مدونة مميزة روح عتيقة || Vintage Soul ~ (2 زائر)

[Meoω❀]

She may be young
But she only likes OLD THINGS

8th of March 2020​

 

[Meoω❀]

كيفكم يا احلى عالم ..من بعد شهر الا شوي من افتتاح المدونة أخيراً قررت أطل بأول تدوينة
وان شاء الله لا أنا أسحب عليها وولا أنتو تسحبوا علي ..

مين أنا؟
متل ما هو واضح من العنوان ومن ستايل المدونة أنا مجرد انسانة غريبة أطوار روحي عتيقة
مهووسة بالثقافة القديمة والعصر الفكتوري والادواردي و الهوليود القديمة وأي شي اله علاقة بالكلاسيك والأشياء الفنتج بشكل عام..
بحب الفاشن القديم وعندي معرفة منيحة بستايل كل عقد أو كل حقبة من الزمن وخصوصتاً باوروبا..

ولكن بنفس الوقت أنا up-to-date يعني حبي للقديم مو معناه أني "دقة قديمة"
بالعكس أنا أكيد بستعمل التكنولوجيا والأجهزة الحديثة وبتابع أغاني بوب ومسلسلات وأفلام جديدة..
بس بنفس الوقت ما بنكر أنه بينطبق علي مقولة: "I was born in the wrong generation"

~~
من كتر الحماس نسيت أحكيلكم اسمي..
اسمي روعة عمري 21 سنة ونص - تاريخ ميلادي 3/8/1998 - برج الأسد
أنا فلسطينية من مواليد الامارات ومقيمة فيها
بدرس تصميم داخلي وليس هندسة ديكور "ترا بيفرقوا" وحالياً أنا بالسنة التالتة وضايلي سنة وبتخرج..
~~

أنا انسانة انطوائية بحب الوحدة ولكن بنفس الوقت عاملة متل المي يعني باخد أي شكل على حسب شخصية المتحدث معي
يعني أحياناً بكون قاعدة مع جماعة من الناس بقدر أجاريهم وأضحك معهم وأفتح سوالف معهم..
بجاري الي دمهم خفيف.. وبجاري الناس الي تعون حكم وآراء بعيداً عن المزح
مش قصدي أني بمية وجه .. ?بس بعرف أحكي مع معظم فصائل البشر

ولكن في بعض الفصائل بتزعجني وما بحب أتعامل معهم نهائياً...
والي همي خفة الدم بتوصل معهم الى حد التفاهة ويكونو - حرفياً - ما بتمر 5 ثواني الا وبيضحكو..
حتى بالأوقات الجدية متل الدراسة مثلاً.. وثقافة السخرية أو "قصف الجبهة"
والبحث عن الكوميديا بكل مواقف الحياة والأحداث... أنه البهجة وخفة الدم ضرورية طبعاً ولكن بالأوقات المناسبة ..

هواياتي/مواهبي:

~1~
ما في داعي أحكي عن موهبتي بالرسم خلي مواضيعي بقسم الرسم تحكي عن حالها - الثقة
بس فيكم تشوفو آخر موضوع نزلته بقسم الرسم تكلمت بالمقدمة شوي عن ستايلي وعن الي بحبه:

الختم الاداري - لوحات مياو ║ طبيعة، بورتريه ║ ألوان زيتية، رصاص، رقمي

بما أنّه ما نِزلت مواضيع كتيرة بالقسم بهالشهر ..☹ حابة هيك فجأة أطجّلكم إياها برسماتي القديمة من 2017-2019 ..ض2 وهالموضوع جاهز بالورشة من كتير زمان.. لوحات 2020 خليها لموضوع تاني أحسن? بداية حابة أحكيلكم أنه بورتريه بالرصاص هي أكتر ستايل أنا احترفته وقدرت أثبت جدارتي فيه.. ❤ وبشكل عام أنا...

www.anime-tooon.com

^تفاصيل أكتر عن هالرسمة ولوحات تانية كمان بتلاقوه بالموضوع..
الي بعدو ما رد يروح يرد..

ولكن بشكل عام أنا انسانة بعشق الفن بكل أنواعه من رسم الى موسيقى الى تمثيل الى رقص الى غيره..

~2~
من مواهبي غير الرسم الغناء بحب أغني وصوتي حلو نوعاً ما بس لأنه صرلي سنين ما بتدرب
فمهاراتي خفت شوي.. ولكن بالمجمل بعرف أعمل الhigh notes بسهولة،
وعندي "عرب" صح خفيفة بس حلوة..
ولكن أكيد أنك تكون مغني ناجح بدو يكون عندك مقومات أكتر بكتير من هالأشياء الي ذكرتها فوق لأنها ما بتكفي

تاريخي بانمي تون

معظمكم ما بيعرفني لأني ما تفاعلت بانمي تون من أيام 2017 .. لهالسبب رح أحكيلكم باختصار عن الماضي تاعي..
سجلت بانمي تون القديم بتاريخ 16 أغسطس 2010.. بعدني بتذكر التاريخ كتير منيح .. كان عمري 12 سنة ..
وكنت من أوائل الي سجلو بالمنتدى هاد متل ما شايفين رقم عضويتي..
بشهر 6 سنة 2016 صرت مشرفة ع قسم الرسم وبشهر 10 بنفس السنة صرت مراقبة..



الي وصلو لهون من غير ما يتعبو أو يسحبوا علي كل المحبة الكم
شكراً لكم على القراءة وترقبوا المزيد من التدوينات..

​

 

[Meoω❀]

#فعالية_الشهر

على الرغم من أنه كنت متحمسة أنزللكم تدوينة تانية وكنت مجهزتها وكل شي الا أنه فعالية الشهر هاي صار بدي كتير أشارك فيها..
لأنه أنا بحب وبفتخر بكل مراحل حياتي وبحب أيام الطفولة كتير...❤❤ لهالسبب رح ابلش بذكرياتي وبعدين أفلامي المفضلة...

أفضل ذكريات طفولتي

عندي كتير ذكريات بطفولتي بس يمكن أفضلها هي فترة وجودي بغزة يعني تحديدا بين هالسنين 2006-2009 ...
سافرت ع غزة أول مرة بأواخر 2005 كنت مخلصة صف أول ابتدائي بالامارات..
بتذكر بهداك الوقت غزة كانت متأخرة عن العالم يمكن 20 سنة .. ومع ذلك ... بعترف أنها كانت من أحلى سنين طفولتي..❤

أكتر شغلات بتميز طفولتي هي:

- هوسي بالرسم .. يعني كل الأطفال بيحبو يرسمو بس أنا الموضوع كان عندي لدرجة هوس وادمان وأقعد بالساعات ع الطاولة أرسم..
ما كانت رسماتي بروفيشنال أكيد بس كان مستواي واضح للكل أنه أكبر من ال standards لمستوى الاطفال بشكل عام

- ستروبيري شورت كيك ??? قدي كنت مهووووووسة بهالشخصية لما كنت بالابتدائي !!!..
بتذكر كنت مشهورة بكل الحارة اني مهووسة بستروبيري شورت كيك.. وع قد ما كنت مهووسة فيها
كنت حافظة تفاصيل وجهها وتفاصيل لبسها هي وصاحباتها .. وكنت أرسمهم بكل دقة من غير نقل والكل يتفاجأ مني..
بتذكر مرة كنت بصف تاني "عمري كان 7 سنوات" اجت زميلتي بالمدرسة معها مسطرة عليها رسومات ستروبيري..
وأنا كنت شوي ورح أبكي ع جمال هالمسطرة وع قد ما نفسي فيها .. فهي قالتلي:
"رح أعطيكي هالمسطرة بس بشرط ! ترسميلي بورقة كل الي مرسوم بالمسطرة .."

وأنا ع السريع مسكت ورقة وقلم وقعدت أرسملها وألونلها، لما اعطتني المسطرة ما سدقت من جمالها ..
لدرجة كنت باخدها بكل مكان حتى بالأعراس والحفلات ..

~~
بتذكر بعدها مش بفترة طويلة رسمت الرسمة الكاملة الي كانت بالمسطرة مرة تانية لكن على برنامج الرسام القديم ..
ولكن نقل مو من خيالي .. مع انه نادراً لما كنت أرسم نقل بس واتيفر.....
الشي الوحيد من خيالي هي الشمس الي لابسة نضارات

^^^^رسمت هالرسمة وأنا عمري 7 - 8 سنوات تقريباً ...
بس طبعاً لا تطلعو ع المهارات لأنه أولا كنت صغيرة .. ثانيا رسمتها بالماوس فكان صعب..
طبعاً ما شفيتها أبداً ولا أي شي! رسم حر 100% .. لأنه في ناس
شكّو وقتها ما بعرف ليش مع أنه مستواي مش هلقد كان

- من الأمور الي بتميز طفولتي بغزة هي اللعب مع ولاد وبنات الحارة والحياة القريبة من بعضها .. على الأقل بحارتنا أحنا ..❤
بتذكر رحت ع مدرسة للابتدائي تعرفت فيها ع بنات بعدني لليوم على تواصل معهم ..ومو بس المدرسة..
أصدقاء طفولتي المقربين كانو جيراني وقدي بالعمر تقريبا وبعدنا لليوم على تواصل وعلى علاقة حلوة مع بعض

قعدت بهالحياة الحلوة ل٤ سنين بعدين رجعنا ع الامارات...
على الرغم اني كنت متحمسة بس مريت بحالة اكتئاب لفترة.. وشفت كيف طفولة اختي الصغيرة المملة جدا مقارنة بطفولتي بغزة..❤
بس عادي هياني تعودت ع حياتي بالامارات لمرة تانية وبحاول أستغل كل مرحلة من مراحل حياتي بما يناسبه أحسن استغلال ..
ما بدي أكون طفولية ولا بدي أكون أكبر من عمري ..

حضرت كتير أفلام بحياتي ولكن هلأ رح أحطلكم هلأ قائمة بأكتر خمس أفلام حضرتهم أكتر من 10 مرات
أكتر افلام مفضلين عندي

1-❄ فيلم سنووايت 1938 - ديزني ❄
هاد للعلم أول فيلم انميشن كامل ينعمل بالعالم ...
بصراحة بحب هالفيلم كتير بكل شي فيه لأنه أكتر أنواع الفنون الي بحبها متضمنة فيه..
نوع الرسم أو تصميم أشكال الشخصيات..❤ الاغاني الاوبرالية ... اغاني الYodel الي غنوها الاقزام السبعة.. الTap dance ...
وكل أنواع الفنون الي انعرضت بالفيلم هي تايبي المفضل بالثقافة الفنية وهاد أهم سبب..
تاني شي هو يمكن لأنه أول فيلم ديزني حضرته بحياتي وقت كان عمري ٣ أو ٤ سنين كنت بحضره مع ماما والي ذكريات كتيرة معه...❤
وبتزكر كتار ناس من معارفنا كانو يشبهوني بسنووايت وبنادوني باسمها أحيانا وانا صغيرة لأنه بالزبط تسريحة شعري كان متلها قصير ولونه أسود وبيضا متلها ..

2- فيلم Sound of music 1965
من أكتر الأفلام الي بجد بحبها وبحب أغانيها وبحب كل تفاصيلها...
بتزكر لما حضرته أول مرة مش من كتير زمان يمكن من كم سنة بس..

3- فيلم Secret Garden 1993
فيلم اقتبس من نفس القصة الي اقتُبست منها انمي الحديقة السرية..
كتير فيلم حلو وحالم وأجواء الطبيعة الي فيه بتجنن ❤
شخصية ماري بتشبه شخصيتي وأنا صغيرة الى حد كبير

4- فيلم انمي 2014 When marnie was there
من أكتر الأفلام الي بحب كل تفاصيلها قصتها موسيقاها التصويرية
الشخصيات الانميشن ❤ بجد بنصحكم كلكم تحضروه لو شو ما كان ذوقكم بالأفلام ..
هاد واحد من الأفلام الي تركني فاضية من جوا بجد ...☹

5- فيلم Inside out 2015
هاد واحد من الأفلام الي من أول ما حضرته بطلت أحس بالوحدة نهائيا
لأنه صرت ع طول بحس أنه في خلايا جوات عقلي بتسعى لاسعادي وكائنات بتهتم فيني

.....

وبس هاي كله بتمنى ما تكونو مليتو من كلامي الطويل ..
ومترقبة جدا أني أتابع تدويناتكم المتعلقة بهالفعالية

بشوفكم ع خير ☺
​

 

[Meoω❀]

#فعالية الأسبوع

__________________________________________________

مرحبا كيفكم جماعة شو أخباركم ..

بصراحة أنا انسانة بيتوتية بحب البيت كتير فبحب أقضي الويكند أخلص من رسماتي القديمة الي مبلشاها وبعدني ما خلصتها ..✏
ضروري أخصص وقت خاص للرسم ولو سكتشات صغيرة..
ما تبقى من الويكند بخصصه للدراسة اذا كان عندي دراسة ..
وبالوقت الحالي بظل هالأزمة بحب أقعد وأسهر برا بالحوش أو بالروف فوق أحلى شي بصراحة ..
ولكن قبل الأزمة كنت أحياناً بطلع ع المولات مع حدا من خواتي وبنلف شوي وهيك يعني..
بس بشكل عام بفضل أنه الويكند أقعد بالبيت أكتر.. لأنه بكون تعبانة من دوام الجامعة طول الأسبوع

____________________________________

اليوم حابة أشارككم بآخر رسمة خلصتها الجمعة أمس:✏

هاي الرسمة ما أخدت معي أكتر من 10 ساعات ماكسيمام ولكن على مدار أسبوعين
طبعاً هاي رسم حر فري هاند 100% ما بستعمل طريقة المربعات ولا أي شي ..
كنت بستعمل الطريقة المربعات ببداياتي ولكن تجنبتها من فترة طويلة ..


______________

كنت مخططة من قبل أني أنشر موضوع الجزء التاني من لوحاتي بقسم الرسم..
ولكن ما لقيت تفاعل كبير على الموضوع الأول ونوعاً ما بتفهّم ليش..?
لأنه الموضوع طويل وفيه رسمات كتيرة والناس خصوصتاً أصحاب الردود المميزة بيكسلوا يعلقوا على كل لوحة ..

بتمنى تعجبكم الرسمة .. ويومكم سعيد .. ​

 

[Meoω❀]

كل عام وانتو بخير حبايبي ينعاد عليكم بالصحة ..

ان شاء الله تكونو استمتعتوا بهالعيد ..

ما بتتخيلو قدي متحمسة لمشروع تخرجي رح يكون عن الفنتج والقديم والقصص هاي..ديم
وعملت استبيان لمشروعي ونوعاً ما مستكفية بعدد الردود الي أخدتها ..
بس بحب كتير أعرف رأيكم وأجوبتكم عن تخيلوا يكون في هيك مكان

Vintage Musuem Exhibit

Take this survey powered by surveymonkey.com. Create your own surveys for free.

www.surveymonkey.com

يعني هي تجربة سفر عبر الزمن أكتر بكتير من مجرد متحف أو معرض عادي..
تفاجأت انه معظم الي جاوبو راسلوني انهم متحمسين لهيك فكرة ..
على الرغم من انهم مش كتير interested للفنتج متلي ..

انتو شو رأيكم؟​

 

[Meoω❀]

من أكتر الأشياء الحلوة الي صارت معي هالأسبوع .. هي أني رجعت أحكي مع صديقة طفولتي..❤

السبب الي ما خلانا نحكي مع بعض طول السنين الماضية هي مش بسبب خلاف أو حرب أو أي شي من هالقبيل
لأني والحمدلله دايماً علاقاتي طيبة وعمرو ما صار خلاف بيني وبين أي حد ..☺
السبب الوحيد الي ممكن يبعد علاقاتي مع صحابي هي بُعد المسافات ومرور فترة طويلة ما نحكي..

ذكرت مرة بمدونتي أني قضيت 4 سنين من طفولتي بفلسطين تحديداً بغزة..
وأنا وقتها ما كنت طفلة كتير يعني.. كان عمري ما بين 7 الى 11 سنة ..
يعني تقريباً بتذكر كل شي ..ما كانت طفولتي وقتها مجرد "مرحلة عابرة"
لأنه كانت أكتر فترة شكّلتني كانسانة .. وكل يوم تجربة وأفكار جديدة زي ما بتيجي لأي طفل بهالعمر..
خلال وجودي بغزة كان عمري 8 سنين.. تعرّفت ع صديقتي هاي كانت جارتي بنفس العمارة..
وهي أصغر مني تقريباً بسنة.. وقضينا حوالي 3 سنين مع بعض كأنا خوات ..
بنلبس متل بعض.. بنسهر مع بعض.. وأهالينا بيثقو ببعض ..

من أول ما رجعت الامارات لما بلشت اصير مراهقة على طول بلشت أتعامل مع الفيسبوك وهول القصص..
ولقيت اسمها وضفتها .. كنا نحكي كتير بالبدايات بس مع مشاغل الحياة بطلنا نحكي..
بس بالكتير ضلينا نعايد بعض بأعياد ميلادنا على الأقل..

بس آخر هالكم سنة الأخيرة.. مع أنهم كانو أكتر سنين حسيت حالي Killing it بالجامعة والرسم والمعارض وغيره..
وتقريباً حققت كتير من أحلامي وأنا صغيرة ...
مع ذلك كنت طول الوقت مش راضية وحاسة في شي مطفي جواتي .. وبضل بتأمّل صورنا القديمة واحنا صغار نفسي أحكي معها..
بس لأني انسانة بطبعي شوي انطوائية وبخاف أحس حالي "لزقة ودمي تقيل" ع حدا فكنت بخاف أبادر أحكي معها..☹
طول هالـ 11 سنة كل يوم فترة العصريات بيزكرني بأيام لما كنا بنلعب ع الروف..
وفترة المغرب بيزكرني بخيالاتنا الواسعة ولما كنا نحضر رسومات سبيستون وناكل اندومي..

كان عيد ميلادها قبل كم يوم .. وانا كالعادة أكيد بعايدها ...
بس هالمرة ولأول مرة أبعتلها صورة قديمة النا ما كانت هي شايفاها من قبل.. وهي انصدمت ..
وقلتلها: بعد عندي فضايح تانية .. ومن بعدها صار في محادثة طويلة بيناتنا وانا تفاجأِت انها بتتزكر كل شي..
وكمان انه طفولتها معي أثرت فيها كتير لليوم .. أنا انصدمت بصراحة ..
لأني كل فكري انّي كنت مجرد "مرحلة عابرة" بحياتها .. طلعت هي كمان كانت بتبادلني نفس الشعور..
وصرنا نحكي سوا video call بالساعات ومن وقتها ونحنا متفقين أنه نرجع زي أول وصرنا نحكي كل يوم عل واتس..

استرجعنا ذكريات زمان يالله قدي خيالنا كان واااااسع واهتماماتنا مشتركة .. احنا التنتين بنحب سبيستون ..
واحنا التنتين ضلينا طفوليات نوعاً ما لحتى مرحلة الثانوية ..اكس واحنا التنتين بنحب العرايس والألعاب..
كان عنا صحاب تانيين .. بس ما كانو متلنا اهتماماتهم كانت مختلفة عنا .. وهاد الي كان بميز علاقتي معها..​

 

[Meoω❀]

تبقى من الزمن 10 أيام وبعدها رح أتخرج من الجامعة
ومش قادرة أصبر لحد ما أوريكم مشروع تخرجي الي صرلي أكتر من سنة بشتغل عليه..

ادعولي من هون لوقت المناقشة ​

 

[Meoω❀]

عضوة مغبرة ما اتوقع حدا بيتذكرها تمر من هنا

بخصوص الأبديت الجديد للمنتدى خانة "مشاركاتي" بالبروفايل ..
كمية الفضايح كل الردود الي كتبتها بكل الاقسام سنة 2016 وقبل موجودة !
عنجد كأني بقرأ ردود شخص غريب مش أنا .....!

كمية الكرنج ​

 

[Meoω❀]

مشاهدة المرفق 8408​

​

بعد يومين تقريباً رح يكون مر 5 سنوات على أكتر موضوع أسطوري عملته بالمنتدى.. ​

الحقيقة ما كنت ممكن أتذكر هالشي لولا الفيسبوك ذكرني أني نزلت بوست الرسمة قبل 5 سنوات..​

الختم الذهبي الفن يمسح عن الروح غبآر الحيآة | الرسم السالب Negative Drawing​

لهلأ مش قادرة أصدق شغلتين:
1- أنه هالموضوع ما أخد الختم الاداري ..
2- أنه صار بيفصلني بين اليوم وبين ما نزلت هالموضوع هالكم من السنين ! ( 5 سنوات )
_____________________



ما أتوقع الأعضاء بيتذكرو هالموضوع .. (بس الي بيتذكروه بجد كل المحبة مني لالكم ..)
بس اليوم .. لما أتذكر انه كان عمري فقط 18 سنة لما رسمت هالرسمة، بحس بمشاعر فخر وسعادة بنفس الوقت...
لما الشخص يكون عمره 18 سنة ما بيكون حاسس حاله صغير .. بس اليوم لما أتذكر نفسي
وأتذكر طريقة تفكيري بهداك الوقت عنجد كنت طفلة كمان مش بس صبية صغيرة ..

بجد ما في أحلى من أنه الواحد بسن صغير يعمل انجازات بمستوى حلو..
​

 

[Meoω❀]

مشاهدة المرفق 8468
مرحبا يا أهل القرن الواحد والعشرين ..

اليوم حابة أشارككم ذكرياتي الخاصة هنا بالمنتدى فترة 2016 ..
الصور الي رح أعرضها هنا هي نوادر اكتشفتها بعد ما أخيراً اجاني النشاط وصلحت شاشة لابتوبي القديم بعد ما انكسرت من أيام 2017
يعني متخيلين 4 سنوات اللابتوب شاشته مكسورة وانا مكسلة أصلحه عشان كنت الريدي شارية لابتوب جديد للجامعة ..

المهم نيجي للصور:

^هاي صورتي لما كنت عضوة مميزة أخدتها قبل ما أصير مشرفة ..
الصورة هاي تصورت بشهر 6 سنة 2016 يعني بعد تخرجي من الثانوية مباشرة ..

بتذكر قد ما كنت بنكر وبمثل انه "آخر همي أكون بالطاقم" ومدري شو ... بس كنت بكذب .. >بعترف بعد 5 سنوات
لأنه لليوم ما بنسى كيف ضليت سهرانة لل5 الفجر وكل البيت نايم بستنى يصير لوني زهري
وخصوصاً بعد ما أرسلولي رسالة الترشيح للاشراف والله اعلم وانا مش حاسة بحالي صرت انط من الفرحة ..
قعدت أستنى اللحظة الي يصير اسمي فيها لونه زهري.. ما بنسى قدي كانت من أحلى الليالي والله ..






_________

^وأخيراً بعد ما صرت مشرفة .. كمية السعااادة الي كنت فيها لا توووووصف ..
وخصوصاً بعد المأساة الي كنت فيها فترة الثانوية كانت تجربة كتير بتجنن أني أحس نفسي أني مسؤولة على شي حتى لو على
مجرد قسم بمنتدى .. الثقة الي اعطوني اياها كانت بتعنيلي الكتير وخصوصاً لصبية مراهقة عمرها 17 سنة ..

طبعاً بالنسبة للرمزية الي كنت حطاها هي لممثلة كنت ولازلت بحبها اسمها شيرلي تمبل ..
أكيد سمعتو عن عصير شيرلي تمبل بالمقاهي بس الي ما بتعرفوه انه هالعصير اتسمى باسم هاي الممثلة ...




ما اتوقع حدا فيكو بيهتم .. المهم...

____
هي صور اضافية الي لما كنت مشرفة مع رمزياتي القديمة الي لقيتها بملف موجود باللابتوب اسمه "المنتدى" :

الصورة الي على اليمين الرمزية الي كنت لابساها كنت ماخداها من احدى مشاريع فريق التصميم اذا ما خانتني الذاكرة ..
لأنه بتذكر كمية اعضاء رهيبة استعملو رمزيات هداك الموضوع الي ما بعرف وينه هلأ..
عنجد قدي اشتقت لهيك رمزيات بسيطة ولأعمال فريق التصميم ..

وبالنسبة للصورة الي على اليسار حتى لقيت الرمزية تعتها :

كيووووت ...

قدي اشتقت لأيام كنا نصمم أو نطلب من الوكالات يصممولنا ألقاب على كيفنا ..
أتوقع اليوم الدنيا تغيرت وصار في ألقاب جاهزة ..
للأسف قد ما حاولت أدور ع الرمزية الي كنت حطاها بهالصور ما لقيت .. بس لقيت الGIF تاعت الصورة ..

اللي بتذكرو أنه بهديك الفترة صرت حاطة ببالي رتبة الرقابة .. فغيرت الرمزية وخليت اسم مياو لون سماوي..

يمكن في قانون الجذب بالموضوع مدري بعد كم يوم من هالرمزية صحيت الفجر زي الملمسة فتحت المنتدى
وبدون سابق انذار بلاقي حالي صرت مراقبة ..

يا جماعة، لو بدي أقعد أوصفلكم كمية الفرحة الي فرحتها تقولو كأني كسبت الدنيا كلها ..
لدرجة اني قمت من السرير رحت عزلت البيت كله من كتر ما انا مبسوطة ..

وآل رحت بمدونتي كتبت كلام بما معناه:
انه يسلمو لكل الي باركولي رتبة الرقابة "زيادة مسؤوليات وقرف" ومش عارفة شو ~ انه آخر همي يعني ..

ما بعرف والله ليش كنت أمثل على الأعضاء اني مش مهتمة وانا بالحقيقة طايرة من الفرحة ..
يا عمي والله ما رح ينقصني شي لو كنت صريحة وعبرت عن مشاعري بصراحة

هي صورة تانية لالي وانا مراقبة بعد ما غيرو أيقونات الرتب:

طبعاً أنا مش من معجبين الأيقونات الرسمية .. وهيني صرت بالعشرينيات وبعدني بفضل الايقونات الطفولية أكتر..
ما بعرف ليه يمكن عشان بحن لأيام المنتدى القديم كمان تاع سنة 2012 وقبل ... كانو معتمدين رمزيات طفولية..



_____
من الأمور الي اكتشفتها بالملف كمان هاي الصورة:

بتذكر أني رسمتها للمهرجان التوني سنة 2017 ..
وبعدها اختفيت من المنتدى




_____

الشغلة الأخيرة الي حابة أشاركهاا معكم هي أنه والله ولفت الدنيا وصرت اشوف ناس بتستعمل الايموجي تاعي
= مياو + 1

أتوقع آل عملتها مناحة أنه حطولي ايموجي باسمي ومش عارفة شو
والادارة عاملوني ع قد عقلي وحطوه

للفانز هي الصورة الأصلية للايموجي :

_____



متخيلين هالصور آخر مرة شفتها وأنا عمري 18 ! اليوم عمري 23 يعني عنجد هالملف
رجعلي ذكريات المرحلة الي كانت بين الثانوية والجامعة ..
أحلى أيام بحياتي .. كان المنتدى ماخد حيز كبير من وقتي.. وكنت ملاقية وقت أكتر لاهتماماتي..


شكراً لكم على حسن متابعتكم والى اللقاء نار1​