مدونة مميزة BLUE (4 زائر)

[HAROLDs]

الإنسانيّة عظيمة، لفظًا ومعنى.​

 

[HAROLDs]

.
"لم أستطع التنفس
سمعت صراخ أحدهم
ثم أدركت بسبب ألم حلقي الشديد
أنني من كان يصرخ"
.
.​

 

[HAROLDs]

-
أصغِ إليّ
أخبرتني أنك قد تجد سببًا لتحيا من أجله إن عشت في عالم من العنف وإراقة الدماء

لن تجده

لا بد وأنك أدركت ذلك بالفعل
سواء كنت في الجانب الذي يقتل الناس أو الذي ينقذهم، فلن تجد شيئًا يتجاوز توقعاتك

لا شيء في هذا العالم يستطيع ملء فراغ وحدتك
ستهيم في الظلام للأبد

كن في الجانب الذي ينقذ الناس
وإن كان الجانبان سيّان، كن رجلًا صالحًا
أنقذ الضعفاء واحمِ اليتامى

أعلم أنك لا تأبه للخير أو للشر
لكن ذلك سيجعلك شخصًا أفضل بقليل على الأقل

- أنّى لك أن تعلم ذلك؟

بالطبع أنا أعلم، أعلم ذلك أكثر من أي أحد آخر
لأنني صديقك

يعيش الناس سعيًا لخلاص أنفسهم
هذا صحيح بالفعل.. |​

 

[HAROLDs]

كل عام وأنتم بخير وينعاد عليكم بالصحة والعافية ونشوف فلسطين محرّرة 3>

لنحكي شوي
ها أنا ذي، متجهة نحو ثالث سنة من تعليمي الجامعي اللي حسته رح يستمر للأبد
وعم اكبر، وعم ازداد تعقيد مع العالم

شو بقدر خبّركم عن تجربتي الجامعية لهلأ؟ البشر بالجامعة، طلابًا ودكاترة، كائنات جدًا معقدة ومش مريح التعامل معهم
وصلت لمكان كل البشر فيه مارين بتجاربهم مسبقًا، وما بعرف شي عنهم بالأساس
يمكن من السنتين اللي مرّوا لهلأ فيه بنتين بقدر قول اني ارتحت لهم، بس أوقاتنا مش متوافقة، فلقاءاتنا قليلة

العيش كشخص كتوم بعالم كثير الكلام أصعب ممّا تخيّلت

أديش بحب البرمجة وبتحمس لها، وبحضر events ولقاءات مع أشخاص واصلين وهيك
بضلني حس انه الموضوع كتير مرهق للمستقبل ورح يغرقني بطريقة ما، كبحث عن شغل بعدين شغل فعلي وكل هيدا
رغم اني فعلًا بحب البرمجة وبستمتع لما اكتب كود أو فكّر بحل أو صمم موقع أو أيا شي
بس لما شوف كل هي العالم اللي عم تشتغل، بحسها بسباق طويل ما اله نهاية، وكلهم عم يتسابقوا ويبذلوا جهدهم
فبقول وبعدين لوين؟ حتى كل هي اللقاءات المهمة اللي بتنعمل عبارة عن كيف تصير شخص ناجح
وشو شخص ناجح أصلًا.. حدا بيعرف يكتب كود أكتر من غيره؟ حدا راتبه أعلى من غيره؟
بفهم أنه الشغل شي مهم، وكتابة الكود شي مهم، والراتب شي مهم، لأن بالنهاية مضطرين كلنا بدنا نعيش
وبفهم أن اللي بحب الشغلة بيبدع فيها وما عنده مشكلة يقضي وقت فراغه فيها
بس جديًا، رغم حبي للمجال، ورغم اني كمان ما عندي مشكلة يكون وقت فراغي هيك، حياتنا هي اللي بدنا نوصلها هيك؟
النجاح اني اقعد آخر النهار احكي كمبيوتر واركض بسباق ما رح يوقف غير بالتقاعد.. أو الموت؟

عم احكي هلأ لمجرد طرح اشكاليّات
وإلا صرت عارفة فعليًا لوين لازم اوصل بحياتي بوجود هالسباق الفارغ اللي الكل عايش فيه
بس أحيانًا بصير فكر بالموضوع متل.. شو هالحياة وشو هالعالم؟ مجرد تفكير

​

 

[HAROLDs]

-

أعِدني لنفسي كم تغرّبتُ حائرا...​

 

[HAROLDs]

قارورة زجاجيّة مَرميّة في المُحيط
ربّما كان بداخلها سرّ أو كنز، أو كلاهما، أُحكِم الإغلاق عليهما
لكنّ المشكلة تكمن في أنّها لا تجيد الصراخ ليلتفت أحدٌ لها ويلتقطها
ولا تجيد السباحة إلى الشاطئ الّذي تريد
إنما تترك الأمواج تتلاطم وتأخذ بها حيث تشاء هي
ليحطّ رحالها على شاطئ إحدى الجُزُر، أو إحدى المدن،
أو يكتشفها بحّار هاوٍ من قلب المحيط فيصبح مصيرُها بين يديه
ومن يدري، قد تظلّ تائهة، للأبد، بلا قوّة ولا دليل​

 

[HAROLDs]

كنت أتصفح مواقع التواصل منذ قليل، واستوقفتني هذه الجملة:

"واعلموا أنّ مهمّتكم ليست ورقةً تنالونها، بل أمّة تحيونها"

العلم والشهادة وسيلة، هذا صحيح ومنطقيّ، وسيلةٌ لماذا؟
لكسب المال؟ لعيش حياة مترفة؟
المال نفسه وسيلة
إن كانت الغاية صلاح الأمّة والبلاد
لماذا أجدنا مستغرقين في دراستنا وسعينا في الحياة بغض النظر عن الأحداث الجارية
لماذا لا تحرّك الشعوب ساكنًا، إلّا قليل
لعلّنا جعلنا الشهادة الجامعيّة هي الغاية، والحياة المترفة هي الغاية

في بداية الأحداث، في شهر أكتوبر الماضي، كنت أحضر للمرة الأولى -والأخيرة-
محاضرة في علم الجبر عند أحد الأساتذة
وبينما كان يشرح، التفت ليجد تلميذين يضحكان في آخر القاعة، سألهما لماذا الضحك فأجاباه
لم أسمع ما كان جوابهما، لكنّي سمعت الأستاذ يجيبهما بنفس النبرة الهادئة التي كان يشرح بها:
"هالأيّام ما إلي نفس أضحك يا أستاذ، أصلًا عيب علينا كيف عم نتعلّم بهيك أيام
اسأل جدّك وبيّك كيف الفلسطينيين خسروا أرضهم
كنا متل هلأ، الفلسطينيين عم يتدبّحوا والعرب مشغولين بشي تاني
هلأ الحمد لله الوضع شوي أحسن...
يوميّة فيه 560 شهيد يا أستاذ... إلك نفس تضحك؟"

لم يُتَحْ لي بعدها أنا أحضر صفًا آخر لديه
لكن يراودني الفضول عن كلام قاله كهذا ولم يُعِره الطلاب اهتمامًا
باعتباره محاضرةً مملة لا علاقة لها بأسئلة الامتحان​

 

[HAROLDs]

"الله وحده يعلم كيف يستطيع الإنسان أن يحمل مشاعر الفخر والأسى
والعجز والقوة والقدرة على المواساة وحبس الدموع في آن واحد"

تدوينة كتير مشتّتة، بس مع هيك حابة اكتب

هذه الحرب أقرب للخيال أكثر منها إلى الواقع..
فجأة بدون إنذار ونحن بالسيارة نسمع انفجارًا. لا يبدو أنه غارة إسرائيلية، ما هو إذًا؟
فجأة، أصبح الجرحى بالآلاف في كل المناطق، من فقد عينيه أو يديه، ومن استشهد
وأضعافهم من المستعدين للتبرع بدمهم وكلاهم وأعينهم (حرفيًا، بدون مبالغة)
حملات القرآن والدعاء
والشفاء المفاجئ للكثير من الجرحى
جديًا ما يحصل يفوق الإدراك

حالات الجرحى والمستشفيات تقطع القلب
لكن مع ذلك، تجدهم أقوى مننا نحن الذين لا نشكو من شيء
همه أن يصلّي وهو طريح الفراش ملفوف بالضمادات
لا تهمه جراحه طالما يواسي غزة وينصر القضية
أي قوّة عندهم، أي ايمان
جعلوا لدينا شعورًا غريبًا من الذنب حتى لامتلاكنا عينين ويدين

"إن كانت جراحنا تخفّف عن غزّة فأنا راضٍ"
- جريح من لبنان في الأحداث الأخيرة

أفكّر أحيانًا، أنه على الرغم من أن الوضع سيئ، والتوتر دائم
أننا موجودون في مكان مقدّس في هذا العالم
جنوب لبنان مقدّس، غزّة مقدّسة، فلسطين مقدّسة
أرض لطالما كانت دماء الشهداء هي التي تمنحها الحياة

بعد الأحداث الأخيرة يسهل التوقع أنّ الشعب الذي تأذى وفقد أعزاءه
سوف يتردد عن نصرة القضية
إلا أن النتيجة كانت المزيد من الثبات والمزيد من القوة
شي بكبر القلب عنجد

عنجد، كيف لكم أن تهزمونا
دعاؤكم جميعًا 3>​

 

[HAROLDs]

ما كنت بعرف مشهد الدني عم تشتّي هالقد ببكّي
هالقد بيحمل حنين وحزن​

 

[HAROLDs]

-

باليوم اللي الاسرائيلي هدد فيه بقصف مناطقنا
فيقتنا أمي الصبح عم تقلنا قوموا ضبوا كم غرض بركي تركنا البيت
وقتها أنا وأختي -اللي ما مر علينا حرب وتهجير نحنا وواعيين- قلنا أنه ما بدنا نروح ع محل شو ما صار
بدنا نضل ببيتنا ونضل نروح ع المدرسة والجامعة، ونموت بأرضنا
فكرة التخلي عن بيتنا وكل شي عايشينه بالجنوب كان كتير صعب تخيّلها، وعيشها كمان صعب
قمنا جمعنا كم قطعة تياب، وبلش القصف بشكل كتير كبير ومخيف جدا بكل محل حولينا فأخدنا كم غرض لا يُذكر وتركنا البيت
كل أغراضي المهمة والمش مهمة بقيت بالبيت، والبيت ما منعرف أيمتى بينقصف أو أيمتى بينسرق
طلعنا مرعوبين كتير، القصف عشوائي والصواريخ عم تمرق حرفيا من فوق راسنا، الذكرى لحالها بتخليني مش مرتاحة
نحنا وعالطريق نفس الشي الغارات بكل الجهات حولنا
صدقا يومها تصالحت جدا جدا مع فكرة الموت، وبطلت خايفة أن كون "مش مستعدة" له
لأن بعد كل شي.. بعمري ما رح كون مستعدة، لأن اللي بيدخل الجنة بيدخلها برحمة ربنا، مش بأعماله
كنت عم ادعي ونحنا عالطريق، أنه الله يعمل اللي بلاقي فيه خير لي
سواء كان الخير اوصل سالمة، أو استشهد عالطريق، وبالنهاية دعاءنا الله ما ياخدنا الا وهو راضي عننا

ليش عم احكي هيدا الحكي
لأن الحرب، بس فكر فيها، بلاقيها نعمة كبيرة كتير
انا حدا كتير بحب التفاصيل، وبيتعلق فيها
كنت متعلقة بالجامعة، بالبيت، بكل غرض من أغراضي بالبيت، بكل حي من أحياءنا اللي تدمرت
بهيدي الحرب أُرغِمت اتخلى عن كل شي، كل أغراضي، جامعتي، حتى مشهد الشوارع والسوق، دمارهم أجبرنا نتخلى عنهم
والتخلي كان كتير صعب، وما بنكر اني عم شوف الجنوب كل يوم بمنامي ع قد ما اشتقت له، أرضنا كتير عزيزة
بس صدقًا، ما كنت رح اقدر اتخلى عن هيدي الاشيا لو ما صارت الحرب، ما كان أخدت هي الفرصة
كان كل شي من هي الاشيا اللي ذكرتها بعده مالكني بطريقة ما
وقد ما كنت مفكرة اني زاهدة فيهم ما كنت رح اوصل لتقبل فكرة التخلي عنهم بكل رحابة صدر
كان رح يكون عندي تعلّق كبير بعد بالدنيا بشكل ما، وما عم قول اني صرت زاهدة بالدنيا بالعكس، بدي كتير شغل
بس الحرب خلتني اوعى ع هيدي الأفكار أكتر، انه لازم اتقبل فكرة التخلي عنهم لكون ضحيت فيهم
الحرب، ع قد ما فيها مشاعر حزن، وفراق، وعلى قد ما فيها دمار وموت، مش بس بتختبر إيماننا، كمان بتقوّيه
الحمد لله اللي عاطينا نعم أكتر ما منستاهل، مجرد عدم عيشنا مخدّرين بالعالم الحديث
عدم عيشنا بغفلة بوسط هالعالم اللي بس عم يدور على مصالحه المادية نعمة كتير كبيرة
تصبحون على نصرٍ يليه سلام ​