مدونة راقية أنثى نادره من عبّق الورد خُلقت ♡ (1 زائر)

[R E E M]

.
.

21 - مـارس ~
( يوم الأم العالمي )



كانت تعيد للقلوب قطعها المفقوده و تجد لها أشيائها الضائعه
لقد شاهدتها ترحل أمام عيني و هذا أقسى حدث ممكن ان تبني عليه ذاكره كامله
أمي .. كنتِ سر سعادتي و كنتِ قطعه من الجنه .. أمسكتِ يدي و أحسنتِ تربيتي
و غرستِ بي حب الخير للناس

بكيت حد الانكسار ولازال قلبي يوجعه فراقكِ ولا زال خبر وفاتكِ عالق في مسمعي منذ 14 سنه
لعل رحيلكـ من الدنيا يخبئ لكِ جنه ما رأت عين مثلها
" أمي .. عيدكِ بالجنه أجمل و عسى الله يجمعنا فيها "

.
.



كل عام وامهاتكم بخييير و عسى الله يحفظهم لكم و يطول بأعمارهم
و رحم الله كل من فقد أمه و عسى الله يجمعكم بجناته يارب

​

 

[R E E M]

" عندما أظهر لك جانبي المرح .. فأنت مميز "


^
قسمبالله هالعباره تمثلني جدا خصوصا الفتره الأخيره بما اني صايره نفسيه و ما اعطي وجه نهائيا
الا الاشخاص اللي يدخلون مزاجي واحسهم يشابهوني بكل شي
و صايره ما احب اتعمق بالاشخاص اللي احسهم مو من مستواي الفكري او الفكاهي وغير ذلك
هم اذا اكتشفت شغله مو عاجبتني حتى لو كانت بسيطه بالشخص على طول تتغير معاملتي معاه
واحيانا اسحب نفسي منه واطلعه من حياتي !


مع ان في السابق ما كانت جذي و كنت بالعكس اضحك و اسولف مع الجميع
وكنت اجتماعيه الى اقصى درجه ( ولازلت اجتماعيه بس اخف من قبل )
بعد ما مريت بالكثير من المواقف اللي اكتشفت من خلالها ان الناس تختلف نواياها و أطباعها كثير
ومو الكل يستاهل الجانب الحلو اللي فيك والاغلب يستغل هالشي او يشوفونه بنظره مختلفه
عشان جذي قمت اعطي كل واحد حقه وما اعطي احد احد اكبر من حجمه و اوريه الجانب المناسب له
لأن باختصار وبعد كل هذا صار عندي جانبين والكل الملاحظ هالشي بالفتره الأخيره
( جانب حنون و مرح و جانب قاسي و النفسيه جداا )


فـ يعني لما ابين لك جانب النفسيه اللي فيني فـ نصيحه لك ( اهربووووواا )
واذا بينت لك الجانب الحلو و المرح اللي فيني فأنت شخص مميز جدا بالنسبه


بوسااااه بحجم السماء لكم

​

 

[R E E M]

.
.

Mood#

^
" وضعي مع هالروتين المتكرر و الملل "


​

 

[R E E M]

ايييه صح بنات مارويتكم ابداعي
واللي الهمتني ارسم رسم خنفشاري << قصدها العكس

^

نشكر الغاليه فانسي على الرسمه الرهيبه
اللي تمثلني حرفياً هالأيام خصوصا اني صايره امشي و اتسدح
بكل مكان وانصح اللي حواليني انهم يتسدحون وانشر فكرة التسدح على كل اللي حواليني واللي اشوفه مو منسدح اخليه ينسدح غصباً عليه
وبالأخير " عاشوااا المنسدحين "

.
.


​

 

[R E E M]

.
.

هااااي قايز جايه اسولف لكم شوي


طبعا الاغلب الحين قاعد يعاني و يشتكي من الحجر والروتين الممل جدا
و انا عن نفسي وبكل صراحه راح اموت من هالوضع والله اكره شي اسمه روتين لان انا وحده حيل تحب التغييرالمستمر

الوضع كالتالي :

انام 9 الصبح و أقوم 6 بعدها انزل تحت الصاله عند خواتي ( اثنين من خواتي يقومون بدري واثنين منهم ما يقومون الا 9 بليل ) وطبعا لازم أعطيهم هالسدحه لين اصحصح بعدها اتغدى > طبعا غداي الساعه 7
وبعدها أروح المطبخ أسوي لي قهوه بعدها ارد اقعد بالصاله واتابع التلفزيون
( مسلسل سعودي اسمه الميراث على ام بي سي )
بعدها عاد اقعد و اتناقش و اسولف مع خواتي او اسولف مع صديقاتي بالواتس و افتح التون من الفون مالي
ويجي أبوي يقعد معانا ويسولف و يعطينا محاضرات و قصص بطوليه و غيرها من صواريخ الوالد > كف

لما تجي الساعه 10 اصعد غرفتي وتبدي ساعة الرياضه و الرقص
على فكره من هواياتي المفضله واعتبرها من اولى اولوياتي هي الرقص بجميع انواعه
والرياضه بعد اهم شي عندي وبشكل يومي أمارسها ومرات امارسها مرتين باليوم ( الساعه 6 الصبح )
على الساعه 11 اخذ لي شاور و بعدها انزل اسوي لي عشا وارد اصعد غرفتي واتابع مسلسلاتي
وادش التون من اللاب ( طبعا انا اونلاين بالتون طول الوقت لان داشته من الفون مالي وكل دقيقه اجيك عليه )

وبعدها عاد اتابع مسلسلات و افلام و مرات تتصل علي صديقتي و نسولف
وبهالوضع لي الساعه الساعه 6 الصبح بعدها اقعد على البلكونه و اسمع اغاني
وعلى الساعه 7 انزل اسوي لي فطور و اتابع مسلسل لي الساعه 8 بعدها اقعد احوس بجوالي لي الساعه 9
وبعدها أخمد

وبس والله بعدها تتكرر الايام و يتكرر الروتين
الا امس تهورت و طلعت و ركبت سيارتي و رحت اشتري أكل من الجمعيه
والحمدلله ابوي ما صادني


المهم ان اتمنى من كل قلبي ان هالأزمه تعدي بسرعه و يرجع كل شي للوضع الطبيعي
وترجع الحياه في الشوارع و بكل مكان




​

 

[R E E M]

#فعالية_ الشهر


خمسة أفلام مفضلة لديك ؟

سؤال جدا صعب بالنسبه لي لان كثير افلام تابعتها و حبيتها
واغلبهم تابعتهم اكثر من مره وما أمل منهم نهائيا
وأولهم :

Titanic
منو ما يحب هالفلم ؟ احس اللي ما يحبه ما يفهم ولا راح يفهم بالأفلام > عصبت
هالفلم اعتبره من اولى الافلام اللي حبيتها و تابعتها مليون مره والمشكله ان كل مره اتأثر واقعد اصيح معاهم
وتأثرت جدا بقصة حب جاك و روز


scream

اتوقع هالفلم معروف في عالم افلام الرعب و يصنف من اقوى افلام الجريمه و ارعب على مر التاريخ > حسب نظرية ريم
وهالفلم عن قاتل متسلل متنكر بقناع مرعب و فيه منه 4 اجزاء و تابعتهم كلهم وهالفتره رديت اتابعهم مره ثانيه


STEP UP MOVIES

سلسلة افلام رقص الشوارع وحاليا فيه منه 5 اجزاء و تابعتهم كلهم ولعدة مرات بعد
هالفلم حبيته و استانست عليه و تعلمت منه بعض حركات الرقص بما ان هوايتي المفضله اهيا رقص
يعني تابعته و استفدت منه بعد وانصح كل اللي يحبون الرقص يتابعونه


THE ROCK AND KEVIN HART MOVIES
هالاثنين اعشقهههههم حيل و احب افلامهم و مستحيل ينزلهم فلم وما اتابعه مليووون مره
خصوصا هالفيلمين ( JUMANJI - CENTRAL INTELLIGENCE )
اثنينهم حضرتهم بالسينما و تابعتهم بعد اونلاين من كثر الكوميديا الجميله اللي فيه
وانصح اللي يحب الاكشن و الكوميديا مع بعض يتابعهم دون تردد


BIG MAMAS MOVIE
اتوقع هالفلم الكل تابعه و معروف عالميا حتى ابوي يعرفه
وفيه منه 3 اجزاء وكل جزء مضحك و مشوق اكثر من اللي قبله
فـ انصح اللي يبي يضحك و يونس نفسه يتابعه

.
.

أفضل ذكريات طفولتك ؟

احلى ذكريات الطفوله لما كنا ساكنين ببيت جدتي
( بيت جدتي كان كبير و الدور اللي فوق كان فيه 3 شقق , شقه لنا و شقة لعمي اللي اصغر من ابوي و شقه لعمي الصغير )
و اللعب مع بنات عمي بالحديقه وكنا مسويين خيمه كبيره حقنا
ونقعد فيها ونسولف و نلعب و نشرب عصير و شيبس بعدها نروح عند جدتي ونناشبها بالتلفزيون و نحط على سبيستون و نتابع ابطال الديجيتال
بعدها نصعد فوق وكل وحده تعزم الثانيه على شقتها ( يعني يوم بشقتنا و يوم بشقة عمي و هيك )
ونقعد نرسم و نلون بعدها نرد و نتابع سبيستون وننسدح كلنا جدام التلفزيون



يعني احلى الذكريات كانت ببيت جدتي الله يرحمها
ومع بنات عمي اللي للحين كل ما تجمعنا نقعد و نسولف عن طفولتنا ونحن لهالايام كثير


.
.
​

 

[R E E M]

#فعالية_الاسبوع

ما هي أفضل طريقة بالنسبة لك لقضاء العطلة الأسبوعية ؟
سولف لنا بالتفصيل.

السؤال ع الجرح > اشتاقت حق الطلعه
اللي يعرفني راح يدري و متأكد ان مسحيل يحصلني بالبيت بالويكند
والله عندي نظام معين ان كل ويكند ممنوع اقعد بالبيت ولازم اطلع و اروح كل مكان


اكثر مكان اروح له بالويكند خاصة يوم الخميس واللي يعتبر بيتي الثاني مجمع ( الافنيوز )
هذا اكبر مجمع بالكويت و بالخليج و بالشرق الاوسط على ما اتوقع
هالمجمع كل الكويتين وجميع الجنسيات فيه وحتى اذا فاقد شخص و مو شايفه من سنين تشوفه بهالمجمع

مرات اروح مع صديقاتي و مرات مع خواتي ومرات مع بنات عمي
طبعا الوضع يكون ( ناخذلنا قهوه من ستاربكس - نتسوق - نتعشا )

اما يوم الجمعه فـ يعتبر يوم ( الزواره العالمي )
نزور بيت جدتي وكل خوالي و خالاتي هناك و كل جمعه يكون العشا على واحد منهم
الا انا وخواتي عايشين اميرات وممنوع يكون العشا علينا > كف

اما يوم السبت فـ هاليوم لـ نفسي فقط
يعني اروح النادي بعدها الكوافير بعدها ارجع البيت واضبط لي ( الجاكوزي )
واحط لي ماسكات لـ شعري و وجهي و استرخي


حاليا انا ماسكه البجيه لاني فقدت كل هالاشياء مع الحجر المنزلي و حظر التجول
الله يزيل هالوباء عناا و نرد نعيش حياتنا الطبيعيه يارب


.
.

​

 

[R E E M]

.
.

احس من زمان ما كتبت تدوبنه مع ان اخر تدوينه من اسبوع تقريبا
المهم قبل لا ابلش تدوينة اليوم :

خملت قسم المدونات
مدونة @R E E M مدونتي المفضله

يااخي هالبنت كمية حب و حيل اخجلتني والله
لووف يوووو تسنييييم




أنا وحده كانت هوايتي و موهبتي الوحيده منذ الطفوله الى أخر سنه من الثانويه تقريبا
هي رسم الشخصيات الكرتونيه او بالأخص ( شخصيات الأنمي )
و كنت معروفه عند أهلي و صحباتي حبي لرسم الانمي و كنت اسوي انميات من خيالي الواسع
وكان عندي طاوله مخصصه للرسم و قابله للتنقل ( صغيره الحجم تقريبا و خفيفه )
انتقل فيها بأرجاء البيت و مرات آخذها ببيت جدتي

المهم الله يسلمكم من دخلت الجامعه وانشغلت بالحياه الدراسيه و غيرها تركت الرسم نهائيا
وحاليا صارلي 10 سنين تاركتها مع اني اشوف فيديوات عن الرسامين خصوصا الي يرسمون الانمي
بس فكرت هالفتره و دام حجر منزلي و حظر تجول وملل وماكو شي أسويه
ان أرجع للرسم بالتدريج
واحلى شي ان اختي عندها كل ادوات الرسم لان ماشاءالله رسامه جدا ماهره برسم الأشياء الغريبه
( راح أعرضها عليكم بعدين )
فـ أخذت الألوان الخشبيه و أقلام الرصاص والمستلزمات الكامله للرسم وقمت أرسم
واللي شجعني على الرسم واني ارجع له أي هالموضوع

✎ ❞ تحدي رسم ????? ????❝ ✎

وهذي مشاركاتي فيها

^ شرايكم فيني وانا راسمه دبدوبنا اللطيف المنسدح > كف

+

أما هذي الرسمه رسمتها أمس الصبح و صورتها بالسناب ولاقت الكثير من الاستحسان

انشاءالله ناويه اني ارسم بشكل يومي دام اني فاضيه
ومنها بعد اني استعيد موهبة الرسم و أطورها أكثر

.
.
​

 

[R E E M]

.
.
.

اليوم جايبة لكم 4 صور مع تعليق
يمثلون وضعي حرفيا هالفتره

^ بالضبط شكلي لما افتح استديو الصور بجوالي و اقعد اشوف صورنا و فيديواتنا
وطبعا مستحيل اتنكد بروحي فـ رحت نكدت على صديقتي و ما قصرت للأمانه > كف

^ بمووتتت حرفياا يمثلنا انا وخواتي واحنا مقابلين بعض طول هالفتره

^ هذا الله يسلمكم يمثلني انا و صديقتي الحامل لما كل وحده تشتكي حق الثانيه
انا اشتكي من الوضع و الروتين الممل و صديقتي تشتكي من الحمل و من اهل زوجها

^ هذي انا راح أطبقها ان شاءالله بس خل تعدي هالفتره على خير و تختفي الكورونا > كف



.
.


​

 

[R E E M]

السؤال هو : انتو ضد الإرتباط او لا ؟
فكرة " الإرتباط " سواء أكانت هذه العلاقة زواج او حب .

انا ما راح اتكلم عن سالفة الارتباط
بتكلم عن سالفة الزواج بشكل عام سواء اكان عن حب او لا !


انا بالنسبه لي اشوف ان الزواج هو سنة الحياه لكن مو ضروري او شرط مشروط على اي احد
فيه ناس تشوف ان الزواج و الارتباط هدف من اهدافهم وللاسف اغلبهم يكون هذا هدفهم الوحيد في الحياه
و شفت كثير نماذج من هالناس في حياتي الواقعية .


انا عمري حاليا 27 و هو يعتبر سن زواج و مسؤوليه بنظرة اغلب المجتمعات العربية
وان اللي ما تتزوج بهالسن فـ قريب راح تدخل دائرة ( العنوسه ) اللي اعتبرها كلمه همجيه جدا
وفيه ناس للاسف قاعده تضايقني بخصوص هالموضوع و فيه منهم يطلقون علي هاللقب من باب المزح
مع ان المشكله ان فيه كثير بعمري و اكبر مني للحين ما ارتبطوا و تزوجوا


الزواج قسمه و نصيب وانا اكثر من مره تجيني عروض زواج لكن ربي ما انكتب لي بولا واحد فيهم
او اني للحين ما لقيت الشخص المناسب لي واللي اقدر اني اكمل حياتي معاه !
انا مو ضد الزواج و لا مع الزواج انا مع راحتي و سعادتي وشنو الانسب لي بالنهايه !


يمكن الزواج يكون مناسب لي وراح يغير كثير اشياء فيني للاحسن و راح اشوف راحتي و سعادتي فيه
ويمكن الزواج يكون الخيار الخاطئ لي فـ ادخل بدوامه من المشاكل و الصراعات اللي قاعده اشوفها حاليا مع ناس قراب مني !

بالنهايه ربي راح يكتب لي الخيار الانسب لي والله يرزقني الخيار اللي يسعدني سواء اكان بالارتباط او لا
والحمدلله اني انسانه متصالحه جدا مع نفسي و انسانه استقلاليه ولا يأثر فيني نهائيا موضوع الزواج
سواء اذا تزوجت او ظليت انسانه ( غير مرتبطه ) للأبد !
.
.
.
​