مدونة راقية في مٌحادثة عميقة مع " الفوضى _ (6 زائر)

[Selene]

-

يمكن تضحكوا عليي
بس انا مبسوطة كتيييير لأني شفت اليوم بشعري اول شيبة

و طويلة يعني لو ما كان شعري متسشور ما كنت انتبهت عليها
يعني هي طالعة من زماااان و ما ركزت عليها

بس اليوم رح سجل بالتاريخ 09.05.2025 شفت اول شيباية بشعري

و هي علامة قوية الي

عم تحكيلي لا تخافي زينة من المجهول , كوني شجاعة و اندفعي للشغلات الي كنتي دايما
تخافي تعمليها, جربي شغلات جديدة , افشلي و اخطأي

لأن بالاخير رح نموت و محدا رح يتذكر شي

احتجت اني شوف الخصلة و سبحان الله كأن الله خلاني شوفها بهل الوقت بالذات مع انها طالعة من زمااان كونها مع طول شعري

كنت محتاجة اتذكر انو الواحد رح يكبر , و رح يختير و رح يموت
كنت محتاجة اتذكر انو اليوم الي بيجي مارح ينعاد نفسو مرتين
و اليوم انا عايشة احتمال بكرا موت

فليه لضيع كل يوم بشغلات تافهة و سلبية ؟

و ليه الواحد يحمل السلم بالعرض, يخاف و يفكر كتير لقدام
خاصةَ بهل الفترة الحساسة الي عم مر فيها , انا بسميها المرحلة الانتقالية
من حياة الوردية للحياة الواقعية

و مبسوطة بهل الشي بالرغم من وجود الضغط النفسي فيها
رح خليها للخصلة مشان كلما شوفها تذكرني اني ما خاف من المجهول
نفس ما طلعت هي من المجهول

هي علامة و فال حلو عليي

 

[Selene]

-




POV : البس الفضفاض, الطويل
IS THE NEW LUXURY

 

[Selene]

-

الاسبوع الماضي كنت عند اخي , واخي عندو تراس كبير
و بهل التراس عندو صمديات قزاز ملونة كديكور

نفس اشكال سنافر و الفطر و هيك شغلات
بس لأن بضلوا برا ف لونن خرب , منو تقشر منو بهت

ف حكالي تعي جدديلي الوانن , و هو جايب الوان اكرلك

لما بلشت لونن يالله شو رجعتلي ذكريات مع الوان الاكرلك

و الفراشي و المي و الدمج , اخدت مني اول قطعة كتير وقت
كنت عم حاول طلعا حقيقية بس ما عجبتني النتيجة لأن كان بدي
ياها تطلع كأنها طالعة من انمي هههههههههه

يعني ما كان بدي استخدم الوان كتير واقعية بس اشتياقي للألوان
و الدمج هو الي خلاني ميل لهل النوع

المرة الجاية رح حاول بسط قد ما اقدر و ما اعمل تدرجات بالالوان
خلص بس بالوان قوس قزح بدون دمج تمام زينة ؟ اي تمام

اخر شي رح تشوفوني دمجت مليون لون و طلع معي مليون درجة
و بوصل بعد ساعة بحكي لحالي ( يالله ايمت رح خلص ابتلشت )

اي اي , نفس ما يصير معي بالتصميم لما ابدا ما بعرف ايمت خلص

بضل زيد بضل زيد

والله ياريت لو يكون في مادة بالجامعة تعلمنا ايمت نخلص

اذا تذكرت رح صورلكن تلويني عليهم , انا صايرة من كتر ما بكون مبسوطة
بأي شي بنسى صور

مشان هيك لما كون لابسة كتير حلو بنسى صور لأن بكون مبسوطة بحالي
لما كون مسافرة و مبسوطة بنسى صور لنفس السبب

الي متلي يحط اضحكني لنعرف بعض ​

 

[Selene]

لما كنت بالعشرينات كنت استغرب من الي بيعتنوا ببشرتن وبخصصوا روتين ممكن يوصل لنص ساعة كل يوم

ان كان صبح ومسا او بس صبح او بس مسا انو كنت حس كتييير بيستهلك طاقة و بياخد وقت

كنت احكي ببالي ما بتخيل لما ارجع من مشوار تعبانة فكر اني شيل الميكب لا كنت نام فيه !

او اصحى من النوم مااا طيق غسسل وجهي وياما كنت اكل بهادل من امي مشان بس غسيل الوجه ( غسيل عادي انو صحيت من النوم مو من الميكب )

ما كنت فكر كيف ممكن يصير وجهي لان صغيرة ما كنت فكر لبعد خطوة حتى

بتعرفوا هالكم سنة الي مضوا بديت اتثقف بعالم البشرة والعناية فيها، مابعرف ليه وكيف؟

اختي حكتلي تدربي من هلأ تقعدي قدام المراية كل يوم بس لتحطي كريم ترطيب صباحي و مرة مسائي

طبعاً هاد مو روتين للبشرة بس كان مجرد تهيئة نفسي اني اقعد وقت اطول بالمستقبل لان روتين العناية مرات بكون ٤/٥ خطوات

هاد غير تثقفت علمياً بالمصطلحات الكيميائية المفيدة للبشرة وشو فايدة كل مكون و شو بيعمل وليه منستخدمو؟ وهل بالاساس بشرتي بتحتاجه ؟

ما كنت اعرف شو هاد التونر. متت متت لاعرف شو هاد التونر. كنت فكرو كريم مائي هيك شي قام طلع مي فيها معالجات كيميائية حسب بشرتي شو بتحتاج. بهيىء البشرة قبل ما حط السيروم و هو بكون اول خطوة بعد التنظيف بالغسول . اغلب التونرات بتهدىء البشرة بعد الغسول لتهيء البشرة اني حط عليها كريمات/سيرومات و اهم شي الميكب اذا بدي حط ميكب

و مصطلح double cleansing ما كنت اعرف شو هو. هلأ من اسمو شي مدبل مرتين قلت معقول غسل وشي مرتين؟ وليه ؟ قام طلع فعلاً نغسل الوجه مرتين هو الاصل بكون مرة بغسول زيتي بدوب الميكب الثقيل بعدين منغسل الوجه بعدين منستخدم غسول عادي . انو بهل الخطوة بيطلع المكيب من البشرة ١٠٠٪؜ و شي عرفتو عن جديد انو الميكب الي مكوناته بيحتوي على السيليكون هو الي بيحتاج هالنوع من التنظيف لان بيدخل جوا المسام وبسكرها مشان هيك هو افضل نوع للبشرات الدهنية. ( لما يدخل المسام و يسكرها ف بقلل البشرة من انتاج الزيوت ) بس بشكل عام هو ع الحالتين مفيد لاي نوع مكياج بس اكتر شي للسيليكوني و الثقيل

بس عرفت كمان مو ضروري اول خطوة غسول زيتي عادي لو غسلت وجهي مرتين بالغسول العادي و حتى عادي لو مرة لو المكياج ما كان ثقيل او الفاونديشن ما كان فل كفر يعني تبع استخدام يومي بكون قوامه اخف من تبع المناسبات مثلاً

عرفت كمان انو كريم الترطيب مابصير يكون الصباحي هو نفسو المسائي او العكس. قوامه بيختلف الصباحي بكون اخف و المسائي اثقل بالغالب. الصباحي بكون فيه ترطيب اكتر كون هو مخصص انو يهيىء البشرة للجو الخارجي و اغلب الكريمات الصباحية فيها مكونات تخفف اضرار الشمس و اكتر ترطيب. بالنسبة للمسائي بكون قوامه اثقل وفيو مكونات مهدئة ، مع ترطيب اكيد بس مو نفس تركيز الصباحي ومكونات ما بتنحط الا المسا ليه؟ لانها ممكن تتفاعل مع اشعة الشمس فبكون افضل وقت انها تنحط المسا

عرفت كمان انو ما بصير لما اطلع من الشاور ما رطب البشرة لانها بتكون جافة تماماً، للامانة ماكنت حس بهل الشي الا لبعد ما بلشت رطب بشرتي صرت حس بفرق و حس بمعنى كلمة جافة! و تصير خدودي وردييات لما حط كريم المسائي كأنها بتحكيلي شكراً انك اعتنيتي فيني

عرفت انو لازم واقي شمس وللامانة مابطيق حط واقي لان متل ما بحطو لازم لازم شيلو المسا و بغسول حتى حمام ( شاور ) مابصير قال ما بروح كامل و مو منيح لو الواقي ضل ع البشرة او بواقي الواقي

بغض النظر عن ما سبق ، انا لهلأ مو مقتنعة بفكرة تكون بشرتي بيضة

التشمس ( tanning ) بسبب ترهل بالمستقبل بس مستحيل ما اتشمس و عم اعمل كل جهدي انو ما اترهل من خلال الرياضة الي هالسنة كملت 15 سنة فيها

اوكي في زيوت تشميس مع واقي بس مع هيك التعرض للشمس بسبب ترهل

هالشي الوحيد الي عرفتو و تأكدت من صحتو ومع هيك مارح اعملو. ممكن اني جيب زيت مع واقي ( قبل ما كنت جيب مع واقي ) بس اكتر من هيك لا

الحياة عنجد حلوة كيف بتتغير اهتماماتنا. قبل ١٠ سنين ما كنت مستعدة اقعد ٥ دقايق قدام المراية هلأ صرت اقعد بالنص ساعة شي حط سيروم شي كريمات شي كريم عيون ومبسووووطة
صح مانن منتجات محترفة. بس هاد اول الطريق للاحتراف واني اشتري منتجات بريميوم متل ما بيحكوا. بيحكوا اول خطوة بالروتين العناية مو المنتجات لا اول خطوة هو انو البني ادم يقدر يقعد قدام المراية يومياً مرتين الصبح والمسا ويخصص وقت لبشرتو

و فعلاً اختي كان معها حق لما حكتلي تدربي ع كريم واحد حطيه كل يوم لما يخلص زيدي عدد منتجات العناية ل ٢ و هيك لان حرام الواحد يشتري روتين كامل ما يكمل عليه لان بالاساس مالو خلق او مانو معود حالو يقعد قدام المراية او حتى يخصص وقت لبشرتو

اول شي بديت بالصباحي وبعدين جبت المسائي بعدين جبت سيروم اخر شي وصلتلو اني جبت تونر طبعاً الغسول كان موجود قبل كل هاد

المفروض انو روتيني كمل باقي بس لما اشتغل بأول راتب رح جيب كريم خاطري فيه بس حقو كلية من ماركة كليرنس مو طبيعي شو حلو الكريم تبعن المسائي لونو ازرق غامق استخدمتو فترة من اختي مو طبيعي شو بورد الخدود و خفيف ع البشرة وما بليط بعد مدة بليط يعني بخلي البشرة دهنية بزيادة

بس حرفياً منتجاتن العناية بالبشرة غاااالية ف و اخيراً لقيت شي الواحد يتشجع يعمل الواحد شي بحياتو لحتى يجيب شي بخاطرو لان هالكم سنة ما كان بخاطري اي شي اي بيشتغل الواحد ليعيش بس غير لما يشتغل الواحد ليجيب الشغلات الي بحبا 🥹

وبس والله. نشوفكم ع خير

 

[Selene]

-

من التقييم :

العناية بالنفس أساسا خطوة كبيرة ، الواحد يتعاجز كل يوم يسوي ألف شي عشان بشرته و شعره و جسمه الخ ، هي المفروض العناية الجدية بالبشرة تبدأ من سن الـ 25 بس لا أنا قدرت و لا جيبي قدر بحثت عن الماركة اللي ذكرتيها و أسعارها عندنا نار مثلما قلتي ، حرفيا لو سعر 2 منها هو سعر تلفوني

والله حكيك صح. هن حكوا من ٣٠ لان جد قبل ال ٣٠ ما حسيت عندي خطوط تحت العين او يمكن ما كان هاممني ولما بديت اهتم انتبهت الهم مابعرف

بس اغلب كريمات الكولاجين مثلاً ماعنا كريم تحت ٣٥ سنة كلو من هالعمر وفوق. ف الكريمات القوية مناسبة لهل العمر وطالع. الصغار ما بيحتاجو ( برأيي ) كريمات احترافية و غالية. مجرد اهتمام بسيط و زيادة

وعنجد كتير كتير بتعاجز ، وهالنقطة الاغلب بيتخطاها مفكر انو لو اشترو المنتج اد ما كان حقو انو خلص. لا والله اول خطوة قبل ما نجيب سعر المنتج الي بكون حقو كلية حرفياً نتعود نعطي وقتنا لبشرتنا

بس انو انا صرت عم استمتع بصراحة مو بالاجبار انو كيف خدودي بوردو بعد الكريم مثلاً كتير بنبسط هههههههه

او لما اطلع من الشاور بشرتي بتكون عم تلمع ( بدون ولا نقطة زيت ) هي بشرة القزاز بسموها ( مع ان بشرتي مو قزاز بمعنى الحرفي فيا عيوب بس بعد الشاور بتلمع كأني حاطة شي 🥹 )

هلأ عنا في منتجات رخيصة بمعنى الكلمة بس كيف احكيلك عنجد متل قلتها عن تجربة يعني. ف حتى لو عندكم ماركات للعناية رخيصة والله بحسها ع الفاضي ايجابيتها الوحيدة بحس انها افضل خيار لنتدرب عليهم قبل ما نشتري الغالي اما عن فوائدهم بحسن متل الميي و مفعول قريب للمعدوم ( هي تجربتي بصراحة )

+

مناسبة للمبتدئين بحيث بشرتن بتكون مو متعودة ع مكونات قوية نفس الريتينول او احماض نفس ال AHA او BHA ساليسيليك اسيد فببلشوا يعودوا بشرتن ع هالمكونات بنسب قليلة

انا بشرتي هيك لسا مو متعودة، هاد الاسبوع شتريت تونر فيه ساليسيليك اسيد لانو رهيييب للبشرة الدهنية ( لما حطيتو اول مرة بشرتي حرقت بس ما هالحرق يعني و تشات جيبيتي طمني انو هاد طبيعي اذا كان اول استخدام و حرق كان معتدل مو تهيج وما اقدر استحمل الحرق ) بعد تاني و تالت استخدام ماعدت حس بأي حرق

تخيلي انو هاد منتج حقو يورو و ٨٥ سنت تخيلي لو مبلشة بتونر احترافي وفيه نسبة عالية من هالحمض
ف عن تجربة المنتجات الرخيصة منيحة لنعود بشرتنا ع بعض المكونات مو فجأة نفاجئها بإهتمام ( كأنها عم تحكي من اين لك هذا تعا انا فاجئك كمان )

ايي هاد الكريم الازرق من هالماركة حقو ٥٠ يورو. في كريم نازل جديد لونو خوخي رهيييب للبشرة الدهنية في من هالاصدار كريم صباحي وليلي ( بعشق لما ينزل من نفس الاصدار كريم صباحي وليلي من نفس المكونات )


تخيلي الواحد حقو عنا 70 يورو هاد لو بستخدمو بشهر بيخلص تخيلي لو كل شهر بدي بس 140 يورو بس لكريم ترطيب. ما دخلت لا بتونر ولا كريم عيون ولا سيرومات

فيو نياسينامايد و هالمكون كتير مفيد للبشرة الدهنية

مشان هيك انا اجاني شغف اني اشتغل هلأ صرت ماشية صح

 

[Selene]

من التقييم

اريد اشوف الصور وصلني شعور التلوين + اتحمس ادون لما اقرا لك احس شعور جميل يكون في قارئ يحب وش انتج ويستلهم ويعجب بوش اكتب ورغم انك وصفتيها بكونه شي مخيف في احد تدويناتك وذكرتي أنو مش مريح يكون في شخص يراقبك ويقرا ويعيد بدون علمك انه موجود اصلا لهيك حطيت تقييم حتى تحسي بوجودي 🫣

هلأ صح مانو مريح ، في شغلات كتيرة ما بتنحكى، اذا بقارن بين نفسي هلأ و قبل كم سنة بالمدونة هون ( مو بالسوشل ميديا ) والله ذاكرة كتير شغلات المفروض ما تندكر ( بالنسبة الي ) او كنت افضل انها تكون خاصة فيني

بس مو كلها، مشان هيك بحب الخصوصية المتوازنة، انو الواحد ما يكون غامض لدرجة القرف او تكون حياتو الخاصة متاحة للكل . بالنسبة للسوشل ميديا موضوع تاني. هنيك بحب كون غامضة لدرجة القرف ( بالنسبة للناس الي قريبين مني يستثنوا من هالقرف )

هون الموضوع شوي مختلف لان صاير المنتدى نفس مجتمع و كلنا او اغلبنا منعرف التاني ان ما كان من شهور ف من سنين . ف بشوف بالنسبة الي بخلي الخصوصية نص نص مو نفس السوشل ميديا اعمل بروفايلي عام مثلاً انشر شغلات من روتيني اليومي للعلن او حتى صوري/فديوات

هنيك غير هون . بالاضافة الي كنت انشرو بالسوشل ميديا ما كنت انشرو هون . يعني الي بيعرفني ع السوشل ميديا غير انا هون تماماً ف كمان هاد فرق كبير

يمكن ما وضحت نقطة الخصوصية بين هون بالتون وبين السوشل ميديا

+ بالنسبة للتلوين والله من عيوني رح صور وكلما روح عند اخي بنسى و بورجيكي تلويني الجديد كمان 🥹

 

[Selene]

كنت لفترة جالسة بصمت بمكاني اتأمل

ان مجتمعي كثير مؤذي بشكل شرس

ماعتقد ان فيه في العالم بهالقدر او يمكن

لاني اصلا ماشفت العالم زين،



على قدر الألم تتشكل المعاناة وجالسين يتوارثون

الصدمات من زمااان لين وصلت لي انا وغيري

لا احد طوال تلك السنوات تجرأ على مواجهة

الظلام والألم الذي بداخله .



صدق ان المؤذي ضعيف وللاسف كل هالأذى

نابع عن ضعف كبير وللاسف ان اجيال تناقلته

مرة بعد مرة ومحد كسر السلسلة للان

الاقوياء مايأذون مؤسف ان مجتمعات كاملة

قائمة على الضعف الداخلي ومنها مجتمعي



مخيف لمن يكون الأذى نمط حياة ويينشاف طبيعي؟

واوو التكيف البشري مرعب !!! تخيل انك تتكيف

مع معاناتك وتراها طبيعية ؟ وحين ترا الحياة

الطبيعية لاتدرك ان هذا هو السليم !

تعلق في ظلامك لدرجة انك لاترا النور +/؛



وبعدين عشان تتعمق الورطة اكبر تربط بأمور

زي الدين او الفضيلة اخ كمية الضياع محزنة



الجيد في القصة أنك ماتوضع في مكان الا وانت

بقدر تحدياته وان كنت محظوظا ورأيت النور

وقررت ان تخرج تعلق بدائرة حنين الذكريات

لكن ايايكن ربما القصة كانت كهذا من البداية

واشخاصك المفضلين او المحبين

ليسوا هكذا اصلا



ربما كنتم مجرد رفقاء يجمعكم الظلام

ليس ألا ظهر مرة نور خافت

احدكم لم يلتقطه فبقي في الجحيم

وانت التقطته فقررت النجاة ...

فأنفصلتم



الحقيقة موجعة لذا لا نحبها

​

 

[Selene]

-



مرة من المرات كنت احكي مثلا عن شي انا كنت حبو كتيييير متل منتج بيتاكل بينباع بالسوبرماركت نقول ايسكريم او بسكوت
مين الاهبل الي مابحب هالمنتج ؟

على قد مانو لذيذ او نكهة معينة بشوف دايما موجودة ما بتكون sold out عكس باقي النكهات مثلاَ

اتضح انو هي نعمة لما حب منتج محدا بحبو غيري او قلة قليلة الي بتحبو

يعني تخيلوا لما تشتهوه و تروحوا لتشتروه و يكون خالص ؟

شوفوا , انا بحس انو في بعض الناس بتشوف هالشي كتير تافه بس حابة احكيلكن مرات بشتهي شي معين
و بدي يااااه , قولوا اقرب للوحام يعني الموضوع كتير بضايق لما فعلاَ يكون بخاطركم نكهة معينة او منتج معين
بسكوت شبس , طبق بمنيو بمطعم و ما يكون موجود لأن الطلب عليه عالي

متل من كم يوم كنت بالسوبرماركت و رحت لجيب بوظتي الي بنكهة الكراميل الي متعودة دايما جيبها لانها المفضلة عندي
و دايما بكون في 5 منها و اكتر بالتلاجة و عمرها ما شفتها خالصة

و اذ بنتبه انو الماركة الي بجيب منها نكهة الكاراميل منزلة نكهة جديدة او هي قديمة بس ما انتبهت عليها
بنكهة الكوكيز و كان في منها حرفيا اكتر من 5 حبات

ف رحت جبت نكهتي ما حبيت خاطر بنكهة جديدة

و اذ برجع بالضبط تاني يوم لجربا هي نكهة الكوكيز و اذ هي خالصة !

حرفياَ مافي ولا حبة منها !!

لك كان في منها اكتر من 5 وين راحوا !! معقول مبارح كنت حولة و مو شايفة مزبوط

اجا ببالي هالحكي الي عم اكتبو بالمدونة

انو الحمد الله لما نحب شي قلة قليلة الي بتحبو

نكهتي المفضلة الي صرلي سنتين بشتري منها عمري ما اشتهيتا و رحت جيبا و كانت خالصة !

مع انها جداَ لذيذة

ف اي, لا كل الناس ذوق و هيك و الحمد الله في اختلاف بالاذواق

و نفس الحكي لما ينطبق ع مغني ما مشهور كتير

-

storytelling الو علاقة بالموضوع

في مرة واحد حكالي ( هو الي عرفني ع مغني ما مشهور بس اغانيه نااار )

حكا حكي ما بنساه لان بينطبق ع كتير شغلات متل مثال البوظة

انو حكيتلو حراام ما يكون مشهور على الاغاني الي بنزلها و البيت beat رهييب و متعوب عليه

حكالي والله منيح انو ما مشهور , كل مغني اول ما يبدا بمسيرتو الفنية بكون مبدع لأن مابكون
منغر بالفلوس و الشهرة او ممكن لأن ما مشهور ف بحاول يتعب بأغانيه , بعد ما ينشهر بصير يخبص و ينزل اي شي مشان الفلوس و الشهرة

ف قالها بالمشرمحي انا بتمنى انو ما ينشهر لان بحب اغانيه !

و انو ينشهر يعني انو اكبر قدر من الناس تحب اغانيه

تحب اغانيه يعني نفس مثال فقدان نكهة البوظة المفضلة عندك

و خدوها على كتير امثلة, لما يكتر الناس حوالين الشغلة بتخرب

btw

هاد المغني الي كنت احكي عنو اسمو ايلي سوستري eli sostre

و هالغنية بتشوفوا البيت تبعا عادي بس جربوا شغلوها على ميوزك سستم و شوفوا الفرق

كنت دايما لما شغل اغانيه بالسيارة كانت السيارة كلها تهز من البيت رهييييب

او هي الغنية

للأمانة ستايلو بالاغاني مو ستايلي , انا ميتل و قد ما بمل و بحاول اني غير لوني انا قالبي ميتل

بس اختيارو للبيتس رهيييب !!! وكيف بنسق الكلام مع البيت !!

اخر اغنية كتير حبيت الكلمات بعض المقتطفات الي عجبتني :

I'm the same as I was
I swear that nobody changed me

-

Damn right a nigga changed
I ain't here to stay the same
Put the diamonds in the chains
I ain't here to play the games

-

Don't get caught in the moment
You might lose yourself
I never told you to trust me
You might lose yourself

-

I know that it hurt
I know that it hurt when I hurt you
I f**k with you bae
I just know I don't deserve you



الي احزني هو عدد المشاهدات بس متل ما حكيتلكن احسلو ما ينشهر لأنو هيك مبدع و رح يخربها متل اي مغني تاني انشهر

( طبعا!َ في منهم انشهروا و ما انغروا بالشهرة وضل مستواهم متل ماهو ما صار اسوأ و في منهم صار احسن من ما قبل الشهرة )
بس الاكترية للأسف او الي عرفتن و حبيتن زمان بالاخص الي صاروا اسوأ و الكلمات بالحضيض

ان كانوا عرب او اجانب

 

[Selene]

-



اكتر شي بكرهو بالحياة او نقول من الشغلات الي بكرها كتير بالحياة

هو الحب المشروط !

و ما عم بحكي من طرف الاهل

انو خلينا نتخيل مع بعض :

انا و سيلين ( شخصية خيالية ) رفقات كتير
سيلين بتعرف حدا كتيير قريب عليها نقول اسمها جيني
و جيني بتحب سيلين كتييير و تكن لها معزة خاصة

ف لما اجت سيلين تعرفني على جيني , جيني حبتني على محبة سيلين !
مع انو جيني بتعطيني اشارات دائما انها ما بتطيقني و ما بتحبني بس كأنها
مضطرة تحبني لان سيلين بتحبني !!

انا ما بعرف انتوا كيف بتحسوا بهيك موقف اذا شايفينو طبيعي او لا

بس من ناحيتي انا مو شايفتو طبيعي و هاد نفاق , و مو حلوة بحقي كون نفسي عزيزة علي

انو حدا ينافق بمحبتو الي و انا عارفة انو هو ما بحبني ( والي بضحك انو هو بيعرف كمان انو هو مابحبني )

انو ليه الناس بتستخسر انها تكون واضحة ؟ يعني لأن مثلاَ جيني بتحترم سيلين ف بتعمل هيك ؟

طيب ما فينها تحترمني عادي مو ضروري الاوفرة مثلاَ تنافق قدام سيلين بمحبتها الي و تبالغ قدام الناس انو اديه نحن صرنا اعز اصدقاء بسبب صديق مشترك و هو سيلين و لما نكون انا و جيني لحالنا

تورجيني اسلوب بقرف بما انو مافي حدا شايف او سامع؟

و بهيك اسلوب بحس اني نكرة

صفر ع الشمال

ما عندي شخصية

ولا كيان

ماعم بالغ , يمكن لاني شخص ستريت , انا لما اكره حدا او ما استلطفو ببين و عمري ما مثلت بحبي لأي حدا
اساساَ حتى لو بدي , تصرفاتي و لغة جسدي ووجهي فاضحيني !

ف يمكن مشان هيك شايفة الموضوع مقرف و مذل ؟

ولا هو الموضوع ما طبيعي و انا عادي مافيني شي

او انا فيني شي و مبالغة الامور ؟

و كمان هالشي من الاشياء القلة قليلة الي بفتخر فيها بنفسي و الي ما زالت متل ما هي بالرغم من تجاربي بالحياة يعني ما تغير اسلوبي من هالناحية
مقارنة بباقي النقاط بشخصيتي الي تغيرت عبر هالكم سنة

مرات بتصدف انو اختي تعرفني ع حدا من طرفها , اي بحبو ع محبة اختي ( احتراماَ لاختي ) على سبيل المثال , بس ما بأوفر بحبي , ما بأوفر بالمجاملات و الحكي قدام الناس و لما كون انا و هالشخص لحالنا بورجيه وجهي التاني

يعني بالله عليكم هيك شي طبيعي ؟

 

[Selene]

-



اليوم شفت بوست عالفيس , بقروب سياحة و سفر

عم يسأل بما انو هو بالمانيا :

انو كيف نحن عم نسافر مو بس مرة بالسنة لا مرتين و على مدن غالية و ذكر حتى في منن وصلوا امريكا

انو كيف عم توفي معن غلاء المعيشة هون و كيف عم يصمدوا مصاري و هون الراتب حرفياَ ما بكفي شي و صعب كتير التصميد فيه !

وذكر : خاصةَ للي عندو عيلة و اطفال هيك ما عادت توفي حتى 4000 يورو بس لسفرة وحدة

-

كان سؤال كتير حلو , جاوبت ببساطة , السفر يعتبر هواية , و قبل الهواية هو مهارة نفسها نفس كرة القدم

كيف مثلاَ انا لما اتعلم السكيت ؟ ببلش يادوب اقدر امشي لقدام و كتير بوقع و بعدين بتعلم , و بتعلم حركات و الخ
بصير محترفة؟ بمعنى اخر صار عندي مهارة

السفر نفس الشي , السفر مو بس هواية لا هو اقرب للمهارة

كيف ؟

يعني الي بسافر كتير صار عندو خبرة , متى يحجز ؟ و هون قصدي المدة , يعني قبل شهر , شهرين , 6 اشهر و هيك

و اي شهر يحجز ؟ شهر 8 مثلاَ عنا كارثة الاسعار بتكون نار لأنو المدارس معطلة و موسم سفر يعني غير مثلاَ بشهر 2

او لما يحجز على راس السنة , بتعرفوا كيف الاسعار بتكون فووووق

هاد بيلعب دور , و اهم نقطة متى يحجز , كتييير بيختلف السعر لما نحجز قبل بمدة عن انو نحجز قبل بشهر مثلاَ

-

الطيران / في طيرانات زبالة بمعنى الكلمة لأنها اقتصادية و رخيصة و العكس صحيح

بدك طيران مباشر ولا ترانزيت ؟

انا مثلاُ مستعدة ادفع 100 زيادة ولا روح ترانزيت

في تركات بس كتير متقدمة هي و فيها خطورة , متل الحجز بآخر ثانية , عادي يكون التكت ب 50 يورو بدل 300 يورو
لانها بآخر ثانية مثلاَ ( بتنفع كشخص لحالو مو عيلة طبعاَ ) بس حبيت اذكرها لأنها موجودة

-

الدولة الي بدو يسافر عليها , في ناس بيعملوا سياحة جوا المانيا بروحوا لغير مقاطعة مثلاَ
في منن بروحوا ع دولة حدودية جمب مكان سكنن بالسيارة ( متل انا رحت براغ لأن بيني و بينها 3 ساعات بالسيارة ! )
في منن بروحوا على دولة بالاتحاد الاوروبي بس بعيدة و محتاجة طيران و مدتو فوق ال 4 ساعات
في منن بروحوا برا الاتحاد الاوروبي ( هون بكون غالي الطيران عكس الي داخل الاتحاد )

و هون الترتيب من الارخص للأغلى

-

المدينة الي مختارها من الدولة الي رح تزورها بتلعب دور بالغلاء
في مدن اغلى من مدن و في مدن رخيصة

-

رايح بموسم فيستيفل , يوم وطني , يوم مميز فيه احتفال بالدولة , رح يكون كل شي اغلى

مثل لما اي حدا يزور المانيا بوقت الاكتوبر فيست بما انو مو بس محلي لا عالمي ف كل الاسعار دبل

-

مكان السكن , هل هو بنص المدينة او على اطرافها ؟ و هل هو فندق نجمة تنين عشرة او شقة ؟
او حتى هوستيل ؟

-

مخططك بالسفرة انك تاكل من المطاعم السياحية الي عندها اطلالة حلوة و مميزة ( و غالية بتكون )
ولا رح تاكل من المطاعم الشعبية ؟

( هون انا عم ركز ع السعر مو على الطعم, بالنسبة الي الشعبي اطيب من السياحي بمراحل )
في بركة

-

حاتط ببالك تعمل فعاليات كتير و اغلبها مدفوعة؟ ولا رح تقضيها تمشاية ؟
-

موضوع تحديد السعر الكلي متشعب
ممكن ببلد معين شخص بيصرف 500 يورو باسبوع وشخص تاني بيصرف 4000 يورو بالاسبوع لنفس المدينة


و هواية السفر بيجي معو لا اراديا مهارة التقنين بالمصروف خلال السنة , كيف شخص بحب السفر كتير , رح يستمتع
بالتقنين بحياتو اليومية لأن بيعرف رح يصرفهن على هواية بحبها

غير لما حدا لسا داخل ع الخط جديد رح يشوف الموضوع كتير صعب

نصحتو انو يبدا يكسب تجربة عملية مو بس نظرية من تجارب الناس, بتضل التجربة الشخصية اكبر معلم

طبعاَ هو صعب كتير بالنسبة لشخص عندو عيلة و هو الممول الوحيد للرحلة

ف بنصح لو الولاد بعمر الشغل , يشتغلوا شغل منسميه بألمانيا ميني جوب ( شغل وقتو قصير, خفيف و لطيف )
مناخد منو مصاري بسرعة

ع الاقل يغطوا مصاريف الطيران , بس لو الاولاد تحت سن الشغل ف ماعندك حل

اذا الزوجة متفقة معك بالنسبة للسفر , و مافي زوجة مابتحب تسافر يعني
بس نقول انو في نسبة كمان ما بتحب السفر

ف لازم تساعدك بالنسبة لمصروف السفرة , اذا ما بتقدر تشتغل ف تساعدك بالتقنين
و نحن النساء مافي اشطر مننا بالإدارة المالية للبيت !

هاد كان جوابي و انتوا شو رأيكم ؟