المدرسة ، رحت دايركت الطوارئ ع الدكتورة واهيا بنفسها عصبت، تسوي شهالمشرفات اللي مايعرفون يتصرفون ..
اقولكم وحدة من المشرفات بطتتت جبدييي، تسوي لي لا تثقون بالاجهزة الالكترونية ومب راضية تطلعني، عبالها ان آنه رحت عقب ماجفت دقات قلبي ع الساعة، آنه حرفيًا كنت مب قادرة امشي عشان اروح للادارة ورايحة لها بويل جير ! صج لو كان لي خلقها بذاك الوقت جان تهاوشت خصوصا ان هالمشرفة بالذات ماطيقهااا، شغلها كله يمشي بالواسطات.. صج حمارة !
المهم ماعلينا من هالخايسة خل ننتقل لموضوع آخر .. واهوا اني ودي امسح هالسالفة من حياتي والله صج الكل قعد يحسسني اني بموت وماعرف شنو ، يعني تخيلوا وحدة يت لي تقول لي احنا مانترك بنات صفنا ؟؟؟ امبيههه صججج ، يعني الكل قام يعاملني غيييررر وحديي مب حابهه هالشغلةة، وخصوصًا ان الدكتورة حولتني ع اختصاصي وصارت لي مواعيد ، فتقريبا هالاسبوع متوزع بين غايبة او اداوم نص اليوم، فيمكن البنات عبالهم فيني شي قوي اسم الله علي صج تخيلوا حتى مشرفتنا الاداريةة - مب تابعة للاشراف الخايس اللي سولفت فيه فوق ، ذاك اشراف اجتماعي اما هذي ادارية - المهم تخيلوا ربعي يقولون لي ان مشرفتنا كانت تمسح ع راسي نفس الجلب باموووتتتت تخيلوا اني حزتها ماحسييييتتتتتت ان فيه احد يمسح ع راسي اقولكم مسكينة من هالسالفة كل يوم تيي تسأل عني وربعي الاغبياء كانو يصيحون يقولون خرعتينا احس تعرفون شنو ؟ ودي اختفيييي .. ماحببب هالشعورررر !!!! صج صج صج كاارهةة حياتي، احس حتى لو بموت بموت بصمت مب جدام احد ، لان ينتشر الشي بسرعة والكل يحسسني اني مسكينة
- السالفةة الثالثةة -
السالفةة الاخيرةة اللي مب للبيع تخيلوا قبل جمن يوم، بطلت دريشة - نافذة - حجرتي ، جان اجوف عش غير مكتمل ع الجدار مال الدريشة يعني اغصان ميمعة وجفت الحمامة قاعدة تلقط اغصان شكلها بتولد قصدي بتبيض عاد اختكم بالله ماتتتتتتت ع الكياتههه هذييي ق8ق8ق8ق8ق8 وقمت كل شوي اطل عليها ..
عاد تخيلوا راحت الحماممةةة والاغصان بقتتت محلها ! ومرت الايام والعش غير مكتمل جان اقول لامي بالسالفةة جان تقولي ان اكيد الحمامة اكتشفت انج جفتيها فغيرت مكانها، عشان لا تاخذين بيضها ، تسوي لي ترا الحمام مب غبي المهم .. تضايقتتتت ! وكل يوم اطل ع العش الغير مكتمل وينكسر قلبيي
ومرة من المرات اختي تسوي لي، اسمع صوت الحمامة عند الدريشة، وفعلًا كانت فيه حمامة قمت طليت الا واجوف مافيه ولا غصن عند الدريشةة تخيلوا كنت بموت يعني طلعت كانت قاعدة تلقط الاغصان عان تسوي لها عش بمكان ثاني
جان تخيلوا اليوم الصبح كان عندي موعد، ومارحت المدرسةة من وقت، جان اسمع صوت طق طق عند الدريشة قمت طلييتتت جان اجووووف الحمامممةةة ق8ق8ق8ق8 وتخيلوا فيه اغصاننن وايددددد عند الدريشةة ف.. ياررببب تكمل عشها يارب تكمل عشها ، يارب تكمل عشهااا وبس والله هذي سالفتي الخطيره اللي مب للبيع نراكم في سوالف بيض اخرى
اليوم وآنه افرفر في السناب.. جفت خالتي مصورة ولدها ماكل من " ماك " بحكم ان لحومهم حرام ومسوية له ارهاب والله صج كسررر خاطرييي .. مخليته يصلي ويستغفر .. ماعرف اذا هالشي يجوز ولا لا حقيقةً ، بس اللي فهمته ان الصبي مسكييييننن خايفففف .. وقاعد يستغفر وفيه الصيحةة كسسررر خاطرييي ..
حلو ان الواحد يعلم عياله الشي الصح من الغلط، بس اجوف ياهل بهالعمر توه في " الروضة " ماله داعي يتم ترهيبه وتخويفه هالكثر وخصوصًا في الامور الدينية، لان نتيجتها شخص معقد وهالشخص المعقد أول ما يتفتح ع الدنيا ، ويتحرر من سلطة امه وابوه بيفسق وهاي شي جفته بعييننيييييي ..!! غير الشخص المتربي بأساليب صح وعن قناعععةة ، والله صج أهم شي القناعة في الدين..
اعرف ناس، امهم وابوهم حارمين عيالهم من كل شي حتى انهم يطالعون رسوم في التلفزيون - بعد مب مسلسلات - ممنووعععععع ! متخيلين طفولتهم بس على مسلسلات الانبياء بس ؟؟ بنتهم لين ماتزوجت ماعندها تلفون، يلبسونها عباية كتف فوقها عباية راس ، وغشواية - للي مايعرف شنو الغشواية اهيا شي مثل النقاب، لكن الفرق ان الغشواية مافيها فتحة للعين - وفوقها يلبسونها قفازات ودلاغات !! يخي هذي الانسانة لما تزوجت .. حست روحها توها طالعة ع الدنيا، قامت تسوي اشياء غبييةةة، وتتصرف مثل اليهال جنها أول مرة تجوف تلفون لمس، قامت تلعب فيه بشكل يفشللل ..!
هاي البنيةة كانت تلبس هاللبس رغم صغر سنها، فكانوا زميلاتها بالمدرسة يتنمرون عليها، وفوق جي، اهيا قامت تفصخ الغشوايةة من ورا اهلها، تعرفون ليش ؟؟ لان اللي قاعدة تسويهه بلا قناعةة، آنه الحمدلله اللي انولدت في عايلةة متفتحة نوعًا ما لكن مب صايعة، فاقنعوني بالحجاب بشكل جميل، وحجابي على أكمل وجه والحمدلله ماتخيلني بيوم من الايام افصخه
والله صج هالناس ماعرف وين بروحون من الله، لان عيالهم امانةة وقاعدين يعقدونهم، اصلا مب بس يسوونهم معقدين، ذلين مب بعيد عنهم يطلعون عن الدين أصلًا .. الحمدلله والشكر !
* ،
هالاسبوع كان متعب متعب متعب بشكل مب طبيعي ..!! اختبارات طول الاسبوع ومافيه فجات بينهم، غير جي الاسبوع الياي بعد بطوله كله اختبارات والاسبوع اللي بعده مباشرة امتحانات وطنية وبعدها بجم يوم منتصف وبعد المنتصف باسبوع نهائي، وجي أقدر أقول اني بموتتت ..
طلعت عن صلب اسبوعي، المهم اليوم قعدت من الرقاد إلا وبلاعيمي داقة عليّ وآنه اكره ماعلي البلاعيم لان تمتد للاذون وتكسررر الواحد تكسير وهاي اللي قاعد يصير حاليًا، غير جي .. اليوم كان كله مسخرة، مانتبهت لولا حصةة، كل الحصص بالنسبة لي ماكانت مهمة، وكنت مستينةة آنه وربعي ومسوين ازعاج في الصف
تخيلوا وصل فيني الينون، اني آخذ الالة الحاسبة واكتب فيها رقم واسوي عمري اتصل واسولف وربعي مب مقصرين تصوير .. ولا قعدنا نلعب في نص الحصة " اكبر بالونة من العلوج - علكة - " كل وحدة تنفخ العلج اللي بحلجها واللي تسويه اكبر مساكين المعلمات اليوم، طلع لهم قروووننن منااا ، كل شوي يقولون لنا سكتوا
وعاد اكتمل اليوم السخيف بالجراد .. واهني نتوقف !
ياجماعة الوضع مب طبيعي، كنا طالعين آنه وربعي الفسحة .. الا اسمع بنات يقولون جراد.. يعني ماهتميت ، شنو جراد يعني ؟ عادي .. عقب مشينا شوي، الا نجوف البنات كلمن يطالع فوق ويصارخ ، طالعنا فوق .. إلا السما كلهااااااا جرادددد .. وايد وايد وايد ، غزوو جراد، حتى جفت معلمة طالعت السما وخافت قامت تركض ضحكتني، عمومًا احسههه غضب بصراحة، لان الجراد من يغزو مكان تقرون عليه السلام ، الجراد ياكل الاخضر واليابس !!
عاد تذكرت هالآية .. " فَأَرْسَلْنَا عَلَيْهِمُ الطُّوفَانَ وَالْجَرَادَ وَالْقُمَّلَ وَالضَّفَادِعَ وَالدَّمَ آيَاتٍ مُّفَصَّلَاتٍ فَاسْتَكْبَرُوا وَكَانُوا قَوْمًا مُّجْرِمِينَ (133) "
انتشار فايروس كورونا بشكل كبير قاعد يخرعني، مب انه يوصل للبحرين أو ما شابه ذلك .. لكن اختي ساكنة بمنطقة فيها حالات اصابة بالكورونا وفيه بعضهم توفوا ، والاشد ع قلوبنا انها مب راضية ترجع، تقول الحافظ الله .. اوكي فعلًا الحافظ الله ، بس وآيد يخرع لما يكون عندكم اهل معرضين لخطر الاصابة وتقعدون بس تحاتونهم ..
عمومًا لفتتني تدوينة سكاي عن الكورونا ، وفعلًا آنه عندي اعتقاد مشابه.. لحد يقول عقاب من الله أو بسبب الحيوانات اللي تنأكل، آنه اجوفه شي سياسي أكثر من ماهو مرض منتشر .. عيل شدعوة انتشر في الصين وايران وعاد اهما عدويين امريكا اللدودين وغير ان ترامب وايد يسولف ويصير يعلم الغيب بسالفة الفايروس ذي
غير جي هالفايروس نوع يديد ما كان موجود، بمعنى نوع مطوّر نفسه .. فما استبعد تطويره في المختبرات ! والغريب ان المصابين في ايران ماعمرهم راحوا الصين عشان نقول - انتقل لهم من الصين - ، او يمكن من علاقات ايران مع الصين ؟ بس غريبة يعني ، لو كانت بسبب علاقاتهم، معقولة ايران بتدخل صينيين للدولة بدون لا تفحصهم أو ..؟
المهم، الله يبعدنا وإياكم من الامراض، ومايراوينا في المسلمين سوء أو بأس يارب
.gif "At (138) ه1")
.gif "At (131) قك2")
.gif "At (373) بكا10")
.gif "At (209) ش2")
ق8ق8ق8 ...gif "at1 ق1")
.gif "At (102) ض1")
نص 1.gif "At (419) هي4")
.gif "At (427) حبي8")
طلبت لي سمارت ووتش .gif "At (422) شش7")
ق8ق8ق8 ، حددددييي متحمسههه لهاا .. بس توصل باصورها لكم ع الطبيعيةة .gif "At (91) نص1")
.gif "At (448) ض2")
ق8ق8ق8.gif "At (274) لا00")
تخيلوا كنت بموت