مدونة راقية أنثى نادره من عبّق الورد خُلقت ♡ (8 زائر)

[R E E M]

#فعالية_الأسبوع

شارِكنا روتينَك الرَمضانيّ لهذه السَنة في ظِل أوضاع كورونا الحاليّة.

كنت متوقعه ان الوضع راح يكون كئيب جدا او ان ما راح أحس بجو رمضان هالسنه
لكن الحمدلله رغم اوضاع الكورونا والحكره بالبيت و حظر التجول وماكو مناسبات و زوارات قدرت أني اعوض هالأجواء مع أهلي بالبيت

أول شي أضفنا الزينه الرمضانيه بالبيت بالأضافه الى لوحه صغيره نكتب فيها أدعيه وكل يوم له دعاء مخصص
وهذي بعض من صور الأجواء الرمضانيه في البيت

والحمدلله روتيني الرمضاني اللي متعوده عليه كل سنه من قراءة قرآن و صلاة التراويح و جمعة أبوي وخواتي
ما تغيرت وهذا اهم شي عندي حتى لو كانت الاوضاع الخارجيه جدا محزنه

رمضانكم كريم و عسى الله يعوده علينا كل سنه بخير و صحه و عافيه و مع وجود أهلنا و كل أحبابنا
و عسى الله يتقبل منا صيامنا و قيامنا في هذا الشهر المبارك

.
.
.




​

 

[R E E M]

.
.
هاي قااايز ر

اليوم الصبح كنت اسولف مع جميلتي @B E B E
وألقيت نظره على اخر تدوينه لها واللي كانت عباره عن تحدي
وفكرته القضاء على العجز و الكسل من اجل تحقيق كثير من الاشياء
اللي نبيها و شجعتني اني اسوي هالتحدي

فـ عشان جذي قلت لازم اجرب هالتحدي لاني من النوع اللي يحب التحديات و عشان اقدر انجز الاشياء اللي من زمان ودي انجزها اشلي2


تحدي العجز لشهر 5:

التحدي الشهري :

١-اختم القرآن ختمه واحده بإذن الله
٢- ارجع حق تماريني الرياضيه بالاستعانه بالادوات الرياضيه اللي متوفره عندي بالبيت
٣ - انزل موضوع بقسمي
٤ - أطلب لي ماسكات للوجه و الشعر من موقع ( بوتيكات )
٥- أصمم أطقم مجانيه لطلبات الوكاله

التحدي الأسبوعي :

١ - اغير ترتيب غرفتي
٢ - أرسم رسمه رمضانيه حق المجله
٣ - اسوي كيكة البسكوت اللي كل رمضان اسويها
٤ - اروح الجمعيه منها اشتري لي جم شغله و منها احرك سيارتي شوي لان صارلي مده ما ركبتها
٥ - أنشط قسمي اكثر و اكثر

.
.

حيل متحمسه اني أطبقهم كلهم و ان شاءالله عاد ما اسحب عليهم
ولي عوده بإذن الله بالأشياء اللي تم تحقيقها بنجاح
.
.
​

 

[R E E M]

.
.
.

‏اللهم إنك أعطيتني خير الأصدقاء في الدنيا دون أن أسألك، فلا تحرمني من صحبتهم في الجنة
اللهم أسعدهم وفرح قلوبهم وفرج همومهم وحقق لهم أمنياتهم واجعل الجنة مقرًا لهم
اللهم لا ترد دعوتي فإنني فيك أحبهم


^
هالدعاء يشمل صديقاتي في التون بعد

.
.

​

 

[R E E M]

.
.

حيل فخوره بكوني معلمه مؤثره في نفوس طالباتي
و الحمدلله ان ثمرة تعبي و جهدي في جعلهم طالبات صالحات يسعوون للخير ويفكرون كيف يسعدون
غيرهم و سعيده جداً انهم اذكروني بهالهديه العظيمه

- ملاحظه : هذي طالبتي درستها من سنتين وللحين ذاكرتني
.
.

​

 

[R E E M]

^

تم تغيير هيدر المدونه بنجاح
الصراحه من زمان و انا ناويه أغيره لأن الهيدر الأول كان جدا بسيط
وصممته ببداياتي في التصميم

وبس والله قلت اسوي نيولوك حق مدونتي العزيزه
.
.
.

​

 

[R E E M]

بكل مطرح في أنا وأنت سوا
في ذكرياتي العالقة بماضي الهوى
قلبي صفي مجروح مش لاقي دوا
يا بموت عإيد الوفا يا بقتلك


^
حرفياً الاغنيه جايبه راسي ومن نزلت أمس وانا اسمعها و عدتها فوق ا00 مره
من كثر ما احساس إليسا قووي بهالاغنيه


طبعا محد فاهمني حالياً الا @Teddy Bear @Angel Haru
من امس واحنا نصيح مع بعض من جمال الاغنيه

.
.

​

 

[R E E M]

بموووتت الفيديو قمه في الابداع والله مت متتت ضحك
يمثلنا انا و @F A N C Y لما نداحر بعض
اللي لفت انتباهي ان شخصيتي حاطه ايلاينر وأنا اهم شي عندي بالمكياج الايلاينر
أما الاصوات تحفه تحفه فطست ضحك وربي
الصراحه حيل حبيت الفيديو و ابدعتوا فيه شكرا لكم
@SKY NET
@Chris
@Failed Painter

.
.
.
​

 

[R E E M]

.
.
.

هالمسلسل اسطوري بمعنى الكلمه يتكون من 6 مواسم وكل موسم اقوى من اللي قبله
واللي ما تابعه ضاع نص عمره

محتوى مخفي: القصه

أناليس كيتينغ هي أستاذة قانون بارزة ومحامية جرائم جنائية في جامعة ميدلتون. اختارت خمسة طلاب للتدرب بشركتها: ويس غيبنز، كونور والش، ميكايلا برات، آشر ميلستون، ولورال كاستيلو. ليعملوا مع موظفي أناليس المحاميين الشركاء فرانك ديلفينو، وبوني وينتربوتوم

أمس خلصته والحلقه الاخيره لعبت بنفسيتي لعب
ومن زمان ما تأثرت و بجيت على مسلسل كثر هالمسلسل والله

أكثر لقطه بجيت عليها حرفيا :

Bonnie and Frank's death



ودي أقولكم تابعوه بس أحس حرقت عليكم
المهم من الحين بديت افقد هالمسلسل و الكاست اللي فيه
وللحين مكتئبه من نهاية المسلسل
.
.

​

 

[R E E M]

.
.

^
والله مادري اذا صاحب هذي تغريده يمزح و لا من صجه
قسم بالله مت ضحك على التخلف
لكن بعلق عليه خصوصا ان فيه فئه كبيره من الناس اللي من هالنوع
كلنا ندري ان ( صوت المرأه عوره ) لكن اغلبنا فاهم هالشي غلط و بطريقه مبالغ فيها
خصوصا اللي يقولون ( ما يصير المرأه تكلم الرجال او ان الرجال يسمع صوتها )
عذرا بس اللي عنده هالمبدأ جدا متخلف و يعتبر آفه على المجتمع
احنا عايشين مع بعض و نتعامل مع بعض بشكل يومي سواء بمكان العمل او اي مكان
فـ شي طبيعي راح يكون فيه أخذ و عطا بالكلام لكن بحدود و أدب !
حتى مثلا اذا رحنا مطعم او كافيه او قام الشخص بتقديم المساعده لي
فـ شي طبيعي و من تلقاء نفسنا أيضا انه نشكره بصوت مسموع
انا ادري ان اغلب الرجال او خلوني اقول
( الرجال المتعلمين و الفاهميين والواعيين )
مستحيل نظرتهم للمرأه تكون بهالسوء و هالتخلف
فـ مشكله جدا كبيره لما يكونون بيينا هالفئه التافهه و الجاهله واللي ما عندهم مواضيع غير
ان عيب المرأه تسوي كذا و كذاا .. ومتجاهلين المواضيع و الأمور الاكثر اهميه !
واتمنى من كل قلبي ان هالظاهره تزول بأقرب وقت
لأن احنا بعصر تطور و تفتح مش بعصر الجاهليه و وأد البنات
وهم عيب انكم تفكرون ان كل الرجال تفكيرهم جذي لأن متأكده ان القله القليله من الرجال
( اللي مو مضبوطين و المتخلفين )
اهما اللي يفكرون جذي و أكثر بعد فـ لا نعمم بهالشي رجاءا !!

وبس والله اهوا صح ان فيه جعبتي الكثير من الكلام بخصوص هالموضوع بس مابي اثير الجدل أكثر
لكن ادري شريحه كبيره من النساء و الرجال يأيدون اللي قلته

.
.

​

 

[R E E M]

.
.

أصاله بهالاغنيه اختصرت شعوري لما قالت
" كل شي بنظرة عيوني تغيّر "

لأن الاغلب الاشخاص اللي كنت اشوفهم بنظره مختلفه و مميزه تغيرت نظرتي لهم وتغيرت مكانتهم وقمت اشوفهم شي جداً عادي
و بنفس الوقت الاشخاص اللي كنت اشوفهم عاديين اختلفت نظرتي لهم و صرت اشوفهم بنظرة اختلاف و تميز و صار لهم مكانه كبيره بقلبي و كل هذا بفتره زمنيه جداً قصيره !

بالنهايه

" ‏الأفعال هي من تتولى أمر ترتيب
‏مقامات الأشخاص في قلوبنا "

.
.
​