مدونة متألقة Philosophy of Mind (2 زائر)

[The Darkness]

السلام عليكم ورحمة الله وبركاته
شحالكم يا حلوين ؟ عساكم طيبين وبأحسن حال
أول شيء أحب أقولكم منورين عالمي الصغير
واللي إن شاء الله ما ينسحب عليه مثل سابقه
وبالبداية بحط لكم تعريف بسيط عن نفسي للي ما يعرفني

الاسم : خليفة الشحي
تاريخ الميلاد : 12 مارس 1994 - 30 رمضان 1414
الدولة : الإمارات
المدينة : رأس الخيمة
التخصص الدراسي : خريج هندسة كيميائية بدرجة باكلوريوس
^ أحس اني نسيت كل شيء عن التخصص
اللون المفضل : الأسود

هاي معلومات بسيطة عني ولو تبون تعرفون شيء فاسألوني وبجاوب عليكم هنا
وقبل لا أنهي هالرد فما أنسى أشكر الأمورة @Milli على تصميمها الحلو واللطيف لطقم المدونة

 

[The Darkness]

في البداية حاب أتكلم عن الشيء اللي محير الجميع تقريبا وهو لون الإشراف
هو صراحة أنا حاب اللون من أيام ما كان اللون للمراقبين
ومن زاد الضغط علي بسبب الخدمة الوطنية اللي أنا فيها الحين وما صرت أدخل مثل قبل
قررت أنسحب من الرتب لكن بعدها قررت أخفض الرتبة إلى أن يعتدل وضعي
لأنه مثل ما تشوفون فما صرت أسوي شيء وحسيت اللون ما يناسبني ومسؤولياته كثيرة
فقررت أرجع للإشراف وإن شاء الله إذا تحسنت ظروفي برجع مثل قبل وأحسن
وايدين سألوني عن سبب اللون فقلت أجاوب هنا بدل ما أعيد الإجابة لكل شخص
وبس ..~

 

[The Darkness]

في شغلة كنت حاب أتكلم عنها من فترة وكل مرة أنساها والحين تذكرتها
~
مرات أكون داخل التون ويكونوا في أعضاء مكلمينا سواء بالخاص أو بالملف
وما أرد عليهم وها مو معناته اني متعمد هالشيء لأني صراحة مرات ما ألقى وقت أرد عليكم
وأنا ماحب أرد على أحد إذا ما ضمنت اني بقدر أرد عليه من يرجع يكلمني
عشان جيه أنتظر لين أكون متفرغ ووقتها أرد عليكم
هالشيء كان في بالي أقوله من فترة طويلة والحمد لله تذكرته وقلته
عشان ما تاخذون عني فكرة خاطئة واني متعمد أسحب عليكم يوم تكلموني

​

 

[The Darkness]

جذبني موضوع فعالية الأسبوع فقلت أشارك فيه وخاصة اني فاضي الحين
المهم .. أنا بالنت صراحة ماعرف كيف أصف شخصيتي لأن كل شخص يقول لي شيء مختلف
مثلا في ناس تشوف اني طيب وفي ناس تشوف اني لا وفي منهم يشوفوني متكبر
فأنا مو من النوع اللي يحب يتكلم عن نفسه ويمدح نفسه لكن بشكل عام
أن بالنت أكون اجتماعي مع الكل يعني ما أخلي بيني وبين أي أحد ثاني حاجز
يعني عادي أتكلم مع شخص أول مرة أكلمه بحياتي كأني كلمته قبل ونعرف بعض الح...
^ في أحد لاحظ هالشيء فيني ؟
وبحياتي الواقعية أغلب الوقت أكون بغرفتي وعلى اللاب أو طالع بالسيارة أتمشى
لكن يوم أتكلم مع ناس فأكلمهم بشكل طبيعي واكتشفت هالشيء
عن طريق واحد رحت وياه مرة الجامعة يوم ما كان عندي سيارة وها واحد من أهلي
وأول مرة أسير معه وأتكلم معه بشكل عام وهو اللي خبرني عن هالصفة
لأنه قال لي فجأة عيبني شيء فيك وأنا تعجبت شو اللي عجبه فيني الحين
وفجأة يقول لي كلامك معي ما يبين اننا أول مرة نتكلم وكأنك تعرفني من سنين
وقتها قلت في نفسي لا يكون يقول في نفسه اني ثرثار كثير الكلام
بس طلع العكس واني ما حطيت بيني وبينه حاجز فهاي الصفة أشوفها لاحقتني
من الحياة الواقية إلى عالم الشبكية ولاحظت اني أقدر أتأقلم مع أي شخص
في حال شفت شخصيته مناسبة وما عليه كلام فعادي آخذ وأعطي معه بالكلام
أما من حيث الأصدقاء فمحد تقريبا من اللي أعرفهم بحياتي الواقعية أكلمهم بالبرامج
أو أتصل عليه باستمرار إلا من فترة لفترة أما من الأصدقاء اللي بالنت
ففي وايدين أتواصل معهم وبمختلف البرامجو في ناس محددة تعرف عني أشياء
ناس غيرها ما تعرفها [ بالمعنى أقدر أشكي لهم وأنا مرتاح ]
وما عندي مثلهم بالحياة الواقعية فهنا في اختلاف بالثقة نقدر نقول
نوصل لنقطة مهمة وهو شخصيتي وتعاملي مع البنات بشكل عام
في النت عادي بتعامل معهم بكل عفوية وكأنهم خواتي وما بينا حاجز
لكن بالواقع الله يستر ويعتبر إنجاز إذا تكلمت مع بنت وجها لوجه
مع أني درست بجامعة مختلطة لكن للحين مو عارف كيف أتكلم مع بنت فيس تو فيس
أحس بإحراج لدرجة لو تكلمت مع وحدة فمستحيل عيني تجابل عينها أو وجها بشكل عام
لازم أطالع يمين ويسار وفوق وتحت [ خجول لدرجة ما تتصورونها ]
وفي شيء مشترك بشخصيتي سواء هنا بالنت أو بالواقع وهو اني كتوم
يعني لو صار شيء وضايجني فما أبدي لأخد هالشيء إلا للناس المقربة
واللي متعود أشكي لهم وصعبة أني أجرح أحد سواء بالنت أو بالواقع
في ناس عاد تجرح ناس غيرها بالنت لأنهم ما يشوفونهم ولا يعرفنهم
لكن لو بالواقع بيخجلون من نفسهم يقولون حرف واحد من اللي قالوه لهم
سواء بتويتر أو وفيس بوك أوغيرها من البرامج وها تناقض كبير بالشخصية
تبين انك قوي من خلف الشاشة وما تخاف على نفسك من الكلام اللي تقوله
وبالواقع انت جبان وخواف وها شيء أنا عن نفسي ما أحبه والحمد لله اني مو من هالنوعية
وأنا أساسا أكره هالنوعية من البشر وما أحب أتعامل معها سواء بالواقع أو عن طريق النت
وهنا أخلص فقرتي الجميلة ونقدر نقول انها تعريف عن نفسي بنفس الوقت
طبعا شخصيتي بالنت والمنتدى هي وحدة كونهم خلف الشاشة

 

[The Darkness]

في هالزمن هناك عادة لاحظت انتشارها عاد مادري لو أنا بس اللي لاحظ ولا في ناس غيري بعد
هاي العادة صراحة سلبية والمفروض يتم التستر عليها لكن الناس الله يهديها ما تفهم هالشيء
والشيء اللي أقصده هنا هو " المجاهرة بالمعصية "
من دخولي للخدمة تقريبا لاحظت انتشار هاي العادة وحبيت أتكلم عنها عشان أوضح لكم خطرها
لأن اليوم سمعت مجموعة من الشباب الله يهديهم يتكلمون عن شيء من الكبائر
بأسلوب ضحك وفكاهي حيث ان واحد منهم عمل هاي الكبيرة وقعد يحكيها للبقية
والكل في حالة ضحك واللي يقول بسير المكان الفلاني مثلك وبسوي كذا وكذا
ناسين انها من الكبائر وماخذينها على انها مزح واستهبال
والشخص اللي يحكي هالشيء نسى ان الشخص اللي يعمل معصية المفروض يسترها
وما يشيعها بين الناس خوفا من اتباع الناس له وخاصة ان الله نهانا عن هالشيء
يعني بالله عليكم الحين لو أنا مثلا لا سمح الله رحت سويت المعصية اللي قال عني صاحبي
أكيد باخذ اثم كونها معصية وفوق ها كله صاحبي بياخذ اثم مثلي لأنه السبب في اني سويتها
وهاي أدلة على كلامي من القرآن الكريم
" وَلَيَحْمِلُنَّ أَثْقَالَهُمْ وَأَثْقَالًا مَّعَ أَثْقَالِهِمْ ۖ وَلَيُسْأَلُنَّ يَوْمَ الْقِيَامَةِ عَمَّا كَانُوا يَفْتَرُونَ (13) " سورة العنكبوت.
" إِنَّ الَّذِينَ يُحِبُّونَ أَن تَشِيعَ الْفَاحِشَةُ فِي الَّذِينَ آمَنُوا لَهُمْ عَذَابٌ أَلِيمٌ فِي الدُّنْيَا وَالْآخِرَةِ ۚ
وَاللَّهُ يَعْلَمُ وَأَنتُمْ لَا تَعْلَمُونَ (19) " سورة النور.
فأي شخص يرتكب معصية لا سمح الله فالأفضل أن يستتر عليها وما يتكلم عنها
حتى لو كان الكلام عنها بهدف إضحاك الآخرين ففي النهاية هي معصية ولو سواها الشخص الآخر
إثمها بيتضاعف عليك وانت في غنى عن هالشيء فالأفضل ان تتستر عليها وتستغفر ربك
ومحد ينسى ان الله تواب رحيم والرحمة صفة من صفاتهفمهما أخطأنا وكل بني آدم خطاء
فالله تعالى بيعفوا عنا في حال أخلصنا نية التوبة لوجهه الكريم وابتعدنا عن المعصية هذي
حبيت أتكلم عن هالموضوع لأني أتضايق من أشوف ناس تجاهر بالمعاصي اللي تسويها
فحبيت أتكلم عن هالموضوع عشان تتجنبوا هالنوع من الأخطاء وما تقعوا فيها

 

[The Darkness]

سلبيات
في مرات وايدة الشخص يفكر بسلبية ويتضايق بسببها ويفكر بأمور مش ولابد
وكثرة التفكير هذي تخلي مزاجه متعكر طول اليوم لدرجة عادي يأثر هالشيء على الناس اللي حوله
أنا من ضمن هالفئة للأسف فمرات تصير مواقف تعكر مزاجي ومرات أهرب من الواقع بسببها
مع العلم ان الأفكار السلبية تؤثر على الصحة مو بس المزاج
لأنه لو تلاحظون فيوم يتعكر مزاج الشخص فوقتها ما يكون له رغبة بالأكل ومرات تقل ساعات النوم
وهذي الأشياء ضرورية للجسم عشان يقدر يأدي اللي عليه خلال اليوم
مرات الشخص يمر بمواقف صعبة بحياته أو نقول محطات لازم انه يتعداها عشان يكمل حياته
أما انك تبقى واقف عند هذي المحطة بسبب ضعفك وضعف شخصيتك فهذا غلط
صح مرات تكون هذي المحطات صعبة لكن في كلام جميل بالقرآن الكريم
وهل في شيء أجمل من كلام الله
" فَإِنَّ مَعَ الْعُسْرِ يُسْرًا (5) إِنَّ مَعَ الْعُسْرِ يُسْرًا (6) " سورة الشرح.
مهما زادت المصائب فبعدها يأتي الفرج والله أكد على هالشيء بهذي السورة وبسور أخرى بعد
يمكن الفرج يكون من شخص ينسيك مشاكلك أو من موقف جميل ينسيك السلبيات والمواقف
اللي عكرت لك مزاجك فالواحد ما يوقف عند السلبيات ويفقد الامل
لا تنسون انه في ناس بتوقف معكم وفي ناس تحبكم وتخاف عليكم مثل ما يخافون على أهلهم
وأقاربهم وأحباب قلبهم .. مافي شخص وحيد بالدنيا أبدا لازم يكون في شخص على الأقل
يقدرك ويهتم لك وبتلقاه ينشب لك بكل مكان حتى لو اختفيت بيظل يحاول يوصل لك

مريت بأفكار سلبية هالفترة وتضايقت مع اني عادة كل ويكند لازم أطلع مع الأهل حتى أغير جو
بس هالمرة طلعت ومزاجي كان خربان من بدايته لكن الحمد لله تلاشت الأفكار السلبية
فقلت أتكلم عن هالموضوع حتى ما تخلوا الأفكار السلبية تلعب براسكم ولا تنسوا الصلاة والقرآن
لأنهم صراحة راحة كبير للقلب وتخليكم مطمأنين نفسيا وان الدنيا بعدها بخير

 

[The Darkness]

تدوينتي هالمرة تدوينة مميزة بالنسبة لي لأني أبي أشكر إنسانة باكا وطيبة وهي @Bella Manaka
هي بنفسها ما تعرف السبب فعشان جيه قلت بشكرها هنا عشان الكل يعرف السبب
وبنفس الوقت بيكون دعاية لها [ أسوي دعايات بالخفاء ] > طير
يوم الأربعاء صار لي موق خايس وعكر مزاجي لدرجة كان ودي أتعارك مع السبب
ولو تعاركت فوقتها راح يتم فصلي من الدورة اللي أنا فيها لكن الحمد لله قدرت أمسك نفسي
وبقيت منفس طول الوقت وساكت ومنعزل عن البقية لأن نفسيتي تعبانة صراحة وقتها ><
كنا في قاعة اسمها قاعة المشبهات ومن رجعنا الكلاس كنا فاضين تقريبا لمدة 2-3 ساعات
فقلت أدخل التون وأطالع مواضيع فيه وفجأة تذكرت اني كنت ناوي أتابع مدونة مانكا
ففتحت المدونة وقعدت أقرأها وصراحة وبكل أمانة حبيت المدونة وكتابات الخايسة الإجابية
فتحت لي نفسي وقعدت أقرأ صفحتين كاملتين من المقالات الطويلة اللي تكتبها
بس بكل امانة ما مليت منها وحبيت كل حرف فيها .. تدوينات إجابية وتشجع الواحدة ومنها المضحكة
قسما بالله انها عدلت لي مزاجي بالكامل وما توقعت في شيء بيعدل لي مزاجي وقتها
قصص طفولة على عادات وتقاليد ومواضيع ثانية .. مدونة منوعة وجميلة بمعنى الكلمة
أهنيج صراحة على ذوقج الحلو في الكتابة وأشكرج جزيل الشكر على الدفعة الإيجابية
اللي قدمتيها لي بدون ما تعرفين .. أول مرة بحياتي أفكر أدخل مدونة أو موضوع ومزاجي يكون متعكر
وهاي هدية بسيطة مني لج وإن شاء الله تحبينها واستمري بمدونتج يا باكا وربي يكتب لج الخير بحياتج
^ المشكلة ان اختيار الصور كان منها هي + هي اللي صممت لنفسها بدون ما تعرف هالشيء

وعقبال نشوفج زوجة طيبة لرجل طيب > شو تبين أكثر من هالدعاء

 

[The Darkness]

سكر بكر لالالا
طبعا هاي كلمات بسيطة من اغنية خاصة بلعبة من لعب الأطفال واللي كنا نلعبها يوم صغار
اليوم راح أتكلم عن سكرتي اللطيفة الكيوت
سكرتي أنا أسميها سكر فأكيد بناديها سكرتي لأنها خاصة فيني فقط
طبعا الحين الكل بيسأل منو سكر ولو كانت بنت أو حيوان أو جماد ولا شو هي بالضبط
بس من الحين أقولكم انها سر مو لازم تكونون فضوليين وتعرفونها
فأنا بتكلم عنها الحين بتدوينتي كشخصية بشكل عام > من باب الملل قلت اتكلم عنها
ببدأ أوصفها بشكل عام حسب وجهة نظري عن سكرتي
سكرة شخصية طيبة وحبوبة وكتومة وما تحب أحد يتدخل بأمورها الشخصية
ومرات يبالها ضرب لأنها تخلي الواحد يخاف عليها بسبب خياستها
طبعا أنا الفارس النبيل مالها فما أسمح لأحد بالاقتراب منها
^ محد يفكر لو سمحتوا ولا يا ويلكم
مرة اختفت سكرتي من أمامي فتخيلوا شو سويت وقتها
قعدت أطالع انمي درامي حزين > احلف بس انت
صح على طاري اسم سكر ما يا في بالكم كرتون قديم اسمه لوز وسكر ؟
للي حاب يتذكره فهذي شارة البداية حقته

سكر هي الدبدوبة الصغيرة اللي لونها أبيض وبعتبر نفسي لوز لعيونها > طير
ما تلاحظون ان اسم سكر ملائم للدبدوبة البيضة لأن السكر لونه أبيض > طلعت تفكر يعني
أما لوز واللي هو الدبدوب البني فبنفس لون اللز تقريبا > بالله عليك
صح وما انسى اقولكم ان السكر طعمه حلو عكس الملح
^ معلومة خطيرة صح ؟
اووووووووه نسيت أقولكم عن اللعبة اللي تكلمت عنها بالبداية
اللعبة يا طويلي العمر انه اثنين او ثلاثة يغنون اغنية سكر بكر لالالا وبنهاية الاغنية محد فيهم يتحرك
واللي يتحرك هو الخاسر وبالعادة نحدد عقاب للي يخسر > في أحد يبا يلعب معي ؟
واللي حاب يعرف الاغنية فهذي هي

نسيت أكمل الكلام عن سكرتي .. الله يسامحكم خليتوني أنساها والحين بتزعل مني
سكرتي يا سكرتي تراج حلوة والكلام ما يعطيج حقج عشان جيه تكلمت بأمور جانبية
^ محدر يرقع لنفسه هنا
عسى ربي يحفظج وين ما كنتي وشو ما كنتي ويطول بعمرج [ حتى لو كنتي جماد ]
وتراني اغار عليج فلا تفكرين تخونيني ولا ويلج من غضبي وزعلي من الحين اقولج
كنت أبي أهديج هدية بس يكفي ان وجودي أحلى هدية ولا شو تقولين ؟ > طير بس
اللي يقدر يصمم هدية لسكرتي فيرسل لي التصميم على الخاص وبنزله هنا بدون ما أقول لها
^ احلف انت بس

ونقول خلصنا الكلام عن سكرتي الحلوة ونشوفكم بفقرة ثانية قريبا

​

 

[The Darkness]

أكره شعور يمر علي هو يوم أجرح ناس عزيزة على قلبي بدون ما أحس بهذا الشيء
والمشكلة إذا ما كنت أدري شو اللي زعلهم بالضبط وخاصة بوقت يكون فيه مزاجي متعكر
وقتها أقول في نفسي يا ليتني ما تكلمت مع أحد ومزاجي متعكر ومرات كثيرة أتضايق من نفسي زيادة
بسبب هالشيء وأقعد أفكر وأفكر شو سويت وشو قلت وخاصة يوم أسأل الشخص ويقول حصل خير
أو يقول ما يدري شو اللي زعله مني بالضبط .. شعور مو حلو تحس فيه وقتها
وتقعد تدعي على نفسك وهذا الشيء حرام بس يطلع مني لا إراديا مع الأسف
وفوق هذا كله أروح أشغل أغاني حزينة وأنكد على نفسي اليوم كله ><
يلا الحمد لله على كل حال وان شاء الله خير
في أحد مثلي ولا أنا بس اللي يكون جيه يوم يزعل أحد قريب من قلبه ؟

​

 

[The Darkness]

اليوم بديت بهذا الانمي واللي كنت ناوي عليه من شفت البوستر ماله أول ما أعلنوا عنه
لكن وقتها كان وقت نزول الانمي بيكون بشهر 4 من سنة 2019 وأنا شايف الاعلان من سنة 2018
عاد انقهرت وتحمست له لدرجة مو طبيعية لكن مع الاسف الشديد صادف وقت نزوله اني كنت
بالخدمة الوطنية فما يمديني أتابعه وطبعا نسيت عنه مع اني كنت متحمس له لدرجة كبيرة
واليوم وأنا أدطالع الصور اللي بجوالي شفت صورة البوستر حقته وتذكرته وعلى طويل بدأت تحميله
لكن طلع انه للحين ما انتهى وان حلقاته 26 حلقة وموصلين الحين الحلقة 19 أظن
وراح آخذ كل راحتي بمتابعته عشان ما أتحمس وايد كون الانمي للحين ما خلص
طبعا كنت حاس انه بيحتوي على لقطات حزينة من البوستر والقصة مع انه مو مذكور بالتصنيف
ان نوع الانمي درامي وطلع من الحلقة الاولى فيه حدث يوجع القلب وحزين مرة
من الحين أقولكم اني بتكلم عن الانمي حلقة حلقة إن شاء الله وبعلق عليهم هنا بمدونتي
فللي ما يحبون الحرق لا يقرون كلامي أحسن مع اني بحاول أقلل من ذكر الاحداث وبركز ع رايي
قبل لا أنسى فللي حاب يتابع الانمي فاسمه هو : Kimetsu no Yaiba
~
الانمي ككل رسمه عجيب والتحريك حلو وتصنيفه من التصنيفات المفضلة عندي وهي الشياطين
بالحلقة الاولى بيكون تقريبا تعريف بسيط عن حياة البطل يعني راوونا فيها الحياة الصعبة
كيف انهم يوفرون قوت يومهم ببيع الفحم اللي يصنعونه هم والجو بالانمي هو الشتاء
وعدد العايلة شوية كبير وأبوهم متوفي والبطل عنده امه و 3 أخوان + أختين غيره هو
بداية الحلقة كانت عادية لكن بعد ما وصلن للمنتصف ومن رجع الولد من بيع الفحم
شافه واحد من اهالي القرية وخلاه يبيت معه في بيته كونه في عاصفة وصار الليل والجبل خطير
ومن رجع اليوم اللي بعده شاف منظر صدمني انا اول شيء وهو ان عايلته كلها أبيدت
أبيدت يعني مافي أحد ظل حي فيها واكتشف ان السبب هم الشياطين واخته الوحيدة
اللي لاحظ انها حية وسارع للمدينة عشان ينقذها رغم صعوبة الجو وبعد المسافة وينصدم بالطريق
ان اخته تحولت لشيطان وحاولت تقتله وفجأة يتدخل واحد ويحاول يقتلها عشان يساعد تانجيرو
اللي هو البطل لكن تانجيروا وبحركة سريعة انقذ اخته
عاد تخيلوا الموقف وهي تبا تقتله وفوق ذا كله أنقذها لأنها الفرد الأخير من عايلته
بداية الانمي عجيبة وتقييمي لها 9/10 ومابي أكمل الحرق ونكتفي بهنا بس
بس صراحة من شفته خسر عايلته شوية وكنت بصيح معه من كثر ما تأثرت
لأنه مو سهل انك تخسر أناس غالين عليك مرة وحدة
متحمس أكمل بقية الحلقات وأشوف لو بيقدر يساعد أخته ويرجعها بشرية ولا لا بالنهاية

​