مدونة مميزة BLUE (3 زائر)

[HAROLDs]

كل مرة أدخل هنا، أتأمل المكان، وأطلع بدون ما أكتب أي كلمة​

 

[HAROLDs]

دخلت هنا، تأملت المكان، ثم كتبت الكثير ومحوت​

 

[HAROLDs]

المكان هنا صار هادئ بشكل مُريح بطريقة ما
وبحس بقدر آخد راحتي بالكتابة هنا لأن بأي حال ما فيه كتير عالم تقرأ أو تهتم للي أكتبه، ويمكن قليل اللي يعرفوني
من فترة حابة أكتب شي هنا بس إما عم يكون عليي دراسة أو ببطل أعرف شو أكتب
بس عمومًا بما أن هالمكان يحمل كل ذكريات مراهقتي الغريبة بحكي شوي عن حياتي بالفترة الأخيرة
لسا أفكر كتير بكل الأوقات، وما بعرف لو أكتر من قبل.
عم أشرد زيادة عن اللزوم ولايك بعقلي كتير أفكار ومواضيع عشوائية.
أحيانًا خلال الشرح بوقف عند معلومة وبستغرق بالتفكير فيها xD

بعدني ما بحب النّاس كتير، بس عم أقدر أتواصل مع زملائي بالصف ومع الأساتذة بشكل جيد
ما أعرف الأشخاص الآخرين لو يشوفوني شخص طبيعي أو غريبة أطوار، بس ما عم فكر بهالشي كتير
بفكر فيه بس لما قول شي يضحك وما حدا يضحك غيري ywy حسي الكوميدي مختلف كتير عن كوميديا باقي الصف

طبعًا دخلت فرع علوم رياضيات وأحس بالمتعة بكل شي عم أتعلمه حرفيًا -ما عدا التربية المدنية-
بالنسبة لاختصاصي عندي كتير احتمالات والاحتمالات بحسب الجامعة، بس عمومًا رح يكون شي بمجال الكمبيوتر

دايمًا بفكر أنني خايفة أسلك الطّريق الخطأ، ماذا لو دخلت هندسة 6 سنين وضيعت حياتي المتبقية بالشغل وبس أكبر أندم؟
المشكلة أنني ما عارفة شو بدي من الحياة وأنا أعرف هالشي منيح، يهمني جدًا كون مستقلة ماديًا
بس بنفس الوقت أخاف أعلق بالعمل للأبد وانسى باقي الأشياء اللي حابة أتعلمها وأموت وأنا ما أعرف نفسي.
كنت أفكر دايمًا -وللآن- أن بعد ما أخلص مشواري العلمي بالجامعة -لايك أدرس اختصاص عِلمي أو أيا يكن- أبدأ خطة أدبيّة،
ومدري لو تعرفوا بس أنا شخص يحب الآداب والفلسفة بقدر حُبّه للرياضيات والفيزياء
سو كنت مقررة أدرس اختصاص أدب عربي إلى جانب أي اختصاص بدرسه بالجامعة، مع هيك مدري لو رح حقق هالشي لما صير كبيرة
بجانب هيك أحب جدًا أتعمق بالفلسفة، خصوصًا الإسلامية، وباقي علوم المنطق وهالأشياء
أحس أن عم يروح عليي كتير اشيا حاليًا وأنا تاركتهم، وما بدي بنهاية المطاف ما أدرسهم

عمومًا أنا أستمر في الدراسة لأن هيدا الشي الوحيد اللي قادرة أعمله حاليًا
فيه كتير اشياء رائعة لتعلمها واكتشافها، المشكلة بس أن حياتي ما بتكفي
-


تذكرت هلأ فجأة أن فيه مرة كتبت أن النوم بطل خارق
لو فكرت بالأمر، النوم بطل خارق فعلًا، بس حاليًا كل اللي عم فكر فيه أديش النوم تضييع للوقت
لايك تقضي 8/24 ساعة -على الأقل- وأنت ما تعمل شي غير شحن نفسك، لول​

 

[HAROLDs]

كنت أفكر أن لازم أكتب شي هنا كمكافأة لي لو درست جيدًا
سو سأعود لما لاقي حالي درست جيدًا لألقي تحية لائقة على شِباك العناكب هنا
~​

 

[HAROLDs]

- ما بعرف ليش المكان هُنا مناسب جدًا لحالات الفراغ الداخلي بالنسبة لي
عندي رغبة بالرسم، شفت عينين بنيتين اليوم ولسا عالقين براسي، وفيه وجه عالق من فترة، أحتاج أرسمهم
بس فعليًا ما إلي خلق كتير، والأولويّة حاليًا لأني أدرس لأن باقي أقل من شهر لامتحاني النهائي

- رح أحكي حاليًا كرمال لما أقراهم بالمستقبل قول "أخ هيديك الفترة.."
موضوع الجامعات تاعبني لحد ما، قدمت ع أكتر من جامعة، انقبلت بوحدة وبانتظار الباقيين
بالنسبة لمسار حياتي قرّرت أنني أدرس علوم حاسوب أو هندسة برمجيات وأشتغل بهالمجال كم سنة
بس ما بدي اشتغل فيه لبقية حياتي، أحيانًا بفكر أنها مجرد أحلام أطفال أو شي، بس بجدية ما بدي اغرق بالشغل
الغرق بالعمل بالنسبة لي يعني أني صير رقم بالنسبة للعالم وبالنسبة لنفسه، وأنسى مين أنا
بدي بمرحلة معيّنة وقّف عمل وارجع أدرس أدب عربي وكمل فيه لحد ما أزهق منه
لأن عالم اللغات بالنسبة لي واسع وجميل جدًا، ما أعرف أشرح، فيه كتير أفكار براسي-
أتمنى ما أنظر لهيدا الموضوع بسخافة بس أكبر

- فيه أشخاص بالعالم لطيفين جدًا، لدرجة يخلوني أشعر بشي غريب بسبب لطافتهم
وفيه أشخاص ما فاهمين حالهم أبدًا، مع هيك عم يستمروا بمحاولة إظهار أنهم أقوياء
وبقولوا أن اللي مش فاهم نفسه واقع بمشكلة، ويدّعوا أنهم ما عم يكذبوا ع أنفسهم
بس الكذب لبسهم لدرجة أنهم نسيوا مين هني جد، أو العالم خلاهم يكبتوا نفسهم الحقيقية
لأن لو أظهروها للعامّة رح تتأذى، يمكن هاي منسميها ارتداء أقنعة مش أكتر

- شعور أنّني قربت أترك مدرسة ربيت فيها من لما كان عمري خمس سنين للأبد غريب
كنت عم طلع بالمدرّجات والملاعب والاشجار، كل ركن من أركان المدرسة هاي يحمل ذكريات لي
وكل مبنى وطابق من طوابقها يعرف منّي شخصية مختلفة عن اللي يعرفوها باقي الطوابق والمباني
الزملاء اللي كانوا معي معظمهم أعرفهم من لما كنا أطفال، وأعرف كيف يفكروا من هني وصغار
هيك أشخاص ما بخوفوا، وفهمهم سهل، لأن كبرنا سوا وكان غالبًا الأشخاص يهتموا لبعضهم
ما أقدر أتخيل فكرة الانتقال لعالم تاني برا المدرسة، أو بالأحرى التعرف على أشخاص جدد ما أعرف شي عنهم
خصوصًا أنني مش شخص يهتم بالطلعات، وما غيّرت مدرستي كل حياتي
صورة الأشخاص المتوفيين من "عائلة" المدرسة ما صرلها زمان موجودة
فيه أشخاص ما تنتبه أنك كنت تشوفهم كل يوم غير لينعي لنا الناظر وفاتهم بالملعب
بس لسبب ما الأشخاص عم يتوفوا أكتر من قبل، أو أنا وعيت لفكرة الموت أكتر من قبل، من يدري.

- مفروض هلأ كون رح أخلص الفيزيا، صرلي فترة ما نمت لهيك يمكن مبينة عم هلوس متتت
عمومًا خلصت كل اشي ميكانيك وبقيلي بس الكهربا، بدرسهم بكرا مع المواد الأدبية المتبقيين
أحتاج جيب معدل عالي، أحيانًا بحس حالي متمكنة كتير لدرجة قادرة جيب المعدل بلا ما أدرس بعد
وأحيانًا بحسه حلم مستحيل، بس كل اللي عليي أعمله هو أني أدرس، بالنهاية أنا اخترت هيدا الفرع لأن بحبه
أتمنى المستقبل يكون مشرق شوي، لأن تعبنا من الظلام جدًا

- هيدا المكان هنا شاف أغرب شخصيّة من شخصياتي، اللي ممكن بالنسبة لي بعض أفكارها تضحك
ومدري بس حبيت قول هيك، أراكم لاحقًا​

 

[HAROLDs]

أنا : نآه حتى صور هتلر لم تكن بهذه الجودة وهذه التفاصيل ..
قتلني الفضول وقلت خليني أسوي بحث على السريع حتى أتأكد بنفسي، لقيت الصورة وبعض
التفاصيل عنها هنا أند هنا
طبعا لم اقتنع .. التفاصيل في الصورة كثيرة بالنسبة لعدسة عمرها 100 سنة لكن المثير للاهتمام
هو المصور نفسه :

عاش قرابة 100 سنة، وعاش في زمن الأمبراطورية العثمانية لمدة 50 سنة وبعدها عاش
سقوطها وشهد احداث الحرب العالمية الأولى والثانية ..
كأنه عاش حياة 3 أجيال متتالية مع كل تلك الأحداث
جنسية البلد : الأمبراطورية العثمانية
يااااه !
Heeeeeeh




​

بما أني بعدني عم ادرس تاريخ حبيت علّق عالموضوع شوي واحكي عن شو الاشيا اللي شهدها فعلًا
بدايةً اللي لفتني أن بحمدون بلدة لبنانية تقع ضمن متصرفية جبل لبنان اللي كانت تخضع لنظام خاص ضمن الدولة العثمانية يعرف ببروتوكول 1861 وعندها استقلال ذاتي تضمنه لها الدول الكبرى وعندها امتيازات معيّنة. المهم هيدا النظام ما كان كتير راضي العثمانيين، فا ببداية الحرب العالمية الأولى تسلم واحد اسمه جمال باشا قيادة الفيلق العثماني بلبنان وسوريا واستغل الفرصة ليقضي على النظام الخاص لمتصرفية جبل لبنان، الجدير بالذكر أن جمال باشا كان من ضمن الاتحاديين -هدول المتعصبين للقومية التركية وبدهم يفرضوها ع باقي القوميات- ، المهم، عمل كتير خطوات خرق فيها البروتوكول 1861 بعدين أنهى نظام الحكم الخاص بالمتصرفية وخلاها تصير تابعة للحكم العثماني المباشر وألغى كل الامتيازات تبعها.
حتى عمل كتير اجراءات تعسفية هي اللي قادت لأسوء أزمة اقتصادية واجتماعية بتاريخ لبنان:
منع وصول الحبوب من سوريا للجبل، فرض التجنيد الإجباري والسخرة، أقفل المدارس وحولها لثكنات للجيش العثماني، صادر المؤن والغلال والأطباء والأدوية ووسائل النقل لمصلحة الجيش العثماني، أضف إلى ذلك الحصار البحري اللي فرضه الحلفاء على الشواطئ التابعة للسلطنة، وغزو الجراد للجبل، وأهم شي أن الأرض كانت جبلية فا الانتاج الزراعي قليل جدا بالأساس، كل السهول اللي موجودة بلبنان هلأ ما كانت تابعة للجبل.

الأخضر يمثل المتصرفية، الرمادي يمثل لبنان الحالي (دولة لبنان الكبير)
فا يب، بعد الأزمة الاقتصادية وهزيمة الدولة العثمانية دخل الحلفاء ع لبنان وبلشت مرحلة الانتداب الفرنسي
وتلبيةً لمطالب اللبنانيين تم الإعلان عن قيام واستقلال لبنان الكبير بحدوده الحالية عام 1920
طبعًا هيدا كان مجرد استقلال بالاسم لأن فرنسا كان لسا منتدبة لبنان وعم "تحمي" استقلاله
مدري لو تعرفوا الأخطل الصغير بس فيه قصيدة له اسمها الجابي بيحكي فيها عن "عيد أيلول" المهم هيدا هو عيد أيلول، الاستقلال الزائف
طيب بعدها عام 1946 تقريبًا تسلم بشارة الخوري رئاسة الجمهورية وعيّن رياض الصلح رئيس حكومة وتم تشكيل حكومة الاستقلال اللي قامت بالعديد من الخطوات الاستقلالية، بعدين وصلت لاستقلال لبنان.

فا المهم هيدا الزلمة أعزائي المتابعين شهد أهم الاشيا بتاريخ بلده، وبتاريخ العالم
شهد أسوء أزمة مرت عليه، قيام دولة لبنان الكبير، واستقلال لبنان الفعلي لاحقًا، وحتى احتلال فلسطين والنكبة
بالإضافة لسقوط الدولة العثمانية والحربين العالميتين الأولى والثانية.

شكرًا لحسن متابعتكم، انتهت حصة التاريخ لليوم owo​

 

[HAROLDs]

مرحبًا، زمان عني وزمان عنكم وزمان عننا كلنا، هل لا يزال أحدكم في هذا المكان؟
كنت أتصفح مدونتي القديمة، كانت مُراهقة سوبر ويرد، سعيدة أنني تخطيتها xD
على كل حال، كنت أفكر منذ دقائق أن لسبب ما مدونتي هنا هي أكتر مكان بكون فيه على طبيعتي
أحب هيدا الشي، خصوصًا أن عندي قلق اجتماعي لحد ما، فمن الرائع أن يكون لي مكان كهذا
أشارك القليل من أفكاري في نطاق ضيّق، وما حدا ينتظر يتصيّد أخطائي، أمر معقد ربما بالنسبة لي
على كل حال، وجدت هذا الشي خلال تصفّحي:
​

ربما نحن نشعر
لكننا بطيئون في استيعاب المشاعر وحسب​

ومن منبري هذا، أيّها الآنسات والسّادة، يُسعدني أن أخبركم بأنّ المشكلة هي هذه
اكتشفت (ربما منذ وقت لا بأس به) أنني قادرة على أن أشعر بعمق، لكن مشكلتي تكمن أنني لا أستطيع استيعاب المشاعر وتمييزها بدقّة أو بشكل صحيح، وبمعرفتي للمشكلة أصبحت قادرةً على حلها، رغم عدم سهولة الأمر

وه اكتشفت أنني صرت معبّرة عن ارتياحي لهالمكان أكتر من مرّة، نايس

على كل حال، يبدو أنني بعد ولا مرة حكيت عن انطباعي عن الجامعة، ف رح احكي هلأ بما أنها مرحلة جديدة
في البداية، أنا أفضّل المدرسة، رغم أن ما كان عندي كتير علاقات عميقة بالمدرسة إلا أن الروابط فيها كانت أحلى، وغير الجامعة، تلامذة الصف كانوا مقربين وعندهم حياة سوا غير تحصيل العلامات، أمّا بالجامعة، على حد قول إحداهنّ، الطلاب جايين ياخدوا علامات ويروحوا. وهيدا شي طبيعي، بس شعرت بالفرق.
لسبب ما حرفيًا أجهله صرت بعرف كتير عالم من طلاب دفعتي، وما أحب هيدا الشي ؛-؛
لايك حرفيًا بصير أعرف الطلاب بدون مناسبة تعارف، مثلًا:
- كان فيه بنت التقيت فيها بشكل عشوائي لما كنت عم آخد أغراضي من القاعة، سألت عن اسمي ومن وين أنا وعرّفت بنفسها، بعدين طلعت ونسيت الموضوع ع اساس أنه مش مهم.
بعدها بأسبوع تقريبًا اجت بنت قالت لي: هااي سجا! وصفنت فيها لايك: مين أنتِ؟
ومن وقتها معش نسيتها
- كنت قاعدة بالباص وناطرة، ففجأة بتجي بنت حرفيًا ما شايفتها بتقلي سجااا فينا نطلع معكم صح؟
آي واز لايك يب.. بس مين أنتِ؟ طلعت لاحقًا بتعرفني لأنها بتروح بنفس الباص معي بس أنا ما بعرفها
صرت مشهورة لأن العم اللي بياخدنا كتير بناديلي باسمي ywy

ن ننسيت احكي عن الاختصاص، فتت كلّية هندسة عشان كانت كلية العلوم مهددة بالإضرابات
يبدو أنه خيار أفضل من المعلوماتية. عندي هلأ سنتين هندسة عامة للتحضير، بعدها كنت ناوية اتصالات
بس هلأ صرت محتارة بين المدني والاتصالات :v ع أي حال معي سنتين أدرس فيهم الموضوع
ما بعرف لو فعلًا مكاني هنا، بس أرجو أنه يكون فعلًا هذا مكاني، الجامعة متعبة جدًا

على كل حال، أراكم لاحقًا * ما بعرف مين عم خاطب بجدية *
إلى اللقاء الآن~
​

 

[HAROLDs]

-


سنة أولى جامعة، أوشكت على الانتهاء.

والمضحك في الأمر أنني لا أزال تائهة لحد ما رغم أنني حددت ميولي وتوجهي بدقة
لن أطيل الكلام، أوشكت أنني خلص سنة أولى هندسة كمبيوتر، وبدي ادرس اختصاص تاني معه بس محتارة فيه
هل أدرس اختصاص قريب من اختصاصي؟ أو اختصاص مختلف كليًا؟
بدرس معه علوم حاسوب، أو أدب عربي؟
المشكلة أنه كل ما بسأل حدا بيقول لي شيء مختلف، بالنهاية لكل واحد وجهة نظره
ادعولي لاقي الطريق الصح، رغم أنه 90% عم أوفرثينك الموضوع وهو ما مستاهل هالقد، كالعادة : )

لنحكي شوي عن السنة اللي مضت
كانت سنة مليئة بالتجارب والأحداث الشخصية بشكل لا يصدق، على الأرجح أنها أكتر سنة تغيرت فيها نظرتي لعدة أمور
وتغير تفاعلي مع هيدي الأمور كمان بطبيعة الحال
كنت أوّل فصل بجامعة ونقلت على جامعة تانية أقرب وفيها الاختصاص اللي حابته
على الأرجح هيدي كانت أكبر تجربة صارت، ولما قضيت أسبوع وحدي بالسكن الجامعي كمان
صار شي بضحك وقتها، كنت وحدي بالسكن ونزلت جيب فاكهة من محل قريب جدًا
فأنا كنت مفكرة أنه لازم اشتري اما نصف كيلو أو كيلو (مدري ليش آخدة هالفكرة)
ف قلي العم اللي هونيك آخد قد حاجتي وهو بيحسبهم، وهي كانت أول تجربة لي وحدي بمحل خضار u__u
تعرفت على ناس من كل لبنان لأن الكلية كانت بالعاصمة، لهلأ بعدني بتواصل مع بعضهم
فيه منهم رائعين، وفيه منهم أشخاص ماديين جدًا، يعني جايين عالكلية يدرسوا ليعملوا مكانة لهم وهيك، بس هيك
*ما بعرف لو عرفت اشرح بس بتمنى وضحت الفكرة* وبعرف أنه معظم الطلاب هيك

المدرسة فيها روابط، الجامعة عبارة عن مكان فيه ناس جاي تجمع علامات وتروح

لو فيه شي سلبي كسبته هيدي السنة فهو التوتر، صرت كتير بمر بحالات توتر بعكس السابق لما ما كان يفرق عندي شي

تقريبًا رح يمر سنة عن أول مرة نزلت فيها ع بيروت وقعدت بالسكن، لهلأ بتذكر رائحة هيديك الأيام
وصوت بيروت اللي ما بتهدا حتى بآخر الليل، ورفيق وحدتي رواية البؤساء،
والورد البنفسجي من شجر الجامعة، والشوكولا المفضلة عندي،
والأمسية الشعرية اللي عملناها لما كانت رفيقتي معي بالسكن،
ومياه بيروت المالحة، ومدرجات القاعات الكبيرة بالكلّية، وكل شي.

لما انتقلت على الجامعة الجديدة انبسطت بالمواد أكتر، بس ما كتير حبيت جو الأشخاص هونيك، بعكس الكلية القديمة

على كل حال، وكما قلت، كانت سنة عجيبة، وسعيدة لأن صار معي هيك اشيا علمتني أن مش كل شي سهل
ولو أنه يمكن بكير على هيدا الحكي، بس حاسة فيه بالفعل

أتمنى الأيام الجاي تكون أفضل لكم ولي، وعسى أن نجد وظيفة كويسة بعد التخرج
إلى اللقاء 3>​

 

[HAROLDs]

-
أخيرًا إجازة، بعد أطول سنة بحياتي​

 

[HAROLDs]

والّـذي نـفـسُـهُ بـغـيـرِ جـمـالٍ
لا يرى في الوجودِ شيئًا جميلا

حلو أن الحياة فانية
الاشيا اللي بشوفها الناس بتخلّي الحياة حلوة لأنها فانية
الحياة حلوة لأنّها فانية
لو الاشيا الحلوة ضلت للأبد كان رح تصير مملة على الأغلب، اعتيادية على الأقل
حتى الاشيا اللي ظاهرها ما حلو، حلوة
تعبك بالظروف القاسية بخليك تشعر بالشباب في عروقك، يشعرك بالحياة
أن عندك طاقة، أن عم يطلع شي منك، أنك مش عاجز
هي اشيا حلوة

شيء ما كان يدور في رأسي، هذا أجملُه

​